ماذا تعرف عن الببغاء الأمازوني؟

[حقائق]

السلام عليكم,

هل تعلم بأنه يوجد أكثر من 30 نوع من الببغاء الأمازوني و موطنهم أميركا الجنوبية. و هل تعلم بأن النوع المسمى ب يلو ناب "نيب" Yellow nape (يعني في مؤخرت رقبته لطخة صفراء) يعتبر من أفضلهم من حيث تعلمه للكلام؟ لو يحصل لي واحد بألف دينار أشتريه بدون تردد, و للحديث بقية باذن الله.

تحياتي

 

[yoyo1983]

شكرا لك

 

[حقائق]

شكرا لك

العفو,

ارفق صورة ببغاء أمازوني يسمونه بلو فرونت أو بلو فرونتد Blue-fronted .. هذا موجود عندي بالبيت و هو يعتبر ثالث أفضل نوع من حيث قدرته على تقليد كلام البشر بعد Yellow-nape و double yellow أما باقي الأنواع ال 27 قطوهم بحر أو حطوهم على الشجر ما يعرفون يقلدون الكلام.

آنه سمعت النوع الأول يغني وطني الغالي ..الخ و كذلك أوه يا الأزرق .. و هبي بيرث دي تو يو .. و يأذن بعد (الله أكبر .. الله أكبر).

فيه خبيره أميركية تقول أن كل الثلاثة أنواع ذكاؤهم و قدرتهم على التقليد نفس الشي بس يعتمد على المدرب. أما البلو فرونتد فهو الأحسن من الناحية الاجتماعيه. و فعلا مونسنا أو مونستنا بالبيت (صعب الواحد يعرف جنس هالنوع من الببغاوات بس أعتقد ان اللي عندي نثيه مو ذكر لأنها تغار من أم ياسمين!)

"الببغنايه بتاعتي" تحب نداعب راسها و رقبتها و تقعد تتقلب بس انها ما تتكلم وايد لأن صاحبها الأساسي ما دربها على الكلام.. يبيلها مقاقه و طولت بال.. طيرتي ما عندها الا جم كلمة مثل "ألو" اذا رن التلفون أو أحد دق جرس البيت. و كلمة "بابا" اذا شافتني نازل من الصاله و ابي أطلع و بعدين تصارخ و تقول لي "تآل" يعني تعال!

و عندي بنت عمرها سنه اسمها ياسمين و اناديها "ياسو" .. و الببغنايه كل ما تشوفها تقول "ياسو..ياسو"!

اذا ياسو قامت تبكي ما فيه مشكلة مع طيرتنا.. بس يا ويلنا اذا شافت أو سمعت صوت طيحة ياسمين و قامت ياسو تبكي .. هنيه شيفكنا من عصفورتنا, تقعد تصارخ و تقول كلام ما أدري بأي لغه.. بس اللي فهمته منها كأنها تقول: اذا انتوا مو قد تربية الأطفال و المحافظة عليهم اشحقه تييبون يهال!

على فكرة هذه الأنواع من الطيور ممكن تعيش 90 سنه يعني راح يورثونها عيال عيالي.

ملحوظه: مو معقوله ما فيه أحد من المنتدى عنده ببغاء يتكلم.

جن الموضوع خلص و ما فيه أحد يبي يبيع لي طير يتكلم.

الموضوع القادم راح يكون عن النمله العجيبه اللي في بيتنا (ترقص و تتكلم فرنسي بطلاقه, بس للأسف آنه ما أعرف الا جم كلمه فرنسيه), بس ساعات تتكلم باللهجه اليمنيه! شلون؟ ما أدري.

تحياتي