وعليكم السلام ورحمة الله وبركاته ...
عزيزي الاخ أحمد ان شاءالله اقدر اساعدك باللي اقدر عليه وترانا مبتدئين يعني الحال من بعضه
بس ان شاءالله باقي الاخوه ما يقصرون
اسمع ياطويل العمر .. بالنسبه لاوامر البيع والشراء .. من شروطها ان يكون السوق فاتح باوقاته الرسميه المعروفه .. يعني عشان تشتري والا تبيع لازم يكون السوق مفتوح والعالم شغاله بيع ومشترا .. هذا الاساس .. طبعا فيه شغله اسمها بري ماركت pre market او قبل الافتتاح الرسمي و افتر اوارز after hours او بعد الاقفال . خلال هذي الفترات يكون السوق شغال ولكن على خفيف وعادة مايكون المحترفين والمتخصصين هم اللي يشترون ويبيعون في الوقت هذا الى ان يبدا وقت السوق الرسمي والعالم كلها تبدا تشتري وتبيع ... بالنسبه لاوقات البري ماركت وال افتر اوارز بصراحه ماني متاكد بالضبط بس اعتقد البري ماركت قبل الافتتاح الرسمي بساعه او ساعتين ماني متاكد وال افتر اوارز او بعد الاقفال وقته ساعه او حواليها بعد ماني متاكد بالضبط ان شاءالله احد الاخوان يفيدنا اكثر ويعطينا العلم الاكيد .. هذا بالنسبه لسؤالك الاول عن اوقات التداول ...
بالنسبه لسرعة تنفيذ امر الشراء او البيع فهذا مبني على عدة اشياء ... منها ان اوامر البيع والشرا بالدور وحسب توفر المشتري .. يعني مثلا لو حبيت تبيع الف سهم بسعر دولار وضغطت على تنفيذ الامر .. الطلب راح يمسك سرا لان يمكن فيه ناس قبلك طالبين البيع بنفس السعر سواء كمية اقل او اكثر من طلبك .. باختصار ان الطلب لازم يمسك سرا واذا جاه الدور لازم يكون فيه شراي على السعر اللي انت تبيه ويمكن يشتري جزء من الكميه ويجي دور اللي بعده ويشتري الباقي منك وهكذا .. يعني البيع والمشترا بالدور ياطويل العمر .. فيه شي يؤثر على سرعة تنفيذ الطلب وهو هل انت تبي تبيع او تشتري بسعر السوق الحالي او بسعر انت تحدده؟ والسعر ينقسم الى سعر الطلب اللي هو اعلى سعر للشراء .. وسعر العرض واللي هو اقل سعر للبيع .. والسعر الحالي واللي هو سعر اخر عمليه تمت .. فلو انت تبي تبيع او تشتري بسعر السوق الحالي اللي هو اعلى سعر العالم ناويه تدفع للسهم غالبا ما يتم تنفيذ الامر في ثواني معدوده .. اما اذا كنت محدد سعر الشراء او سعر البيع واللي يسمونه لمت اوردر فهذا النوع من الطلبات ياخذ وقت طبعا الى ان يصل سعر السهم للسعر اللي انت محدده وبعدين يتم تنفيذ الطلب ...
وبالنسبه للبيع عزيزي تقدر تبيع السهم اللي شريته اي وقت طالما ان السوق مفتوح طبعا .. ويتم تنفيذ الطلب بناء على الشروط اللي شرحناها قبل شوي .. يعني لك الحق تبيع السهم اللي تشتريه حتى لو بعد دقيقه او اقل .. بس طبعا حسب توفر المشتري والسعر اللي انت طالبه .. الا اذا كنت تبي تبيع بسعر السوق واللي اسمه ماركت اوردر هذا يتم تفيذه بسرعه غالبا ... لكن لاحظ شي مهم وهو انك لو بعت الاسهم وتبي تشتري بفلوسها اسهم ثانيه هنا ياتي نوع حسابك مع الشركه .. هل هو كاش او مارجن .. اذا كاش ما تقدر تستخدم فلوس الاسهم اللي توك بايعها قبل 3 ايام عمل .. اما اذا كان حسابك مارجن تقدر تبيع وتشتري بفلوسك على طول ...
ان شاءالله تكون الامور وضحت وهذا اللي انا اعرفه وان شاءالله الاخوان يصححون كلامي لو كان فيه شي خطاء او يزيدونك وتقبل تحياتي ...
اخوك ابو سامي
