عضوه جديده

[كويتيه]

السلام عليكم ورحمة الله وبركات

هذا اول موضوع اكتبه في المنتدى الرائع
انا احب الاسهم وااايد وكنت اتمنى اشتغل فيها وصارلي فتره اقرأ مواضيعكم وعجبني الاحترام المتبادل بين الاعضاء وعندي جم سؤال شلون ابدأ بالسوق مع اني ماعندي الا خبره قليله فيه لاني دارسه بنوك ياليت احد يساعدني وشنو احسن الشركات

ومشكورين
اختكم كويتيه

 

[50 فلس]

اهلا وسهلا بالاخت كويتيه

اشكر اولا على بدايتج على الاعجاب بالاخوان الاعضاء

وثانيا انا نرحب بسيدات الاعمال

وعلى دخولج السوق وانشالله يكون فال خير علينا بعد الهبوط الى من يومين .

على سؤال ماهى الاسهم التى تكون زينه انا

اولا هل انتى مضاربه او استثمار مدى طويل ؟

ويعتمد على حسب المبلغ اللى عندج . بس نصيحتى لا تدشين باسهم خشاشه واولهم سهم البحريه
واذا قررتى هل انتى مضاربه او استثمار مدى طويل ساجاوب
اتمنى حظ سعيد

 

[كويتيه]

مشكور اخوي 50 فلس على الترحيب والتشجيع واسلوبك الراقي
بالنسبه لي بدش بالسوق مضاربه احسن كبدايه لاني بدش في مبلغ بسيط

واتمنى التوفيق للكل

 

[50 فلس]

والله خايف عليج

للمضاربه يا المال للاستثمار او لولوه العقاريه ....

بس نصيحتى ما دام اعلانات الارباح والتوزيعات بعد اسبوعين بالكثير, براى ان تشترى باسهم لها توزيعات جيده

 

[أبو مشاري]

يا مرحبا بالكويتيه

مرحبا بالاخت كويتيه ومثل ماقال اخوس 50 فلس انشالله تكونين فال طيب بالسوق بعد النزول000

وبخصوص سؤالك اول شي انا انصح انك تتعاملين عن طريق شركة الاوسط للاستثمار المال مكانهم بناية البنك العاقاري الدور العاشر عن طريقهم ممكن تشترين عن طريق الانترنت وتتابعين الاسهم عالهوا مباشره وبطريقه ممتازه وبامكانك الشراء والبيع عن طريق الاتصال بالهاتف بهم ايضا0

اما بخصوص الاسهم 000
شراء السهم يجب ان يكون بطريقه مدروسه اي نرجع لارباح الشركه ان كانت متازه او متوسطه او سيئه ونقارن سعر السهم بالنسبه للتوزيعات وعلى اساسها نشتري فمثلا00
سهم الاسماك توصيه مجلس الاداره 40 فلس للسهم كتوزيع ارباح عن السنه الماضيه وسعر السهم حاليا 250 فلس وهناك الكثير من الاسهم اللي سعرها اعلى من سهم الاسماك وربحيتها اقل بكثير اذا فهذا سهم له مستقبل بالارتفاع القريب انشالله او على الاقل سهم ما يخوف0

واذا اخترتي سهم شركه مثلا ربحيتها ممتازه فلا تشترينها وسهمها مرتفع قارني بين اعلى سعر وصلته واقل سعر خلال فتره تقريبا كم شهر وعلى اساسها اشتري فمثلا سهم الوطنيه العاقاريه حاليا 510 فلوس بالمقارنه قبل كم شهر كان سعره اقل شي 450 فلس واعلى شي 620 مع العلم ان الشركه ارباحها ممتازه الربع الثالث ولم تعلن الرابع اللي هو الاخير وانشالله انها ممتازه ارباحها المهم اذا فان سعر السهم حاليا ممتاز اي انه قريب للقاع اكثر من القمه اي ان المجال للارتفاع اكثر انشالله من النزول 0

ارجو ان اكون قد اوضحت بعض المعلومات البسيطه التي انشالله تستفيدين منها انتي وكل الاخوه وارجو لك ولكل الاخوه التوفيق والربح بسوقنا الحلو0

وارجو من الاخوان ايضا ان يوضحوا لك اكثر حيث انهم لديهم خبره اكثر مني بالسوق وانا استفيد منهم شخصيا0

ومع تحياتي لكم جميعا

 

[مستثمر فقير]

السلام عليكم

اهلا بكل عضو جديد


واقول يا اختي كويتيه انه الدراسه شئ............. وسوق الكويت للاوراق الماليه شئ ثاني


الدراسه قد تنفع مع اي بورصه بالعالم بس ويه بورصة الكويت انا اعتقد انه لالالالالالالالالالالالالالالالالالالالالالالالالالالالالالالالالالا تنفع

اتمني لكي التوفيق ....... والمنتدي فيه مجموعه طيبه ولهم خبره
وماراح يقصرون مع اي شخص يطلب المساعده

واقول يا شباب يوم السبت اطلبوووووووووووووووووووووووووووووو الدواجن بالحد الاعلي ......... والي يحصل هذا امه تحبه.......... السهم فيه بركه قويه

والله اعلم والله اعلم والله اعلم

 

[محمد2]

أرحب بالأخت أو البنت الكويتيه

وأتمنى لها التوفيق

وأهديها هذه الوصله لما بها من فائده عظيمه لكل من يعمل بسوق الأسهم

http://**********.com/vb/showthread.php?threadid=44917


والشكر للأخ رجل أعمال الذي الذي أوردها والأخ الكاتب أبو ناصر

فهي فعلا تستحق الرجوع لها من وقت لأخر

 

[123456]

اهلا وسهلا فيج يا بنت الكويت اللى اقوله اذا مالج قلب قوى وصبر وطولت بال بالاسهم اللى راح تدخلين عليها لا تدخلين من اولها ولا دوخين راسج ترى سوقنا مو سوق اوادم سوقنا سوق ناس وناس يعنى من مجرد اشاعه صغيره تنتشر مع الهوى بالسوق او من اخوانا الصحفيين يتبهدل سهم قوى ويصعد سهم ضعيف يعنى راح تدرسين سهم وتعرفين قوته وفجاءه تلقينه بالقاع شلون هذى تعرفينها بعد ماتدفعين ثلاث دنانير بالطابق السادس وتسوين لج رقم تداول وتجهزين دفتر الشيكات وتشترين بعدها راح تعرفين هالسوالف والنصيحه عدم الاستجال مع ان الوقت الحالى وقت شرا لا ربعنا 90% منهم اشترى وقت صعود السوق وتعبو وهم يبردون على اسهم والله يعين الجميع وبالتوفيق لج ولربعنا وانشاء الله على دشة السوق يصعد وتكونين فال خير علينا ترى ملينا وحنا ننطر والله يستر لايرجع السوق ويصير مثل سوق 98

 

[الريان]

لاتعليق

 

[كويتيه]

50فلس
الريان
مستثمر فقير
محمد2
ابو سلطان
123456

مشكورين على المعلومات واتمنى للكل التوفيق

اختكم كويتيه

 

[50 فلس]

العفوا كويتيه ما سوينا الا الواجب بس نصيحتى اخذى بشركه المخازن العموميه

شوفى اخر يوم تداول كان الاقفال 1.280

واذكريها بعد اعلان توزيعات جم راح يصير لاتنسين التوزيعات 70 فلس للسهم و25% منحه
اتمنى لج التوفيق

 

[أبو عبدالمحسن]

هلا

الرسالة الأصلية كتبت بواسطة 50 فلس
العفوا كويتيه ما سوينا الا الواجب بس نصيحتى اخذى بشركه المخازن العموميه

شوفى اخر يوم تداول كان الاقفال 1.280

واذكريها بعد اعلان توزيعات جم راح يصير لاتنسين التوزيعات 70 فلس للسهم و25% منحه
اتمنى لج التوفيق

من وين جبت هالتوزيعه يبه المخازن ماقولوا ولا كلمه بعد ولا حتى اعلان اجتماع مجلس الاداره

ارجوا التاكد من كتابه اي خبر

تحياتي

 

[قلنا لكم]

نصيحه للاخت كويتيه

بالبدايه اشكرك على المدح لكل الاعضاء
وثانيا اتمنى لك التوفيق في خطوتك الجديده الدخول في عالم الاسهم
شوفي اختي
حاولي اول شي تتابعين عن طريق الجرايد الاخبار
وتتابعين الاسهم وحركتها لمده طويله
وهذه موجوده في موقع الاوسط دوت كوم يعني تشوين حركة السهم من 3 او 6 شهور مضت
او سنه او اكثر
وشوفي حركته شلون صايره وشوفي اوقات الارتفاعات في اى وقت من السنه وهل واعتقد راح تشوفين انه الارتفاعات اغلبها عند اعلانات الارباح الربع سنويه
وانصحك ان تدخلي الاوسط وتشوفين طريقته واشتركي معاهم بس اذا فكرتي بالشراء اسئلي الاخوان هني وتاكدي ان الوقت مناسب للشراء
وانا اقترح عليك الاستثمار بالاسهم وليس المضاربه
الاستثمار متوسط الاجل يعني من 1 الى 3 اشهر
واختاري الشركات اللي توزع ارباح ممتازه لانه لاخوف منها لو لاسمح الله هبطت بعد شراءك لانها ستتعافى من جديد
نصيحتي لك ان تختاري شركات اسعارها متوطه مابين 250 فلس الى 500
وهني اعتقد فيه كثير شركات شغلها حلو في هذه الاسعار على سبيل المثال المال الاستثماريه والمال العقاريه وشركة عارف وبيت التمويل الخليجي والتمويليه
واسف على الاطاله

 

[50 فلس]

بوعبدالمحسن يطولى عمرك

هذى توقعات تم الاعلان عنها فى الجرايد من قبل محلليل للشركه والاعلانات بالطريج

 

[التكانة]

عسى الله يوقفنا وإياك

السلام عليكم
اهلا وسهلا فيك اختي كويتيه وديري بالك زين من السوق وشاوري قبل لا تشترين اي سهم الشباب اهني او اذا كان عندكم احد من الاهل عنده خبره في هذا المجال ولا تشترين سهم عشوائي وللأسف وايد جذي يشتري سهم عالبركة واحيانا تضرب معاه ولكن موزين جذي لأن مرة تصيب وإمية تخيب المهم ركزي على الشركات ذات الأرباح القوية وذات العقود الكثيرة المستمرة وأيضا مثل ماقالو الاخوان لازم تعرفين سعر السهم من قبل كم شهر كم كان وسعره الحالي كم عشان تعرفين اهوا الحين بالقمة ولا بالقاع اذا كان بالقمة ماينصح بالشراء عادة المهم مابي اطول وأتجرأ جدام فطاحل المنتدى أخيرا أنصحج وأصح إخواني بهذا الموقع لأن يحتوي على رسومات بيانية وأخبار أول بأول وتحاليل فنية وإن شاء الله تستفيدون وعسى الله يرزقنا وإياكم رزق حلال ويبعدنا عن الحرام
هذا الموقع www.occkw.com

 

[كويتيه]

بديت اتردد لان فعلا السوق يبيله وقت علشان الواحد يعرفله
ومشكور اخوي التكانه و50 فلس وقلنا لكم على النصايح وانشالله ماراح اشتري
الا لما اخذ رايكم لان عندكم خبره وانا معتبرتكم اخوه وماقصرتوا


اخوي ابو سلطان حبيت اسألك شركة الاوسط للاستثمار وين مكانها بالضبط
وشلون الطريقه معاهم ومشكور

 

[50 فلس]

اظن عند بنك الكويت والشرق الاوسط الرئيسى الدور السادس او السابع

بس السالفه فيها رسوم

 

[الوطني2]

الأوسط ببناية البنك العقاري الدور العاشر
و فتح الأكاونت بالمجان واذا تبي يعطونك الأستريم اول شهر مجان والثاني بعشرين دينار ...