الحاضنة تنوي السفر .....

[بوناصر56]

السلام عليكم ...

اثناء الحصول على حكم الحضانه بعد الانفصال :-

هل من حق الحاضنة الام السفر بالابناء الذين يقعون في عهدتها دون اذن ولي الامر ؟

هل يمكن طلب تحويل الحضانه للاب مؤقت بداعي ان الحاضنة تريد السفر ؟؟؟ ام ان تحويل الحضانه يتم تلقائي بشكل مؤقت ؟؟


هل يوجد مده قانونيه تلزم الحاضنه بعدم تعديها اثناء السفر ؟ ؟ ؟



دمتم سالمين غانمين

 

[fayoona74]

نصت المادة 195 من قانون الاحوال الشخصية على الآتي

أ- ليس للحاضنة ان تسافر بالمحضون الى دولة اخرى للاقامة الا باذن وليه ، او وصيه.
ب- ليس للولي ابا كان او غيره ان يسافر بالمحضون سفر اقامة في مدة حضانته الا باذن حاضنته.


المادة اشترطت الاذن لسفر الاقامة اما السفر للسياحة اسبوع اسبوعين ماشترط القانون اذن الولي
طلب تحويل الحضانة للاب مؤقتا بداعي السفر يقع بالتراضي بين الطرفين أما قضائيا فلا تسقط الحضانة بالسفر المعتاد
مادة 193
لا يسقط حق الحضانة بالاسقاط ، وانما يمتنع بموانعه ، ويعود بزوالها.
والسفر لايعد مانع من موانع الحضانة

بالنسبة لسؤالك اذا كانت في مدة معينة تلزم الحاضنة بعدم تعديها
اكيد مافي مدة معينة لكن بنفس الوقت ماتكون السفرة طويلة حيل فيها شبهة اقامة دائمة او فيها عائق من رؤية الاب لابنه مدة طويلة
مادة 196
.............
ب- وليس للحاضن ان يمنع احد هؤلاء من رؤية المحضون

 

[rahaly]

اذا كانت الام كويتية فلا تمنع من سفر السياحة .... بالحدود المتعارف عليها

اذا كانت اجنبية ... فيها كلام وخااااااصة اذا كان السفر لبلدها


ما في شئ اسمه تنتقل الحاضنة مؤقتا ....


موفق

 

[ناصر فيصل]

الحضانة

الحضانة حق للمحضون قبل ان تكون حق للحاضن اي ان الحاضنة اذا اسقطت حضانتها من نفسها فانها ترجع اليها اذا طلبتها لان حق المحضون مقدم على حق الحاضن .

 

[بوناصر56]

انزين اذا الحاظنه ظروفها ما تسمحلها تاخذ المحضونين في السفر ........ و تبي تحول الحضانه لاب الاطفال مؤقت لان لايوجد من يحضن الاطفال غيرها عند افراد اسرتها ... شنو الحل ؟



اخوي ناصر فيصل بوركت , لكن افهم من كلامك ان يجوز للحاظنه تتنازل عن الحضانه للاب مؤقتا و بعد الرجوع من السفر ترد تطالب بالحضانه ؟ ولا شنو بالضبط ...... و هل القاضي يجبر الاب بالحضانه ولا شنو و بعدين بسهوله ترد الحضانه متى ما بغتها ولا شنو بالضبط ...


دمتم سالمين

 

[fayoona74]

قلت لك اخوي بوناصر هذا يصير اتفاق بين الاب والام وتخلي العيال عند ابوهم لين ترجع من السفر لكن الحضانة قانونا عندها الموضوع تفاهم بين الطرفين مو اكثر

ومثل ماقالك أ. رحالي مافي شي اسمه بالقانون تنازل مؤقت عن الحضانة في اثبات حضانة وفي اسقاط حضانة ومافي شي بالنص بينهم

 

[القمر]

بوناصر انتا بتسقط حضانتها علشان النفقه؟

واذا الام مسافره اسبوعين عادي ويا العيال وانتا تقدر تسوي اثبات حاله اذا رحت البيت وما طلعو عيالك حقك سو اثبات حاله بالمخفر بس اذا ثبت عليها اثبات حاله كذا مره تسقط حضنتها موقته وليس دائما وشكرا

 

[بوناصر56]

ياجماعه رجاءا فهموني اختي فيونه يعني بالمنطق لو كان في اتفاق تشوفيني اسأل ؟ وانا افضل القانونيين يجاوبون

السوالف كلها بالاعناد قاعده تصير ......

واخوي القمر اتمنى انك تقرى الموضوع من البدايه لانك فاهم غلط 360 درجه انا لاهي طليقتي ولا شي



اخت فيونه .... التفاهم معدوم
والحاضنه ما تبي تاخذ اليهال بالسفر لان مو ملزومه بتذاكر سفرهم بس تبي تستمر بحضانة اليهال .... فهل يحق لها التنازل مؤقت عن الحضانه للاب لحين الرجوع من السفر تطالب بالحضانه مره اخرى ... ؟

ولحد يقول ليش ما تحطهم عند امها وهالكلام لان سؤالي محدد وما ابي احد يطلع عن السؤال جزاكم خير

واتمنى الي يجاوب يكون قانوني افضل لان اكيد راح يعرف الجواب الدقيق وما يطلع برى الموضوع ......

 

[القمر]

يالغالي شالمانع تسافر بدونهم ما فيها شي اذا سافرت وايد طلع برنت وشوف شكثر مسافره وسو اسقاط حضانه واذا ما تبي روح اخذهم من البيت وردهم باليام الرويه وما فيها شي عيل وشكرا

 

[بوناصر56]

القمر دامك مو فاهم الموضوع ارجوك لا ترد علينا ولا تلخبط الكل وياك

 

[fayoona74]

بو ناصر اخذ العيال عندك مدة سفرها ولما ترجع من حقها تاخذهم لان الحضانة حق لها والسفر للسياحة مو من موجبات اسقاط الحضانة الا اذا تعدت حدود معينة تنبىء بالاهمال وعدم القدرة على رعاية الاولاد
باختصار السفر العادي مايسقط الحضانة ولو مؤقتا وعيالك بوجودهم معاك بصفتك ابوهم مو حاضن لهم
اتمنى تكون الصورة واضحة

 

[بوناصر56]

فيونه جزاج الله خير ... و انا ممنون لج على هالجميل ...


افهمج السالفه من الاول


الحاضنة تنوي السفر بس ما تبي تاخذ المحضونين لان والد المحضونين رافض يدفع فلوس التذاكر


قررت الحاضنه تخلي المحضونين عند والدهم لكن والدهم رافض ياخذهم

يعني لا يبي يدفع تذاكر ولا يبي ياخذهم ..... شالحل هني تقدر عن طريق المحكمه تتنازل عن الحضانه للاب مؤقت ولا ما تقدر ؟

واذا ما تقدر شالحل يعني تقط المحضونين بالشارع وتسافر ولا شنو ؟


للعلم امكانية التفاهم معدومه الى ابعد الحدود

 

[fayoona74]

مافي شي اسمه تنازل مؤقت عن الحضانة
اذا ام ماعندها رحمة تسافر وتقط عيالها يعني لازم هالسفرة تقعد تجابل عيالها صج شي غريب عجيب
اذا قطتهم بالشارع ولو انه صعبة تصير خل الابو يسوي اثبات حالة ان لقاهم بالشارع ويرفع عليها قضية
بس مبين ان السالفة وسيلة ضغط عشان الابو يدفع مو معقول في ام تقط عيالها وتسافر تستانس

 

[بوناصر56]

يعني وحده نفرض تبي تسافر حق علاج او مكه المكرمه او زياره احد الاماكن الدينيه وانتي قاضبتلي شي غريب عجيب ؟

بكيفج اهو تحكمين جذي عالناس ؟ ليكون عالمة غيب وانا ما ادري ؟
هذا وانتي قانونيه و تحكمين على الناس قبل ما تراودج فكره الله يعلم بالظروف والله يستر على الجميع



....

عموما مشكوره مكاتب المحاماه اوسع ,,,,

 

[fayoona74]

يابو ناصر تقول ماتبي تاخذ عيالها ولا ابوهم يبي وتسأل اذا تقط عيالها بالشارع وتسافر ولا شنو تسوي وماتبيني اتعجب واستغرب لا وتقول رحلة دينية بعد يعني اللي استغربت منه مو علم غيب من واقع اللي انت كاتبه بعد ليش زعلان اكو ام تحتار بين سفرها وبين عيالها
وعلى قولتك مكاتب المحامين على أفا من يشيل روح ادفع وخل يعطونك استشارات ماراح تطلع عن اللي قلناه لك

 

[fayoona74]

بو ناصر خل عنك الزعل الحين ترا جد قاعدة افكرلك بحل حق هالمرة وخل نفترض ان عندها ضرورة قصوى للسفر ونفترض ان كلللش ماعندها أحد تخلي عيالها عنده سواء كانت اجنبية او مقطوعة من شجرة او او
مثل ماقلت لك مافي شي اسمه تنازل مؤقت عن الحضانة ومدام انت شايفها محتاجة انت مدلها ايد العون واجرك عند رب العالمين وخل عيالها عندك او اذا ماتبي وهم بتزعل من هالاقتراح ييبهم عندي انا اخذهم مؤقت وترا صج مو قاعدة اتغشمر ها شرايك

 

[بوناصر56]

دام السالفه عناد يا اختي ما كو شي اسمه اتنازل وامد ايد العون ابي حل باسرع وقت خل يعرفون شلون يعاندون وبخصوص انتي مشكوره هذول ناس ما يخافون ربهم يقولون قطوهم في ايد مو امينه و تروحين فيها ويانا تدشين بقضيه خطف


شوفي لنا حل احسن ههه

 

[rahaly]

ييبهم عندي انا اخذهم مؤقت وترا صج مو قاعدة اتغشمر ها شرايك

اووووه فيونة ... فاتحه حضانة ؟