فيفا وما أدراك ما فيفا

[دينار كويتى]

يا شباب لولا الله ثم فيفا للحين تستقبلون من الخطوط الارضيه والخارجيه بفلوووس ..

والخدمات جايه شوي شوي وخدمة النت بسرعة 14.4 بدل زين والوطنية اللي كل خمس دقايق لاااااااااااااااق

وبعدين فيفا شركة جديده اكيد مبدئيا ماراح تكون بقوة زين والوطنية

واذا على الــ 15 دينار صج صدمة لكن لما تفكر فيها ادفع رسوم تشغيل ويعطوني رصيد 15 دينار

وغير هذا الرصيد تعبي 5 دنانير يعطونك مجاني 5 دنانير يعني اتكلم بعشر دنانير بقيمة خمس دنانير بالعكس اشووفها افضل شركة اتصالات بالكويت



إلى الأمام يا فيفا

وانت شدراك انك متكلم بعشر دنانير مش بخمسه ؟؟؟؟؟؟؟؟؟؟؟؟؟؟؟؟؟؟

يلعبون على راحتهم واذا سألتهم قالوا لك النظام يحسبها صح!!!!!!!!!!!!

والنظام طبعا ما يكذب .

لكن اول كذبه انكشفت بسرعه .

الخط ببلاش وتروح تستلم الخط يقولون لك ادفع 15 دينار .
عادى بالرصيد .
والفواتير ليش تاخذ عليه رسوم ؟ قالك رسوم تشغيل .

 

[شاعري]

فيفا وبس​

​

 

[دينار كويتى]

فيفا وبس​

​

فيفا الكره والا الاتصالات ؟

 

[CENTRALBANK]

والله انى حاجز خط ورقمه حلو بس بعد ماسمعت 15 دينار قلت مو لازم

الى الان ما لقيت عند الشركه شئ مغرى عشان اطلع رقمى اللى حجزته

خلنا مع الزين

الى الان لايوجد منافس لزين

الدقيقه 22 فلس ثابته والاستقبال مجانى يعنى افضل من الفيفا وشبكه ممتازه

وانا بعد نفسك يالشاطر

 

[alsaher55]

شين

صار لى 15 سنه عند شين من سنه 1994 الى اليوم ومالقيت اى خدمه زينه غير النصب والكذب وعدم المصداقيه

من عرفتهم ودقيقتهم 40 فلس استغرب اللى يقول 20 فلس

هذولا مصاصين دماء

امس قطعت خطوطى بشركه شين الى الابد

والله لو ان الدقيقه بدينار عند فيفا لااخذها

على الاقل فيفا خلت الاتصال الارضي مجانى
وشركه شين صار لها اكثر من 20 سنه ماقدرت شفتو الفرق

 

[CENTRALBANK]

دقيقة ال 22 فلس تسعيرة ثابتة...او 26 ذروة 13 وقت عادي ..هي اشتراكات خاصة ببعض الهيئات والشركات والوزارات

 

[طاحوس]

بخصوص شركة الإتصالات ذيبة

شباب ذيبة (فيفا) مثل قصة ليلى والذيب ،،، وباللحظة المناسبة راح تفترسنا. نصيحة إذا تبون منافسة حلوة قاطعوها حتى يسوون عروض قوية. أكبر خطأ ان تكنسلون خطوطكم حاليا.

 

[Falcon]

شباب أحنا نبي سعر الدقيقة للعامة وليس للاسعار الخاصة للشركات و الهيئات بس.

دقيقة زين 40 فلس...... حتى لو تتصل من شبكتهم الى شبكتهم.

زين صلوا فينا شرق

 

[بومعالي]

صراحة فيفا استعجلت بتشغيل الخطوط لأن الأخطاء اللي لاحظتها عليهم كثيره

أولاً ماتقدر تعرف فاتورتك إلا بالإتصال على الدعم الفني

ثانيا لما تتصل بالدعم الفني الله يعينك على الإنتظار لمدة عشر دقائق على الأقل والمشكلة الإنتظار يكون بسماع أغاني وأنت غير مخير لسماع شيء آخر

ثالثا وانتبهوا ياشباب ترى جميع خطوط فيفا فيها خدمة الإنترنت مفتوحة ولايمكن اغلاقها عن طريق الشركة وتسعيرة الإنترنت ناااااااااااااااااااااااااااااااااااااااااار بالكيلو بايت .

رابعا اللي اشتركوا بالبداية ودفعوا 15 دينار كان العقد إن ال15 دينار تكون بالرصيد للدفع الآجل وهذا هو الأساس .. بس بعدين تغير الوضع واصبحت ال15 دينار رسوم اشتراكات من شهر واحد إلى شهر خمسة ... طيب على أي أساس يحولون المبلغ إلى اشتراكات ؟؟؟ هل تم مخاطبة العميل ؟؟ طيب إذا ماعجبتني الخدمة وبسكر الخط باجر تردون لي اشتراكاتي الباقية ؟؟؟

خامسا تم اضافة مبلغ 3 دنانير رسوم شهرية لفاتورة هذا الشهر ... ( شنو فلم هندي ) ... مو إنت توك ماخذ 15 دينار رسوم اشتراكات شلون تاخذ رسم إضافي ؟؟؟؟ قالوا هذا حق الشهر الحالي <-=- حدث العاقل بما يعقل ... تدفعني اشتراكات حق خمس شهور جدام وتخلي الشهر الحالي ؟؟؟؟

سادسا حاولت اليوم اتصل دولي وتفاجأت أنه ( لايمكتنك إجراء المكالمة ) !!! اتصلت بالدعم الفني والحمدلله تم الرد بعد ماحفظت ترنيمة الأغنية صم ... وأفادوا إني ماني مشترك بخدمة الإتصال الدولي !!! طيب شلون مسوين عرض لمكالمة السعودية بسعر 35 فلس وانتوا مو مشغلين الاتصال الدولي للمشتركين !!!! وشلون خدمة الإنترنت مفتوحة تلقائيا ولايمكن الغاءها والإتصال الدولي مو مفتوح ؟؟؟؟؟ ( تخبط )


من الغرائب اللي واجهتني إني لما استفسرت عن فاتورتي وجدت مبلغ 7 دنانير .... خلال 4 أيام !!!! أنا ماني من النوع اللي يتكلم كثير بالتلفون نهائيا ... قلت يمكني خربتها مع فيفا من الوناسة من حسن حظي إني كنت شاري جهاز تلفون جديد بنفس الوقت اللي أخذت فيه خط فيفا ولما شيكت على مدة المكالمات الصادرة لقيتها 51 دقيقة !!! ثلاث أرباعها أكلم خطوط فيفا
طيب شلون طلعت علي الفاتورة جذي خلال هالوقت ؟؟؟ اتصلت فيهم قالوا مكالمات محلية و خدمات انترنت !!!!!!!!!!!!!!!!!!! متى وشلون وشحقا وليش

منو طلب منكم تشغلون ( خدعة ) الإنترنت ؟؟؟ أنا ما أبيها ونص العالم ماتبيها أنا عندي اشتراك 1 ميغا مع كوالتي وما أحتاج انترنت متنقل وتلفوني يدعم الواي فاي واشبك فيه بالبيت... يا فيفااااا ماااابيييي إنترنتتتت مشكورين وجزاكم الله خير ..... حتى أسعار النت محد يعرفها ؟؟ مايصير

عموماً ماسبق هو رسالة إلى القائمين على شركة فيفا .. أنا أتمنى لكم النجاح والتوفيق وأيضاً الربح ... ولكن إنتبهوا لجودة الخدمة والشفافية مع المشتركين حتى لاتكونوا الوطنية رقم 2 وتكونوا أكبر ثاني دعاية لصالح شركة ( شين )

وعن نفسي بصبر عليهم لمدة شهر وإن شاءالله تتعدل أمورهم وإلا فلا حل إلا بقوطيين سانكست وخيط بلاستيك

 

[ابو غانم]

قبل أسبوع أخذت خط فيفا فاليو بــ 15 دينار وخليت خط شين استقبال بس ماتكلم فيه كلش وكان عليه 70 دينار والحين صار لي أسبوع وطار من الــ 15 دينار 6 دينار فقط ولما استفسرت عن فاتورتي في شين لقيتها لالحين ثابته الــ 70

يعني في أسبوع تكلمت بـ 6 دينار بس .

الشهر 4 اسابيع وكل اسبوع 6 دينار يعني المجموع 24 دينار بالشهر .. يابلاش .

خلاص راحت أيام الفاتوره بالشهر 130 دينار وصاعد .

ورب الكعبة أنقذتينا يا فيفا .

لاتذمون فيفا ترى هي اللي أنقذتنا من شين والوطنية .. وخدماتهم الطيبه بالطريق بس نصبر عليها شوي .

 

[أبوفهـيد]

فيفا وبس

سوت حركة بالسوق

وحركت الطواغيت اللي طايحين له شفط وبس

اول يوم تشغيل لها خلتهم يتسابقون على

استقبال المكالمات لولا الله ثم فيفا

المكالمات المستمله على ظهورنا

مالكم الا فيفا اهي اللي اشترتنا

والمفروض وزين وغيرها نعطيهم درس بالتعامل

 

[الراقي]

فيفا مو خوش بداية السيرفس تعبان خصوصآ في منطقة كبد

 

[fabulass]

جان زين عندنا شركة مثل فيفا للسينما بعد

 

[وليد السعيدي]

أخوي السرعه مو 14.4 عندهم أكيد

مجرد أرقام تبثها سيرفرهم ولم تشتغل أي خدمه 14.4 بالكويت

إشلون يعطون الناس سرعه 14.4 ويبيعون عندهم قطعه 7.2 سرعتها ؟؟؟؟

ممكن أفهم هل الشغله ؟؟؟

يعني لو تبي إشتراك وقطعه .. يقولون لك السرعه 14.4 والقطعه 7.2 ؟!!!

وإشلون ينزلون إنترنت بسرعه 14.4 بالكويت وهم شغالين بالسعوديه ومانزلوا هل السرعه عندهم هناك موليه ؟

هناك الشركه الأم وما نزلت سرعة 14.4 وهني أنزلت من أول خدمه لهم !!!!!!!!

يا حبيبي شي طبيعي انها تسوي عروض اول ما تفتح .. ومو لازم تسويها بالشركة الام في المملكة .. واكبر مثال شوف خدمات زين البحرين اكثر من خدماتها في الكويت .. وشوف عروضها بالسعوديه من احسن ما يكون تدفع شهر ويدفعون عنك شهر وبلكويت ما غير يمصوون دمنا مص


بسكم ترقيع لزين والوطنية .. اذا انتم عايشين بالديرة وشايفين كل شي جدام عيونكم وتدافعون عن زين والوطنية بدال ما تقاطعونهم باللي سوووه فينا كل هالسنين ... مالووووم اللي برا يقولوون عنا قواطي ؟؟؟

 

[s man]

جان زين عندنا شركة مثل فيفا للسينما بعد

قصدك ديوانية السينما الوطنية , اول مرة أشوف شركة أدارتها كلهم ربع ديوانية

 

[coooool2]

@@ خطوط فيفا جديده تنزل في يناير @@

وصلني كلام من عدد من المصادر أن اختيار الخطوط الجديده في بدايه السنه لكن بالتحديد مادري أي يوم بالضبط ..

يمكن فيه حجز بموقعهم او فيه خطوط بفروعهم ..

 

[قلم حر]

وصلني كلام من عدد من المصادر أن اختيار الخطوط الجديده في بدايه السنه لكن بالتحديد مادري أي يوم بالضبط ..

يمكن فيه حجز بموقعهم او فيه خطوط بفروعهم ..

حسب ماوصلني 10 يناير

 

[fabulass]

مشكور على المعلومة

 

[D.NeT]

على ذمة الراوي انه راح يبدأ الرقم بــــ 54 .

وعلى حسب مصادري انهم اخطئو عندما حطوا ارقام عن طريق الموقع .

 

[offoff]

حسب ماوصلني 10 يناير

انت صح