خبر مؤسف الغاء مشروع غرب هدية السكني

[المنظور الشامل]

شباب خبر مؤسف اليوم بجريدة الوطن وهو الغاء مشروع غرب هدية السكني وأصبح السكن بالمدن الحدودية أمر واقعي .

والسؤال هل هذا الخبر راح يأثر بأسعار العقار


كتب عبدالله الشمري:

أربعة أعوام من الاجتماعات والمخاطبات بين المؤسسة العامة للرعاية السكنية وشركة نفط الكويت بشأن تخصيص 4 آلاف قسيمة للمواطنين في منطقة غرب هدية أسفرت عن لاشيء، فقد أغلقت المؤسسة ملف المشروع نهائيا وذلك لرفض شركة النفط منحها الأرض المخصصة له.
وقال مصدر مسؤول ان اجتماعا حاسما عقدته المؤسسة مع قيادات من شركة النفط بحضور مسؤولين من بلدية الكويت، وكان رأي النفط صريحا وواضحا ولا لبس فيه وهو امتناعها النهائي عن تسليم أي جزء من الأراضي التي سيقام عليها المشروع، لحاجتها الماسة اليها لاقامة مشاريع عمرانية تتبع مدينة الأحمدي النفطية، اضافة الى وجود عوائق أخرى مثل خطوط النفط، مما يجعل تسليم الأراضي لأي جهة حكومية أمرا مستحيلا.
وأضاف المصدر ان رأي شركة النفط في ذلك الاجتماع ثبت في محضر رسمي ورفعت نسخة منه الى نائب رئيس مجلس الوزراء للشؤون الاقتصادية ووزير الدولة لشؤون الاسكان والتنمية الشيخ أحمد الفهد، وأشار الى ان الملف يعتبر مغلقا بصورة نهائية ما لم يتخذ فيه قرار سياسي.


المصدر

http://www.alwatan.com.kw/ArticleDetails.aspx?Id=27841

 

[q8-speed]

هاردلك

 

[الوافى44]

اكيد يلغونها شلون يصرفون مدينه صباح والمطلاع والخيران

 

[النموذج الدولي]

الحمد لله على كل حال والصبر مفتاح الفرج

 

[بالول]

والله وناسه الحدود شنو فيها يالربع باجر تنسكن وتصير ديره ثانيه واذكرها

 

[q8.1911]

ويلومونا لما خذينا بمدينة صباح الأحمد

 

[الجلمود]

خبر يضيق الصدر صج يعني الطق كله بيصير على الصليبيه هذا اذا اقروها كانو اصحاب طلبات 98 وماحولها يتمنون ان تقر غرب هديه عشان تفضالهم الصليبة بس الظاهر بنبدددددددددددددددددددددددددددل ماكو حل السالفه مطوله وخلو غرب هديه للضبان والجرابيع لانهم عيال بطنها واقدم منا بالكويت ههههههههههههههههههههه

 

[tmh]

اكيد مرفوضة ولا ليش موقفينها كل هالسنين هاردلك يا شباب ومبروك لمن اخذ بشمال غرب الصليبيخات ومبروك لهم بعد اكيد راح ترتفع اسعار غرب الصليبيخات

 

[عقارى ولهان]

حكومة ما عندها مصداقية

 

[بالول]

ياجماعه الخبر هذا مو صحيح فى ناس نفته وهذى خطه عشان يوزعون لبعيد اللى على الحدود وعقبها راح يوزعونها وحطوا بالكم ترى هذى فخه ويبون يصيدون الناس وهذا اعتقاد ناس وايد وسئلوا احسن وباجر انا اعرف واحد يقعد بديوانيه فيها الفهد وراح نستفسر عدل منه على هالخبر اللى ضيق خلقنه والله وتكدرنه وياريت اللى عنده معلومه يقولها وشكرا للعموم...........

 

[CENTRALBANK]

ان شاء الله يتم اتخاذ قرار سياسي

 

[مستريح]

يااااااااااحظ اللي اخذوا على المخطط ولا عزاء للي طنشوا شمال غرب صليبخات والله اعرف واحد طلبه 92 نطر غرب هدية ورفض ارض شمال غرب صليبخات ارض النخبة افضل موقع وع البحر اتصل فيني ومتحطم نفسيا يقول ياليتني اخذت في شمال غرب صليبخات

 

[مستريح]

اللي مااخذو في شمال غرب صليبخات من الطلبات القديمه اقول لهم : لا عزاء لكم خسرتم منطقة النخبة ولن يغفر لكم التاريخ مهما طال الزمن

 

[العوشز]

قلنالكم من زمان الارض غير صالحه للسكن النفط لن تتخلى عنها محد سمع الحجي والطيور طارت بارزاقها شكلي باخذ في الخيران هههههههههههه

 

[ودي اربح]

موووو خوووش خبر

والعالم اللى ناطره كل هالسنين هذي شنو يسون وين يسكنون الله يكون بالعون

 

[أبومبارك2007]

اللي مااخذو في شمال غرب صليبخات من الطلبات القديمه اقول لهم : لا عزاء لكم خسرتم منطقة النخبة ولن يغفر لكم التاريخ مهما طال الزمن

والله ياخوي أنا لو تحصل لي غرب الصليبيخات قسيمه على 6 شوارع ماخذيت فيها أنا من ضاحية صباح السالم وجنوب لو أسكن في شقه طول عمري والصليبيخات خل يفتحون التبديل وشوف شلون البدل يصير بالهبل نص الربع ماخذين فيها على شان يبدلون وياخذون لهم كم دينار وأعتقد من تقرأ أسامي اللي دخلو الدفعات السابقه راح تعرف أن كلامي صحيح وبالنسبه لغرب هديه أنا قلت قبل هالكلام أنا مواجه أحمد الفهد بدوانيه النائب محمد الحويله ووقفته قدام باب الدوانيه وحلفته بالله قلت له بخصوص هديه ننطر ولا نشتري قالي بالحرف الواحد مثل الشارب اللي عليك طالعه ونا لاقلت كلمه قدها بس أصبروا شوي وأعتقد أهل المنطقه العاشره خابرين سالفة أم الهيمان لما وزعوها شلون صرفوها على الشباب وبعدها طلعت المنقف وفهد الأحمد

 

[اساهيم]

ياجماعه الخبر هذا مو صحيح فى ناس نفته وهذى خطه عشان يوزعون لبعيد اللى على الحدود وعقبها راح يوزعونها وحطوا بالكم ترى هذى فخه ويبون يصيدون الناس وهذا اعتقاد ناس وايد وسئلوا احسن وباجر انا اعرف واحد يقعد بديوانيه فيها الفهد وراح نستفسر عدل منه على هالخبر اللى ضيق خلقنه والله وتكدرنه وياريت اللى عنده معلومه يقولها وشكرا للعموم...........

الفهد لو يبى جان مشاها يوم كان وزير النفط ..بس لحد يضحك عليكم ..

وترى السبب مو اللى انت قلته انهم يبون يوزعون مناطق بعيده ..

السبب يا عزيزى علشان خصخصة النفط ..لان الارض تتبع النفط واذا تخصخص النفط راح تكون وياه الارض ..

اتمنى اتضحت الرؤيه ..

 

[ابو غانم]

من قال مافيه شمال غرب الصليبخات ؟؟؟؟؟؟؟!!!!!!!!!!!

شمال غرب الصليبخات ماراحت باقي منها قطعة عدد 396 بيت .

طبعا بيوت حكومه موقسايم بس سمعت انه فيه مطالبات بتحويلها الى قسايم .

لكن بيوت حكومه او قسايم نفس الشي .. يعني فيه امل لأصحاب طلبات 92 أبشروا بالخير والتوزيع قريب انشاءالله

 

[KEMPES]

منو مصدر مسؤول ؟؟
الخبر هذا اعتقد مو صحيح .

 

[صقر3]

وأشار الى ان الملف يعتبر مغلقا بصورة نهائية ما لم يتخذ فيه قرار سياسي.

ماهو المقصود في قرار سياسي يعني في مجال من قبل النواب الامه عودة غرب هديه للاسكان........