هل ممكن استرد حقي ولا خلاص مافي امل

[koko2000]

السلام عليكم جميعا

انا عندي مشكله والظاهر مالها حل انا مواطنه كويتيه كان عمري 19 سنه اجريت عمليه سنه 1987 في مستشفي الصباح عمليه ترقيع طبله يعني اسهل عمليه تجرى بالاذن وكانت النتيجه فاشله جدااااااا حيث اني فقدت عمليه السمع بالاذن لانه الدكتور اوهمني انه عادي بعد العمليه وراح استرد السمع بالتدريج طبعا كان الكلام كله كذب بالعكس فقدت السمع تماما بالاذن شنو سوا باذني مادري وظليت ار اجع المستشفي التهابات ومشاكل فيها وهذا شي طبيعي بعد العمليه الفاشله المهم

انا بديت اتقبل مصيري وقلت الحمدلله قدر الله ماشاء فعل وصار الغزو الغاشم علي الكويت بعد كم سنه بديت اعاني من عمليه دوار شديد بالاذن الخربانه
وانفلبت حياتي راسا علي عقب كل يوم بمستشفي طبعا طلعوني تقاعد طبعي لاني غير لائقه للعمل بعد عمل لجنه طبيه بمستشفي الصباح


ورحت للسعوديه وسويت عمليه بالسعودي الالماني وقال لي الدكتور اللي اجري العمليه انه الاذن ملعوب فيها يعني خربانه وغير قابله للعلاج طبعا انتوا عارفين كم تكلف العمليات كلها بالخاص ومراجعات يعني بالعربي كل معاشي دوا ومراجعات بالمستشفيات

تحسنت شوي فتره ورحعت اعاني مره ثانيه والدكتور يقول عمليه تخيلوا مره ثالثه افتح اذني لي متي اقسم بالله صار لي الحين 23 سنه اعاني من الخراب اللي صار باذني

جيت الكويت وقررت ارفع قضيه في مكتب**** قبل اربع سنوات
وقال لي المستشار المصري اوكي نرفع دعوه بس قال لي روحي هاتي دليل من المستشفي انه هذا الدكتور هو اللي سوا العمليه لمن رحت المستشفي قالوا الملفات ضاعت اثناء الغرو ودورت ودوت ولا في شي بس في ملفي مال التقاعد الطبي

وسكت اللي حارني انه الدكتور مازال يعمل بافضل مستشفي خاص بالكويت وكل يوم اعلان عنه
والبلوه انه كان رئيس وحده السمع بالصباح

سؤالي هل يحق لي رفع قضيه علي مستشفي الصباح بعد هالعمر ولا خلاص راح حقي وكيف اثبت انه مستشفي الصباح هم اللي سووا لي العمليه
لانه الملفات ضاعت
طبعا دفعت فلوس للمحامي ولا سوا شي لانه ماقدرت اجيب دليل علي دخولي المستشفي اصلا

الحين في عمليه ثالثه وراح تكلف مبلغ وقدره وبعدين شنو الحل
ارجوا اني ما طولت عليكم بس من كثر المعاناه حبيت استشيركم وشكرا

 

[koko2000]

مستشارينا ياريت تردون وشكرا

 

[abatchy007]

الله يعينج ويوفقج ان شاء الله وينصرج على الظلم ويجازي هالدكتور الي ما يخاف ربه

 

[مشعل المحامي]

اختي الكريمه

اتمنى لك دوام الصحه والعافيه

تمهليني لغاية بكره لان عندي قضيه مماثله في المكتب

اشوف شنو الاوراق اللي تم تقديمها ومسالة المدد القانونيه وغيرها

انا بس اطلع عليها واعطيج خبر تحاتين انشاء الله خير


وما تشوفين شر انشاء الله

 

[قناص_السوق]

لا حول ولا قوه الا بالله العلي العظيم

اسأل الله سبحانه رب العرش العظيم ان يشفيك

و اسأل الله سبحانه ان يصل صوتك الى الحكومه و يسهل دربج للعلاج و يعيد لج السنوات التي فقدت من ماضيك


اسأل الله سبحانه الصبر فهو مفتاح الفرج .



للرفع و منتظرين اخوانا المحاميين انشالله ما يقصرووون وياج يا رب اللهم لك الحمد ان للحين في ناس تحب الخير .

 

[فريح الكوح]

لو جتني قضية مماثله ما راح اقبلها لمرور الزمن ..

بس اعتقد لج امل في التقادم الطويل ز..

والعلم عند الله

 

[koko2000]

اشكر الجميع للتفاعل معي وماتقصرون واشكر تعاطفكم معاي والله ماكتبت هالمشكله الا لاني ارهقت ماديا بسبب العلاج ولا تتصورون في دكتور مارحت له بالكويت بجده بالمانيا ما خليت ادور امل والامل بالله اكيد المحامي مشعل انتظر ردك وعساك علي القوه

السؤال هل انتهت مده رفع الشكوي علي وزاره الصحه مع انه المشكله مازالت قائمه وهل اقدر اثبت اني سويت العمليه في مستشفي الصباح علما اننني لم اغادر الكويت في هذه السنه ومافي مستشفي خاص بالكويت تقدر تثبت اني سويت العمليه فيها ؟

 

[koko2000]

انا سمعت عن شي اسمه ضرر مستقبلي ؟

 

[مشعل المحامي]

اختي

الملف الخاص بالتقاعد الطبي مافي اي دليل انك كنت تراجعين مستشفى الصباح ؟

في اي تاريخ تمت الموافقه على احالتك للتقاعد ؟

التقارير الموجوده عنك تبين ان تلف الاذن بسبب خطا طبي ؟

تستطيعين مراجعة الصباح لاخذ التقرير النهائي لاخر عمليه اجريتيها؟

لمن تراجعين المستشفى يقولون ان في امل باصلاحها ام لا؟

شنو العمليه اللي بتسوينها الحين ؟


ردي على هذي الاسئله وانا اقولك

وانشاءالله في امل لا تحاتين

 

[koko2000]

اولا اشكرك اخ مشعل المحامي وماتقصر وماعليه ازعجتك معاي

الملف مال التقاعد صار جديد لانه انفتح بعد الغزو اما الملفات القديمه اتلفت او فقدت مادري

التقاعد صار سنه 1998 بعد عمل لجنه طبيه بالصباح يعني بعد 10 سنين من العمليه لانه الدوخه جات بعد فتره من العمليه وطبعا هذه من نتائج العمليه الفاشله كثره التهابات والتصاقات وكان سبب التقاعد الدوخه وعدم الاتزان لانه الفحص اللي سوته اللجنه بين انه نسبه التوازن بالاذن الخربانه 5 بالميه فقطططططط تخيل 5% بسسس

طبعا كما شرحت بالسابق الدكتور الثاني اللي سويت عنده عمليه هو دكتور سعودي بالمستشفي السعودي الالماني كتب تقرير انه لقي الاذن فيها التصاقات ووجد عظمه معلقه بالهواء ولقي تراكمات اوساخ مزمنه ووجود بقع بيضا نتيجه كثره الاتهابات


طبعا الدكتور ماراح يقول خطا طبي بيقول اللي شافه بالاذن بعد فتحها وهو مايقدر يتهم الدكتور اللي قبله بس شرح بالتقرير اللي شافه

مافهمت اشلون اخذ تقرير طبي من الصباح لاتنسي انه في عمليه ثانيه بعدها بالسعودي الاماني وطبعا ماراح يقدرون يعطوني تقرير الا بالدوخه لانه الملف الاساسي فقد ومايدرون شنو صار بالاذن لانه مافي ملف

لمن اراجع المستشفي طبعا راجعت كذا دكتور يقولون مافي حل وهذا المرض الدوار بيتم معاي مدي الحياه خلاص والادويه مجرد مسكنات وانه حرام افتح اذني مره ثالثه صعبه
اما الدكتور اللي سوي العمليه الثانيه السعودي رحت له وطبعا هو مازال دكتوري واتابع معاه منذ العمليه الثانيه يقول خلينا نفتحها ونشوف مانقدر نحكم مايبين شنو صاير الا لمن نفتحها بس من خلال الفحوصات يبين انه الاذن مافيها اي تجاوب شبه منتهيه خلاص وهو مجرد محاوله اخيره
طبعا انا فكرت اذا بسوي عمليه راح اسويها بالمانيا لاني فعلا صرت حقل تجارب وخايفه بس انا قاعد امشي ورا اي امل ماتتصور حياتي اخ مشعل عايشه ومو عايشه كله دايخه والله يكرمك زواع من الدوخه وقوتها وفجاه اطيح بالارض يعني معاناه وهم اقول الحمدلله

وانا اسفه اخوي مشعل طولت وثقلت عليك بس ونستني انه فيه امل وعساك علي القوه وماتقصر
اختك ام مشعل

 

[koko2000]

الاخ مشعل انا في انتظارك وياريت اذا مافي امل تقول لي وانا شاكره لك ولا هانوا اخواني المستشارين اذا في احد يقدر يفيدي

 

[koko2000]

الا خ رحالي والاخت فيونه ياريت فيكم احد يقدر يعلق علي موضوعي وانا شاكره للجميع

 

[ابو فهد الراكب]

السلام عليكم ...الله يعينج على بلواج ولاتقولين امل مفقود ...مدام الله موجود لاتقولين امل مفقود

 

[koko2000]

ابو فهد ماتقصر واكيد لولا املي بالله ماكان صبرت كل هل السنين ودايم اقول الحمدلله والشكر علي كل حال

 

[fayoona74]

لاحول ولا قوة الا بالله وحسبي الله ونعم الوكيل باطباء بوطقة
اختي رايي الشخصي اذا ماعندج دليل فوضي امرج لرب العالمين وكافي تعب صحي هالمرة بتمرمرين نفسج بتعب نفسي بالقضايا والمحاكم ويعطونج امل وتكتشفين ماكو شي

 

[الحـــوت]

الله يعينيك ويعوض عليك
دكاترة بو طقة كثروا هالأيام وخصوصا بعض دكاترة المستشفيات الحكومية حدث ولاحرج وهالشي شفته بعيني وهيلقتهم تقدر تشوفها من ملابسهم اللي يلبسونها تحت اللابكوت وتقول بلوزه صارلها 10 سنين عنده وماقطها.

 

[koko2000]

الاخت فيونه ماقصرتي كلج ذوق انا لمن فكرت ارفع قضيه و هذا المفروض لاني كل يوم اشوف للدكتور اعلانات بالجريده بعد ماتحول الي مستشفي خاص لازم الناس تعرف حقيقه هالدكتور بالغض النظر انه القضيه تنجح او تفشل شنو ذنب الناس تغامر هذا قصاب مو دكتور

اخواني الموضوع مو سهل انها خسرت حياتي الطبيعه بسبب هل العمليه قسما بالله اخذ باليوم مو اقل من عشر حبات دوا خسرت وظيفتي كمدرسه طلعت تقاعد طبي سياره ما اقدر اسوق خسرت ماديا لين قلت بس بعض الادويه مو موجوده بالكويت اضطر اجيبها من بره اغلب مراجعاتي بجده بالسعودي الالماني سفر رايحه وراده وكل بين فتره وفتره فحوصات يشوفون شنو استجد وبعدين منو المسؤل ؟

 

[الحـــوت]

الله يكون بعونك ويعوضك بالدنيا والأخرة

 

[sportsaaad]

الله يكون بعونج واتمنى لكي الأجر والعافيه

بس هل تعتقدين ان الدكتور يتعمد في إيذاء المرضى ، واتمنى لو تعملي بحث بسيط بان تجدي مرضى أجرى لهم الدكتور عمليات في آذانهم ، وتنظري الى نتائجهم بعد العمليه ، واعتقد انهم سوف يساعدونكي كثيراً في رفع قضيه على الدكتور وينكشف على حقيقته ونتخلص منه ، لو كان الدكتور مثل ما تعتقدين .

 

[سرور]

أنا بعد الغزو طلعت ملفي من مستشفى الصباح وكنت احتاجه لتقديمه للمستشفى العسكري
واللي قال ان الملفات غير موجودة ما عنده سالفة .. دوري واسطة ويطلعون الملف