أخر الأخبار عزوف عن قسائم مدينة صباح الأحمد

[ابو سعد$]

اذا ما عندك تشتري بيت مالك الا مدينة صباح الاحمد 600 متر واقل ارتداد 12 متر واغلب البيوت رووس شغل عدل بس فيها عيب واحد ...ساكن في البر... وقت القيظ الله يعين على العقارب والضبان ... انا انصح الي ياخذ اهناك يكت جاز حوالين البيت عشان العقارب نفس المخيمات...

 

[عبدالرزاق 7]

انا سمعت انهم اطلبوا بعض اللي طلبهم 2002 وكان راعي الطلب مستانس طلعله البيت بسرعه مو مصدق
وسمعت ان واحد انصحه بعدم اخذه لان فيه عزوف عن المنطقة لانها مشابهة لام الهيمان
وايضا التربه تصبح فيها انهيارات انا ماشفت ولاسمعت منه شخصيا ولكن سمعت من اقرباء لي عن قريب لهم حصل
معه هذا الشي والله اعلم​

 

[الوافى44]

اخوى الى الان طالبين 96 شهر 6 حق صباح الاحمد

والحين فى مناطق جديده مثل سعد العبد الله و جابر الاحمد و غرب هديه وشمال غرب صليبخات

واعتقد راح يطلبون الى سنه 99 و سنه 2000 حق صباح الاحمد

هذا والله اعلم

 

[بومناور]

يا خرطى

اول لو يفتحون الدور الى 2009 هم ما راح يتقدم 50 هذا والقسايم اكثر من عشرة الاف المشكلة ابعد من ام الديبان اقصد ام الهيمان وراها وهم مو على الشارع مغوينك داخل البر منطقة تعيسة منطقة متلوثة من الصوبين وهم كله سافي لازم عند بيتك تراكتور يشيل التراب الناعم وووو المهم لا يقصون عليكم مثل اخوانى اللى دبسوهم بام الهيمان بعدين انا متاكد انه ما راح تشوف لا فرع جامعة ولا كلية ولا تامينات ولا مركز شرطة اذا عبدالله المبارك يشكون النقص 3 عسكر وضابط يعنى هناك حتى مخفرة ما فيه وتقحص عند بيتكم وفي امك خير تكلم بجابر العلى من سنين ومحد سوى لهم شى ؟؟ ولا شى زين اذا حطوا فرع غاز زين وبعدين شوف التركيبة هناك انت منهم ولا لا ::verymad::::verymad::::verymad::

 

[الحريه وطن]

حاذفين الناس بجنوب الكويت ويبوننا ناخذها الا بنرفضها ونرفض غيرها

150 كيلو جنوب العاصمه وين قاعدين ؟مايفكرون

والله اقعد بشقه بحولي عند الناس والعالم ولا اروح جنوب الكويت

تري السكن نفسيه واسالو اللي سكنو ام الهيمان كلهم جاهم اكتئاب وهجو منها

 

[المنظور الشامل]

للرفع

 

[بدون مجامله]

ياجماعه لكم خيارين لاثالث لهما اما تقبل بالقسايم المطروحه او تشتري بيت على قد حالك وسط الناس والقرب غير هذا ماكو الكل يقول تمام يافندم​

 

[الحريه وطن]

لا بالعكس احلب بدل الايجار 50 سنه شنو خسران هم الخسرانين
احلبهم حلب واذا شفت انهم بيدبسوني بمنطقه معزوله في الجنوب
اروح اشتر ي بيت بس عقب ماكسرت ظهرهم بدل ايجار موهين 150دك

 

[ودي اربح]

قواكم الله جميعا

 

[تويجر]

والله في اراضي اقرب بوايد من هالمنطقة

ليش قالعينا جذي وين نسكن هناك الواحد اذا راح شاليهات الخيران يتعييز يحدر من الطريج فما بالك اذا كان هذا سكنك وعندك مراجعات وتشري وبلاوي

بالعقل ياجماعه مشروع فاشل واللي بياخذ هناك محدود على اقصاه من قلب

 

[عبدالرزاق 7]

أقتباس =الحريه وطن - لا بالعكس احلب بدل الايجار 50 سنه شنو خسران هم الخسرانين
احلبهم حلب واذا شفت انهم بيدبسوني بمنطقه معزوله في الجنوب
اروح اشتر ي بيت بس عقب ماكسرت ظهرهم بدل ايجار موهين 150دك
---------------------------------------

صج المواطن غلبان ومغلوب على امره ياخوي ترى المفروض الايجار فوق 200 دينار مو 150 الفرحان فيها ومتكاثرها لانه واجب وملزومه فيه الحكومه بتأمين سكن للاسرة الكويتية ولابد من الزيادة ضريبة التأخير لعدم تسليم
الكويتيين السكن ينطر 15 الى 20 سنه شاب متوظف توه متزوج يقدم طلب بيت حكومي ياخذ البيت
شايب متقاعد وفوق هذا متكاثر 150 دينار ايجار​

 

[النجدي2007]

مكانها بعد منطقة ام الهيمان 20 كيلو ؟؟
صج بعيدة

 

[saket]

لا طبنا وووووولا غدااااااااااااااااء الشر

 

[الحريه وطن]

نعم اخي الحل في شراء بيت حتي لو تقترض وتبيع نعولك يكرم السامع لانك لو بتنطر البيت الحكومي علي الوضع السلحفائي اللي صار مو اقل من 50 سنه هذا اذا ما صرت مومياء وحنطوك اهلك بطوفة البيت اللي بيطلع
بس اهم شي احلبوهم ببدل الايجار 150 تجبسهم كل راس شهر والله يعوضكم ببيت في الجنه ان شاء الله بلا منتهم
الله يستر لا يطلع لك البيت وانت ناشف مثل هذا

 

[أبوفلان]

أقول قالعينهم قلعة وادرين

حتى الغنم ماتعيش هناك

اخاف باجر اييوون فريق الإزالة يشيلون البيوت عبالهم مخيمات بوسط البر

 

[look4land]

يا جماعة الخير ودي اوضح كم نقطة:

1) صباح الاحمد ما تبعد 150 كيلو هاذي مبالغة....تبعد بالضبط عن مدينة الكويت 70 كيلو! يعني بالسيارة لو تمشي بسرعة متوسطة 100 كم توصل الدائري الاول خلال 45 دقيقة...

2) صباح الاحمد مو قريبه وايد لحقول النفط كما يعتقد...بل الاحمدي ملاصقة لحقول النفط اذا نبي نقارن

3)لا يمكن ان تكون ملوثة نفس ام الهيمان...لانها محاطه بمساحات صحراوية شاسعة وتبعد عن الزحم السكاني و قريبه من مزارع الوفره...و بعيدة عن اي مصفات نفطية كالاحمدي و الشعيبة وبعيده عن اي مصانع

و بعدين بالمستقبل لازم فيه توجه للمناطق البعيدة كما هو الحال في معظم دول العالم ...كما في الخليج ليش انروح بعيد...70 كيلو عن العاصمة تعتبر لا شيء... عدد سكان الكويت قاعد يزيد ولا يمكن استيعاب كلهم حول العاصمة ...و شوفو الاختناقات المرورية الحالية و راح تزيد...الواقع راح يفرض نفسه و الاجيال الجديدة راح تعتبر المناطق البعيدة شي عادي و طبيعي...لا و يمكن تتطور مناطق افضل من الداخلية من ناحية الهدوء و عدم الزحم السكاني...و قربها من البر و بحر جنوب الكويت و الخفجي

(كمثال واحد من عمامي متقاعد و ساكن بمزرعته بالوفرة ولا يبي يشم ريحة المناطق الداخلية....و في نهاية الاسبوع الكل يزوره و مكيفين عنده)

ثانيا الدولة استثمرت بالجنوب (منطقة الخيران) و قد تكون هذه نقطة بداية لانشاء مراكز ومدن سكنية واستثمارية

ثالثا توجد فرص وظيفية كثيرة في جنوب الكويت... و قد تكون منطقة جنوبية كصباح الاحمد مميزه فعليا لموظفي المشاريع الجنوبية الحالية و المستقبلية

 

[الجود الاول]

يا جماعة الخير ودي اوضح كم نقطة:

1) صباح الاحمد ما تبعد 150 كيلو هاذي مبالغة....تبعد بالضبط عن مدينة الكويت 70 كيلو! يعني بالسيارة لو تمشي بسرعة متوسطة 100 كم توصل الدائري الاول خلال 45 دقيقة...

2) صباح الاحمد مو قريبه وايد لحقول النفط كما يعتقد...بل الاحمدي ملاصقة لحقول النفط اذا نبي نقارن

3)لا يمكن ان تكون ملوثة نفس ام الهيمان...لانها محاطه بمساحات صحراوية شاسعة وتبعد عن الزحم السكاني و قريبه من مزارع الوفره...و بعيدة عن اي مصفات نفطية كالاحمدي و الشعيبة وبعيده عن اي مصانع

و بعدين بالمستقبل لازم فيه توجه للمناطق البعيدة كما هو الحال في معظم دول العالم ...كما في الخليج ليش انروح بعيد...70 كيلو عن العاصمة تعتبر لا شيء... عدد سكان الكويت قاعد يزيد ولا يمكن استيعاب كلهم حول العاصمة ...و شوفو الاختناقات المرورية الحالية و راح تزيد...الواقع راح يفرض نفسه و الاجيال الجديدة راح تعتبر المناطق البعيدة شي عادي و طبيعي...لا و يمكن تتطور مناطق افضل من الداخلية من ناحية الهدوء و عدم الزحم السكاني...و قربها من البر و بحر جنوب الكويت و الخفجي

(كمثال واحد من عمامي متقاعد و ساكن بمزرعته بالوفرة ولا يبي يشم ريحة المناطق الداخلية....و في نهاية الاسبوع الكل يزوره و مكيفين عنده)

ثانيا الدولة استثمرت بالجنوب (منطقة الخيران) و قد تكون هذه نقطة بداية لانشاء مراكز ومدن سكنية واستثمارية

ثالثا توجد فرص وظيفية كثيرة في جنوب الكويت... و قد تكون منطقة جنوبية كصباح الاحمد مميزه فعليا لموظفي المشاريع الجنوبية الحالية و المستقبلية

سؤال واحد بس وابى اجابه الله يحفظك

هل قرأت تقرير هيئه البيئه عن تلوث مشروع منطقه صباح الاحمد ؟​

 

[ibrahimi]

انه دوامي بالوفرة في العمليات المشتركه وهم رافض فكرة البيت الي اهناك منطقه مايعدي عليها اسبوع الا وحايشها الاغبار صيف وشتا ماتفرق لازق اييها الاغبار

 

[look4land]

انه دوامي بالوفرة في العمليات المشتركه وهم رافض فكرة البيت الي اهناك منطقه مايعدي عليها اسبوع الا وحايشها الاغبار صيف وشتا ماتفرق لازق اييها الاغبار

الكويت كلها ما يعدي عليها اسبوع الا و حايشها الاغبار كمثال اليوم

اتصدق عاد اول ايام بيع قسايم جنوب السرة قالو الكثير اشتبي بهالمنطقة داخل البر ما تسوى!

 

[look4land]

سؤال واحد بس وابى اجابه الله يحفظك

هل قرأت تقرير هيئه البيئه عن تلوث مشروع منطقه صباح الاحمد ؟​

الله يحفظنا جميعا ان شاء الله

بصدق ما قراته...بس هل التقرير رسمي او مجرد كلام؟ اذا عندك رابط عنه يكون افضل و كدليل اذا تقصد الحجة من سؤالك