حملة خلوها تصدي وموديلها يعدي بالكويت ؟؟؟

اخواني الاعضاء



تحيه طيبه وبعد ,,,



مووضوعي هو موضوع اخوي وربما الجميع لا يغفل عنه اعتقد اننا وقعنا تحت جشع التجار ووصلنا لمرحلة الا معقول من ارتفاع الاسعار الجنوني في السلع بشكل عام وبوكلات السيارات بشكل خاص فنلاحظ ان اسعار السياره من سنة 2000 الا سنة 2010 وصلت لمرحلة الدبل وعدم الرحمه ولا حسيب ولا رقيب على الوكلات تلاعب بالاسعار وارتفاع جنوني وايضا غش تجاري ولعب واستهتار بارواح البشر وعيوب مصنعيه في بعض السيارات وسكوت الوكيل وعدم الابلاغ للمصلحه الشخصيه فمثلا هناك موضوع بالمنتدى يطالب بكل من يملك سياره موديل 2007 ان يرفع معه قضيه ويغيرها الى 2010 وذلك لثبوت عيب مصنعي بالسياره , اين الجهات المسؤاله عن هذا الخلل اين حماية المستهلك عن الارتفاع الجنوني باسعار السيارات وصلنا لمرحلة اننا اغلى اسعار ببعض السيارات بالخليج و على ذلك كله انا فقط اريد ان اصل الى نقطه معينه من خلال هذا الكلام ؟






هل تؤيد حملة خلوها تصدي وموديلها يعدي التي طبقت بالسعوديه ان تطبق بالكويت ؟



وهل تتوقع نجاحها ؟ وهل تتوقع فشلها ؟ ولماذا ؟



انا اتفق معكم انها في المملكه العربيه السعوديه لم تعطي النتائج المطلوبه ولكن نحن لو طبقنها بالكويت خلال شهر واحد سوف تعطي النتيجه المرجوه منها .






اتمنى ان يقرا الجميع هذا الكلام وان يخاطبني بالعقل وان يتكلم بكل عقلانيه عن اسعار السيارات المبالغ فيها .[/size][/size]​

 

انا وياكم باذن الله
خلوها تصدي وتقعد عندهم ونشتري مستعمل ولا نشتري منهم
حراميه وما يخافون الله فينا حسبي الله ونعم الوكيل

 

اي والله وانا بعد ومعاكم

هل سنه بس نجرب

نخليهم يسؤؤن احلا عروض لنا

هل تؤيد حملة خلوها تصدي وموديلها يعدي

 

لا يبا لا تصدي ولا بطيخ والله اذا الموتر بخاطري وعندي فلوسه لادقه والعن ابو الفقر.

عيل اشتري مستعمل من حراميه المستعمل وكل يوم اطق الكرت بالصناعيه ؟

 

سوف تكون هناك لجنه لحملة خلوها تصدي ؟



من يريد ان يكون من اللجنه يرسل رساله الى الخاص ؟

 

بكل بساطه انت مقتنع باسعار السيارات الحالي ؟



جيب توه نازل سعره 15000 دينار ليش على شنو



لان ما في احد يوقفهم عند حدهم

 

لا طبعا مو مقتنع 15000 البرادو مثلا مايسوى كلش - وانا مو ملزوم اشتريه ب 15000

وبنفس الوقت المستعمل اسعاره مومنطقيه - يعني جيب شاريه ب9000
وكارفه كرف 3 سنوات يبي يبيعه ب 8000 ليش ؟؟

واذا تركنا اليديد والمستعمل ونتم على سياراتنا راح يرتفع سعر القطع و الاجور .
يعني في كل الحالات احنا الخسرانين

بس خسران ومرتاح احسن من خسران وتعبان.

خنروح نصلي وللحديث بقيه

 

خلها تصدي وصدقني بتعدي بتعدي ... تدري ليش ؟ لان اللي عنده فلوس مايهمه هالامر هذا ولكن انا وانت وغيرنا انروح للوكاله ونتحكحك باكشخ السيارات ونرجع البيت ضغطنا الف ... واي موتر يصدي عندهم يسوون عرض اشتر سيارة وحصل على كوبون بقيمه 30 دينار واحنا مساكين انصدق ونشتري يامعود خلها على الله وشكلنا احنا اللي بنصدي ... تحياتي للجميع

 

لو 25% من اهداف الحمله تتحقق نوصل للغايه اللي نريدها ولو الحمله اعطينها حقها الاعلامي صدقني الكثير راح يؤجل ان يشتري سيارته لمدة 6 اشهر لا نريد سنه يا جماعه 6 اشهر والله العظيم نلوي ايدينهم نخلها نخازنهم ما تتحمل من كثر السيارات المخزنه .



نبي نخلي الياس يتمكن منا لا اللي يبي يشتري سياره نقوله انطر بس 6 اشهر وراح تاخذها طايح من قيمتها الحاليه الشي الكثير ولا يعطونك معاها عروض ولو نخليها سنه ثق بالله السنه الجايه تلقى السيارات بنص قيمتها




لا تيئسون خلونا نسوي شي لو نحاول وقلت لوو 25% من اهداف الحملهه تتحقق حنا الرباحنين



اياك والياس

 

اكيد ما يسوى وسعره غالي حيل وطغيان و الجشع بعينه وطبعا مو ملزوم تشتريه ولكن لو صار سعر بــ 7000 دينار يعني السعر معقول اخوي احنا نتكلم عن المرحله العقلانيه وليست القدر الماليه والحمله هااذي الهدف منها وضع النقاط على الاحرف وتوقيف اهل الجشع عند حدودهم .



ثانيا :


تقول السياره انكرفت ثلاث سنوات وسعرها بــ 8000 طيب السياره بسنتها جم سعرها خلنا نقول 12000 يعني طاح منها 4 الالف لان قيمتها من البدايه غاليه يعني موو معقوله ابشتري سياره بـمبلغ وقدره وابيعها بعد اقل من خمس سنوات بــ 3 الالف دينار لكن لو حنا حاولنا ننزل قيمتها من الاساس من سعرها وهي بالوكاله حتى المستعمل راح ينزل .




ثالثا :



ما اعتقد تحليلك صحيح لان قليل من سيارته موديلها مر عليه 8 سنوات وبعدين حنا ما طالبنا بــ 8 سنوات لعمر الحمله وحصد ثمار النجاح عشان كل هذا يصير طالبنا بـــ 6 اشهر يعني اتوقع الاغلبيه سيارته راح تقزره اكثر من 6 اشهر

 

السلام عليكم
والله يا اخوان كلامكم طيب وعين الصح لان جد الموضوع بدا يكبر والكل يتمادى ويسعر سياراته على كيفه ، الى ان وصلنا لمرحله ان الكويتي يسافر كل ديره عشان يروح يشتري له سياره ب5 او ب6 الاف وتفرق عن سعرها اهني مو اقل من الف دينار ، مع العلم ان كلهم وكلاء وكلهم من نفس بلد المنشأ ونفص المصنع ونفس التكلفه بشحن السيارات لان دول الخليج كلها يم بعضها ، فليش السيارات عندنا بالكويت خاصه مشلعه فوق !!؟
مع العلم اردى واقل مواصفات عندنا بالكويت ، الواحد لما يروح الوكالات الثانيه بالسعوديه وبقطر والامارات يلاقي شغلات تطير العقل واحنا كل يوم راعي الحلال يقوم من النوم ماسكه معاه على سعر معين ويرفع على الفقاره والمساكين

المقتدر الله يزيده ، لكن اللي على قد حاله بعد جم سنه شلون راح يقدر يشتري سياره اذا استمر وضع رفع الاسعار من وكلاء السيارات !!

اتمنى من هالحمله تتفعل بشكل ملموس ونشوفها على ارض الواقع عشان نكون من ضمنها ومن اشد الداعمين لها


تمنياتي لكم بالتوفيق ،، وخلوها تصدي

 

جزاك الله خير
وانا بعد وياكم

خلوها تصدي​

 

نعم اخوي بو غلاب اضم صوتي لصوتك (نعم لقد وقعنى في جشع التجار وعلينا التوقف)

 

انا معاكم الاسعار مبالغ فيها !!!
لكن اذا افتكينه من الوكالات تتوقع الشريطيه بيسكتون
راح يرفعون سعر المستعمل يقولك تبي روح اشتر من الوكاله!!!
فالناس راح تضطر تشتري من الوكاله يقولون ولا مذاله هال........(الشريطي)
تمر يم الوكالات تلقاهم بره تقول عتاويه جبد بكل بساطه عمي هاي للبيع
تقوله اي سوم اممممممم ولك 300 بعتنيييييي والسياره تسوا 2000
ودك تقوم تاكله وتخليه يعيش ابطنك ما طلعه بال.....تكرمون

 

المشكله بالحكومه.

دعم مطلق للتاجر

وين دور الرقابه وتفعل القوانين ؟؟
وين منع الاحتكار ؟؟ وين التجاره الحره ؟؟

ليش مايلزمون الوكيل يستقبل السياره غصبن عليه؟؟ ولا اسحب ترخيصه ! شنو الي يمنع ؟

ليش ما يعطون ترخيص لاكثر من وكيل ؟

ليش منع استيراد السيارات الي موديلها اكبر من 4 سنوات ؟

ولا المرور ياعيني لاعبين لعب سعيده بالسطوح ههههه

لوبي التجار فارنا فر ولا حسب ولا رقيب ! حسبي الله ونعم الوكيل

قوانين توضع لمصلحة المواطن وبقدرة قادر تصير ضده !

اييه يبه خلها على الله.. والله ما تصدي.. الا احنا الي انصدي ونعفن بعد.

 

اود ان أشكرك اخوي ابو غلاب عالموضوع المهم جدا
اول شي موضوع الرقابة وحماية المستهلك لا تسأل فالفساد متفشي في سوق السيارات الكويتي بدون رقيب او حسيب..
ومع الأسف أدى جشع وطمع وكلاء السيارت في الكويت الى ان تصبح الكويت من اكثر دول الخليج ارتفاعا في اسعار السيارات..
وباعتقادي اخوي بو غلاب نحن المسؤولون عن ذلك لأننا نركض ونتهافت لشراء السيارة من الوكالة بالسعر الذي يطلبه الوكيل دون اي وعي.. مع العلم انني لا ادافع عن مكاتب ومعارض السيارات لأنهم هم ايضا يطلبون اسعارا خيالية بالسيارات..
وبالنسبة لحملة خلوها تصدي السعودية فلقد أتت بنتيجة والدليل أن اسعار السيارات بالسعودية أرخص من الكويت...
السؤال...
لماذا هذا الصمت والسكوت عنهم ونحن نعلم أنهم يقومون بسرقتنا؟؟؟
من المستفيد الأول من هذه العصابة الموجودة في سوق السيارات الكويتي؟؟؟
أسف على الإطالة ... وشكرا

 

اخواني



اقسم بالله الهدف من الموضوع ومن الحمله هو كسر ظلام الصمت الذي يخيم علينا وظهور نور الحق ووضع حد اكرر ووضع حد ونقول للتجار اذا رفعتوا اسعاركم مره ثانيه نفس هالحمله نبي نسويها واحنا لازم نبلش بالحمله قبل بداية السنه الجديده



ويا اخواني نبي نجتمع ونبي ننسق ونتشاور بيننا ونبي دعم فهناك الكثير من سوف يدعمنا وانا متاكد ونريد نضع يوم نتجمع فيه ونخليها اعلاميه بحت والله ثم والله ليخافون خلاااص عصر السكوت ولا اليوم الجيب 20000 بعد جم سنه بجم ابتشتري بـــ 60000 وثق بالله انه سعر السياره من المصنع الى ان تصل للوكيل وهي بقيمة النص من قيمتها الحاليه يعني بالعربي ربح باي طريقه على حسابنا



يا اخوان ما نبي دعم معنوي بس لا انا ان شاء الله بعد العيد سوف انتهي من موقع للحمله والهدف الاساسي منه توجيه داعمين الحمله واخبارهم بكل التفاصيل وبكل نتائج الحمله


وباذن الله بعد العيد سوف نتهي من موقع



خلوها تصدي وموديلها يعدي بالكويت




وانا متاكد ان الموضوع هذا قد سمع فيه بعض التجار وانهم سوف يحاولون ود الموضوع ولكن يا ادارة منتدانا الغالي امنعوا اي تدخل لود الموضوع لان هذا الموضوع محتكر فقط لمنتدى المؤشر نت وانا متعمد ان يكون انطلاقة الحمله من هذا المنتدى واني اكون اول من يطرح الموضوع للمنتدى

 

خلوها تعطب بعد مو تصدي

ايه قالوا كويتي ومعاش وماخذها اقساط

خلـــــــــــــــــــــوها تعطـــــــــــــــــــب​

 

خلوها تفحم