بغيت مشورتكم بمشاكل تاجير التناكر والنسافات ضروري

[Bsmbsm]

مساء الخير جميعاً

حبيت الاخوان اللي عندهم فكره عن مشاكل وعقبات تاجير التناكر والنسافات

للشركات يفيدوني جزاهم الله الف خير ويرزقهم من حيث لا يحتسبون

من حيث شروط العقد - قيمه الإيجار- مده الإيجار- طريقه دفع الإيجار- حاله المركبه بعد الإيجار-...... الخ

اي مشكله صادفتك او تبيوني انتبه منها

واحب أذكركم بقول الرسول صلي الله عليه وسلم ( احب لأخيك المسلم ماتحب لنفسك)

أتمني تفيدوني وعساها في موازين اعمالكم يارب

.

 

[أ ح ـمد]

والله ياخوي ليتهم يفيدونا . .
وأن شاء الله الاخوان مايقصرون . . منتظر الرد منهم

وانت ياخوي اذا لك خبره بسيطه بهالمجال ياليت تراسلني ع الخاص ابستفيد منك
لآني بصراحه هالفتره هذي بشتري نساف وبستأجره على الشركات . . ياليت لو عندك اي معلومه عن هالشغله تفيدني . .

وبارك الله فيكِ

 

[Bsmbsm]

حياك الله يا احمد

أنا للامانه ماجربت لحد الان وعلي وشك توقيع عقد تاجير هلاسبوع مع احد الشركات وابشر من عيوني من اجرب أعطيك الاكو والماكو  على قولتهم

ولا زلت بانتظار الاخوه اللي عندهم خبره يفيدونا

يا شباب لحد يبخل بمعلومه قد تكون سبب فتح رزق لك وانت ماتدري

.

 

[أ ح ـمد]

الله يحيك ويبقيكِ ياخوي وعسى الله يرزقك بالدنيا والآخرى . . .

 

[Bsmbsm]

الله يبارك فيك ويسلمك اخوي احمد ويرزقك

عالعموم أنا بجرب وامري لله وعسى الله يكتب اللي فيه خير

بس بخاطري ان الاخوان يفيدونا عن العقبات اللي ممكن اواجهها مثل نع سايق احسن والا بدون سايق والديزل عليهم والا علي احسن ومده العقد

ياجماعه لحد يبخل علي بمعلومه

.
*

 

[بو بـدر]

لا تستعجل ولي عوده للموضوع

 

[Bsmbsm]

بو بدر الله يحييك

وفي انتظار ملاحظاتك واللي حاب يحط ملاحظاته هني والا ع الخاص رغم اني افضلها بالعام ليستفيد جميع الاعضاء

.

 

[Bsmbsm]

للرفع

في انتظار المشوره

.

 

[saadkuwait]

شوف أخوي بخصوص التناكر ما انصحك فيها وهذا رأي
اما النسافات فاذا تبي تشتري تكون نسافات 32 فقط قلاب
لانها مطابقة للمناقصات الحكومية
اما بخصوص السواق أجر النسافات بدون سواقيين لصعوبة الحصول عليهم
اما الديزل موضوعه بسيط وكل العقود تكون مع الديزل
وبخصوص الصيانة وبخاصة التواير هذي تكون عليك بكل المناقصات
التأجير يكون ابتداء من 1500 بدون سائق
و 2000 دينار مع السائق
اذا اشتريت تقدم على شركات الخرافي والخالد تقول لهم عندي نسافات وراح يرحبون فيك
بشرط ان تكون كمية لا تقل عن 3 سيارات
وعلى فكرة المشروع جدامربح ولكن متعب من ناحية المراجعات ولازم يكون عندك شوية صبر
لان المناقصات راح تكون متقطعة
وعلى فكرة اهم شئ ان تكون السيارات حديثة
يعني فوق موديل 2000 غير جذي لا تتعب نفسك
وانصحك بالكرين
وايضا السطحات للمعدات الثقيلة
وايضا أذا كان عندك رأٍس مال تشتغل على التاجير
يعني تأجير معدات تبدأ من الماسحة الى الرافعة الثقيلة
الاسعار المعدات نار ولكنها استثمار رائع تعادل العقار

والله الموفق
وان شاء الله الاخوان ما راح يقصرون معاك في النصيحة

 

[Bsmbsm]

سعد ماقول غير بيض الله وجهك علي الشرح الطيب

بس ما وضحت لي يا سعد ليش ما تنصحني بالتناكر؟

وشنو الصعب في المراجعات ؟ لأني اعتقد ان الاجراءات كلها عقد يبرم ويتم الاتفاق بينك وبين الشركه

وبالنسبه للسائق اعتقد حسب رأيي انه من الافضل انه يكون موجود وذلك للحفاظ على المعده واذا كان الفرق خمسميه فاعتقد انه افضل بعد لأنك بتاخذ ٢٥٠ علاقل في مخباك زياده

اخر ملاحظه اخوي سعد اعتقد ان من الافضل انك تشترط ساعات العمل ٨ ساعات باليوم عشان ما يسكربون السياره بالاستعمال وتستخدم ١٦ ساعه او اكثر باليوم واعتقد لمن يكون السايق موجود تقدر تضمن ساعات العمل تكون ٨ ساعات واذا زادت كل شي باتفاق

وجزاك الله خير علي النصيحه الثمينه *

 

[saadkuwait]

شوف أخوي التناكر ما عليها طلب يعني تواجه صعوبة بأخذ التعاقد مع الشركات
واذا أخذت ما فيها فايدة قوية يعني تحصل لك 300 الى 350 دينار ولا شئ
هذي سالفة التاكر
أما التعاقد وصعوبته يبيلك خبرة هذا المقصود واسلوب وشد وربط لان هذا حلالك يعني صعوبة في التعاقد والحزم في بعض الشروط
من غير نقل
وفوق كل هذا لازم يكون عندك مكان آمن ( مواقف لسيارات )
بخصوص التأجير للنسافات يفضل بدون سائق
قول ليش
الكويت تعاني من عدم وجود سواقيين معدات ثقيلة ( يعني نسافات وانت طالع ( مافي بالكويت قلة
والموجودين العرب مثل السوريين يشتغلون على سياراتهم
بس اذا انت شاطر تقدر تجيب من الهند بس راح تتعب لانهم ما يجون بالساهل
رواتبهم بالكويت من 350 دينار الى 600 دينار
350 للوافد الهندي
والباكستاني من 400 الى 600
ما انصحك بالعربي أبد لانهم يخربون المعدات طبعا مو كلهم بس كمية لابأس فيها
---------
مافي شئ اسمه عمل 8 ساعات او 12 ساعة في التعاقد
راح يحاسبونك عن طريق الدرب
يعني يقولك
عندنا درب أو دربين ( يعني حمولة أو مشوار من _ الى )
والله الموفق
وان شاء الله الاخوان في المنتدى ماراح يقصرون باستفساراتك

 

[أ ح ـمد]

كلامك سسليم أخوي وبيض الله وجهك . . عزالله ماقصرت

 

[بو بـدر]

الاخ سعد ماقصر واحب ازيد جم نقطة على كلامه

اذا نويت تدخل في هذا المجال لازم يكون شويه علاقات علشان تضمن استمرار العقود ونسافك يشتغل

وشي ثاني هناك البعض علشان يدخل مناقصة مطلوب فيها عدد كبير من النسافات يجمعها من الاشخاص الى عندهم نساف او نسافين وبعد ماتسرى عليه المناقصه بشهرين او ثلاثه يطلع النساف صحيح بينكم عقد ولكن بالنهاية انت راح تسحب نفسك من موضوع لانك راح تعطل نفسك

الشركات تبحث عن شخص عنده اكثر من نساف او تفضل هذا الشي

الافضل انك تاخذه كاش اذا تقدر مع ان البعض يفضل ياخذه اقساط ومن التأجير يدفع السقط وياخذ باقي الارباح ولكن مثل ماقلت لك النساف ماراح يتم شغال علطول

ابتعد عن المشاريع البعيده والمرهقة للسيارة واسئل قبل الدخول مع شركة اصحاب النسافات والسواقين عن درب هذا المشروع

كل شركة تطلب نساف عندها شروط مثل موديل 2000 نساف 32 ألخ من الشروط الواجب توافرها

اجر النساف من غير سواق افضل واريح لك

كون علاقات طيبة مع السواقين لانهم اهل الشغله ويعرفون تفاصيلها بخصوص القطع الميكانيكية والانسب للسيارة

والله يوفقك وعيدك مبارك

 

[Bsmbsm]

مشكورين والله وما قصرتو

اخ سعد ما قصرت كفيت ووفيت

بو بدر رايتك بيضا يالغالي

جم اسعار نساف ٣٢ موديل ٢٠٠٠ ونت طالع؟

عالعموم اقتنعت انه بدون سايق افضل رغم اني كنت متوقع العكس

الف شكر وتقدير للجميع

.

 

[ابن النصير]

للرفع شصار عليكم يا اخوان تنصحون انخوض التجربه

 

[Jaber_1234]

للرفع شصار عليكم يا اخوان تنصحون انخوض التجربه

السلام عليكم ياليت تفيدنا في هالمجال او احد الاخوان الي خاضو التجربه انا الفكره هذي ببالي صارلها فتره طويله بس ابي واقع تجربه من شخص ف ياليت احد يفيدنا

 

[Jaber_1234]

مشكورين والله وما قصرتو

اخ سعد ما قصرت كفيت ووفيت

بو بدر رايتك بيضا يالغالي

جم اسعار نساف ٣٢ موديل ٢٠٠٠ ونت طالع؟

عالعموم اقتنعت انه بدون سايق افضل رغم اني كنت متوقع العكس

الف شكر وتقدير للجميع

.

السلام عليكم ها بشر ياخوي عسى الامر مشت تمام .. للامانه انا مثل حالتك وافكر بهالشي تنصحنا بعد تجريتك ولا ماتنصحنا