لحد يزعل

الموضوع في 'اعلانات بيع وشراء متفرقة' بواسطة almu7ank, بتاريخ ‏5 أكتوبر 2009.

حالة الموضوع:
مغلق
  1. almu7ank

    almu7ank عضو جديد

    التسجيل:
    ‏3 يوليو 2009
    المشاركات:
    590
    عدد الإعجابات:
    0
    بسم الله الرحمن الرحيم

    في البدايه كلامي موجه بشكل عام وليس لشخص محدد

    وهي عباره عن ملاحظات

    لاحظت ان البائع يحاول يبيع في اي طريقه لي درجه انه يصور البضاعه انها افضل بضاعه بالعالم وان مافي غيرها وان سعرها ممتاز وانتم شوفو عروض الاخوان وراح تتأكدون من الشي هذا.....هذا غير عن الغش الواضح في امور ثانيه والغش انواع ومنها غش الكلام يعني يقول كلام والواقع ينافي الكلام هذا وعلى سبيل المثال مثل اللي يقول عطور مركزه ماتفرقها عن الاصلي ولما تشمها ولا الفرق مثل فرق المشرق عن المغرب...اهني اهو غش الكلام لان ماله داعي يقول الكلام هذا....المفروض يقول شم العطر اذا اعجبك اخذه واذا ماعجبك خله واتركه

    مثال اخر على غش الكلام..ساعه طبق الاصل درجة اولى ماتفرقها عن الاصليه ولما تشوفها ولا الفرق مثل الفرق بين الشمال والجنوب

    وغيره من الغش حدث ولا حرج

    اما الشاري يحاول يكسر في البضاعه في اي طريقه والشي هذا ينطبق على الخطوط الارقام هناك ارقام حلوه ويقول الشاري الرقم مو شي وسعره مو فيه وكان المفروض ما يقول الكلام هذا لان يا انه يسوم او يسكت وغيره من الامور الكثيره


    وراح انقل تجربه صارت لي اهني في المنتدى بشكل سريع

    شفت كذا اعلان عن توم فورد ولان هذا العطر عندي منه خمس انواع واشتري العطر بإستمرار واعرف اسعارهم عدل وتفاجأت بالاعلانات اللي اهني ان هناك عطر تركيب من الاخوه والاخوات وبنفس الجوده اللي يقولون عنها لي درجه ماتقدر تميز بين الاصلي والتركيب فقلت خل اجرب فجربت وبصراحه استغربت من شغلتين الشغله الاولى واهو ان الفرق قدرت اميزه من اول مافتحت غطا العلبه وان الكلام اللي يقال ماتقدر تفرقه غير صحيح وكان الاجدر والاولى مايقولون الكلام هذا يعني يقول توم فورد تعبئه اذا عجبك اخذه واذا لا اتركه ولا ان يقال ماتقدر تفرقه بينه وبين الاصلي ومركز حيل وقوي ويعطيك اوهام انه مشابه وملازم وملاصق للاصلي

    والشي الثاني اول مره اسمع ان العموله موجوده حتى لو ماشريت العطر يعني اللي اعرفه ان العموله يتم احتسابها اذا شريت العطر اي انه صاحب الحلال يعطي للمناديب اللي عنده عموله اذا باع وتكون العموله من البائع مثال يقول البائع للمندوب كل بيعة عطر اعطيك عموله دينار فيتم حساب الدينار من القيمه وتكون القيمه اربعه والعموله دينار يعني السعر خمسه

    لكن ان يحدث العكس وان يتم حساب العموله على ظهر الشاري سواء قام بالشراء او لا هذا شي اول مره يحصل مو في الكره الارضيه في عطارد وزحل والكواكب الاخرى ايضا

    فلما وصل لي المندوب وشفت العطر وان الفرق بينه وبين الاصلي كما قلت كالفرق بين المغرب والمشرق قلت له مشكور مابي العطر فقال لي اوكي عطني عمولتي قلت له اي عموله قال عمولة اني رحت لك وجيتك قلت له وجم العموله جان يقول دينار ونص اهني ضحكت وقلت له العطر بجم قالي اربعه ونص مع العموله قلت له هذي اربعه ونص والعطر مابيه اخذه لك وعطيته الاربعه والنص واحتسبت الامر صدقه لوجه الله لان المندوب كان بدون فقلت اذا كان يستحق الصدقه فهي صدقه واذا كان ما يستحق الصدقه راح اعتبر ان الاربعه والنص طاحو مني مادريت عنهم

    لان اللي اعرفه انه اهو ياخذ العموله من البائع اذا تمت البيعه هذا من جانب والجانب الاخر الشاري ماله علاقه بالعموله واذا كان عذر المندوب وعذر البائع بإن المندوب راح لك وطريق ومصاريف مثل ما قال بانزين خلاص اوكي لاتخلي عندك مندوب وخل الشاري يجيك البيت واذا ما جاز له العطر خله يقول لك عطني عمولتي انا تعنيت وجيتك والعطر ماعجبني فأبي عمولتي لانه نفس المنطق

    وللحديث بقيه
     
  2. الطـبـيـب

    الطـبـيـب عضو نشط

    التسجيل:
    ‏16 مايو 2008
    المشاركات:
    2,345
    عدد الإعجابات:
    20
    مكان الإقامة:
    النعيم
    أخوي بالنسبة للغش حدث ولا حرج

    ولكن لا يعني هذا وجود الناس الثقة الامينه

    عالم العطور عالم كبير يفني في العطور اللي تعبأ محليا والحقيقه ان كان الريحه مشابهه تحس ضررها عليك عند استنشاقها.

    بالنسبة للمندوب الصدقة تجوز على الغني والفقير والله

    والمندوب لو هو غني ما كان جاك وتعنا وطالب بالدينار ونص

    فإن شاء الله لك الاجر

    وازيد شغله بالمزادات
    يصير في مزايدات من قبل ربع صاحب السلعه اذا كان بعد هو مو داخل بنك نيم ثاني وهذا حرام شرعا واسمه التناجش

    لك مثال ذلك من كم يوم كاميره سعرها جديده كما قال صاحبها على سبيل المثال 68 والكامبيره مستعمله عدة أشهر

    يجون السوامه يوصلونها ل 62 وصاحب السلعه ما باع للحين عشان اذا انت أو أنا جينا وقلنا 62.100 قال بعتك

    وتقبل مروري

    دمتم بخير
     
  3. mosq890

    mosq890 عضو جديد

    التسجيل:
    ‏7 ابريل 2009
    المشاركات:
    266
    عدد الإعجابات:
    0
    والله يا غالي معاك حق في كل كلمة قلتها

    والملاحظ وبدون زعل مواضيع اراء الزبائن اللي احس انهم مجبرين انهم يقولونها عشان لا يكسرون خاطر صاحب الموضوع !!!
    يعني لو الموضوع عن طيب خاطر كنت تشوف في الموضوع اراء ايجابية وسلبية بخصوص البضاعة المطروحة اما انها كلها مدح وشكر في البضاعة !!!


    تحياتي
     
  4. almu7ank

    almu7ank عضو جديد

    التسجيل:
    ‏3 يوليو 2009
    المشاركات:
    590
    عدد الإعجابات:
    0
    اهم عبالهم الرزق من خلال الاسلوب هذا ما يدرون ان الرزاق اهو رب العالمين

    وكذلك الشاري يظن انه يبي يقطع رزقه وما يدري ان الرزاق اهو رب العالمين

    المفروض ان الانسان يكون واضح في تعامله مع الاخرين ويكون سهل وبسيط

    مثال على ذلك

    تيلفون النوع الفلاني شوفت عينكم واستعماله المده الفلانيه واذا تريد فحصه يمكنك الذهاب به الى الوكيل

    وينتهي الموضوع مو يقولون نضيف وجديد وما استعمل الا مره وحده ساعه ونص و و و و

    او ساعه جديده واصليه ومو مستعمله الا لبسه وحده وبالاخير يقول فاتورة الشراء مو موجوده والكفاله منتهيه

    شلون منتهيه الكفاله وانت تقول الساعه جديده دام جديده لازم في كفاله لان الساعه كفالتها مو اسبوع او شهر ومدام جديده فاتورة الشراء اذا ضاعت منك تقدر تطلع بدل فاقد من المحل


    ولا عطر اصلي واهو بالاخير ما يدري وين صناعة العطر دام اصلي شوف العلبه شنو كاتبين اي صناعه وتعال وقول الصناعه الفلانيه


    يفترض يكون طريقة واسلوب البيع اكبر من جذي

    وطريقة واسلوب الشاري اكبر من جذي
     
  5. ابوبدر33

    ابوبدر33 عضو جديد

    التسجيل:
    ‏13 أكتوبر 2005
    المشاركات:
    153
    عدد الإعجابات:
    0
    الله يجزاك خير والله هذا الكلام الطيب
    والله يغنينا بحلاله عن حرامه
     
  6. الوحداني

    الوحداني عضو نشط

    التسجيل:
    ‏7 ابريل 2008
    المشاركات:
    511
    عدد الإعجابات:
    0
    والله انت كلامك عدل
    انا اشوف وايد شغلات تنباع اهني ضعف السعر
    توني شايف اعلان عن تمنه طير اهو مسيوم 45 دينار
    والطير نفسه وفرخ انا شاريه قبل سبوع من سوق لطيور 23 دينار
    والله مادري شسالفه بس اتمنى من الاخوان يخافون ربهم شوي بالبشر

    اما بخصوص العطور اتمنى من الاخوان الحذر من هالعطور المركبه لان هذي مو مركبه على طريقه فنيه
    شركاة العطور قاعده تدفع ملايين الدولارات على عطورها وعلى التجارب والتحاليل لها وصحتها للأستعمال
    مو اي واحد ركب عطر صار خبير لان ممكن هالعطور تسوي سرطان جلد
    وبعدين روحو سوق لسلاح وراح تشوفون التركيز مال العطور المقلده تنباع على 3 و 4 دنانير
    ويزيدونها كحول وكل علبه تسوي فوق 1000 ملي يعني 10 عطور وفي ناس تحط ماي مقطر معاه
    عشان يكسرون ريحة الكحول
    انا من ناحيتي الصراحه احذر من هالعطور لانها خطره ما دشت الفحص
    تذكرو لو ان الشركاة الكبيره ما تدخل عطورها الفحص والتحاليل جان الحين العطر الاصلي اقل من 5 دنانير
     
  7. alanzi

    alanzi موقوف

    التسجيل:
    ‏9 ابريل 2007
    المشاركات:
    1,399
    عدد الإعجابات:
    0
    تدري انا شاريه فرخ بـ 20 دينار من البيعات اللى بجبد
     
  8. محب الرياضه

    محب الرياضه عضو نشط

    التسجيل:
    ‏27 سبتمبر 2009
    المشاركات:
    610
    عدد الإعجابات:
    81
    مكان الإقامة:
    السودان
    يعطيك العافيه عالموضوع وكثر الله من امثالك اللي ينصحون هالأيام قله
     
  9. بحريني1972

    بحريني1972 عضو نشط

    التسجيل:
    ‏26 مايو 2009
    المشاركات:
    3,223
    عدد الإعجابات:
    1
    مكان الإقامة:
    الكويت الحبيبة
    انا حبيت اشارك بالموضوع واوضح نقطه واحده بس

    بالنسبه للمندوب تري ماله شغل الريال راح خذا الشيئ اللي تبيه وجابه لك وانت في بيتك صحيح

    يعني فيها تعب انت لازم تحاسب راعي البضاعه اذا صحيح ماكانت نفس الاعلان لا معاك حق والمندوب لازم يأخذ حق التوصيل من صاحب البضاعه مو من الزبون
     
  10. بومشاري 97

    بومشاري 97 عضو نشط

    التسجيل:
    ‏26 أغسطس 2007
    المشاركات:
    330
    عدد الإعجابات:
    127
    مكان الإقامة:
    الكويت
    اي والله صدقتوا
    وخصوصا سالفة المندوب تشتري ما تشتري دافع دافع
    اي طيب انته رفعت السلعة لي السما من المدح وتتحدى فيها البوتيك وآخرتها السلعة حتى ببلاش الواحد ما ياخذها
    لكن التنبيه لجميع الاخوان في المنتدى لتوخي الحذر من (بعض) الموجودين
     
  11. sporty72

    sporty72 عضو نشط

    التسجيل:
    ‏4 فبراير 2006
    المشاركات:
    1,680
    عدد الإعجابات:
    71
    مكان الإقامة:
    الكويت
    وانا أقول احذرو الي يقولك عطور أصلية بدون كارتون الي أعرفه وبذمة الراوي انهم يزيدونه كحول وعشان أتأكد انا بنفسي سألت أكثر من بياع قلتله أبي عطر مو مرشوش منه رشة واحدة محد عطاني طلبي شلون مرشوش منه والعلبة فل ؟

    ومن ناحية ثانية مرات أستغرب من السومات أو الأسعار ولا صندوق عدة انا شاريها بـ 3 ونص وتنباع هني بـ 7
    وال بي اس بي هني أغلى من سعر السوق فعلا شي غريب

    والحين طالعين فيها طلعة لما نسأل جم السعر يقولي السعر عالخاص اذا السعر بالسر عيل البضاعة شلون بتكون ؟
     
  12. مؤشر اخضر

    مؤشر اخضر عضو جديد

    التسجيل:
    ‏7 يناير 2009
    المشاركات:
    99
    عدد الإعجابات:
    0
    مكان الإقامة:
    Kuwait
    السلام عليكم ،،
    والله يا جماعه المواضيع هذي المفروض من زمان انتكلم فيها
    انا عندي شغله ودي اتكلم فيها من زمان
    في بعض الناس تعرض شغله تبي تبيعها واذا ما وصلت المبلغ الي اهو في باله او المبلغ الي طلبه اقول : ( للعلم في متدى ثاني واصلتلي بالسعر الفلاني او خارج المنتدى واصله بالمبلغ الفلاني )
    يا جماعه الي يعرض بضاعته بالمنتدى اهني يرضى بسومات اهل المنتدي احنى مالنه شغل بسومات المنتديات الثانيه او السومات الي خارج المنتدى اعجبتك السومه بيع ما عجبتك براحتك
    انا جم مره اكلم صاحب السلعه المعروضه اقولي مسيومه في منتدى ثاني باكثر من هالسعر يعني هذا مو صحيح
    يا جماعه ارجو النضر بالموضوع هذا
    وسامحوني على الاطاله وارجو الرد على الكلام هذا وشاكر لكم
     
  13. red1981man

    red1981man عضو جديد

    التسجيل:
    ‏3 ديسمبر 2007
    المشاركات:
    281
    عدد الإعجابات:
    0
    السلام عليكم

    والله يا اخوي البيع والشراء لزم يكون عن طيب خاطر وليس بالغصب خصوصا البضاعه المقلدة والامور المركبه مثل العطور تعودنا حتى نجيبها من الدول بره الاسيوية بالذات بارخص الاثمان لمه نسافر اهناك تلقى جنطه متروسه للاهل هدايا بمبلغ معقول جدا ساعات بواكه جناط نظارات مداليات وغيرها بس اهني اسعارهم مضاعفه وغاليه على تقليد!! والعطر الاصلي له انواع من ناحيت التركيز ومدة بقاء العطر وتقدر تسال المحلات المعروفه الوكلاء لاي عطر بالكويت اقرى تحت العطر تلقى مكتوب برفيوم او غيره لهم تصنيف ما اذكرة الان تختار اللي يناسبك واذا عندك حساسة اكيد بتاخذ الاقل تركيز من بين العطور.... هالمره تقليد ابشر بالحساسية
     
  14. sub_zero

    sub_zero عضو جديد

    التسجيل:
    ‏23 أغسطس 2009
    المشاركات:
    69
    عدد الإعجابات:
    0
    الله يعطيك العافيه علىى الموضوع بصراحه كلامك طيب ,,

    ياجماعه في ناس مادري علي بالها جذي التجاره ولا ودهم بس يشترون سوني 3 سعرها جديد وصل 100 دينار اهني سومات علي 90 والله احس بس جذي ومحد يشتري ,,
    ولد عمي عارض لاب توب وصول 190 دينار ولمه يدق عليهم يتهربون مادري بس ماخذينها ضحك اضاهر
     
  15. sound blaster

    sound blaster عضو نشط

    التسجيل:
    ‏13 ابريل 2007
    المشاركات:
    1,004
    عدد الإعجابات:
    3
    مكان الإقامة:
    الكويت
    ياجماعه بقول الحق ولحد يزعل
    90% من العطور الي معروضه بالموقع تصبغ بالملابس ...وفي فرق كبير بينها وبين الأصلي
    واذا بتجربون اترك العطر بالسياره يومين بتلقاه بدا يتسرب وريحته قريبه للكلونيا ..

    ومن يومها جربت أكثر من واحد بس ماكو فايده .. شكلي بشتري الأصلي وأمري لله


    موفق أخوي
     
  16. LS__430

    LS__430 عضو جديد

    التسجيل:
    ‏15 أغسطس 2009
    المشاركات:
    218
    عدد الإعجابات:
    0
    هالمنتدى تلاقي فيه البلاوي

    وتلاقي فيه احزاب



    وإذا تبي تكتشف هالشي شوف لك اي موضوع بيع عطر او ساعه او بقي او سيارة او اي شي

    وإنتقد السعر او إن البضاعه ماتسوى هالسعر



    تلاقي كم هائل من الأعضاء يردون عليك وكلهم سبحان الله يدافعوووون عن صاحب الموضوع مو البضاعه !!!!!!!!!!!!!!!!!!!!!!!!!!!

    وكأنه هتلر وهذول جنوده المخلصين -- وتلاقي حطوووك في بالهم وصرت بلاك ليست عندهم

    وحط موضوع لك -- تلاقي الإنتقام ينصب عليك لأنك خربت عليهم البيعه الأولى



    تبي القوية صج


    في موضوع ( بيع بضاعه ) ماراح اقول شنو نوع البضاعه

    لما دخلت اشارك بالسومه إكتشفت إن البضاعه حدها بالسوق تسوى 6 دنانير للحبه

    ولما شفت المشاركات لقيت اكثر من 5 مشاركات إرفعوا سعر البضاعه لــ 12 دينار

    وطلعت من الموضوع وبعد فترة إكتشفت الـــ 5 مشاركات من قبل الأعضاء اللي إرفعوا سعر البضاعه

    منزلين نفس البضاعه بسعر ثاني ===

    يعني طلع صاحب الموضوع والمشاركات اللي أرفعت السومه == ربع

    واخذ مدح على البضاعه وجودتها وإنها تنباع بالسوق بسعر غالي وإن صاحب الموضوع موطماع

    ومنزل البضاعه وبياع بسعر رخيص و و و وو و



    وسلملي على المراقبين اللي مايتدخلون إللا إذا احد إشتكى !!!!!!

    بالعربي مافي مراقبه منهم على اللي يجري بالمنتدى
     
  17. sound blaster

    sound blaster عضو نشط

    التسجيل:
    ‏13 ابريل 2007
    المشاركات:
    1,004
    عدد الإعجابات:
    3
    مكان الإقامة:
    الكويت
    عجيييييييييب

    عندي 255


    اخوي ضروري ضروري شوف الخاص



    صراحه تستاهل السعر ورخيصه







    هذه العبارات السابقه التي تضع صاحب السلعه تحت المجهر :)
     
  18. almu7ank

    almu7ank عضو جديد

    التسجيل:
    ‏3 يوليو 2009
    المشاركات:
    590
    عدد الإعجابات:
    0
    انا احث البائع والشاري ان يتقون الله في تصرفاتهم وكلامهم

    يعني البائع لا يمدح بضاعته
    والشاري لا يظلم البضاعه

    هذا كل ما اريد
    وهذا المقصد من كلامي اللي كتبته
     
حالة الموضوع:
مغلق