ذهبت اليوم للأشتراك بهذة الخدعة ( الخدمة ) التي تطلق عليها الـ MTC خدمة الـ E-Go

[Chess]

السلام عليكم ............

ذهبت اليوم للأشتراك بهذة الخدعة ( الخدمة ) التي تطلق عليها الـ MTC خدمة الـ E-Go ... وبعد توقيع العقد الذي ينص على الزامي بدفع 20 دينار نظير هذة الخدعة التي يقال بأنها تصل الى قرابة 3.6 ميجا كسرعة رهيبة تغطي على أي سرعة معلومة في الكويت . فوجئت بأنها من أبطء اللأشتراكات و اليكم الأسباب :-


1) هذة الشبكة تعمل على تغطية الشركة لخدمة الـ 3G ففي حين ضعف هذة الشبكة أو الضغط عليها تتحول الى خدمة قديمة أسمها الـ EDGE

2) القطعة تحتاج الى مخرجين لل USB لكي تعمل وهي مصنوعة في الصين !
MADE IN CHINA وهنا يكمن سر رخص القطعة عند الشراء فهي تكلف 60 دينارا فقط .

3) كل ما سبق ذكرة والله مو هامني الي باط جبدي الحوار الي دار بيني وبين موظف 107 !

Chess: الو مساء الخير أخوي
107 : مساء الورد معاك فلان الفلاني وقال رقم مادري والله جم
Chess: عفوا أخوي أنا أشتركت وياكم في الخدمة اليديدة E-Go مادري ليش بس يعطيني Edge ما يشتغل 3G !
107 : عفوا أخوي أنتا في أي منطقة ؟
Chess: صباح السالم .
107 : غريبة أهناك فية تغطية حق الـ 3G
Chess: يعطيني 3G مو ما يعطيني بس حدها ضعيفة شخطة وحدة بس - وفي هذي الحالة ما يعطي أرسال ولا أستقبال !
107 : أيه أخوي خلها على الـ EDGE
Chess: الحين انا مشترك 3G اب 20 دينار عشان أشغلها EDGE !? جان أشتركت اب 9 دنانير أحسنلي !
107 : ايه خوي اليوم والله عندنا " لود "
Chess: " لود " ؟!
107 : اية خوي ظغط على الشبكة
Chess: انزين لي متى ظغط عالشبكة
107 : يعني خلة على ال AUTO يمكن يشبك معاك
Chess: على الـ AUTO - ايه خير ان شاء الله
107 : يعني جرب فوق الساعة 12
Chess: وكل يوم على هالحال بالله ؟ّ
107 : لا بس تدري ظغط الشبكة وجذية لو عند مشكلة ابتعريف القطعة أوشي كان ممكن انساعدك بس الشي مو بيدنا
Chess: ايه خوش عيل - مشكور
107 : تامر ابشي ثاني ؟
Chess: لا سلامتك - مشكور
107 : شاكرلك اتصالك .


و يكون ابعلمكم أخواني ان من بنود العقد انك ملزم تدفع هل 20 دينار لمدة سنة كاملة أو انك تلغي العقد عقب ما تدفع 55 دينار !!!

نصب في نصب !! و أترك لكم التعليق!!

 

[بو هادي.]

الله يعينك عليهم كلامهم حلو بلتلفون بس ماكو فعل
إذا يبون منك فلوس بحق أو بدون حق ياخذونها منك ونتا تضحك بس إذا إنتا تبي منهم إقبض من دبش.




أنا صارتلي وياهم وايد سوالف آخرتها إشتركت بخدمة إختر وسولف لخطين Ezzee فقالي الموظف راح نخصم 1 دينار من رصيد كل حساب فخصموا المبلغ نفس الوقت وأضافوا علي إسمي دينارين غير إلي قبل..

لما سألتهم قالي الموظف هاذي حق الezzee قلتله آنا دافعهم جان يقول ها خلاص إنجيك وندك عليك وإلى اليوم مافي خبر.

وعلى فكرة من 1 يناير 2007 تم إحتساب أول دقيقة بدون وحدات يعني تتكلم ثانية يحسبلك سعر دقيقة.

آنا مو هامتني للفلوس ولكن يبط جبدك جشعهم جنه أرباحهم شوية ما جنها أكثر من البنوك.

 

[Chess]

--------------------------( مدعم بالصور )-----------------------------​

 

[Master-Leo]

الدعايه وماتسوي يغرون الواحد يشترك وياهم

سواء اهم أو شركات بمجالات أخرى ومن تشترك.......

 

[Chess]

الدعايه وماتسوي يغرون الواحد يشترك وياهم

سواء اهم أو شركات بمجالات أخرى ومن تشترك.......

عل وعسى أن يقراء مشاركتي صحفي يشخط فيهم بالجريدة بمقال بس بو سطرين - تدري شيصير ؟
لا وذا يبي شاهد أنا حاظر !!

 

[Master-Leo]

عل وعسى أن يقراء مشاركتي صحفي يشخط فيهم بالجريدة بمقال بس بو سطرين - تدري شيصير ؟
لا وذا يبي شاهد أنا حاظر !!

السنه اللي فاتت وقت كأس العالم كانو يبيعون كروت

الستالايت للي يحب يشترك ؟ انا اشتركت وياهم وتحسفت

لو أقولك شنو صار وياي تقولي عفيه عليك مارحت كسرت

الشركه باللي فيها ، يكفي اقولك ان خلال 10 أيام يالله

انحلت مشكلتي وياهم بعد عناء ومكالمات وروحات ومشاوير حق فروعهم

و يتراوالي كل موظفين 107 حفظو اسمي حزتها من كثر مادقيت !!!

 

[NBK]

عل وعسى أن يقراء مشاركتي صحفي يشخط فيهم بالجريدة بمقال بس بو سطرين - تدري شيصير ؟
لا وذا يبي شاهد أنا حاظر !!

حبيبي شركة الاتصالات اكبر نصابين
اذا توهق الموظف قالك من الشبكه
ولا العيب في جهازك
عمي دز ايميل لفؤاد الهاشم وينشر شكواك بالجريده
بالتوفيق​

 

[Champion]

من أحسن خدمات الأنترنت اللي جربتها لحد الآن,, و على كلام الموظف ان السرعه بنهاية السنه راح تكون رقم قوي .. انا واحد من الناس ما أعتمد على كلام موظفين 107 ..
لا تحكمون على الخدمه من أول يوم

 

[توته]

الاتصالات وما ادراك ما الاتصالات
اشتركت معاهم بخدمة الانترنت قالوا لي تدفعين 9 دنانير بالشهر ماكو غيرهم وعقب اسبوع لقيت علي 60 دينار !
دقيت وسألتهم ليش
جان يقولون لي احنا ناخذ 5 فلوس على كل ميجا بايت.....وليش الحجي بالاول كان 9 دنانير ماكو غيرهم؟؟؟ قالوا لي الموظف ما عرف يشرحلج عدل

وحتى فلوس المكالمات يدزون لي مسج ولازم ادفع اول وآخر كل شهر يعني مو مره وحده بالشهر...
سألتهم ليش؟؟؟؟ قالوا لي علشان خط يديد!
انا صكيت خطي وفتحت خط وطنيه
خدمتهم وايد احسن وخدمة الانترنت تبرد الجبد عقب اللي شفته من الاتصالات

 

[البواردي]

اخوي انا سكنت بصباح السالم 5 سنين والله لا يوريك شلون السيرفس هناك
لدرجة ان الربع اذا دقو علي ولقوه مغلق يقولولي درينا انك في البيت لان الجهاز مغلق
اشتكيت عليهم وقالولي اهني ملتقى شبكات وطلبت تقوية وما عطوني ويه لاني من سكان صباح السالم وبيت حكومه
وبعدين اخذت رقم الشكوى ورحت حماية المستهلك وقلتلتهم السالفه واستدعوا الدعم الفني وشرحولهم السالفه وعقبها بـ10 ايام السيرفس فل في البيت
انت روح واشتك عليهم بحماية المستهلك بس اهم شي انك تثبت شكوى اول شي عند الشركه وبعدين حماية المستهلك
واخذ عقدك معاك وقولهم الكلام اللي انقالي غير عن الواقع وانا ما ابي الخدمه

واشوه انك قلت عن هلخدمه لاني كنت بروح اشترك فيها

 

[mercury]

السلام عليكم جميعا
ياجماعه والله نصابين الله يعوضك لانه صحيح كلامك سرعته بطيئه بشكل ما حصل والله الشبك على الموبايل وايد اسرع بس انا صدت الحركه الظاهر لأني طلبت تجربته قبل و طلع قمه الفشل لا و يقولون e-go من القرور خير انشاء الله

 

[wazer]

جزاك الله خير اخي الفاضل على كشفك لخدعة الاتصالات المتنقله

 

[العماري]

اخوي والله ممتاز دش على اعدادت وبعدين حط اختيار 3g فقط

 

[arabvb]

السلام عليكم
اخوي والله العظيم انا توني خذيت e-go وكانت تشبك معاي بسرعة 236.8 كيلوا بايت واتصلت على الشركة وقالوا غير الاعداد الى شبكة ثري جي فقط وصارت السرعة جدا ممتازة وصلت السرعة الى 3.6 ميغا
هذه اللي حصل معاي وشكر

 

[wzer]

زين علمتونا كنت ناوى اشترك
اشكركم على التوضيح ما قصرتوا

 

[Abdulazeez]

السلام عليكم

الشـركه تشتغل على أخذ فلوس الناس وما يعرفون يديرون خدمه الإنترنت ولا خدمه العملاء .

أنـا أشتغلت بالشبكات ونظامها كمجال هوايه وعمل إضافي لمده زادت عن 3 سنوات وطبعا كسب رزق ثاني ، قبل مده كان الأهل يحنون علي إشترك بخدمه الهواوي أو الهوائي وقالوا النت عندهم سريع وزين حقنا لأهل جنوب السره. وبعد ما رحت هناك فرع السالميه طلبت جهاز نوت بوك وما قصر موظف خدمه العملاء وعطاني الجهاز من صاحبه وكرت الإتصال وشبك لي وقال لي سرعه الشبك للكرت مو ذاكر جم بس قلت ممكن أجرب ودشيت كم مكان وجربت وأتصلت على صديقي وشرح لي إشلون أتأكد 100% . جان يتوهق بعد ما عرف أني عندي بعض المعلومات بشغلهم وخلال دقيقه أتصلت على صاحبي مره ثانيه وهو موجود بالسوق وطلبت منه يجي عندي ، طبعا الموظف توهق وبينت له أن الخدمه وخاصه السرعه ما وصلت حتى 20% من السرعه الي هو ذكرها لي ، فأتصل على واحد وبعد دقايق وصل موظفهم وعرفت أن المهندس والفني المختص بهل المجال وقالي بالبدايه كلام غير وأن في مشكله عندهم وصل صاحبي سلم وقعد جنبي ، وقبل ما يكمل قلت للمهندس والفني أن صاحبي يبي يعرف ويفهم شنو المشكله وليش الفرق بين كلامهم والحقيقه وما زدت شيء موليه ، وما قلت لهم أنه يعرف شغلهم أحسن وهو صديق من دوله عربيه ومن مواليد الكويت وأشتغل بشغلهم بسويسرا 12 سنه وخبرته كبيره بهل المجال ، وكان صاحبي ساكت وما تكلم بس يسمع ، وكنت ناطره يتكلم ويرد بس هو فضل أنه يسمع كلام المهندس كامل ، وبعد ما خلص كلامه مهندس الإتصالات وبعد ما قلب الكلام وكان يروح بالكلام يمين ويسار ودش بأمور ما فهمتها ، أبتسم صاحبي وعرف نفسه ومجال شغله وقاله بما معناه أن كلامه في كثير من الخطأ وذكر النقاط الخطأ بكلامه وسأله هل هو أخطأ من جهل بالمعلومات الصحيحه ولا أعطى معلومات خاطئه للتهرب من أخطاء ومشاكلهم ، وقال إذا كان كلامه من عدم معرفه فالشركه لازم تحط واحد يفيد الناس ويعرف ولا يجاوب ويفسر من عنده وإذا كان الخطأ متعمد الله يستر على شركها موظفينها تغش وتخدع الناس ، توقعت المهندس يرد ، ولكن وقف وقال عن أذنكم بس شوي وعلى وجه ما رد ولا بين موليه وخله موظف خدمه العملاء متوهق وقال لنا مو عارف شنو أقول ، قلت له : بلغ مديركم أن مو كل الناس جهله وما يعرفون شيء ومشاكلهم وحرام عدم توضيح الأمور للمشتركين من أول شيء وقبل إشتراكهم ودفع الفلوس ، وللعلم أنا أقدم واحد ممكن إشترك معاهم بخدمه wap والـ GPRs وعارف مشاكلهم ، بس شسوي ساكن بمنطقه مافيها خطوط أرضيه ومستحمل مشاكلهم المستمره والمتجدده .


وبالنسبه لكلام بعض الأخوان يقول شبكت وبين معاي سرعه 420 كيلو بايت أو 1 ميجا تحت ، فأقول له هذا مو سرعه النت موليه ، هذا الي يبين له السيرفر الي شابك معاه ، سرعه النت تبين من برامج أو صفحات لقياس سرعه النت .​

 

[Abdulazeez]

زين علمتونا كنت ناوى اشترك
اشكركم على التوضيح ما قصرتوا

أنصحك إذا عندك مجال تروح وتجرب الخدمه عندهم وراح تتأكد أفضل​

 

[S500]

احترم وجهه نظر الجميع

انا اشتركت معاهم اليوم اول ساعتين ما شتغلت معاي وبعدها اشتغلت الخدمه ومن اروع ما يكون وعلى فكره انا من سكان صباح السالم وصراحه انا مو غشيم بالنت بعد ما جرب الخدمه اتضح عندي ان الداونلون فوق الممتاز ويعادل الدي اس ال 512 ثلاث مرات

وعشان اتأكد انا مشترك بالدي اس ال 512 من كوالتي الملف اللي انزله بخمس دقايق بالدي اس ال انزله بالخدمه الجديده بأقل من دقيقتين

صراحه خدمه فوق الممتازه

 

[S500]

هذا مثال بسيط على سرعه النقل

على فكره الدي اس ال 512 ما يتعدى 70

هذا يوصل 140 بالراحه

وبالصوره المرفقه واصل 80

 

[Chess]

السلام عليكم .........


أولا أشكر جميع من شارك أو سوف يشارك في الموضوع .
ثانيا واضح من مشاركات الأخوان و خلاصة الردود الطيبة منكم أن الموضوع هو تغطية الشبكة للخدمة ضعيفة في أماكن و قوية في أماكن أخرى .

موضوعي يصب في جوهر الدعاية القوية للشركة في حال التسويق الحاصل للخدمة الجديدة .

فكيف تقوم الشركة بعمل تسويق لخدمة لا تغطي جميع مناطق الكويت بالكامل في حال أشتراك العميل ؟!

ما ذنب العميل الذي أبرم معة عقد ينص على حقوقي أنا كشركة و أتجاهل تماما جودة و حقوق العميل بتلقي أفضل خدمة ممكنة !؟

في حال تردي هذة الخدمة ما دوري أنا كشركة في تعويض العميل عن الضرر الحاصل !؟

و أخيرا و ليس آخرا لكل من يشك في معرفتي بالشبكات أو علوم الحاسب الآلي فأنا مبرمج أول و خبرتي مو أقل من 15 سنة ولا حق على المودم بو 3600 Kb !! ... أيام ما كان سعرة 95 دينار و اشتراكات الـ Kms بو 60 دينار !!

و لا أقصد من فحوى هذة المشاركة سوى تعريف الناس برداءة خدمات الـ Mtc على أثر الدعاية الجديدة .

ودمتم سالمين .