الفزعه ..... ارجوا المساعده يا اهل الكويت

يا اخوان انا عندى عقار من 5 شقق وصارلى مأجره مده طويله لـ 5 عوائق بدون وعراقيين ولما بغيت ارفع الايجار مو راضين يدفعون ولايطلعون علما بأنى استخدمت كل الوسائل معاهم مع العلم ان مافيه عقد ايجار بينى وبينهم وصار رزق عائله كويتيه بيدهم ابى تنصحونى شلون اتصرف معاهم والطريقه .

بارك الله فيكم وجزاكم الله كل خير .

 

ابومالك شوف لك محامي من غير مايدرون ولا راح تقدر تصيدهم باي شي لان العقد هو الشي اللي يلزمك ويلزمهم ---والله يعينكم

 

اسهل شغله عند اي محامي

 

اخوي انت لما كنت تستلم الأجار منهم بوصل ولا من غير وصل ....ّ؟؟

بعد ما تجاوب انا راح اقولك شنو تسوي بالضبط

 

بدون وصل وبدون اى شي

 

نصيحه
حط اعلانات للاجار شقق للعزاب داخل العقار وحط بالشقه 120 عازب
ترا راهي تشيل لان الغرفه تشيل 30 نفر بس لا تغلي خل النفر 5 دنانير شهريا
وبالتالي راح يتضايقون ويبحثون عن شقق ثانيه
وبالتوفيق

 

اخوي بومالك اظاهر انك مومفتح باللبن شغلتك مايبيلها شي اذن هدم من البلديه مايكلفك شي ولاتهدم ولاشي وبعد ماتطلع الاذن دز لكل عايله من الاشاوس الي عندك اعلان عن طريق مندوبين الإعلان بقصر العدل مع تحديد المده المناسبه للإخلاء وإذا تنحرو وما رضوايطلعون لك الحق تستخدم القوه الجبريه وما عندهم عقود ايجار بعد ما يردهم الاطلحه افا عليك بس .


ملاحظه/ الاعلان الواحد يكلفك عشرة دنانيرفقط لاغير


والله يوفقك.

 

عندي صديق عنده الحل وباذن الله راح يطلعون بكل سهوله واذا تعطيني رقمك اخليه يتصل عليك

 

والبيت وين عنوانه اذا الحساوي مضبوط 100 % علاجه موجود عند صاحبي

 

سد المجاري بكنكريت وخرب وايرات الكهربه وابني غرف على مداخل العماره وخل المدخل 40 سم

شرايكم شباب مو ممكن يطلعون

 

لم ترد علينا يابو مالك

 

ياجماعة الخير شفيكم كلكم وقفتوا مع الرجال ضد المؤجرين ولا واحد فيكم فكر فيهم وبحالتهم ووين يروحون يعيشون ولم تسألوا الرجال كم الايجار وليش يبي يزيد الايجار عليهم وكم راح يزيد عليهم وهل هم مضايقينه بشئ ؟؟؟؟ بصراحه اعتب عليكم ياجماعة لانكم حكمتم عليهم وكل واحد سل سيفه وصار يفكر بالف طريقه وطريقه عشان يطلعهم من مكانهم الي عايشين فيه مده طويله على قولة اخونا ، ويمكن ياجماعة مساكين مولاقين يدفعون اكثر من ايجارهم وخصوصا انهم مثل ماقال بدون وعراقيين واعتقد جميعنا يعرف معاناة البدون وحالتهم المادية والنفسية وجايين انتم تصيرون عليهم .

 

يا اخوان البيت عباره عن قسيمه وانا علشان ظروفهم طولت بالى عليهم بخصوص الايجار لكن هم ما يصير يقطعون رزقى ورزق عيالى نفس الشقق 3 غرف وحمامين ومطبخ مأجره فوق 300 وانا شققى على 150 تكييف مركزى هم ما يرضيكم جذى انا ما ابى اظلم احد بس هم ما ابى احد يظلمنى .

شقق 3 غرف وحمامين وصاله كبيره تكييف مركزى سخان مركزى ستلايت مركزى على 150 دينار يرضيكم هذا ؟

اخوى تحليل حتى بالحساوى ما اعتقد فيه هالايجار .

والشي الاخير صارلهم قرابت 5 سنوات اعتقد من حقى ارفع الايجار العقار والايجار كله ارتفع غير فواتير الماى والكهربا على ظهرى .

غير شركة الصيانه مالت المصعد

والمشكله اذا كلمتهم قالو انت كويتى عندك فلوس مو محتاج

 

ياخوي ممكن اعرف المنطقه اذا الحساوي الحل بسيط جدا جدا وبدون ماتتعب واذا غير الحساوي الحل يحتاج مدة شهر الى الى شهرين

بس ارسل رقمك او تعال مكتب صاحبي بالحساوي خبير بهذه الامور وصدقني بدون مقابله الموضوع كله فزعه مع اهل ديرتنا

 

هذا عيبنا قلوبنا ضعيفه الى ابعد الحدود ياشباب مانزل قيمة الكويتي الا ضعف قلوبنا

 

الحين ماكو اضعيف الا لكويتى المسكين

بالنسبه للبدون صارو مثلهم مثل لكويتين واحسن وظفوهم بالشرطه والجيش وعطوهم جوازات واجازات ويعرفون يشتغلون كل شغله بعد شنو الفرق بينهم وبين الكويتيين ؟

والكويتيين نصهم مساجين على فلوس والباجى ماكلين 3 ارباع راتبه والمشكله حتى شغله ثانيه ما يعرف وصار اكثر من 30% منهم اسر محتاجه لكنها متعففه.

الحمدالله على كل حال

 

قال رسول الله صلي الله عليه وسلم ( انصر اخاك ظالما او مظلوما) وانت جاي تنتصر لابن ديرتك على حساب ناس اخرين ماتعرف شنو ظروفهم يعني اسألك بالله لو كان المؤجرين كويتيين كان وقفت مع الرجال وصرت تفكر بالطرق الملتويه لتطفيشهم

 

اخوي والله انت مسكين لانك مو مطلع على احوال البدون وتقرا اخبارهم من الجرايد اولا منو قالك ان وظفوهم بالشرطه هذا قرار صدر والى الان لم يتم توظيف احد منهم ثانيا لو عطوهم جوازات واجازات مثل ماقلت شنو اللي يختلف راح تظل احوالهم المعيشه نفسها ، ثالثا ادري انهم يشتغلون كل شغله حتى انهم يبسطون بالرقي على الشوارع بالحر ويجي واحد ماعنده ضمير من البلديه ويصادر بضاعته علشان دينارين او ثلاثه ياخذهم باليوم رابعا من وين جبت المعلومه اللي تقول ان الكويتين نصهم مساجين ، فالمساجين اللي على الفلوس على قولتك شللي خلاهم يقترضون عشان يسافر والا يشتري سياره احدث موديل ولا يسدد قسطها ، عجل شنو تقول حق الوافدين اللي معاش الواحد مايزيد عن 200 دينار ويدفع منهم ايجار البيت وقسط السيارة واقل كويتي متزوج معاشه مايقل عن 600 دينار هذا غير بدل الايجار ، واقولك اخوي لا تحاول تستدر عطف الاخوان بقولتك انهم يقولون لك انك كويتي وفلوس واجد ، واخيرا اقولك اتق الله بس شرهتي على الاخوان اللي صار كل واحد يفكر بطريقه لاخراج هؤلاء المساكين واقولك ترى الدينا زايله واكسب فيهم اجر ولا ترفع الايجار عليهم واجعلها في ميزان حسناتك

 

اهنيك والله على الفزعه بس تأكد ان دعوة المظلوم ليس بينها وبين الله حجاب فتخيل لو واحد من اللي تحيك المؤامرات عليهم دعا عليك واستجاب له الله دعائه شنو موقفك ؟؟!! شنو راح يفيدك ابن ديرتك

 

الاختلاف فى وجهات النظر لايفسد للود قضيه