اجابه لو سمحت ؟هل

[القديم 22]

بسم الله الرحمن الرحيم


لو تكرمتم

هل العقار راح يرتفع او ينزل ,,,,,,,,,,,,,, مع الدليل والافاده

وجزاكم الله خير​

​

 

[man-kuwait]

العقار حالياً في صعود
والدليل
روح شوف اي أرض او عمارة جم سعرها الحين
وجم سعرها قبل 6 اشهر

واذا لقيت موقع او شي زين بسعر ارخص من 6 شهور
واكييد ماكو ارخص
هذا اكبر دليل
والعقار منتظر الحين مشاريع الحكومة وقرارات حكومية
اذا صارت طار العقار مرة ثانية

 

[haddaq8]

والله أعلم ، ما أعتقد في مجال للصعود لأنه حاليا الأسعار على حد المقدرة المالية لمعظم الناس (دليل حدود الاقتراض تسمح تمويل 210 الف كحد أقصى للزوجين مع دفعة التسليف)

و لا أعتقد في مجال للنزول و لكن في مجال بسيط كنسبة 10% عند منتصف سنة 2011 و ذلك بسبب التأثير المحدود المتوقع لتنفيذ الضريبة , و أقول محدود لأنه باقي المؤشرات كعدد الطلبات الاسكانية القائمة و شح الأراضي القريبة للمناطق الحضرية ستوازن هذا التأثير ، كما سبق أن قاوم سوق العقار الكويتي المؤثرات السلبية في سنة 2008

و في المدى البعيد ما في خسارة ، أذكر لك المثل الأمريكي عن العقار:

"Land pays back"

 

[القديم 22]

مشكورين على الافاده

بس ارجوا من الاخوان المزيد من الافاده والنصيحه

اشتري او مااشتري ,,,,,,,,,,,,, اماته عطوني الجواب

 

[man-kuwait]

من وجهة نظري اذا انت مستثمر لفترة كبيره (سنتين وما فوق) انصحك بالشراء الحين
واذا انت مستثمر لفترة قصيرة (اقل من سنيتن) لا تدش لان العقار في وضع ركود ويمكن يصعد ويرجع للركود وبعدين يصير الصعود اللي متوقعه يكون صعود قوي

 

[لؤلؤة الخيران]

مشكورين على الافاده

بس ارجوا من الاخوان المزيد من الافاده والنصيحه

اشتري او مااشتري ,,,,,,,,,,,,, اماته عطوني الجواب

فى 2009 بوفطيرة وصلت 70الف وفى ناس نفسك كانوا يتسائلون فى ذاك الوقت أشترى أم أنطر؟ وشوف الحين . بقولك اذا انت سكان لاتشاور وعزم وواذا مستثمر أقولك السوق يتذبب مرة فوق ومرة تحت والتجارة ربح وخسارة

 

[مهم للغاية]

بعد تنفيذ قرار الضريبة راح يكون ملاك العقار في ورطه مابعدها ورطه ... يدفعون حق الحكومة كل سنة مبلغ كبير جدا وبدون مردود ..... والمواطن البسيط يتفرج على السالفة واهوا يقول بينه وبين نفسه .... هذا الاحتكار وما يسوي .... اكلوها عيل ................ ( لول ) بس الاخ الفاضل المحترم اللي يقول تأثير محدود ..... انا اقولك ....اذا تم تطبيق القانون بالشكل الصحيح .... راح يصير العقار .... مثل الكامري .... كل الشعب يقدر يشتريها .............. والله يعطينا وياكم طولة عمر وبتشوفون ......... موعد تطبيق القرار .......... فبراير 2011 .... عدل والا لا شباب ؟؟ اعتقد فبراير

 

[مساهم11]

والسعر واصل حده ولا اعتقد فيه نزول
ولو انت مستثمر لا تشتري
واذا بتسكن الله يعينك
واذا عندك بديل وبتصبر اصبر افضل لك

 

[العمر فرصه]

رغم انى من اشد المتابعين للعقار من كم سنة ودور بيت
وكنت اتوقع نزول الاسعار
لكن ماضنتى راح ينزل العقار والسبب المقنع
ان توجه الحكومة القوى الى بناء المساكن خارج المدن
اى القطار ركب السكة مثل ماينقال
لا مجال لتفكير الحكومة للبناء فى الداخل بسبب الازدحامة والكثاقة
والدليــــــــــــــــــــــــــــــــــــــل
بناء مدن ضخمة بالخارج مثل العبدلى والوفرة او عريفجان والنويصيب
الاف المسكن تبنا بالخارج
وهذا اللى بخلى العقار ماينزل لو شنو والكل يبى داخل الديرة
واللة اعلم

 

[nokia*nokia]

الله بالخير أخوي

أعطيـــك كـــلام مـــن الواقــــــع

قبل سنه ونص تقريبا كنت أدور على ارض وكانت الأراضي طايحه نسبيا من أسعارها

الأساسيه بسبب إنهيار الإقتصاد العالمي وكثر الكلام بوقتها سبب لها شلل مؤقت

فأغلب الأعضاء في المنتدى كانوا يقولون الركود مستمر والنزول الكبير قادم ومن هالكلام

فكلمت واحد من الأخوان صاحب مكتب عقاري جزاه الله الف خير وقالي :

إذا انت تبي تبني وتسكن ماراح تحصل أنسب من هالوقت ، وأذكر كلمته يوم قال :

إعقلها و توكل الله

والحمدلله توكلت على الله سبحانه وتعالى وشريت الأرض وبتعدت عن كل الكلام

إللى سمعته من فلان وفلان بعد الشراء لأن الأغلبيه قالولي إستعجلت!!؟

وشوف الحين وبهذا الوقت سعر الأراضي زادت عن سنه ونص مو أقل من 30 ألف

والحمدلله أني شريت والبناء مازال قائم لغاية هذا الوقت بفضل الله سبحانه

وإذا حاب تتأكد من كلامي إعمل بحث على مواضيعي وكل شي تشوفه بعينك

وكلمه أخيره لك : إذا انت جازم بالشراء فأنا أقولك توكل على الله وأشتر

علشان ما تتحسف على أسعار كانت بين إيدينك والسبب أنك تنظر إلى سرااااب

وأتمنى من الله عز وجل لك التوفيق

تحياتي لك​