شطانة ايام الثانوية!!!

[دحيم 06]

شطانة ايام الثانوية البريئة اللي يتذكرها الحين فعلا يضحك عليها ويتذكر الربع اللي معاهم مواقف مضحكة والمدرسين والدقات اللي قبل ...صج ايام حلوة ...
والحين نبي الشباب ملوت قبل يذكرون بعض ذكرياتهم وانا في بالي جم واحد من اسماء الاعضاء اللي شكلهم عافسين الدنيا بس كبرو الحين وعقلو

اذكر من المواقف ايام الثانوية ان صفنا قررنا نطلع رحلة للمتحف العلمي بروحنا من غير اذن وعلم المدرسة !!!...وفعلا ثاني يوم الصبح الصف كله بمواقف السيارات وركبنا بسيارتي السوبر 20 واحد !!! وسيارة ثانية تويوتا 7 داخل السيارة و3 بالدبة!!! كان واحد من الربع مشورب وشكله مدرس دخلنا من باب المتحف ثنين ثنين طابور قالو المتحف اي ثانوية ؟ قلنا ثانوية (.....) قالو ماعندنا خبر بزيارتكم !!!مو بالجدول!!!المهم دخلونا وفرينا المتحف واخر وناسة واذكر واحد من الشباب بدل نعاله الله يكرمكم بنعال كانت معروضة بركن الملابس الشعبية القديمة لانها جديدة!!!
وبنص الزيارة طردونا قالو لنا : اتصلنا على مدرستكم وقالو لنا اطردوهم
الله وكيلك قبة ركض للسيارة الشباب...

دخلنا مطعم هندي عقب المتحف وثلاثين واحد مرة وحدة دخلو المطعم!!!
حسبنا الفلوس اللي ويانا تكفي شاي حليب و2 شباتي فقط لكل واحد ...
شوي ولا الكيما وصحون البيض والتكا تنزل على الطاولات!!!
عقب الوجبة طبعا المخفر كان بانتظارنا عند الباب لانه ماكو فلوس !!!!
ونص الربع انحاشو ...والباقي دفعو باقي الحساب عن طريق ولي الامر...
وكل الصف ريحو بالبيت اسبوع طبعا مفصولين طاحو علينا الناظر والوكيل

 

[copra]

ههههههههههههههههههه خوش طلبه منظمين رحله من راسكم جان زين كل الطلبه مثلكم

 

[دحيم 06]

ههههههههههههههههههه خوش طلبه منظمين رحله من راسكم جان زين كل الطلبه مثلكم

متبعين سياسة اكتفاء ذاتي...

تحياتي لك...

 

[iidvdii]

الله يذكرك بالشهاد أخوي دحيم
يا حلو أيام الدراسه
أنا كنت من الناس المتمرده على كل شي ما أداوم الا بعد الطابور والحصه اللي ما أحبها ما أحضرها وكنت أنجح بكل المواد الا الفرنسي وعدتها ثلاث مرات بسبة هالماده لدرجه أن ربعي تخرجوا وواحد منهم صار سكرتير في نفس المدرسه .
وكنا مسوين انا والمدرسين الكويتين طريقه للريوق كل يوم على واحد تبي تجيب من البيت أو من المطعم بس أهم شي أنه يكون راهي .​

 

[دحيم 06]

الله يذكرك بالشهاد أخوي دحيم
يا حلو أيام الدراسه
أنا كنت من الناس المتمرده على كل شي ما أداوم الا بعد الطابور والحصه اللي ما أحبها ما أحضرها وكنت أنجح بكل المواد الا الفرنسي وعدتها ثلاث مرات بسبة هالماده لدرجه أن ربعي تخرجوا وواحد منهم صار سكرتير في نفس المدرسه .
وكنا مسوين انا والمدرسين الكويتين طريقه للريوق كل يوم على واحد تبي تجيب من البيت أو من المطعم بس أهم شي أنه يكون راهي .​

اذا ثلاث مرات عايدها لازم يعطونك مكافأة اعمال ممتازة...

حياك الله يالدوسري

 

[iidvdii]

اذا ثلاث مرات عايدها لازم يعطونك مكافأة اعمال ممتازة...

حياك الله يالدوسري

ابقاك الله والمكافأه ناطرين للحين​

 

[برميت]

لوووووووووووووووووووووووووووووووووووول


والله انكم لاعبين لعب خووش موقف

بس والله ايام حلوه علي انهااا كانت دراسيه بس احلى ايااااام

بارك الله فيك اخوي دحيم واتمني لو انشوف مواقف اكثر ....

 

[ياقوت]

صج ايام حلوة​

 

[yoyo1983]

 

[Edary]

اتلذذ بذكرايات الثانويه

ولا زلت عند لقاء رفقاء الدرب

نسترجع الذكريات لتلك الايام الجميله

المواقف كثيرة لا استطيع حصرها

اذكر اني فصلت 3 ايام لمجرد ابتسامه برئه مني للوكيل ابو باسل الله يذكره بالخير كان مبهدلنا

وفي اختبارات الصف الثالث

كنا وبكل ادب نتسور الجدار وندخل المدرسه ونبرشم ( اي نكتب بخط متناهي الصغر ) على طاولاتنا بالرصاص ليسهل علينا ازالته في اليوم التالي واعادة الكره في كل مره المراد بعد ايام حس الحارس بحركشه في الجناح كنا ندخل على دفعات فخاف الصدام معنا فاكتفا بفصل التيار الكهربائي ، الشباب ما يتعطلون دق الولاعات انقزت السبرنقات لكن وفت بالغرض في اليوم التالي تفاديا لاي طارئ قمنا بالاستعانه بالشموع ( بتقول ليش مو تريكات ، لان الشموع اكثر رومنسيه وتحسسك بالامان والطمأنينه مو التريك جنك حرامي ) المراد بدعنا بالاختبارات لين جانا اختبار الانجليزي روح يالحارس وقول حق الوكيل بوباسل حبيب وداهيه ومفتح باللبن جاب اسطول ماي واسفنجات وهات دعك بالطاولات لين شفت وجهي فيها اطلع لاااا تأبا المرؤه جواب من هالشاب وكلمه من هاللطيف مشيت حالي في ثالثه ثانوي ولنا لقاء آخر باذن الله في وسولة الغش في اختبارات الفتره الاولى للصف الربع

 

[(فزاع)]

ايام الدراسه ،، ايام لا تنسى ..

من المواقف اللي كانوا الربع يسونها مع بعض ..
* اي واحد ما يغششهم ولا ما يفرض الولاء لهم .. يحطون علج بالكرسي ماله .. علشان اذا قعد عليه وقام .. نقعد نضحك عليه
عز الله خوش طفوله ..;PpP
* مرات اتكون في حصص مليغه وبايخه .. شنسوي ..؟ المساحه نروح نترسها ماي .. والطباشير انضيعهم ;pPp
*مره من المرات بعيد المعلم .. كنت ابي اعطي حق المدرس مالي هديه .. شنو عطيته تتوقعون ..؟ خيزرانه شاريها من الحواي


- تتذكرون سالفة مراقب الصف ..؟ اللي اذا المدرس يبي يروح مني ولا مناك يحط مراقب يكتب اسم اللي يتكلمون .؟ انا كنت على طول المراقب وأي واحد مو عاجبني شكله اكتب اسمه لوول >> دكتاتوري
- تتذكرون لي قالوا لنا حصة احتياط .. تشوفون الوناسه امبينه من اعيونا .. جك بم ولا ايي مدرس العربي المليغ يقول نبي نكمل المنهج عاد اشدعوه شي مهم
- تتذكرون لي ايوا يبون يوزعون افلوس المقصف .. واخر شي 3 دنانير يامال الفقر ..؟ وانا كنت حاط احلام وآماني اني راح اغتني ويعطوني افلوس وايد لوول .. حدي متفاءل


تحياتي لكم

 

[دحيم 06]

اداري

حلوة بكل ادب نتسور الجدار.....والله ايام حلوة ماتنسى...


cobra تذكر ايام الطباشير والله ايام العصر الطباشيري

سالفة الحصة الاحتياط جبتها رايت صراحة ...