هل بالامكان بناء سرداب في بيت حكومة ؟

[بــوعبدالله]

السلام عليكم

ياجماعة على افتراض اني شريت بيت حكومة بالقرين
طبعا بيوت الحكومة مافيها سرداب

هل بالامكان بناء سرداب ؟

اسمحوا لي ماسألت هالسؤال الا لأنه ماعندي أي خبرة في البناء

 

[majed778]

هلا اخوي

نعم بالامكان
اولا: يجب ان يكون البيت فاضي الارضي اثناء الحفر
ثانيا: يجب ان عمل تدعيم للارضيات الدور الارضي بعد الحفر
يعني اذا دشيت تحت الغرفه تحمل تدعيم عباره عن تلحيم حديد يكون سماكت الحديد صغيره وعلى حسب الغرفه ومساحتها تعمل كذا تدعيم
ثالثا: يمكن تحتاج اعمده بسيطه على بعض الجسور لكي تحط احتياطك

وكذا بيت سووها
وبيتنا قسيمه مافيها سرداب وسوينا سرداب بعد ماسكنا حفرنا تحت وسوينا سرداب
بس بصراحه تخطيطنا كان مو حلو


الله يكتب لك الخير

 

[zidantheking]

صعبه و مكلفة

لو تشتري قسيمة فيها سرداب توفر على عمرك و تفتك

 

[بــوعبدالله]

قواك الله اخوي ماجد
الغريب اني ماسمعت للحين عن اي بيت حكومي بالقرين سوه سرداب
لكن في بيان عندنا بيت حكومي سوينه فيه حوش ولكن مكان الحوش

ننظر راي البقية

 

[zidantheking]

حط في بالك لو الخرسانة مو قوية او التربة مو صالحة لبناء سرداب ممكن البيت يطيح

 

[majed778]

اخوي السرداب مافيه خطر على البت نهائيا

لان البيت يقوم على قواعد واعمده

الخطر فقط على الارضيه الغرفه او المكان اللي راح تحفر تحته
طريقة الحفر بالدركتر الصغير او عمال

والتكلفه ابسط مايكون

اذا تبي تشوف بعينك تعال الرحاب قطعه 3 وشف كذا بيت مسوي

انا سويت تحت قسيمتنا سرداب بمساحة 150 متر
دوانيه 9 في 5
مطبخ كبير وغرفه للسائق وحمام ومغاسل
والله يا اخوي انصحك اذا انت ناوي خطط السرداب من جديد وخله مشبوك مع البيت راح تتوسع باقل التكاليف

والتربه مالها خص بالسرداب انت القواعد زاهبه والاعمده
وتقدر تعزل اذا حفرت وشفت التربه كلها ماي

والله كذا واحد نصحته بالرحاب وماسمع النصيحه الحين يقولون صج كانت فرصه وندمنا عليها

الله يكتب الخير ويوفقك في بيتك
والسلام عليكم

 

[zidantheking]

تنفع بس لازم تجيب واحد فاهم و عارف شغله , لانك اذا يبت واحد خبل راح يطيح البيت مثل ما قلتلك

بلاخير لو تشتري قسيمة فيها سرداب افضل

لانه السرداب اذا بنيته 400 متر يكلفك يمكن 50 الف مع التشطيب

لكن اذا بنيته 200 متر ما يصير 25 الف يصير 35 الف

و انا اشوف انه السالفة مكلفة و ما وراها الا عوار الراس

 

[صقر3]

معقول بناء سرداب تحت البيت او تقصد في المساحة الفاضيه في الحوش؟؟؟؟

 

[فرحان جداً]

بوجهة نظري انك ما راح تقدر تبني سرداب تحت بيت الحكومه

واخذ هالمعلومه مني وتأكد مليون بالميه منها انها صح,,,,,,, لا يمكن الحفر بجانب القواعد مالت البيت واذا صار هالشيء فتأكد ان البيت راح ينهار على اللي قاعد يحفر

يعني اقصى حد تقدر تحفر فيه ...اللي اهو مستوى القواعد عندك...شوف جم عمقهم وقيسها على هالقياس اذا تسوى والا ما تسوى....بعدين شلون بتحفر يعني؟ شهالمكاين اللي بتدش لي تحت البيت وتشيل التراب وتطلعه

 

[busalih]

مو ضوع حلو بصراحة و بالتأكيد يهم اللي بيشتري بيت

أخوي أحسن لك تسأل مكتب هندسي على هالموضوع أو تاخذ تفاصيل أكثر من الأخ majed778 لأنه مجرب من قبل

بس فعلا صعبة هالفكرة ، شلون تحفر تحت البيت من غير ما يطيح عليك؟ و حتى لو ما طاح ممكن يتشقق و يميل و يتأثر الهيكل بشكل عام بس أنا ماني مهندس و لكن المنطق يقول جذي؟؟

أتمنى احد يشرح تجربته و كم كلفه و عند اي مقاول ، و اعتقد إن أسهل تبني سرداب في حوش البيت و الله أعلم

 

[majed778]

السلام عليكم

والله كلامك صحيح اخوي busalih

الموضوع شيق وحلو

انا سويت السرداب وواجهت كلام وانتقادات كثير والحين كذا بيت سوا سراديب

ولد عمي الحين يخطط سردابه بالنهضه تحت البيت الحكومي وراح يشبكه مع البناء الجديد( الحوش )

ياجماعه محد يحفر تحت القواعد

الحفر لين توصل القواعد بس يعني الارقاب وانت وحظك اذا الارقاب كبيره راح يكون حلو


واحسن شي بيوت فهد الاحمد السرداب جاهز تحت بس يشيل الرمل
والبيت مو شايله الرمل
اللي يبي يسوي بيته انصحه يسال المكاتب اللي مشتغله بهالشي مو اللي مايعرف

والسلام عليكم

 

[BMW750]

نعم تهدم البيت وتبنيه من جديد اضمن حل

 

[الحريه وطن]

سؤال وجيه واستفدنا منه كثيرا

 

[بوو عبدالرحمن]

صباح الخير

ما انصح نهائيا اعرف جم واحد بنى سرداب كان بيخسر البيت بالكامل

 

[ostath]

بما اني مهندس مدني..راح اقول رايي ..الشغله فيها مخاطره كبيره...بسبب انك راح تخلخل التربه اللي تحت البيت...و البيت ممكن يصير فيه هبوط و تشققات و مشاكل و فوق هذا الشغله راح تكلف وايد...اهم شي بالبدايه اذا بتاخذ راي مكتب هندسي لازم يشوفون المخطط و عمق الاساسات و توزيعها​

 

[zidantheking]

اذا كان عندك البيت بيعه و اخذ فلوس السرداب و اشتر فيهم بيت فيه سرداب

و اذا ناوي تشتري اخذ بيت فيه سرداب بلاساس

يعني تقط 30 الف على سرداب صغير و تخاطر بلبيت يمكن يطيح يمكن يصير فيه شيا بعد كم سنة

او تقط 20-30 الف و توفر و تاخذ بيت فيه سرداب و مضمون

شرايك ؟؟

 

[خالد32]

حطلك دور فوق البيت اصرفلك من السرداب اغلب اللي حطوه مااستفادو منه شئ خلوه مخزن لاتكييف يضبط ومكلف

 

[q8ihome]

مع احترامي للمهندسين جميعا الي منفذ هذا العمل ومتمرس به وشايف عواقبه ويتفاداها بغير الي ماسك قلم وورقه يخطط لها , وانا مقاول بس مانفذت نفس ما سبقوني اخواني بالمهنه لكن فكره ممتازه واشجعهم والاخص اخوي zidantheking , وموفق خير للجميع