تعال وتذكر الماضي ... فقط ( لمواليد السبعينات والثمانينات ) | المؤشرنت
 
 

تعال وتذكر الماضي ... فقط ( لمواليد السبعينات والثمانينات )

التسجيل
4 أغسطس 2008
المشاركات
561
الإعجابات
0
#1


تذكرون لما اييلك واحد مليق من العايله اكبر منك ويقولك تبي اسويلك ساعه وانت تمدله ايدك ويقوم يعضك ذيج العضه اللي توارص منها .



تذكرون لما كنا نصور فوري عند مصور الجمعية وطبعا غصبن عليك الخلفيه زرقه مو بكيفك ولازم تمشط شعرك بالمشط اللي عنده كله شعر وبعدين يقصلك الصورة بالآله اللي عنده ام ذراع والاطراف مشرشره يعني يكون حركه .


تذكرون ايام حصة الموسيقى قبل كان الدرس لمدة سنه عباره عن تــــــــــافــــــــــــاتيــــــــــي فـــــــــــي تاتي والصفقه بصبعين بس .... صج كان منهج صعب .



تذكرون لي شفت واحد عنده سيارة مرسيدس كان يحوشك فضول الا تبي تعرف شنو اكو بالصيدليه اللي ورى بالسياره ونقعد انطلطل بالسياره واخر شي يطلع ( بلاستر وباندج)


تذكرون اول يوم دوام بالمدرسه كانوا يسلمونا الكتب كلهم مع بعض وصافينهم من الكبيييييييييير لي الصغير وطبعا الكبير كتاب العلوم وكانوا يربطونهم بحبل عشان ما ينفلون مع 6 كشاكيل -



تذكرون المعجون الصغير اللي ريحته تبط الراس ومعاه عود لونه احمروكنا نبطله بالمقلوب ونرعصه ونلف العود عليه وننفخ عشان نسوي
تفاخيه وطبعا لاتفاخيه ولا قالها الله لين تطلع بلاعيمك منه .



تذكرون لما كانوا الاولاد يلعبون كره مبارات بالفريج واذاكان واحد من الفريق ناقص لاعب بعد ما يبيله قولجي دفاع هجوم ماشاءالله قرندايزر مو قولجي وطبعا كان اللعب لــــــي اذان المغرب اول ما يقول الله اكبر


تذكرون لما كنا نشوف افتح ياسمسم وانتأثر بكعكي اللي ياكل بسكوت ونشتري بسكوت كاكاو ونقعد ناكل مثله والوالده تصارخ من قمة راسها قطيــــــعه شنو هالشفاحه من لاحقكم خخخخخ.



تذكرون يوم الجمعة ... نقعد من الصبح علشان نسمع أغنية في عالم الشعوب قصائص لا تنتهي وعالم حلو بهي يسكن في قلوب في قصص الشعوب .



تذكرون لما كانوا بالصيف يسبحونا من الطشت والمغرافه الزرقه او الحمره لوول وانت تتنافض من البرد وتنطر متى يكتون عليك ماي اي بطل الدوش وفك عمرك....ياسلام على سياسة ترشيد المياه منذ القدم .



تذكرون تيلفون بوقرص اللي يخيب ثناك وانت تتصل وياااااااويلك يطلع الرقم مشغول لان مافي ريدايل والله يعينك لي بغيت تدق مكالمه حق
خدامتكم تلاقي اصابيعك اتعربك.....صج كانت معاناة بالعيشه.



تذكرون لما نرجع من الزواره كنا انتناجر منو اللي ينسدح ورىبالسياره صوب الجام ويطقها نومه لي البيت لالا ويتحرش بخوانه ينزل ريله عليهم يعني يكون حارهم لوووووول



تذكرون لما كنا نربط الشرشف او الفله على رقبتنا يعني يكون سوبرمان ونصعد فوق الكبت وانط على الدواشق واخر شي طاب غلط ومنكسره ايدك....



تذكرون شريط الشراغي الاحمر اللي اذا اخترب المسدس ماله مايبيله كلام حًول على كعب الوالده وكمل عليه بالكاشي والا على عتبة الباب اخر شي الوالده مكمله عليك بالكعب لووووووول



تذكرون لما كنا نحط قوطي السانكست بالفريزر عشان يثلج مع العصير الطوالي بونصين وكل ماتروح تبي تاخذه تلاقي الوالده منزلته تحت وماثلج.....راحت الفرحه .




تذكرون لما كان الاولاد يغسلون الحوش بالويك اند قمة الوناسه يمسك المساحه يعني يكون بيساعد واخر شي طايحله سكيتنج على الكاشي لوووووول وبالليل رايح الاميري.




تذكرون لما كنا نستقبل الحجاج عند الحدود من زود الفرحه واللهفه على الصوغه واخر شي جم مسواج وقحفيتين والكاميرا الحمره وسياده والبنات قطعه خام مالت هنود وساعه مينتها صغيييييييره .



تذكرون لما كنا نحب عبدالرحمن العقل ونروح مسرحياته السندباد والزرزورر والف باء تاء ولما الحرامي يكون وراه نصرخ من قمة راسنا ورااااااك وراااااااك واهوا يقول وينه وينه يميييييين يميييييين....ياعيني على الاستهبال .



تذكرون عزايم قبل والصماط المفروش على كبر الحوش اللي علىصورة ميوه ( فواكه ) وريحته لازم ريحة مطبخ وقاعدين على المده اللي لي قمت تلاقي ريلك كلها شخوط من المده....ياخي شنو هالزهد بس.




تذكرون لما هبينا في اغنيه البحريني سليمان الزيمان ولييييييييي في ربوووووووع الشمال غرام حي وزنبقه طاهره وحاطين المسجل على قاري منتزه الخيران وحد الصوت العالي وطيحله فراره بالمنتزه



تذكرون لما يبلشون الشباب يدخنون زقاير كل واحد حاط باكيت بمخباته ولافه بكلينكس عشان ما يبين من الدشداشه الصيفيه ولي شاف واحد من الربع يدخن يسأله السؤال المعهود (ها فلان تكنها ولا ما تكنها ) لووول شدعوه شي زين عاد ..وكان لازم مالبورو احمر شعار الرجوله .



تذكرون ايام الدراسه قبل يعني يكون بنشد حيلنا بالدراسه ونشتري قلم فسفوري اصفر ولا برتقالي عشان نظلل على الشي المهم اخر شي مظللين
على كل الكتاب وين الشي المهم مادري لوووول .




تذكرون ايام الكشخه قبل كانت عباره عن سيارة هوندا بيضه اكورد باب واحد ولازق على الرقم من ورى شعار نادي الكويت يعني كووول وولد العاصمه والمشط بالدرج اللي على قبضة يد حق الجاكسون وحاط بالمسجل فرقة الدانه ولا عبدالكريم .



تذكرون لما تطوروا الشباب بالطلعه عقب سوق الديره والعماره البيضه قاموا يروحون الصالحيه ويدشون محل محل ويتطمشون حجي هذا بجم وهذا بجم) لين يطردهم راعي المحل لما يعرف ان المخباة مافيها الا 1.500 حق الرده يا بالتاكسي ولا وانيت .



تذكرون اول ما يبوق الصبيان سيارة الوالد كانت الريل اليمين على البانزين والريل اليسار على البريك من الثواره .... ولازم طبعا يمر على الربع بالفريج ايتشيحط عليهم....واديلوووووو بريك وبانزين



تذكرون لما كانت جائزة البيبسي سياره بالمغاطي مالت البطول كنا الظهر نروح الحوش الوراني ونبطل السحاحير كلها وبعدين نرد نسكرهم اي كلام جود الغازات كلها طايره ومتبخره وصاير ماي مايوه .



تذكرون لمايقول الاستاد ان هذي الصفحات ملغيه ايوااااااااااا تعال شوف التشخط اللي على الصفحه من فوووووووووق لي تحت ولا انشقها خير شر من الكتاب.....شدعوه هالحقد عاد ......



تذكرون لما اتهاوش مع ولد جيرانكم وتقوله وخرعن بيتنا وعن رصيفنا يقولك مو رصيفكم هذا رصيف الحكومه
كلام منطقي الصراحه , لووول ويقعد يحوس جبال بيتكم ويمر يمك ويقولك ماحشتك ماحشتك خخخخخ .




تذكرون كمبيوتر صخر 170 لما حنينا على الوالد عشان يشتريه عشان يساعدنا بالدراسه اخر شي محولين على لعبة الاميره ام الخواتم ورامبو اللي يطير الطياره ولي دش الوالد حطينا شريط بنك المعلومات يعني استفاده لوووول .



تذكرون لما يروحون الصبيان السوق مع الوالد يشتري لهم خامات حق العيد ..اخر شي شاري طاقه كامله نفس اللون وتشوف باول يوم العيد من الوالد لي الاخو الصغير نفس الدشاديش ( تقول فرقة التلفزيون .)



تذكرون لا بغوا الشباب يشيلون حديد قبل يعبون قواطي نيدو اسمنت ويحطون بينهم بايب حديد وهووووووووبا واخر شي منكسر ه ظهورهم ....



تذكرون المسجله السوده مالت استاد الانجليزي لي دش علينا فيها قمة الوناسه اليوم ليسيننج يعني مافي اسئله ورووووح سكشن فايف .....
ترررررن تررررررن سكشن فايف.....هاي سوبر فالكون
.



تذكرون السشوار البيج بو جنطه بيضه تقول لاب توب مع الهوز جنه خرطوم طياره ( تشغله قبله بيوم عشان يصير حـــار.)


تذكرون الكشكول الادعم اللي في صوره بابا جابر الله يرحمه ومن ورى صوره بعير والمسجد اللي بالضاحيه .


تذكرون لما نقلد رقص مايكل جاكسون ونسوي حركه الرجعه وحركه الايد اللي على الجام ونغني بيييييييييييلييييييييييه بييييييييييلييييييييه شنو بيله مادري لوووول
 
التسجيل
25 سبتمبر 2008
المشاركات
2
الإعجابات
0
#2
طيرت منى النوم ورحت ووديتنى حق الماضي الحلو كل الى قلته او نقلته بصوب وسكشن فايف ::: هاى فالكون بصوب هههههههههه
لانى انا الى اركض واجيب المسجل حزتها المدرس ماله خلق يشيلها بس ايام ماتتعوض
 
التسجيل
11 سبتمبر 2008
المشاركات
495
الإعجابات
0
#3
تذكرون المسجله السوده مالت استاد الانجليزي لي دش علينا فيها قمة الوناسه اليوم ليسيننج يعني مافي اسئله ورووووح سكشن فايف .....
ترررررن تررررررن سكشن فايف.....هاي سوبر فالكون .



هههههههههههههههههههههههههههههههههه ايام حلوه تسلم حبيبي اسمحلي بنسخ الموضوع
 
التسجيل
26 مارس 2008
المشاركات
701
الإعجابات
3
الإقامة
الكويت
#5
الله اكبر عليك بترولى

مع ان الموضوع ملغووووووم ويطلع الشيااب الموجودين

بس روووعه .... وذكرياات صج حلوووه

الف الف شكر لك بتروولى:d
 
التسجيل
10 ديسمبر 2007
المشاركات
733
الإعجابات
0
#6
يعطيك العافيه .. بصراحه قعدت اضحك لأن اغلب الشغلات صايره معاى انا واخوانى...يااااااااااه ذكرتنا على الماضى والايام الحلوه
 
التسجيل
10 فبراير 2008
المشاركات
3,367
الإعجابات
0
الإقامة
K.W.T + مـجـلـس الأمــة
#7
تذكرون يوم عطيت مدرس الرياضيات طراق كف احمر ..!!
 
التسجيل
24 مارس 2005
المشاركات
10,052
الإعجابات
936
#8
عيال السبعينات والثمانينات اقول عنهم قبل عيال النيدو اذا اشوفهم :)
----------------
الله يرحم الحال يازينهم الحين فرق كبير مع عيال اليوم عيال الكلينيكس:p
 
التسجيل
4 أغسطس 2008
المشاركات
561
الإعجابات
0
#9
تذكرون المسجله السوده مالت استاد الانجليزي لي دش علينا فيها قمة الوناسه اليوم ليسيننج يعني مافي اسئله ورووووح سكشن فايف .....
ترررررن تررررررن سكشن فايف.....هاي سوبر فالكون .



هههههههههههههههههههههههههههههههههه ايام حلوه تسلم حبيبي اسمحلي بنسخ الموضوع
اي اكييييد اخذ راحتك فديتك
 
التسجيل
4 أغسطس 2008
المشاركات
561
الإعجابات
0
#10
التسجيل
4 أغسطس 2008
المشاركات
561
الإعجابات
0
#11
الله اكبر عليك بترولى

مع ان الموضوع ملغووووووم ويطلع الشيااب الموجودين

بس روووعه .... وذكرياات صج حلوووه

الف الف شكر لك بتروولى:d
من ذوقك

مشكور علي مرورك
 
التسجيل
4 أغسطس 2008
المشاركات
561
الإعجابات
0
#12
عيال السبعينات والثمانينات اقول عنهم قبل عيال النيدو اذا اشوفهم :)
----------------
الله يرحم الحال يازينهم الحين فرق كبير مع عيال اليوم عيال الكلينيكس:p

ماشاء الله عليك عيل شكلك شايب :)

الله يعطيك طولت العمر إنشالله
 
التسجيل
13 سبتمبر 2008
المشاركات
116
الإعجابات
0
#13
:) حلوه منك يا بترولي صج أيام عجيبه

ولا راعي البرد من أول مايدخل الفريج و يقول بريييد إلا الكل طالع ركض من بيته الحافي حافي و الي فرده و فرده و الي يسحب أخوه الصغير و يوصلونه بزفه لي بيوتهم متيمعين عليه جنه تقول نمل على قند ولا نطل معاه داخل ثلاجته مادري شنبي نشوف تقول بنشوف مصنع داخل :d
 
التسجيل
23 مارس 2008
المشاركات
1,020
الإعجابات
0
#14
آآآآآخ منك هيضت المواجع

ولا تذكرون المهارا اللي يدورون بين البيوت و يقولون " بياع بياع" و شايل الصره ورى ظهره :)
ولا لما تطلع الصبح من البيت و تبي تروح للبقالة و تلاقي السكة ملغمة من آثار روث بقر الفريج (أعزكم الله) و تعال دورلك سكة بينهم و المصيبه إذا كان شكلة يابس و دست عليه وطلع من داخل للحين طري ::verymad:: تعال رقع و شيل الوصخ.

والله كانت أيام حلوة و بسيطة :rolleyes:

مشكوووور على الذكريات الحلوة يا حلو
 
التسجيل
23 مارس 2008
المشاركات
277
الإعجابات
0
#15
انا اذكر ودونا للقصر الاحمر بالجهرا
وكانت رحله ممتعه وكان معنا مدرس شقردي
اخذ منا علي ربع واشتري لنا ريوق وقعدنا بمزرعه علي الطريق
والي الان لازلت اتذكر القصر الاحمر رغم انه كان بسنة 1982

اشكرك بترولي نت طلعت غبرتنا الله يصلحك
 
التسجيل
21 مايو 2008
المشاركات
569
الإعجابات
0
#17
منو يذكر المدارس بدون تكييف على المراوح هذا اذا كانت شغاله وباصات المدارس بدون تكييف وكراسيها خشب وضرب بالمطبات
 
التسجيل
3 يوليو 2008
المشاركات
603
الإعجابات
0
الإقامة
K.u.W.a.i.T
#18
شكررررررررررررااا :) انا اتذكر كنا نيييب الطشت او واحد يركب فيه او واحد يدزه من الدري ( انقلد الجندول بالترفيهيه ) الله يرحمها من ايام
 
التسجيل
30 أغسطس 2008
المشاركات
524
الإعجابات
0
#19
الله فعلا ايم حلوه
بس ودي اسأل مر عليكم ( فاول دشداشه )
 
التسجيل
9 أبريل 2008
المشاركات
395
الإعجابات
0
#20
تذكرون المعجون الصغير اللي ريحته تبط الراس ومعاه عود لونه احمروكنا نبطله بالمقلوب ونرعصه ونلف العود عليه وننفخ عشان نسوي
تفاخيه وطبعا لاتفاخيه ولا قالها الله لين تطلع بلاعيمك منه .


لوووووووووووووووووووووول


للحين اشترية حق اليهال .. مو علشان خاطرهم .. علشان اتذكر طفولتي

مشكوووووووووووور اخوي عالموضوع الروووعة
 
أعلى