باترول 2010 (سفاري) الجديد حوار ونقاش | المؤشرنت
   

باترول 2010 (سفاري) الجديد حوار ونقاش

الحالة
موضوع مغلق

TRADING

عضو نشط
التسجيل
17 أكتوبر 2007
المشاركات
216
الإقامة
kuwait
بسم الذي لا اله الا هو والصلاة والسلام علي اشرف المرسلين وعلي اله الطيبين الطاهرين وصحبه ومن تبعهم باحسان الي يوم الدين

السلام علي الجميع واسال الله ان يتقبلنا واعمالنا واياكم بهذا الشهر الفضيل

بالحقيقة موضوع اليوم هو للنقاش والحوار عن مميزات وعيوب السفاري الجديد اللي بسميه الوحش حسب ما شفت فيه من مواصفات جبارة وفخمة

فكلي امل ورجاء من الاخوة اصحاب الخبرة وخصوصا من يملكون النوع الجديد الادلاء بدلوهم ورايهم عن الموتر لانه بكل امانه دش خاطري ومحتار بينه وبين اللاندكروزر (ادري رغابة اللاند كروزر راح يدافعون عنه) بس مو كل شي بالدنيا ننظر له بالبيع بعد نبي نرضي ذوقنا وخاطرنا
انا عن نفسي لما صعدت الباترول السفاري الجديد طاح من عيني اللاندكروزر جني راكب وانيت عقب لكزس ههه طبعا كناية لحد يكون عنده وانيت ويزعل علينا

نسمع رايكم فيه واللي عنده ملاحظات اتمني لا يبخل وما خاب من شاور مع كل الشكر للجميع مقدما

وهذا رابط يعرض السفاري الجديد :

http://www.youtube.com/watch?v=0gA0kKDlFgo&feature=fvw
 

ابن ضعيان

عضو نشط
التسجيل
11 مايو 2008
المشاركات
349
لا تغرك الدعايات والكلام الفاضي ... لأن هذه الدعايات والكلام الكثير هي للفئة الأولى وسعرها 24000 ألف دينار يعني كلام فاضي.
أما الفئة الثانية فهي لعبة نيسان لأن الباترول الفئة الثانية عبارة عن أرمادا بشكل باترول , المكينة والقير وتقريبا كل شيء إلا الدبل أرمادا والسعر 14700 ...
وشوف كيف ضحكوا على الناس بالفخامة الزائفة . وهذا كلامك إنت غرتك الفخامة .
والله يا صديقي أعتقد أن شركو نيسان غبية ... قلت لأحد البياعين بالبابطين : يا أخي نزلو من سعر الباترول ( الفئة الثانية) ألف دينار بيعوه بـ13700 وشوفوا الاقبال ...
والحين شوف المبيعات الباترول صفر على الشمال وروح شوف الزحمة بالساير والبابطين
وإذا إنت ناوي تشتري جيب ومحتار بين اللاندكروز والباترول ... وكان السعر واحد ...والله لآخذ لاند أبيعه بعد ثلاث سنين بــ 12500 ( وشوف موديل 2008) ولا آخذ باترول الله أعلم عن حاله
وشكرا على الموضوع فقد كان في بالي منذ زمن.
 

الأرستقراطي

عضو نشط
التسجيل
17 أكتوبر 2007
المشاركات
7,178
الإقامة
OKBK
لا تغرك الدعايات والكلام الفاضي ... لأن هذه الدعايات والكلام الكثير هي للفئة الأولى وسعرها 24000 ألف دينار يعني كلام فاضي.
أما الفئة الثانية فهي لعبة نيسان لأن الباترول الفئة الثانية عبارة عن أرمادا بشكل باترول , المكينة والقير وتقريبا كل شيء إلا الدبل أرمادا والسعر 14700 ...
وشوف كيف ضحكوا على الناس بالفخامة الزائفة . وهذا كلامك إنت غرتك الفخامة .
والله يا صديقي أعتقد أن شركو نيسان غبية ... قلت لأحد البياعين بالبابطين : يا أخي نزلو من سعر الباترول ( الفئة الثانية) ألف دينار بيعوه بـ13700 وشوفوا الاقبال ...
والحين شوف المبيعات الباترول صفر على الشمال وروح شوف الزحمة بالساير والبابطين
وإذا إنت ناوي تشتري جيب ومحتار بين اللاندكروز والباترول ... وكان السعر واحد ...والله لآخذ لاند أبيعه بعد ثلاث سنين بــ 12500 ( وشوف موديل 2008) ولا آخذ باترول الله أعلم عن حاله
وشكرا على الموضوع فقد كان في بالي منذ زمن.

أخوي ابن ضيعان الرجال يقولك اترك عنك اللاند كروزر شيك و ان يحافظ على سعره ،،، الرجال يبي يستعمل موتر كنظره بالشارع و مميزات و فخامه ،،، آنا لو خيروني بين اللاند كروزر و ال باترول الفئة المتوسطة أختار الباترول ،،، لكن و كالة الساير بالخدمة تطق البابطين 10 صفر ،،، اذا تبي نصيحتي أطلع بالسيارتين تيست درايف بنفس اليوم يعني أخذ موعد تجريب اللاند و وراه على طول جرب الباترول و شوفهم كنعومة بالقيادة و عزل الصوت و أهم شي التكييف ،،، يقولون ان تكييف الباترول نظام سنترال جديد ،،، بالتوفيق ،،،
 

Duke wahid

عضو نشط
التسجيل
12 فبراير 2010
المشاركات
214
صحيح ان اللاند من داخل بيج والتابلون(طبلون) اسود

شي حلوووو من زمان ودي بجذيه كككوخه
 
التسجيل
10 يوليو 2010
المشاركات
82
والله ياخوي هذا زين وهاذا زين بس جنه الاندكروز احله وسعره فيه ولابق شوي اصغر من السفاري الجديد بشوي
وبالتووووووووووووووووفيق
 

TRADING

عضو نشط
التسجيل
17 أكتوبر 2007
المشاركات
216
الإقامة
kuwait
الله يرحم والديكم جميع من شارك
بن ضعيان بارك الله فيك علي رايك - انا ذكرت انه ماهو الهم البيعة بعد الاستعمال كثر ما يكون الواحد يطيب خاطره واهم شي عندي المميزات الميكانيكية والعيوب اكثر من فرقية السعر بعد الاستعمال
وانا عندي خبر ان اللاند او التيوتا بشكل عام بعد الاستعمال هو الاول بالسعر بعد ذلك ياتي الباترول او النيسان عموما

شورك حلو الاخ الارستقراطي بالنسبة للتست درايف وعساك علي القوة يا بو خالد

وبالنسبة للاخ اللي قال ان اللاند البق بالحجم ياخوك والله انا لهذا السبب حاط عيني علي السفاري لانه حجمه من داخل كانك راكب سوبر او يوكن اكس ال من السعة
وانا عندي برادو واعرف شنو يعني التيوتا بس بالسعة مع الاسف ما ينفعني لي وللاهل والعيال عسي الله يرزقنا واياكم كل خير - لذلك - من باب المساحة اشوف السفاري واسع من داخل واسهل من للاند في استعمال الكراسي اللي بالدبة لانك تدخل الراكب من باب العادي مو من الدبة مثل اللاند كروزر وبنفس الوقت الكرسي يتسفط فلات مو مثل اللاند كروزر يظل ماخذ مساحة علي الجنبين

طبعا هذا راي ومشجعني لكن ما زال اللي يشاور اهل العلم والخبرة يستقيم رايه

كل الشكر لجميع من شارك وننتظر المزيد بالنسبة لقطع غيار النيسان واستعمال مواترهم
 

sound blaster

عضو نشط
التسجيل
13 أبريل 2007
المشاركات
1,004
الإقامة
الكويت
مميزات كُل من ( اللاند + السفاري )

السفاري :

1- شكل أجمل ومميّز

2- أفضل مُواصفات

3- أوسع وأريَح في المركب

العُيوب :

1- وكاله سيّئه

2- ما يمسك سعره بعد البيع

3- سعر غالي ومبالغ فيه .. الظاهر الوكيل ناسي أن العلامه نيسان .. يظن أن العلامه لكزس على هل أسعار الي ما تدش العقل

_________________________________________________

اللاند كروز :

1- وكاله جيده نوعا ما من حيث الصيانه

2- سعر أفضل ما بعد البيع

3- متماسك من حيث الرساوة

4- شكل جيّد

5- على قولة الشيبان شيك بالجيب ..وقابل للإستثمار هه


العيوب :

1- كثر انتشاره بالشارع بس ناقص نشوف لاند كروز تكسي

2- ضيق المساحه الداخليه ..

3- غالب الي يشترونه يقعد شهر شهرين بالكثير سنه ويبيعه " لحد يسالني ليش لأني مادري ليش "


اذا أنت بتاخذ كامل المواصفات ووصلت ميزانيتك الى ال 20 الف .. طق لك جيب لكزس .. شكل ومركوب وشيك بالجيب
 

topic_love

عضو نشط
التسجيل
9 أبريل 2009
المشاركات
260
أنا معا الاخ ساوند بلاستر

اذا عندك ميزانيه اخذلك جيب لكزس احلى وافخم

وشوف السكاليد ترى هم فخم وحلو ومواصفات وتقنيه عاليه

والله يوفقك
 

ايطالي 71

عضو نشط
التسجيل
10 يوليو 2010
المشاركات
131
السلام عليكم ....
ياجماعه انا مستغرب من اللي يبي يشتري سياره يفكر في البيع قبل لا حتى يفكر شنو يباخذ ؟
انت بتشتري سياره علشان انت مقتنع فيها وبتستخدمها ولا علشان بتبيعها ؟
صدقوني يا اخوان اذا الواحد بفكر بهالطريقه بيتم على نوعيه معينه من السيارات ...
 

TRADING

عضو نشط
التسجيل
17 أكتوبر 2007
المشاركات
216
الإقامة
kuwait
الاخ ساوند بلاستر شرحك ممتع بارك الله فيك وعساك علي القوة ولو انك ظليت في نفس محور السعر بعد الاستعمال اكثر من المواصفات والعيوب الميكانيكية
ولكن اشكرك علي تنبيهك بالنسبة لمعاملة الوكيل وهي بكل امانة مهمة جدا - من له خلق يتطاقق مع موظف خدمة والسبة خدمة تعيسة

وبالنسبة للكزس موتر ولا صار بكل امانة لكن يا اخوان مشكلتي مع اللاندكروزر او حتي اللكزس انا اشوفه نوعا ما ضيج ولا يساعد حق العايلة - الا جان بتمشي فيه بروحك :) واتخلي العيال وامهم بشفر بوكس ههههههههههه

ايطالي رايك اهو رأيي المبدأي بالنسبة لشراء السيارة - بالفعل اهو الواحد لازم يفكر لي جدام انه اذا ببيع السيارة ما يطيح من قيمتها شي بس بصراحة هالشي حكرر علي اللاندكروزر او تيوتا بس - معناتها لازم ما نشوف اي نوعية من السيارات بالشارع غيرهم ونصير مثل لبنان بالبيئم ومصر بالبيجو
وبصراحة تيوتا كد ومد قول وفعل ولا ينكر هالشي الا غير عاقل لكن اشاركك الراي ودنا نرضي ذوقنا بعد خبرك السفاري الجديد يخوي له هيبة مو طبيعية من الداخل - طبعا اللي يشوف رأيي يظن اني معزم مابذني ماي - لا يا اخوان انا بطريقتي قاعد احط بعض المميزات اللي شفتها ونسمع رايكم وبالنهاية يصير القرار صلب
كل الشكر للجميع ويريت اذا في احد مجرب او له احد قريب مجرب لانه مثل ما قال الاخ ساوند بلاستر اللاند الله ما كثره وكلهم ببيعونه عقب شهر شهرين واقل من سنة بس السفاري للحين ما شفت معروض
 

Riskman

عضو نشط
التسجيل
13 يوليو 2005
المشاركات
374
الإقامة
Kuwait
سفاري

بالنسبه للي يقول لك اخذ الكامل اب ٢٤ الف او اهو نفسه ارمادا
غلطان لانه الارمادا غييييير او الباترول غير او على فكره الارمادا اخر موديل ٢٠١٠ او راح يوقف تصنيعه.

الباترول اللي قيمته ٢٤ الف مصنوع منه ٢٠٠ جيب فقط للعالم كله او حصه دول الخليج منهم ١٠٠ حبه

كامل المواصفات سعره مايوصل ٢٠ الف والعادي ١٤،٥٠٠ تقريبا

جرب الاثنين تيست درايف او انت احكم بنفسك قبل لا تشتري

او بنسبه للي يتكلم على سعر البيع بعد فتره الاستعمال اخوي شي طبيعي انك تشتري سياره
قيمتها ٣٠ الف راح تبيعها اب ٢٠ بعد سنتين ٣٠٪ من قيمتها شي طبيعي ليمه تشتري اب ١٥ الف اتبيع اب ١٠ الاف.
يعني اللي يقولي جيك او خرابيط مالها معنى قبل لاتقول جيك شوف جم دفعت في البدايه.


مواصفات الباترول افضل او اكثر من الاندكروزر.
بالسعر الباترول ارخص
الباترول شكل جديد كليا ( يبيله مو اقل من ١٠ سنوات على مايتغيير )

اخوي اذا انت راعي بر او بحر اخذ باترول او اذا انت مالك شغل بهالسوالف روح شوف انفنتي qx56 اخو الباترول بس مال زقرت.

مثل الاندكروزر والليكزس


بنسبه للدعايات ياخوي كفايه سمو الامير عنده باترول الجديد او واحد من ٢٠٠ حبه.

انا استخدمت جيبات من ٩٤ لي ٢٠٠٨
٤ باترول ٢ لاند او ١ انفنتي qx56

الباترول شيخ البر والبحر


اطلب تيست درايف او توكل على الله عقبها
 

TRADING

عضو نشط
التسجيل
17 أكتوبر 2007
المشاركات
216
الإقامة
kuwait
كلامك يبرد القلب اخوي ريسك مان ويشجع الواحد علي الاقدام ويقل التردد بارك الله فيك

باذن الله برتب معاهم علي تيست درايف وبنجرب الموتر وعسي ربك يكتب اللي فيه الخير ونعقلها ونتوكل باذن الله بعد العيد علي مزاج باذن الله
 
الحالة
موضوع مغلق
أعلى