اضحك مع المتزوجون ( حوارات زوجية )

الموضوع في 'إستراحة المنتدى' بواسطة showbiz, بتاريخ ‏25 سبتمبر 2007.

  1. showbiz

    showbiz عضو نشط

    التسجيل:
    ‏26 سبتمبر 2005
    المشاركات:
    401
    عدد الإعجابات:
    0
    مكان الإقامة:
    دولــة الكـــــــويت

    1- زوجين متدينين
    الزوج : إني أحبك في الله

    الزوجة : وانا بعد أحبك في الله استغفرالله من كل ذنب عظيم

    الزوج : بكل صلاة ما أنساج من دعائي

    الزوجة : بارك الله فيك وجزاك الله خير

    الزوج : شكثر تحبيني ؟

    الزوجة : عدد ما غرد طير وطار وتعاقب الليل والنهار ودعا داع في الأسحار

    الزوج : الله يا سلام على هالكلام ذكرتيني بليالي رمضان

    الزوجة : متى نروح العمرة ؟

    الزوج : قبل أسبوع كنّا في العمرة !!

    الزوجة : عيل نغير نروح المدينة

    الزوج : على بركة الله

    قبل لا يقومون من القهوة

    الزوجة : أبا عبيدة

    الزوج : نعم يا أم عبيدة

    الزوجة : دعاء كفارة المجلس ( كله حب شكت أم عبيدة )

    الزوج : سبحانك الله وبحمدك أشهد أن لا إله إلا أنت استغفرك وأتوب إليك



    (2)زوجين صايعين

    الزوج : تصدقين ما حبيت وحده كثرج

    الزوجة : وانا بعد حبيت بس مثلك أبد ما حبيت

    الزوج : انتي خليتي حياتي كووول

    الزوجة : وااي انت ستايل وتهبل تشبه توم كروز

    الزوج : تذكرين أول مرة شفتج فيها وين ؟

    الزوجة : اي كنت أقز مع سبجوه بالمارينا

    الزوج : الله كان أسعد يوم بحياتي

    الزوجة : شكثر تحبني ؟

    الزوج : كثر جمهور نادي القادسية

    الزوجة : ترى ذبحتني بنادي القادسية يلوعون الجبد

    الزوج : يا عمري انا أشجع نادي القادسية عشان لونهم يذكرني بضروسج

    الزوجة : عيل تدري ليش أنا أشجع نادي العربي ؟

    الزوج : ليش ؟

    الزوجة : عشان ريحة البصل تذكرني فيك

    الزوج : الله عسل عسل دمج شربات

    الزوجة : قوم قوم قبل لا أقط الرقم على اللي كاشخ وراك



    (3)زوجين أغبياء ودمهم ثقيل

    الزوج : يا حيالله أبو الوجه الصبوحي .. أبو الوجه الصوبوحيي ييي يييي

    الزوجه : لا تذكرني بلندن بروحي ودي أسافر لها

    الزوج : شكو لندن ؟

    الزوجة : هذي مو أغنية عبدالكريم اللي صورها بالـ هايد بارك

    الزوج : والله ما أدري بس يسويها عبدالكريم عبدالقادر

    الزوجة : ودي أروح لندن وأنت معاي

    الزوج : لا والله

    الزوجة : شفيك علي اليوم

    الزوج : يعني مع منو بالله .. العادة تروحين مع السايق مثلا ؟

    الزوجة : لا مو قصدي السايق .. بعدين احنا ما عندنا سايق شلون أروح معاه ؟

    الزوج : اللهم طولك يا روح

    الزوجة : خلاص خلاص غير الموضوع

    الزوج : حبي لج ماله حدود

    الزوجة : الله وناسه يعني بدون جوازات وجذي

    الزوج : اي ذكرتيني .. أمس رحت دوار الجوازات بجدد جوازي ما لقيت أحد

    الزوجة : يا حظي مو بدوار الجوازات

    الزوج : مو انتي ذيج المرة قلتي سويتي حادث وودّوج دوار العظام ؟

    الزوجة : بصراحة مو متأكدة

    الزوج : تدرين إن لازم يسوون دوار بإسمنا انا وياج

    الزوجة : الله دوّار حبنا


    (4)زوجين ضغاط


    الزوج : تصدقين بيوم عرسنا كنت خايف حدّي !

    الزوجة : انا كنت خايفه عليك بعد

    الزوج : كنت خايف أبوج يفشّلنا وينجب من البوفيه حق بيتكم

    الزوجة : نعم نعم ؟

    الزوج : أتغشمر معاج شفيج !

    الزوجة : عيل ما شفت أمك واهيا تتعلج خفت عليها يطيح حنجها

    الزوج : عاد ما أرضى على أمي

    الزوجة : حتى انا ما أرضى أبوي

    الزوج : أخوج الكبير بأي محل برْدات مفصّل دشداشته ؟

    الزوجة : يمكن بنفس المحل اللي فصلت فيه أختك مو متأكده

    الزوج : تذكرين خالتج لابسه كعب ثلاث طوابق

    الزوجة : اي تذكرت لما كانت واقفة يم خالتك اللي حاطه حمره تقول شاربه شاني

    الزوج : تصدقين أحلى ما فيج بالعرس النفره اللي طالعه بيبهتج

    الزوجه : وااي انت تهبل بالشعر اللي طالع من أذونك

    الزوج : شرايج نمشي ونكمل سوالف بالطريج ؟

    الزوجة : على راحتك حبيبي



    (5 )زوجين أغنياء

    الزوج : أقول حبيبتي شرايج بغدانا أمس في فينيسيا ؟

    الزوجة : بصراحة القعدة حلوة بس أكلهم مو زود

    الزوج : انا بصراحة عجبني أحسن من مطعمنا في روما

    الزوجة : انزين انا رايحة باريس تمورو بتسوّق تبي شي من هناك ؟

    الزوج : متى بترجعين ؟

    الزوجة : ما أدري على حسب يمكن توو دييز وأرجع

    الزوج : خذيتي مليونج من أبوج ؟

    الزوجة : وييه الله يعافيك روح أخذه ما يمديني

    الزوج : عيل بأي حساب بتتسوقين ؟

    الزوجة : ما عليه بصرف من حساب خلودي ولدي فيه 300 ألف

    الزوج : عاد رديهم له مو تنسين حرام فلوسه يبي يستانس فيهم الولد

    الزوجة : انت وين بتروح في هالويكند ماي سويت هارد ؟

    الزوج : ودي أروح معاج بس مواعد الوليد بن طلال عازمني على العشا باجر

    الزوجة : اوكي انا بسافر بالطياره الرمادية عبّيتها بانزين ؟

    الزوج : اي فيها بانزين أكيد وانا بروح باليخت مالي ودي أحدق بطريج الرده

    الزوجة : قود نايت حبيبي وسويت دريمز

    الزوج : قود نايت ماي سويت هارد



    (6)زوجين صواريخ


    الزوجة : ما قلت لك يوم طاحت فينا الطيارة ذيج السنة ؟

    الزوج : مرة ثانية ؟

    الزوجة : اييي مرة ثانية يوم أمي تعلقت بجناح الطيارة وطارت عبايتها

    الزوج : اوف اوف اوف صج والله !!

    الزوجة : أمي مسكينة ايدها تعبت وهدت جناح الطيارة

    الزوج : وبعديييين ؟

    الزوجة : الحمدلله ما صار فيها شي أبوي لحق عليها بالبرشوت

    الزوج : الحمدلله والا بغت تروح فيها مسكينة

    الزوجة : انا من الخرعة طبيت بدون برشوت وبدون ولا شي

    الزوج : وبعدييييييين ؟

    الزوجة : لقيت أبوي بالسما مع أمي قلت لهم لحقوني

    الزوج : سبحان الله شوف الصدفة

    الزوجة : اي انا عقبها حرمت اركب طيارات

    الزوج : انا مرة بغيت أموت يوم كنت أسوق سيكل وطحت فيه من الجسر

    الزوجة : اسم الله عليك وبعديييين ؟

    الزوج : الحمدلله اني طحت على ساعتي ما تعورت

    الزوجة : وليش طحت من السيكل ؟

    الزوج : انا كنت دايس تقريبا 200 فيوم صعدت الجسر لف السيكل فيني

    الزوجة : وبعديييييييين ؟

    الزوج : جان أتصل على الاسعاف يمكن بالطيحة أتعور لا سمح الله

    الزوجة : هذا وانت طايح من السيكل وتتصل ؟

    الزوج : اي وما وعيت والا أدعم الصبّة مالت الجسر وأطيح من فوق

    الزوجة : وبعدييييين ؟

    الزوج : جان أحط التلفون بمخباتي ولبست ساعتي

    الزوجة : جنّه صك علي .. اي كمّل

    الزوج : جان طربااااخ وإلا أطيح على ساعتي وتكسرت والا الاسعاف وصلوا

    الزوجة : الحمدلله على السلامه


    (7)زوجين صغار


    الزوج : تصدقين خلصت المرحلة الأخيرة بهاللعبة ؟

    الزوجة : بيييه انا من زمان خلصتها .. ألحين عندي لعبة يديدة

    الزوج : أقول دقي على هارديز اطلبي لي هابي ميل

    الزوجة : اي حتى انا مشتهية هابي ميل يوزعون معاها لعبة شريك

    الزوج : وإذا دق علي حمني البطّه قولي له مو موجود

    الزوجة : انزين قوم خل نكمل بلاي ستيشن

    الزوج : لحظة متابع حلقة سلاحف النينجا ألحين بتطلع على سبيس تون

    الزوجة : شايفتها هالحلقة مو حلوة

    الزوج : عاد لاتخربين علي يوم طلع باباي البوكيمون ما خربت عليج

    الزوجة : خلاص خلاص لا تزعل بعدين تروح تنادي أمك

    الزوج : ترى والله أحاربج من صجي

    الزوجة : عطني كبوسي مالي انا شريته

    الزوج : يعني نحاسه .. انا أوريج بس يخلص الباباي



    ( 8)زوجين شيّاب

    الزوج : انا بعرف الدكتور مالي ما يفتهم مدمّغ ؟

    الزوجة : هوْهوْهوْ شفيك يا بوصالح أمس تمدحه واليوم تذمّه ؟

    الزوج : يا ام صالح الدختر أثولْ ما يفتهم شعرّفه ؟

    الزوجة : ألحين صار كودني ما يفتهم ؟ صج منكر حسنه !!

    الزوج : ما يدري إن هاللي قاعدة جدامي اهيا علاج السكري والضغط وأمراض الدنيا

    الزوجة : يمّه منك عيّار ما تيوز عن سوالفك يا بوصالح

    الزوج : انتي لو في منّج وايد جان سوّوهم ابرّ حق المراضى

    الزوجة : ذكرتني بأيام أوّل يوم تقص علي في بيت أبوي العود وتغازلني

    الزوج : آآآآه يا زينها من أيام

    الزوجة : انا كنت أطلطل من الدريشه وإلا أشوف هالحافي العصل المهتمل اللي دخل قلبي من أوّل نظررره

    الزوج : ايييي هذا انا عدل عدل .. في السكة مع عيال بن نخّي نعلب تيلْ

    الزوجة : شكنت تسوي ما عاد أذكر شي !

    الزوج : يوم أدز اختي الصغيرة تقولج غطاوي وانتي طاقتج البوهه

    الزوجة : يا علّك شقوووول ذكرتني " إذا تلّيت حزامه تهلهلت عظامه " !!

    الزوج : وانتي تقولين الجندل شكووووووووو

    الزوجة : شعرفني بالغطاوي هوْ غصب ما عرف ما افتهم

    الزوج : هذا اللي علقني فيج أكثر

    الزوجة : قوم قوم روح يعطونك ابرة السكر الظاهر ارتفع

    الزوج : هذا يزاي أتغشمر معاج وألاغيج

    الزوجة : يمه منك جمبازي




    (9)زوجين نكته


    الزوج : يقولج في مدرس سأل الطلبة اللي غبي يوقف .. جان يوقف واحد سأله المدرس ليش وقفت ؟ قال ما حبيت أشوفك واقف بروحك يا استاذ :>

    الزوجة : يعني دمك خفيف ؟ اسمع : في مرة واحد دخل السلك الدبلوماسي تكهرب هاهاهاها

    الزوج : يخرب بيت الملاغه سمعي : جلب شوارع مر على مركز شرطة شاف جلب بوليسي قال : آآخ لو مكمل دراستي هههههه

    الزوجة : ترى صج صج دمك ثقيل اسمع : في واحد قاعد يطق الديايه مالتهم ليش ؟

    الزوج : ليش ؟

    الزوجة : يقولها كل يوم بيض كل يوم بيض ما في جبن .. هي هي هي

    الزوج : ملاقه جذي ما شفت سمعي : في ياهل عمره ثلاث سنوات قال حق أمه الحامل شنو في بطنج ؟ قالت له : هذا أخوك الصغير ...

    الزوجة : هاهاهاهاهاها

    الزوج : لحظة ما خلصت يا الغبية !!

    الزوجة : اوكي

    الزوج : قال لها : تحبينه ؟ قالت له : اي أحبه .. قال لها : عيل ليش بلعتيه ؟

    الزوجة : خلصت ؟

    الزوج : يالله الحين الناس يضحكون
     
  2. أبو بكر

    أبو بكر عضو نشط

    التسجيل:
    ‏9 مارس 2007
    المشاركات:
    185
    عدد الإعجابات:
    0
  3. UNIX

    UNIX موقوف

    التسجيل:
    ‏9 ابريل 2007
    المشاركات:
    7,556
    عدد الإعجابات:
    1
    أحلى وحدة رقم 9!!! الله يرزقنا مثلها ان شاء الله
     
  4. الخليجي 1

    الخليجي 1 عضو نشط

    التسجيل:
    ‏11 ديسمبر 2006
    المشاركات:
    782
    عدد الإعجابات:
    0
    حلو

    موضوع حلو
     
  5. سيده اعمال 2008

    سيده اعمال 2008 عضو جديد

    التسجيل:
    ‏2 يونيو 2007
    المشاركات:
    2,794
    عدد الإعجابات:
    0
    مكان الإقامة:
    امريكا
    ماشاء الله موضوع حلو

    تسلم اخوي على النقل
     
  6. محمد2000

    محمد2000 موقوف

    التسجيل:
    ‏6 فبراير 2005
    المشاركات:
    1,004
    عدد الإعجابات:
    0
    مكان الإقامة:
    الــQ8ــكــويــت
    الزوج : تذكرين أول مرة شفتج فيها وين ؟

    الزوجة : اي كنت أقز مع سبجوه بالمارينا

    هههههههههههههههههههههه
    عاد صج يقولون في وحدة تقز وايد بشارع الحب اسمها سبيجة
    اللة يستر علي عيالنا
    هذي سبيجة واشكالها ما وراها اهل يسألون عنها وعن اخلاقها
    لاحولة ولا قوة الا باللة
     
  7. محمد2000

    محمد2000 موقوف

    التسجيل:
    ‏6 فبراير 2005
    المشاركات:
    1,004
    عدد الإعجابات:
    0
    مكان الإقامة:
    الــQ8ــكــويــت

    ديروا بالكم من سبيجة واشكالها
    هالاشكال اهم خراب بيوت المجتمع الكويتي
    لا اهل ولا والي ولا تربية مثل المسلمين .
    الحمد للة والشكر لرب العالمين
     
  8. Bent_alq8

    Bent_alq8 عضو جديد

    التسجيل:
    ‏28 سبتمبر 2007
    المشاركات:
    3,735
    عدد الإعجابات:
    0
    مكان الإقامة:
    حبيبتي الكويت
    أحلى زوجين رقم 6 خصوصا لما طاح من الجسر وأنقذته الساعه:eek: اوله قويه صك على دوانية الجذابين:rolleyes:
     
  9. zoya_y

    zoya_y عضو جديد

    التسجيل:
    ‏26 ديسمبر 2007
    المشاركات:
    9,261
    عدد الإعجابات:
    4
    مكان الإقامة:
    DREAM WORLD
    ياحلووووووووووووووووووووووووووووووووووووووووووهم يشـــوقون والله عاشو الصغار :p
     
  10. الفايدة للجميع

    الفايدة للجميع عضو نشط

    التسجيل:
    ‏22 أكتوبر 2005
    المشاركات:
    1,168
    عدد الإعجابات:
    2
    لوووووووووووووووول حوارات زوجيه فله
     
  11. yoyo1983

    yoyo1983 عضو نشط

    التسجيل:
    ‏22 ابريل 2007
    المشاركات:
    22,658
    عدد الإعجابات:
    22
    مكان الإقامة:
    DaMBy
    :) :) :)

    حلوووو