شنو الفرق ....

الموضوع في 'السوق الكويتي للأوراق الماليه' بواسطة ALSALEM, بتاريخ ‏14 ديسمبر 2007.

  1. ALSALEM

    ALSALEM عضو جديد

    التسجيل:
    ‏25 أكتوبر 2006
    المشاركات:
    1,734
    عدد الإعجابات:
    0
    مكان الإقامة:
    الكويت
    سؤال لاهل الخبره يا جماعه اذا واحد شاري كمية اسهم في شركه معينه شنو الفرق بين انه يبيع بعد توزيع الارباح وتفسيخ السهم وبين انه يبيع قبل ذلك - واذا بتقولون الاول مستثمر فالثاني يقدر يشتري بعد التفسيخ - ارجو الافاده
     
  2. Academic

    Academic عضو جديد

    التسجيل:
    ‏11 نوفمبر 2007
    المشاركات:
    206
    عدد الإعجابات:
    0
    أخوي السالم.. انا ماني من أهل خبرة ولكن راح ابدي رايي لأنه هالسؤال كان شاغل بالي فترة طويلة واللي توصلتله انه الجواب يعتمد على عوامل عديدة:
    1- سعر شراء السهم: مقارنة سعر شراء السهم مع ما يمكن اي يصل له السهم قبل التوزيع. هل سيحقق السهم الربح المقنع باللنسبة لك قبل انعقاد الجمعية العمومية؟ هل هذا الربح يغنيك عن توزيع الأرباح؟

    2- الأرباح المتوقعة: توزيعات الشركة بالسنوات الماضية. هل هي مقنعة؟ هل تبشر بالخير؟ هل تشمل منحة او زيادة رأس مال؟

    3- حالة المحفظة: مدى توازن المحفظة الشخصية. هل أرباح هذا السهم كافية لتعويض خسارة سهم آخر؟ هل يدعم صعود هذا السهم توزيعة ارباح غير جيدة بسهم آخر؟

    4- تاريخ التوزيعات: تنظيم عمليات البيع والشراء بحيث ان تغطي جميع الفرص المتاحة في السوق حسب ظروف المحفظة. ماهو انسب وقت لشراء سهم الشركة الفلانية و بيعه وبنفس الوقت عدم تضييع فرصة الحصول على توزيعة ممتازة من سهم آخر؟

    بإختصار أخوي.. لكل شخص وضع مختلف عن الأخر ولكن انصح بمراجعة البيانات التاريخية من توزيعات ومنح وأسعار لوضع خطة محددة بأسعار شراء وبيع وتواريخ دخول وخروج لتحقيق افضل فائدة خلال فترة الإغلاقات وإعلانات الأرباح. بالإضافة الى متابعة التحليلات الفنية وأخبار وإعلانات الشركات. اتمنى لك ولأخواننا التوفيق.
     
  3. السهو

    السهو عضو نشط

    التسجيل:
    ‏11 نوفمبر 2005
    المشاركات:
    623
    عدد الإعجابات:
    0

    اذا انت لست بصاحب خبرة من هو اذا صاحب الخبرة

    رد موفق ورائع وشامل واكاديمي

    حقيقة اتمنى لك التواصل معنا في المنتدي والافادة منك

    تحياتي
     
  4. Academic

    Academic عضو جديد

    التسجيل:
    ‏11 نوفمبر 2007
    المشاركات:
    206
    عدد الإعجابات:
    0
    اخوي السهو شاكرلك تقديرك وتشجيعك وان شاء الله تعم الفائدة على الجميع. وأتمنى مشاركة أصحاب الخبرة في الرد على تساؤل أخونا السالم.
     
  5. alhihi

    alhihi عضو جديد

    التسجيل:
    ‏8 يوليو 2007
    المشاركات:
    530
    عدد الإعجابات:
    0
    مكان الإقامة:
    الكويت - الجهراء
    بسطة المسألة واجدة بطرحك
    وتستأهل جزيل الشكر
     
  6. garmin

    garmin عضو محترف

    التسجيل:
    ‏3 يوليو 2005
    المشاركات:
    2,446
    عدد الإعجابات:
    0
    موضوع جميل ..ومهم

    وعندي رد مقتبسه من المنتدى اللي ورانه :)
    بخصوص هذا الموضوع

    طبعا راح أنسخ بداية الموضوع

    واللي كان عنوانه التوزيعات والناس الضايعه


    السلام عليكم ..

    أخواني و أخواتي الأعضاء .. تحية طيبة ..


    حبيت في هذه الليلة ان أكتب موضوع مهم جدا ..خاصة و ان موسم اعلان الأرباح و التوزيعات قريب جدا ..

    راح أسرد هذا الموضوع بشكل قصة أو رواية ..حتى يسهل فهمه و تقبله من قبل الأغلبية ..

    لكني راح أبدى الموضوع بسؤال ... "ليش نعتبر التوزيعات مهمه ؟"

    سؤال قصير ..و إجابته لا يمكن تكون بمستوى قصره .. و لا بسهولته ..

    الموضوع فيه شويه سياسة و دبلوماسية ..

    التوزيعه هي العائد .. صح ؟ ........................................ هممممممم غلط .. !!

    التوزيعه هي .................................................. ........كلام فاضي .. ما منه أي فائدة من منطلق اقتصادي صحيح..

    كلام كبير أدري .. و أكيد الكل بيظن انه فيه شي غريب بهذا الطرح ...و لكن ما غريب الا الشيطان ..

    أنا بضرب مثال و قولوا لي اذا في جزئية مش صحيحه ..

    عندي اثنين من الربع .. بو شادية .. و بو أم كلثوم .. (أدري الثاني اسمه ييب الحارج ..و يسبب انفصام بالشخصية..شلون أبو ..بعدين ..أم .. ارسالك على بر .. يا أبو ..يا أم ..)

    المهم ..بو شادية يظن ان كلامي صحيح .. و بو أم كلثوم .. يقول ان بو فارس ابدا ما عنده أي سالفة ..

    المهم .. الأثنين شروا 10000 سهم (عابدين للإستثمار الزراعي) بسعر دينار ..لأنهم سامعين ان "أرباحة و توزيعاته" طيبه .. حلو ؟

    تم الإعلان عن توزيع منحه 100% ..و السهم صعد بسبب هذا الخبر .. و وصل 1.200 يوم الجمعيه ..

    بو شادية باع ب 1.200 .. كل الكمية .. بقيمة 12000 دينار .. تفسخ السهم ثاني يوم ..بقيمة 600 فلس .. قام بو شادية و شرى السهم بكل فلوسه .. طلعله .. 20000 سهم (دبل الكمية الي كانت عنده قبل الفسخ) ..

    عادة السهم بعد توزيع أي منحه .. يكون رخيص نسبيا ..و بنفس الوقت عدد الأسهم المتاحة في السوق هي نفسها القديمة ..يعني فعليا ..رأس المال الموجود في السوق هو رأس المال القديم ..اللهم ان التعديل دفتري ..

    يعني ..لو الشركة المذكوره راس مالها قبل المنحه 10 مليون ..و عدد اسهمها في السوق 100 مليون سهم .. بعد المنحه 100% ..يصيرراس مالها 20 مليون ..و عدد اسهمها يفترض 200 مليون .. لكن مو هذا الي حاصل .. الي حاصل ان عدد الأسهم دفتريا تم تعديله ..و الأسهم الفعليه بعد الفسخ بيوم هي نفسها ال 100 مليون ..

    تظل هذي هي الحالة لغاية اليوم الي يصرفون فيه للمساهمين شهادات اسهم المنحه .. اهني ..نقو انه فعليا زادت عدد الأسهم ..

    طيب معناته ان يوم الفسخ السهم يكون رخيص ..و عدد الأسهم شويه .. فالكبار ينتهزون الفرصه ..و يرفعون السهم لأسعار ممتازة ..على سبيل المثال ..800 فلس ..

    بو شادية ..شغلة مضبوط ..شرى دبل كميته بسعر الفسخ 600 فلس .. و استفاد من الإرتفاع .. و باع على 800 ..و طلع مربح 200 فلس على كمية 20000 سهم .. يعني راس مال بو شادية جم ؟ أول بيعه على 1.200 ربح 2000 دينار .. و ثاني بيعه على 800 فلس ربح 4000 دينار .. على راس ماله الأصلي 10000 دينار .... يعني الرجل يملك 16000 دينار..

    بو أم كلثوم (المقرود) .. عنده 10000 سهم الأصليين .. على سعر 600... و لما ارتفع السهم ..سمع كلام بو شادية و باعهم ب 800 فلس.. (8000 دينار ) ... و قعد الحبيب يكش الذبان ..لغاية اليوم الي تعطفت الشركة فيه .. و وزعت الشهادات ..

    و هنا كانت الفاجعه ..

    السهم سعره بالسوق مو 800 فلس .. سعره للأسف أقل من سعر الفسخ الأصلي ..

    الحين شيسوي بو أم كلثوم ؟؟

    يبيع ؟.. لأن في ناس تقوله .. بيعهم .. انت ربحان ربحان .. هذي أصلا اسهم مجانية .. !

    قال الريال .. "اي والله ..انا شفيني دايخ ..هذي تعتبر اسهم مجانية ..أكيد أنا ربحا حتى لو بايع ب 100 فلس .. "

    طبعا الرجل صج صج صج دايخ .. لأنه باع ب 450 فلس و طلعله من ورى هالبيعه 4500 دينار ..

    حطهم على ال 8000 دينار مالت البيعه الأولى .. و صار المبلغ 12500 دينار .. و قال نعمة كريم ..

    و بو شادية فلوسه بجيبه من زمان ..و كان يشتغل فيهم بالسوق ..أيام ما كان بو أم كلثوم ينطر شهادات الأسهم أو بأسلوب أكثر احترافيه ..كان (يكش الذبان) ..

    الحين .. شنو فادت بو أم كلثوم التوزيعه ؟ .. طبعا و لا شي ..جمدت حلاله .. خذوا من جيبه و عايدوه ..


    ممكن يطلع واحد و يقول .. "بس يا بو فارس ..توزيع النقدي غير ..أكيد منه فايده ..غير موضوع المنحه .."

    أقوله .. نفس القمنده .. فرضا شركه قررت توزع 100 فلس نقدي .. و يوم الجمعية كانت بدينار ..

    شنو المانع أبيع يوم الجمعية و باجرأسترجع السهم ب 900 ؟؟

    يعني أبيع 10000 سهم بدينار .. و باجر استرجع 10000 ب 900 .. فرق التكلفه 1000 دينار ..

    الي هي اصلا ال 100 فلس النقدي الي وزعتها الشركة ..

    اللهم انا الي بعت ..عندي 10000 سهم .. و 1000 دينار بالحساب أقدر أحرقهم على اليهال و أمهم من أول يوم .. أما الي مسك ..عنده 10000 سهم ..و ينطر الشركة تصدر له الشيك .. و كل يوم يصبر اليهال و أمهم ..و يحاول يخدر الموضوع

    ممكن يكون فيه ناس تقرى كلامي و تقول شنو الي بيوصله بو فارس ..؟؟

    الي بوصله ان ..التوزيعات ما هي الا لعبه محاسبية لا أكثر و لا أقل .. ممكن أي شخص يستفيد نفس الفايده ..و ممكن يسفيد أكثر ..(مثل أخونا بو شادية) .. و الموضوع مثل ما يقولون .. "صبه حقنه لبن" ..

    فيعني الواحد فيكم لا يعول كثيرا على موضوع التوزيعات .. و يعتبر التوزيعه هدف .. و كأنه يشتري السهم .."بهدف الحصول على التوزيعه" ..

    مع خالص الأمنيات لكم بالفائدة .. و الربح ..


    أخوكم
    بوفارس
    منقول
    http://www.tawseya.com/forum/showthread.php?t=1242&page=1&pp=40


    اخوكم
    بوفواز
     
  7. ALSALEM

    ALSALEM عضو جديد

    التسجيل:
    ‏25 أكتوبر 2006
    المشاركات:
    1,734
    عدد الإعجابات:
    0
    مكان الإقامة:
    الكويت
    الله يبارك فيكم بصراحه نورتوني صح وانشالله بعيد حساباتي