السلام عليكم اذا احد عنده خبره بخصوص بطاقات الشراء من الانترنت يفيدنا الله يرحم والديكم مثلا البطاقه الفلانيه من البنك او الشركه شلون طريقه ايداع الرصيد وشنو المطلوب وشلون اقدر اسحب الرصيد الي فيها الي عنده خبره يفيدنا الله يخليكم الي ابيه بطاقه اقدر اعبيها رصيد واشتري من النت واحولها الفلوس واذا بغيت اسحب منها وشكرا
وعليكم السلام اخي الفاضل هي عباره عن بطاقه تاخدها من البنك الخاص بيك او اي بنك اخر مثل بيت التمويل وعلي حسب المبلغ اللي تبيه يعني مثلا يعطونك رصيد 50 دينار ويكون قيمة الاشتراك 5 دينار بالسنه وفي حالة بغيت اكثر يعني 100 بيكون قيمة الاشتراك 10 وهكذا واذا خلصت رصيدك وتبي زياده بتروح علي البنك وتعطيهم المبلغ اللي تبيه وهما يعبولك البطاقه او لو حساب راتيك علي نفس البنك يصير تحول اما عن طريق التلفون او عن طريق النت وطبعا الدفع بيبقا اجل بمعنا انك لو سحبت المبلغ ما بينخصم من في نفس الوقت يتم خصمه بعد شهر هذا كل اللي اعرفه عن بطاقة النت اتمنا من الله ان تكون استفدت اخي تحياتي وشكرا
اخوي خالد مشكور على الرد وياليت كل الناس مثلك والله بس عندي كم سؤال اذا تسمحلي البطاقه مقبوله بمواقع النت كلها؟ اقدر احولها رصيد من مواقع مثلا PayPal او كاش يو واقدر اسحب منها فلوس كاش من السحب الالي ولا بس شراء بالنت؟ ولو سالفه الرسوم السنويه ضيقه خلقي بس اشكرك والله من قلبي على ردك السريع
هلا بيك اخ عزيز وغالي للاسف مو كل البطاقات اللي تقبل paypal يعني تمويل نت مثلا ما تقبل وللاسف ما تقدر تسحب منها الا للنت هذا بالنسبه للتمويل نت وما ادري عن البنوك الاخره واي استفسار انا حاضر تحياتي
السلام عليكم اخوي روح لمحلات الفيرجن اللي بالمطار والمارينا قولهم ابي الماستر اللي تتعبأ سعرها ب 10 اول مره وبعدين ما تدفع رسوم وماتدفع شي بس انت تعبيها من اي بنك برقان وانا مجربها وتستخدمها دولي عليها شعار ماستر كارد واذا تبي معلومات اكثر 9720866 هذا رقمي اتصل وانا اقولك بس اتصل بعد العصر احسن
وعليكم السلام والله يجزاك خير اخوي بس ابي اعرف اذا ممكن اقدر اسحب منها كاش من السحب الالي؟ وتقبلها مواقع النت ولا لا؟ وطريقه التحويل لازم من بنك برقان ولا من بنك ثاني تحويل عادي ؟ وشاكرلك استجابتك اخوي والله يكثر من امثالك
السلام عليكم انا عندي فيزا الوطني الالكترونية يعني ما تقدر تسحب منها وتاخذ كاش الا عن طريق الانترنت رسوم استخراجها صفر دينار اول سنه مجانا وبعدين كل سنه ب 5 دنانير والميزه الحلو بالفيزا هذه انها ما تصير بالسالب يعني متى ما اشتهيت تحط فيها تحط وتشتري وفيها مميزه بعد ان الفلوس تتحول مباشره من الحساب العادي الى حساب الفيزا
اخوى عندك موقع اسمه كاشيو تقدر تشرى كرت تعبئه من حولى على حسب فئه السعر الدفع المسبق تنباع هذى البطايق بحولى ش ابن خلدون مجمع القيروان شركه كاميو تقدر تشترى من المواقع وامازون اذا تبى موقع كاشيو https://www.cashu.com
اخوي تقدر تاخذ منها كاش بس اللي حطيت الفلوس تسحبها بس وكل مواقع النت يقبلها اي لازم تعبيها عن طريق برقان
استخدمت و لا زلت فيزا انترنت البنك الوطني .. ما تسحب منها كاش .. لكن تقدر تتصل على البنك و تقولهم حولوا على حسابي العادي من فيزا الانترنت .. و تسحب الفلوس من كرتك الكينت العادي .. تقبل في جميع المواقع اللي تقبل الفيزا عادي .. و استخدمتها في ال Paypal و Amazon و worldpay و حجز الفنادق اونلاين و باقي المواقع عادي جدا .. طبعا مثل ما قال الاخ .. اول سنه مجانا و كل سنه بعدين 5 دنانيير .. تقدر تعبيها من حسابك الوطني عادي عن طريق التلفون او عن طريق النت وطني اونلاين بنفس اللحظه تحول .. و طبعا تقدر تسوي ايداع في حساب عن طريق البنك او عن طريق تحويل من حساب اخر في بنك اخر او عن طريق مكاين الايداع مالت الوطني اللي صارت في كل مكان و بعدين تحول على البطاقة مثل ما قلتلك اونلاين او بالتلفون .. في بطاقات ثانيه نفس الطريقة و نفس الاليه بس هذي تقدر تسحب فيها من اي مكينه عادي كاش .. بالوطني اسمها فيزا الهدية .. و هذي تشتريها بقيمه محدده مثلا 100 دينار .. 500 .. الي تبي .. و يكون فيها هذا الرصيد .. تسحبه كاش .. تستخدمه بالنت .. كيفك .. و بوبيان في عنده نفسها اسمها فيزا مسبقة الدفع .. يا تعبيها عن طريق النت او البنك نفسه .. و تسحب كاش فيها او بالنت .. و مقبولة في كل مكان مثل الوطني .. انشالله تكون حصلت اللي تبيه
السلام عليكم ورحمة الله وبركاته أنصحك ببطاقة فيزا انترنت لبنك الخليــج تقدر تحط المبلغ اللى تبيه بدون تحديد والرسوم 5 بالسنه وتقبل بجميع المواقع وتقدر تستفسر منهم على رقم 805805 وتحياتي لك .
بيض الله وجيهكم كلكم وما قصرتوا والله وعساكم ذخر وانا صراحه سمعت كلام اخوي sporty لان هالبطاقه هي الي ابيها رحت للمطار وشريتها قيمتها 10 رسوم اصدار البطاقه 5 دنانير و5 دنانير كبون مشتريات من عندهم والتعبئه ببنك برقان واقدر اسحب فيها من اي مكان سحب الي حول العالم وجميع مواقع النت تقبلها واقدر احولها الفلوس من برقان نت او من بنك ثاني الله يجزاكم كل خير وصج صج ما قصرتوا
السلام عليكم اخوي عندك بنك بوبيان في بطاقه شامله سحب فوري انترنت مكالمات سفر اللي تبيه استخدام شامل رسومها دينارين ونص وتعبيها من 10 الى 500 وتقدر تعبيها بالكي نت او عن طريقهم برسوم دينار وصلاحيتها سنه وتقدر تجدد ولا تطلع غيرها على راحتك
foxmond الله يعطيك العافيه اخوي وهذي نفس البطاقه الي اخذتها بس الفرق بينهم ان مالت برقان الي اخذتها تقدر تعبيها من مكينه الصرف الالي بالمبلغ الي تبيه يعني لو الساعه 5 الفجر وبيوم عطله تقدر انت تحط فيها فلوسك عموما شاكرلك وماقرت والله
هلا اخوي .. انا عندي فيزا الانترنت من بنك الخليج .. صراحة وايد مرتاح فيها وممتازة لان انت ما تحط فيها قيمة ، يعني لو مثلا باقوها منك ما راح يستفيدون .. الحد الاعلى المسموح فيه 200 دينار ، انا عن نفسي قايلهم ابي 100 دينار بالوقت الحالي .. واذا احتجت مبلغ اكبر من 200 دينار تقدر تحول من حسابك لحساب الفيزا عادي .. بشكل عـام ، البطاقة هذي مقبولة بمعظم المواقع (ما يوم واجهتني فيها مشكلة) وانا مسجلة بالـ Paypal عن طريق هالبطاقة وكل شي تمام وشغال 100% .. وبالنسبة للسحب الكاش ما تقدر تسحب كاش منها .. ان شاء الله اكون فدتك واذا بغيت اي معلومات ثانية انا حاضر
بالنسبة للسحب الكاش ما تقدر تسحب كاش منها . هذي اهم ميزه ابيها صراحه ولقيتها في بطاقه برقان الي اخذتها عموما شكرا لك وماقصرت وكل الشكر لجميع من رد في هذا الموضوع
