مبروك 310 قسيمة جديده في غرب الصليبيخات

[مفتش تجاري]

الكويت -15 -3 (كونا) -- وزعت المؤسسة العامة للرعاية السكنية اليوم الدفعة الاخيرة من القسائم الحكومية في مشروع شمال غرب الصليبيخات الاسكاني على المخطط التي تشمل 201 قسيمة لاصحاب التخصيص حتى تاريخ الرابع من يوليو 1993.
ويعتبر مشروع شمال غرب الصليبيخات احد المشروعات الاسكانية الجديدة التي تتميز بالقرب من الامتداد العمراني حيث يقع بالقرب من منطقتي الدوحة والصليبيخات ويطل من الجهة الشرقية على شاطىء الخليج العربي ومن الناحية الجنوبية على امتداد طريق جمال عبدالناصر.
ويصل عدد الوحدات السكنية الى 1736 في مساحة اجمالية للمشروع تقدر ب 51ر236 هكتار ويبلغ عدد القسائم فيه 1030 قسيمة بينما يبلغ عدد البيوت الحكومية 396 بيتا اضافة الى 310 قسائم بمساحة 400 متر مربع.(النهاية) م غ ع / ي س ع كونا151234 جمت مار 10

 

[مفتش تجاري]

مبروك للجميع واللي ناطرين واللي له نصيب فيها انشاء الله بياخذه في هالمنطقه مع العلم انه هالقسايم غير ال 396 بيت يعني اضافة جديده من الاسكان للمشروع بعدد 310 قسيمه بمساحة 400 متر مربع والفال للكل يا رب قولو آمين

 

[ابوعامر]

نتمنى ياخوي يستفيدون منها باقي اخواننا

لاكن نبي الدليل

لان مخططها موزع وجاهز واعتقد مساحة المنطقه ماتستوعب

والله اتمنى يكون كلامك صحيح

 

[مفتش تجاري]

نتمنى ياخوي يستفيدون منها باقي اخواننا

لاكن نبي الدليل

لان مخططها موزع وجاهز واعتقد مساحة المنطقه ماتستوعب

والله اتمنى يكون كلامك صحيح

هلا وغلا اخوي بوعامر
والله يا خوي الخبر هذا انا واعوذ بالله من كلمة انا نقلته لكم من موقع وكالة الانباء الكويتيه كونا وهو بتاريخ اليوم وتقدر تدخل على الموقع وتتأكد بنفسك يالغالي لاني مجرد نقلت الخبر عشان الشباب اللي ناطرين وعليهم الدور يفرحون بالخبر والله من وراء القصد وشاكر لك مشاركتك يا ابو عامر

وهذا رابط الخبر على موقع كونا

http://www.kuna.net.kw/NewsAgenciesPublicSite/ArticleDetails.aspx?id=2068235&Language=ar

 

[F*N]

السلام عليكم
تونى دقيت على كونا والموظف اكد لى الخبر وعندى سؤالى انه لم ينشر فى مكان اخر قال نحن ناخذ اخبارنا من المؤسسه مباشره وغدا سوف تنشر فى الجرائد الاخرى وننتظر غدا
ونتمنى ان يكون الخبر مؤكد
وشكرا جزيلا لناقل الخبر​

 

[I T C]

يقصدون الشقق....

 

[F*N]

يقصدون الشقق....

شلونك ابو عبدالعزيز

شقق ليش زلمات منهو يسكنها
بيوصل الدور الى 98 ماادرى منهو فكره الشقق
وليش يسوونهم مايشوفون الطلبات على شنهو
لو يتكنسلون احسن يمكن بس 3 اشخاص بالكويت طالبين شقق وكلهم مطلقين حريمهم

 

[ابو غانم]

الله يبشرك بالخير .. والله من أحلى الاخبار اللي سمعتها .. لكن فيه فقره محيرتني بالموضوع .. شلون يقولون توزيع الدفعه الاخيره وبعدين يقولون باقي 300 قسيمه .. من يفسر لي الفقره هذي شلون صايره !!!!!! وبعد نبي متابعه للموضوع هذا والتأكد منه عدل ... مشكور يالغالي

 

[مفتش تجاري]

السلام عليكم
تونى دقيت على كونا والموظف اكد لى الخبر وعندى سؤالى انه لم ينشر فى مكان اخر قال نحن ناخذ اخبارنا من المؤسسه مباشره وغدا سوف تنشر فى الجرائد الاخرى وننتظر غدا
ونتمنى ان يكون الخبر مؤكد
وشكرا جزيلا لناقل الخبر​

العفو يالطيب وتهمنا فرحتكم وتسكنون انتو مع عيالكم مع خالص شكري لتدعيم وتوثيق الخبر في اتصالك ومتابعتك الحلوه للموضوع

 

[مفتش تجاري]

الله يبشرك بالخير .. والله من أحلى الاخبار اللي سمعتها .. لكن فيه فقره محيرتني بالموضوع .. شلون يقولون توزيع الدفعه الاخيره وبعدين يقولون باقي 300 قسيمه .. من يفسر لي الفقره هذي شلون صايره !!!!!! وبعد نبي متابعه للموضوع هذا والتأكد منه عدل ... مشكور يالغالي

والله يبشرك بالجنه يالغالي

 

[مفتش تجاري]

يقصدون الشقق....

لا اخوي يقصدون 310 قسيمه وليس شقق شاكر لك مشاركتك

 

[مفتش تجاري]

من باب تحليلي الشخصي للموضوع انه الخبر اكيد والتحليل هو استنتاج مجموع الاراضي مع الوحدات السكنيه الجاهزه اللي هي مقصود فيها بيوت وراح تلقون الجواب والتاكيد في نفس الخبر اللي نشرته كونا وهي ذاكره في الخبر عدد 1736 منهم 1030 اللي توزعو وخلصو على اخر دفعه قسايم ومنهم البيوت المتبقيه وعددهم 396 بيت بالاضافه الى الرقم الاخير للقسايم وعددهم 310 معناته وبالتالي يصبح عندنا العدد صحيح لانه

1030 + 396 + 310 = 1736 وهذا الرقم مذكور في الخبر
وعندنا ايضا
1736 - 1030 = 706 المتبقى سواء قسايم او بيوت
وعندنا ايضا
706 - 396 بيت = 310 وهو الرقم المذكور في الخبر معناته الخبر اكيد وليس فيه اي تلاعب اتمنى اني وضحت لكم الصوره والخبر بشكل افضل ومفهوم مع العلم بانه تحليل شخصي لواقعية ومصداقية الخبر مع احترامي للكل ومبرووووك مقدما للي عليهم الدور والله يهنيهم في قسايمهم ومنازلهم

 

[ابو غانم]

أخوي مفتش تجاري

تسلم على التحليل الطيب .. بس فيه سؤال ليش الــ 310 قسيمه ماتم توزيعها مع الــ 1030 دايركت .

ليش التأخير على العدد هذا ؟

وليش ماسموها الدفعه السادسه ؟ ليش قالوا تم توزيع الدفعه الخامسه والأخيره ؟

كلمة أخيره معناتها انها ماوراها شي .. تبي الصراحه شي يحير والله .. وأكثر الشباب يقولون خلاص مافيه شي .

بس أنا مقتنع بتحليلك ومتفائل والله .. ولكن نبي أحد يعرف أحد بالاسكان يتأكد لنا من الخبر هذا

وشكرا

 

[مستريح]

يقصدون الشقق ياشباب الله يهديكم بس

 

[مفتش تجاري]

يقصدون الشقق ياشباب الله يهديكم بس

ممكن لو سمحت اخ مستريح تقرأ الخبر عدل اللي موجود بالرابط وتفيدنا اكثر

 

[مستريح]

اي اخوي خطأ من ناقل الخبر

 

[مفتش تجاري]

اي اخوي خطأ من ناقل الخبر

هلا اخوي انا اللي ناقل الخبر وممكن توضحلي وين الخطأ وهو معلن عنه في وكالة الانباء الكويتيه كونا يعني ما جبت شي من عندي وقلت لك ادخل على الرابط وتاكد من الموضوع بس انت شكلك مستريح ومريح على الاخر وماتبي تتعب نفسك وتشوف بعينك واعتقد يا اخ مستريح ما في شقق بالكويت وتوزعها الاسكان بمساحة 400 متر اتمنى تركز على هالنقطه لانه شقق الصوابر ما وصلت هالمساحه ولا راح توصل في اي مشروع قادم وشغله ثانيه منو قالك انه غرب الصليبيخات فيها شقق على حسب كلام المخطط والخريطه الشقق مجرد اقتراح لكن من بعد مشكلة الصوابر لا يمكن انهم يطرحون شقق لانه محد قابل بالشقق وانت متاكد من هالكلام عدل وانت اولهم وبعدين الاسكان تقول 400 متر لكل قسيمه لو انه خطأ في النقل على حسب كلامك ما يكون 400 متر ويعتبر خطأ في النقل وما تكون كلمة قسيمة لو في خطأ بالنقل مع احترامي الشديد لشخصك الكريم روح تأكد وبعدين تعال ونتفاهم على كل شي

 

[ابوعامر]

الخبر غير واضح ابد ياشباب وننتظر توضيح اكثر من المؤسسه

نتمنى لاخواننا الخير والتوفيق

 

[ابو غانم]

تم الاتصال على موظف بالاسكان وقال انها شقق .. ومدري عنه والله .. لازم نتأكد بكره من الرعاية السكنية

 

[مفتش تجاري]

بصراحه قمت اشك في نفسي من هالخبر اللي نقلته مقيوله خيرا تعمل شرا تلقى مع انه مكتوب والكلام اوضح من الشمس

400 متر

قسيمه

واتمنى من الشباب عدم التشاؤم في الموضوع وتفائلو بالخير تجدوه

بصراحه شي محبط ويحز بالنفس من اللي اشوفه من مشاركات بس اليوم تعلمت درس حلو من مدرسة الحياة وهو امش في حالك وما عليك من غيرك حتى لو كان فعل خير لانه السالفه بترجع عليك مره ثانيه عالعموم مشكورين للكل ولجميع الاعضاء وخالص احترامي وتقديري لهم وهي بالنهاية حرية اراء بالناس ولا اعتراض عليها والله يوفق الجميع لما هو خير للناس