أكبر مقلب أكلته في حياتي

[مستريح]

القصة واقعية وحدثت لأحد اصدقائي .. (مختصرة)
يقول اكبر مقلب اكلته في حياتي حينما استلمت قسيمتي في منطقة جابر الأحمد وقررت ابنيها احسن بنيان 3 أدوار ونص سوبر ديلوكس ..
ويقول لما خلصت الأسود اكتشفت ان فلوس التسليف خلصت ووقفت القسيمة على الأسود !! ولا قادر اخذ قرض لاني مطلوب لاكثر من جهة !!
الي ان جاني ولد الحلال اللي اشترى القسيمة مني على الاسود وافتكيت والحين رجعت للمربع الأول وانتظر نصيبي في بيت ولا افكر مرة ثانية اشتري قسيمة لو يطلع بيتي في العبدلي والسلام ...
هذا اكبر مقلب اكلته في حياتي
#للعبرة

 

[bu sale7]

اشدخل سالفة رفيجك بالبيع والمشترى. بعدين رفيجك مفكر إن بنك التسليف يعطيه لما يخلص محد قاله انه لك بس سبعين.!!!!!! سالفتك مالها راس.

 

[صقرالبحر]

شلون يخلص قرض التسليف عالاسود ؟؟ البنك يعطي دفعات
علي كل مرحله من البناء الي ان تشب الكهرباء .. مايعطيك
البنك كل الدفعات عالاسود بس ... ضبط سالفتك مره ثانيه

 

[متوازن]

السالفه مع صاحبك والا معك واذا مع صاحبك فانا اشك في سالفته من حيث التكلفه!!

 

[بــوعبدالله]

للأمانة ماتدش العقل هالسالفة
لأن بنك التسليف يقسم لك ال 70 لما توصل الكهربا ويكون خالص

 

[عبدالله السادس]

عدل بدل 70 الف للاسود ماتصير ابدا ؟

 

[طارق55]

كلامه صحيح

اعتقد انه يقصد ان بعد الاسود التسليف يعطونك 30 الف علي الاسود ومايعطونك غيرها الا بعد ان تنتهي المرحله القادمه واذا خلصت افلوسك بيتك يوقف لانه ماعندك تلحق وياهم لان سياسه البنك انت ابني المرحله القادمه وبعدين اعطيك الفلوس الي بنيته ... لكن لما تخلص افلوسك انت شغلك يوقف مع انك تبي منهم مثلا 40 الف وماتقدر تاخذها ... يمكن هذا قصده الرجال

 

[سلام عليكم]

70 الف شتسوى الحين ؟ اللى ماعنده كثرهم نصيحه لايبنى ويوهق نفسه

كل شى غالى واسعار نار

 

[ابوفيصل_]

يااخوان انا اعرف رجال اخذ القرض كاش وكان عنده معرفة بسيطة

طبعا اكيد مو من صالح الرجال المتهور .. والله يعوض رفيجك خير