فرصة استثمار حقيقية

[gmail2020]

يا اخوان اشرايكم بمشروع التنس المطروح للاكتتاب نبي تحليل هل نساهم و الا لا ؟؟؟

للأهمية يا اخوان

 

[احمد knpc]

الا كتتاب خاص مو عام فيه زياده رأس المال.......يحق لملاك السهم فقط الاكتتاب فيه..... والله اعلم

 

[gmail2020]

هلا بخوي احمد تأكدت من الشركة الخليجية للمقاصة بأن اي واحد ممكن يساهم و مفتوح لكل الجنسيات بعد.

بس ابي اعرف الجدوى من الاستثمار في هالنوع من المشاريع بما انه يعطيك عائد 12% سنويا و هو أكثر من الوديعة ايام عزها ..

و الا اشرايك ؟؟

 

[انوفستي]

انا ما اعرف العب تنس شوف لك واحد يعرف يلعب تنس

 

[خبير النفط]

ما له شغل بالتنس اذا يبون يربحون العمليه فقط للحصول على اراضى لأقامه المشروع بعدين تجييرها لشى ثانى مطاعم منتزة فندق .....الخ ولا اذا راده على مباريات التنس و اللاعبين الى يبون يستأجرون ملاعب ما راح يحصلون ولا حتى 1% عائد

 

[Balool]

عادي تغير النشاط اذا المشروع بي او تي؟

اذا لا اشوف المشروع عادي بس يمكن بطولات عربية .. و الجمهور العربي بس يحضر لكورة القدم

اما بطولات عالمية اشوفها صعبة خصوصا العرق ممنوع الجماعة يبون بطل شامبين لا فازو نعطيهم لقاح؟

 

[ابو عبادي]

والله يا خوي المشكله مو في المشاريع 95 في الميه من المشاريع في الخليج ناجحه شوف المشاريع الخاصه ما تحصل احد خسران حتى البقاله تربح صدق سوق شعبي ابو مية فلس يربح كثر من الشركات الي راس ماله كثر من 10 مليون

بس وين تصير المشكله في الشرط الي تحصله في كل شركه الي يقول

شراء وبيع الاسهم والسندات والاوراق المالية

الشركة واستغلال الفوائض المالية للشركة عن طريق استثمارها
في محافظ مالية


لو كل شركة تشتغل في نفس النشاط ولا تغامر ولا ضارب في الامول

كان ما تشوف شركه خسرانه

بس الربح السريع في المقابل الخساره اكبر

 

[gmail2020]

بس للاخوان الي فاهمين غلط هذا التصريح بالأنباء
"أعلن رئيس مجلس ادارة شركة سبيريت للتطوير العقاري علي حسين الداوود فتح باب الاكتتاب الخاص للمساهمين من الأفراد والشركات والمستثمرين الراغبين في المشاركة في زيادة رأسمال شركة «سبيريت» للتطوير العقاري اعتبارا من امس الاحد 16-5-2010 ولمدة 45 يوما وذلك لدى الشركة الخليجية لحفظ الأوراق المالية التي ستقوم بإدارة كافة الإجراءات المتعلقة بالاكتتاب."



و مذكور أنه عائد سنوي 12% لمدة 30 سنة يعني احسن من الاستثمار العقاري تراني متهدد و بروح اكتتب بس أبي رايكم يا اخوان.

 

[احمد knpc]

بس للاخوان الي فاهمين غلط هذا التصريح بالأنباء
"أعلن رئيس مجلس ادارة شركة سبيريت للتطوير العقاري علي حسين الداوود فتح باب الاكتتاب الخاص للمساهمين من الأفراد والشركات والمستثمرين الراغبين في المشاركة في زيادة رأسمال شركة «سبيريت» للتطوير العقاري اعتبارا من امس الاحد 16-5-2010 ولمدة 45 يوما وذلك لدى الشركة الخليجية لحفظ الأوراق المالية التي ستقوم بإدارة كافة الإجراءات المتعلقة بالاكتتاب."



و مذكور أنه عائد سنوي 12% لمدة 30 سنة يعني احسن من الاستثمار العقاري تراني متهدد و بروح اكتتب بس أبي رايكم يا اخوان.

ومثل هالشركات ممكن تدش البورصه بالمستقبل والا لا.......

 

[احمد knpc]

أخوى يقولون التوقع 12% وممكن أقل وممكن أكثر........واعرف طالما زياده رأس مال يمكن هالشركه متوهقه .........وخل افليساتك للكتتابات العامه الجايه الى اشوفها افضل بكثير من الشركه هذى الى اشوى غامضه ......

 

[ابو عبادي]

هل انت شايف سوق العقار غليه حركه اذا عليه حركه ليش ما تاخذ من السوق في شركات اقل من مية فلس ياليت تشوف الشركات لي لين الحين ما ندرج فيه موقع خاص في الشركات الي غير مدرجه شوف شكثرهم وانت تعرف شنو المغامره

 

[رشيد]

ماعليك منهم هم ونشراتهم بيوصلونك القمر

تبي تعرف السالفة الصحيحة ولا لا ؟

 

[عندك سلف]

اذا ما ني غلطان المشروع اللي تأسست الشركة له موجود في جنوب السرة بجانب مجمع 360
والمشروع لا يزال هيكل اسود في بداياته
اذا انت جاد في الاكتتاب روح لك يوم من الايام وانت مار مجمع 360 طل طلة على المشروع وشوف احد من المهندسين وسولف معاه عن المشروع ومحتوياته وتكاليفه...الخ
وبعدين قرر

 

[Metalforever]

في أحد عنده نشرة الإكتتاب و التوقعات المالية المستقبلية للمشروع ؟
بدونها لا أحد يقدر يتخذ قرار الإستثمار ...

 

[دوم خسران]

في أحد عنده نشرة الإكتتاب و التوقعات المالية المستقبلية للمشروع ؟
بدونها لا أحد يقدر يتخذ قرار الإستثمار ...

طبعاً التوقعات الماليه المستقبليه للمشروع سوف تكون مثل العسل وكلها أحلام ورديه ---- عيل شلون كل العالم طبعانه كله من كلام الكلك والكذب الذي يتفننون في طباعته بأجمل الكتيبات وأفخر أنواع الورق ومكاتب فارهه ومواقع بأرقى المجمعات التجاريه --لزوم النصب والاحتيال
وهناك معلومه----- طالما أن الاكتتاب لجميع الجنسيات هذه علامه مؤكده بأن الشركه طبعانه ونواياهم سيئه ويريدون لم فلوس بأي وسيله