البنك الوطني مو راضي يعطيني براءة ذمة ... شنو الحل؟

[Maxima]

السلام عليكم
صارلي شهر اراجع البنك بخصوص براءة الذمة وآخر مرة حجتهم السستم حق براءة الذمة موقفينه من الرئيسي وراح يشتغل بعد اسبوعين
اقسم بالله ماسك نفسي شكلي بسوي فيهم جريمة
اشتكيت على الفرع عن طريق الرئيسي ولا فيه فايدة
شنو الحل وياهم مع اني لا عندي فيزا ولا قروض ولا شي
وراح احول على التمويل
نصايحكم يااخوان ؟

 

[iidvdii]

دز لهم واحد أو وحده لسانها طويل وكل شي يصير تمام
أو أشتك عليهم بالبنك المركزي
وخلنا نشوف الأخوان يمكن عندهم حل

 

[rakan_yes]

مسااك الله بالخير


اخوي الحل سهل جدا جدا جدا


اركب سيارتك الصبح واصفط عند البنك المركزي قسم الشكاوي على البنوك وقدم شكوى بسرعه بسرعه بسرعه


وشوف الحل شلون يوصلك باسرع من الشكوى


احنا بالكويت ناس مسالمين جدا جدا ومابي اقول كسولين لاكن مانحب المشاكل وعوار راس والدليل انك نطرت شهر على برائة ذمه

مع العلم ان فيه حمايت مستهلك وفيه قسم لشكاوي التجاره وشكاوي البننوك وفيه اخر حل شكوى عن طريق مجل الوزراء في النت تقدمها على اي دائره بالدوله وتلقا الحل بالتفصيل الملل

لاتنسى روح الصبح للبنك المركزي

تقبل تحياتي
ابورااشد

 

[سهم مرتاح]

جزاك الله خير
والله يرزقك لانك افتكيت من البنوك الربويه
بس هذي مماطلات لابد منها

 

[دحيم 06]

السلام عليكم
صارلي شهر اراجع البنك بخصوص براءة الذمة وآخر مرة حجتهم السستم حق براءة الذمة موقفينه من الرئيسي وراح يشتغل بعد اسبوعين
اقسم بالله ماسك نفسي شكلي بسوي فيهم جريمة
اشتكيت على الفرع عن طريق الرئيسي ولا فيه فايدة
شنو الحل وياهم مع اني لا عندي فيزا ولا قروض ولا شي
وراح احول على التمويل
نصايحكم يااخوان ؟

حبيت ابارك لك مقدما على تركك البنك الربوي عسى الله يبارك لنا ولك في ارزاقنا .....

تحياتي لك...

 

[صح النوم]

انا نفسك كنت في الوطني وطلعت ورحت التمويل المهم انهم يماطلون عشان يمكن تهون وتمل وتنسى الموضوع لاتسكت وناجرهم ترى اهم مايمشون الا بالزف واذا شافوك ساكت جزروها عليك

 

[Maxima]

مشكورين اخواني
ياليت بعد حلول سريعة وماتقصرون
وان شاءالله بروح المركزي بعد العطلة

 

[الشامري]

السلام عليكم ورحمة الله وبركاته

أولا أبارك لك أخي على هذا القرار، فمن ترك شيئا لله عوضه الله خيرا منه

انا نفسك كنت في الوطني وطلعت ورحت التمويل المهم انهم يماطلون عشان يمكن تهون وتمل وتنسى الموضوع لاتسكت وناجرهم ترى اهم مايمشون الا بالزف واذا شافوك ساكت جزروها عليك

نفس الشي حصل معاي (من الوطني إلى التمويل)

وأضيف بأن بعض الموظفين لما سألوني عن ترك البنك وجاوبتهم بأنها أسباب شرعية (الشهادة لله) توقف فورا عن طرح الأسئلة

أما بعض الموظفين أخذ يناقشني، المشكلة لما أقول له قال الله وقال رسوله يزعل، ويقول لي خلنا نتكلم بالمنطق ونبتعد عن أي حوار أو اقتباسات مو من منطقنا الخاص!

على العموم المسألة تحتاج صبر، والمثل يقول :

إلحق الجذاب ............

أما إذا طالت المسألة، فأنصحك بسلك القنوات الرسمية

والله يوفقك

 

[Maxima]

اخوي الشامري
مشكور والله يوفق الجميع

 

[ناصر فيصل]

براءة الذمة

اسحب رصيدك اولا و افتح حساب ببيتك و لما يشوفون كل شهر قاعد تحول رصيدك يملون و يعطونط براءة الذمة ,

 

[Maxima]

ناصر فيصل
المشكلة بيتك مو راضين يفتحون حساب الا بشهادة براءة ذمة

 

[بوغمازات]

روح البنك المركزي وقدم شكوي وراح تلقي رد سريع منهم ... وفي احد يروح حق بيت التمويل ؟؟؟

 

[مراقب الاسهم]

اخوي الكريم

اللي اعرفه وسبق لي تجربه فيه

براءه ذمه لاااااااااازم تطول وصعبه يعطونك بسرعه

ااذا يتحول من بنك لي بنك ثاني (((اطلب منهم شهاده عدم ممانعه تحويل راتب )) هالشهاده هذي تآخذها جهه عملك مع حسابك بالبنك الجديد والراتب من لحظه استلام الورقه بالماليه اعتبره نازل عالبنك الجديد

وبراءه ذمه عمرها ماجت ((((انا سويتها مع بيت التمويل من وحولت من دون براءه ذمه )))
وعقب ماحولت بشهرين دقوا علي وقالو لي براءه الذمه خالصه تعال اسلمها

طبعا هالكلام قبل 5 سنوات ولي يومك هذا ما استلمتها

لان براءه ذمه لها طابع ومجريات قانونيه تطول شوي



واذا ماعطوك شهاده (((عدم ممانعه تحويل راتب الى جهات اخرى )))

خلك ذكي ولاتغفل عن القانون
دش عالمدير وكلمه واذا مارضى حاول تآخذ منه اي مستند رسمي او اي ورقه منه تثبت صحه كلامه او ثبت انك في هاليوم راجعت البنك بخصوص هالشهاده وماحصلت عليها طبعا راح يتهرب وانسى يعطيك شيء رسمي ((((ماحطوه مدير بالصدفه )) صعد الموقف معاه وقوله طلعه من البنك ماراح اطلع (((يالشهاده او اي ورقه منك والا اتصل باقرب مخفر شرطه )))

طبعا هنيه ((غصب يدق بريك )) المسأله في شرطه وقضيه وتحقيق وموقفه ركيك حييييييييييل
وهم اذا سواها واتصل عالمخفر فوووووووق الزين بالنسبه لك (((هذي اثبات حاله ))
انك راجعت وماعطوك عشان جذيه صارت المشكله

واذا صار اثبات حاله وفيها شرطه شهود بس خلاااااااااااص
مكتب المحاماه عندي اضبطك باذن الله براءه ذمه وفوقها تعويض كم الف تحطهم بحسابك الجديد (((عشان ما تآخذ تورق او بالاصح تورط ) ) على الطريقه الاسلاميه من بيتك


خبرنااااااااااااااا شنو يصير معاك اول باول ترى هالصفحه او هالموضوع ممكن يكون
مرجع يسنفيد منه الكثير

 

[al3zeez]

على فكره انا تغريبا نفس الموضوع
بس انا بطلع من الكويت والشرق الاوسط وبروح الاهلي ونفس السالفه قاموا يماطلون ببراءه الذمه وقالوا ان بس موظف واحد على هالمعامله واساسا يبيلها شهرين تغريبا وتاخذها (هذا الاجراء الاعتيادي والقانوني)
ولكن نفس ماقال الاخ الي قبلي انك تقدر تاخذ شهاده (لامانع من تحويل الراتب) وتطلع باقل من اسبوع وبهالشهاده تقدر تحول راتبك على البنك الي تبيه وخل براءه الذمه مالها داعي بعد ماتحول راتبك
والسلام ختام

 

[بو زعلان]

تحويل الراتب من بنك إلى بنك مشكلة تختلقها المؤسسات المصرفية لتصعيب الأمور على العميل...

النقل من بنك إلى بنك صعب...حتى أن هناك مشكلة أخرى باتت تواجه الذين ينتقلون من وظيفة إلى أخرى...

أحد البراذرات ذكر لي أنه عند تركه لوظيفته الحكومية وانتقاله إلى القطاع الخاص...قرر ترك البنك أ والانتقال إلى البنك ب...وهذا الأمر من المفترض أنه سهل جدا حيث أنه لا يوجد أمر تحويل للراتب من بنك إلى بنك...وإنما مباشرة عن طريق فتح حساب مصرفي جديد في البنك ب وإعطاء أمر تحويله إلى وظيفته...

بعد شهرين من فتح الحساب والتعيين في الشركة...إتصل به البنك أ وقال أنه عرف بأمر الحساب الجديد عن طريق الساي نت (طبعا هذا "صاروخ") وأن عليه إعادة راتبه إليهم أو الحصول على براءة ذمة منهم وإلا سوف تتخذ بحقه إجراءات قانونية...

المهم...البراذر استشار أحد القانونيين العاملين في المجال المصرفي الذي قال له...بالمعنى..."ما عليك منهم وحته لو عندك قرض عليهم كل اللي عليك تسويه إنك دايما تحط في حسابك عندهم فلوس تغطي الاستقطاع وما لهم شغل براتبك الجديد لأنه من الأساس ما كان عندهم وما يحتاج براءة ذمة وإذا أذوك شوف لك محامي يدوس بمردانهم وبعد ياخذ لك تعويض جان تبي"...

القطاع المصرفي الكويتي...للأسف الشديد...تحول إلى دراكولا ضد سكان الكويت...

فهذا القطاع يدعي النزاهة والتنافسية والرغبة في التطوير ويرفع شعار "البقاء للأقوى" لكن مساعيهم ضد البنوك الأجنبية (بي أن بي باريبا - ستي بنك - Hsbc - بنك أبو ظبي الوطني) واضحة جدا خوفا من حصول العملاء على عروض تجعل البنوك الكويتية تبكي حسرة على المغادرين من عملائها...فالبنوك الأجنبية لا يحق لها سوى فتح فرع واحد ولا تتتعامل إلا مع الشركات أو الأفراد أصحاب الملاءات المالية العالية (الله العالم جم مليون والحمد لله على كل حال اللي يرزقنا مثل ما رزقهم بالحلال)...

 

[rakan_yes]

اخوي شضراااااايك
احلها لك بطريقتي الخاصه

الحين قولي
اي فرع للبنك تبي تاخذ برائة ذمه وابشر بحاول انشااء الله اتوسط لك بحكم علاقتي فيهم

راح اجيبلك برائة ذمه مع قلاص عصير فرش شرااااااايك

خلهم يولون ولا تحاتي بس انت قولي اي فرع وعطني رقم تلفونك واواعدك عن باب البك باجر انشااء الله وابشر بالخير

ماكون ابورااشد اذا ماسويتها لك انت بالذات فقط لاتحرجوني
الله يستر اخاف المنتدى كله بيحول راتبه والبنك يقولي خلاص مانبيك عندنا ههههههههههههه


لاتترد بارسال رساله لي خاصه فيها تحديد الوقت الي بتروحله للبنك واي يوم وانا عند وجهك بالخير

يالغااااااااااااااااالي

تقبل تحياتي اخوك
ابورااااشد

 

[ياقوت]

الشكوى لله
جان زين يفتحون لنا بنوك اجنبيه عشان يمكن شوي نرتاح
ليش لازم راتبنا يتحول على بنك ليش ما نروح نستلمه بشيك ​

 

[rakan_yes]

نوووووووووووو

الشكوى لله
جان زين يفتحون لنا بنوك اجنبيه عشان يمكن شوي نرتاح
ليش لازم راتبنا يتحول على بنك ليش ما نروح نستلمه بشيك ​

لا لا ليش تقول جذيه يالغااالي

شوف انت كلامك معقول نسبيا يعني اذا نزل الراتب اليوم الخميس تنطر لغاية يوم الاحد وتروح للدوام وتاخذه شيك والاثنين تروح تصره وتبهذل حالك ليش هالعباله
بالعكس البنوك احسن واوفر لنا وقت واي وقت تبي راتبك بعد ماينزل تروح وتسحبه على راحتك تبي كل الراتب او نصه او حتى ربع راتبك مو تصرف شيك وتروح تخشه بالبيت هههههههههههههههههههههه

تخيل نفسك ماسك طابور عند المحاسبه تبي راتبك هههههههههههههه

انا عارف انها مزحه منك على هالصبح وانا كان ضايق خلقي السهم مقووووع وقريت ردك ومت من الظحك

تقبل تحياتي
ابورااشد​

 

[Maxima]

مراقب الاسهم
الف شكر لك على هالنصيحة ومعلومات قيّمة جداً وراح اكون متواجد بالفرع الصبح ان شاءالله وراح ابلغك بالتطورات

al3zeez
مشكور وماتقصر نفس معلومة اخوي مراقب الاسهم

بو زعلان
الله يرضى عليك ان شاءالله تسلم على المشاركة

rakan_yes
بيض الله وجهك يابوراشد وماتقصر تم ارسال رسالة خاصة

ياقوت
اشكرك اخوي على المشاركة

 

[al3zeez]

اخوي شضراااااايك
احلها لك بطريقتي الخاصه

الحين قولي
اي فرع للبنك تبي تاخذ برائة ذمه وابشر بحاول انشااء الله اتوسط لك بحكم علاقتي فيهم

راح اجيبلك برائة ذمه مع قلاص عصير فرش شرااااااايك

خلهم يولون ولا تحاتي بس انت قولي اي فرع وعطني رقم تلفونك واواعدك عن باب البك باجر انشااء الله وابشر بالخير

ماكون ابورااشد اذا ماسويتها لك انت بالذات فقط لاتحرجوني
الله يستر اخاف المنتدى كله بيحول راتبه والبنك يقولي خلاص مانبيك عندنا ههههههههههههه


لاتترد بارسال رساله لي خاصه فيها تحديد الوقت الي بتروحله للبنك واي يوم وانا عند وجهك بالخير

يالغااااااااااااااااالي

تقبل تحياتي اخوك
ابورااااشد

كثر الله من امثالك