متى التصحيح ؟؟؟؟؟؟؟؟؟؟؟؟؟؟

[بوحسن]

هذا موضوع يديد لا علاقه له بالرد على موضع اخر


متى التصحيح ؟

بغض النظر عن الاسهم الجيده من عدمها


ان صحح السوق مو اقل من 95 % واكثر من الاسهم اما تقف على سعر معين او انها بتتضرر ..وبيفرق من سهم الى سهم اخر بنسبة الضرر

اتمنى من اللي عنده خبر او اتمنى من الي يقره الشارت وارقام التداول عدل

يفيدنا وجزاه الله خير

 

[Cha3bar]

ذكر لي أحد أساتذتي الأفاضل الله يذكره بالخير مثال كرة الثلج لما تسقط من تل حيث أنها تكبر كلما زاد النزول، الزبدة من هذا المثال إلي إقتنعت فيه إن موجه التصحيح على أي مجموعة من مجاميع السوق حاليا قد تجذب باقي المتداولين "نفسيا" إلى البيع وطبعا مثلكم عارف حبايبنا مدراء المحافظ ما يطوفون أي فرصة

قبل أشهر كانت حالة التصحيح مصحوبة بقيادة سهم المخازن لأن السوق أصلا كان بقيادة المخازن وأخواته، حاليا في أكثر من مجموعة في السوق والسبب طبعا حجم السيولة وطريقة توظيفها والتي إنعكست على أداء السوق بشكل مباشر وأصفت عليه صبغة لم نكن نألفها بالسابق ومن أهم صفاتها أن مدراء المحافظ وصناع السوق المحليين ليسوا وحدهم وإنما هناك منافسين خليجيين

بعد هذه الدباجة الحلوة أدخل بالزبدة، في أسهم قاعد يصير عليها جني أرباح وفي أسهم قاعد يصير عليها ضغط و في أسهم قاعد تأسس للإنطلاق وفي أسهم إنتهت من الصعود وبدأت في التصحيح وفي أسهم ما أدري ليش موجودة بالبورصة

نصيحة لا تعور قلبك في متابعة السوق عامة وركز على كل سهم في محفظتك لأن نظرية كرة الثلج يصعب تحقيقها في ضوء حجم السيولة الحالي إلى إذا كان هناك خبر سياسي أو عامل خارجي سلبي لا سمح الله

 

[بوحسن]

حاليا النفسية مهيئه لدى كل المستثمرين


ان لابد من التصحيح وهذي كرة الثلج يا جعبر ..خلك منتبه ان الكل حاليا ايده على الزناد وهذا الي يزيد الطين بله


الكل مهيئ ان يقط اسهمه باي لحظه وبسرعة جدا

ويدري ان السوق ارتفع فتره طويله بدون تصحيح وهذا الي ......

بالاضافه الى امور اخرى ... الي عنده خبر يا جماعة او قراءه

ترى قربنا على ال 12 الف نقطه وايد

 

[بنكي الوطني]

حسب معلوماتي المتواضعه ....
التصحيح لقادم و بقسوه جدا جدا على نهاية الربع الأول من 2006

و اللي قاعد يصير جني ارباح شوي حاد و ربي يوفق الكل ..

 

[غازى]

التصحيح اتوقعه بأي لحظة واعتقد قبل لا ينتهي الشهر اللي حنا فيه,, نصيحة اتمنى اطبقها خل شغلك يومي هاليومين
وانشاءالله ما تصدق التوقعات ولا يصير التصحيح بالدرجة اللي خايفين منها

 

[matrex-ku]

يا اهـــل الخبــره
هــل ابتـــدأ التصحيــح

 

[غازى]

التصحيح اتوقعه بأي لحظة واعتقد قبل لا ينتهي الشهر اللي حنا فيه,, نصيحة اتمنى اطبقها خل شغلك يومي هاليومين
وانشاءالله ما تصدق التوقعات ولا يصير التصحيح بالدرجة اللي خايفين منها

كنت مقتنع ان التصحيح خلال هذا الشهر ولكن البورصة صارت ادمان وصعب اطلع وعندي كاش

هذا انهيار مو تصحيح

 

[اعلامي]

المؤشر الوزنى 560.53 -6.69

المؤشر السعرى 11,410.7 -180.70

الكمية المتداولة 58,471,000

القيمة المتداولة 35,464,160

عدد الصفقات 2,855



راقبوا 11.400 نقطه .. ودعواتكم بأن لا ينزل عن هذا الرقم

 

[اعلامي]

سنقول مبروك ​

 

[bujwsq8]

يا اهـــل الخبــره
هــل ابتـــدأ التصحيــح

انت شنو شايف

ولا شرايك

ما تشوف اللون الاحمر بكل البورصه كل هذا من دم المتداولين

انا اقول انهيار ارباح الفتره السابقه الى خسائر حاليه

وتعتقد ان بدا التصحيح ولا شرايك

كل هذا النزول شنو يعني لك​

 

[اعلامي]

الف مبروك ... انتهى النزول باذن الله​

 

[bujwsq8]

الف مبروك ... انتهى النزول باذن الله​

انشاء الله​

ونشوف اللون الاخضر اللي يخلي طريجنا خضر

انشاء الله

 

[bujwsq8]

التصحيح اهو اذا اسعار الاسهم الحاليه تكون اعلى من من سعرها الفعلي

وبالنسبه للسوق الكويتي اعتقد اقلب اسعار الاسهم هي اعلى من سعرها الفعلي

بس سوق الكويت ماله شغل بتصحيح او اي شي اهم شي عند المحافظ وصناع السوق الخروج من السهم بربح واذا كان خسران والله ما يهمه لو قالو تصحيح او اي شي

بس لازم في فترات معينه اعتقد لازم يتذبذب السوق من فتره الى فتره معيه

وهذا طبيعي للسوق

والله اعلم​

 

[اعلامي]

طالما هناك بيع من قبل صغار المتداولين فالنزول لن يتوقف !!! لابد من وقف عرض الأسهم ليستعيد السوق توازنه

 

[bujwsq8]

طالما هناك بيع من قبل صغار المتداولين فالنزول لن يتوقف !!! لابد من وقف عرض الأسهم ليستعيد السوق توازنه

بس ما اعتقد بشكل كبير ياثر صغار المستثمرين في السوق

وبعدين ليش صغار المستثمرين اول ناس اتخسر في النزول

ليش ما اتقوي قلبها لان النزول ما راح يدوم لازم يرد ويتعدل السوق

بس الكميات المعروضه مو وايد مو صعبه على المحافظ وصناع السوق شرائها
كميات قليله بس المشكله بالطلب مافي طلبات كبيره تساعد على صعود السوق يعني المحافظ مع صناع السوق ما يطلبون بس يخمون من المعروض

اعتقاد شخصي​

 

[اعلامي]

[/QUOTE]لاحظ تعليقك فيه تعارض ....

بس ما اعتقد بشكل كبير ياثر صغار المستثمرين في السوق​

من قالك صغار المستثمرين ما يأثرون بالسوق ... يأثرون وبشكل كبير خصوصا اذا المحافظ والصناديق رفعوا يدهم عن السوق بعد ما قاموا بعمليات لجني الأرباح لما كانت الاسعار مرتفعه .. كونهم يملكون الاسهم والسيولة بشكل كبير يخليهم يتحكمون في السهم صعود ونزول ... لذلك تلاحظهم يحطون طلباتهم بالنازل وصغار المستثمرين يقطون عليهم لأن مافي اي قوة شرائية على اسهمهم .. وهذا ما يفسر كلامك المتعارض في الاقتباس التالي

ليش صغار المستثمرين اول ناس اتخسر في النزول

ليش ما اتقوي قلبها لان النزول ما راح يدوم لازم يرد ويتعدل السوق

عشان جذي انا قلت لابد من وقف عرض الاسهم ووقف عمليات البيع لأن المحافظ لن تشتري من المعروض ابدا .. لذلك صغار المستثمرين مضطرين انهم يقطون اسهم على الطلبات خوفا من النزول فتشوف السهم كل اشوي نازل وتشوف المؤشر ينزل و السوق أحمر ..

الكميات المعروضه مو وايد مو صعبه على المحافظ وصناع السوق شرائهاكميات قليله

لأن اللي قاعد يعرض اهم صغار المتداولين

بس المشكله بالطلب مافي طلبات كبيره تساعد على صعود السوق يعني المحافظ مع صناع السوق ما يطلبون بس يخمون من المعروض

لأن مثل ما انت وغيرك ما تبي تخسر ايضا المحافظ و الصناديق ما يبون يخسرون .. اهم توهم بايعين عليك اسهم فوق .. اشلون تبيهم يشترون منك فوق ؟؟ لازم ياخذون منك تحت وهذا اللي يفسر نزول السوق بالكامل ..

اتمنى تكون وضحت الفكرة

 

[bujwsq8]

انا كلامي مو متعارض لاني اقول ان صغار المستثمرين ما ياثرون بالسوق بهذا النزول الكبير
بس صغار المستثمرين ياثرون اذا السوق مافي صانع سوق اكيد كلامك صح راح ياثرون فيه صغار المستثمري


وكلامك معقول 1000 بالاميه

وانا اييدك اذا صناع السوق شالو ايدهم


بس بالنسبه حق بيع صغار المستثمرين مو الكل قاعد يبيع بس اللي خايف من السوق

وانا قصدي اني اشجعهم على عدم البيع


وانا متفق معاك في هذا التوضيح الجيد منك

مشكور


بس تراني ما قدرت اسوي نفسك انك اتحط كل نقطه واتحط رايك فيها

مشكور بعد

 

[غازى]

انشاءالله يكون انتهى التصحيح وانتهت عقدة انتظاره وترجع الثقة بالسوق

 

[اعلامي]

-=

السلام عليكم .. اردت ان اقنل لكم هذا التحليل للمؤشر الذي قام يتحليله اخونا العزيز فيرسون يوم أمس تمام الساعه 12:56 من بعد منتصف اللي .. يعني قبل بداية تداول اليوم ب 9 ساعات .. عسى الله يحفظه ويرزقه من وافر نعمته

السلام عليكم ..



الله يعلم اني شايف ان عجينتنا اختلطت بعجينة الجيران ..و محد عارف أيهي خبزته ..و أيهي خبزة الجار .. لكني بحاول أشوف ان كان فيه أمل نخبص شوي بالعجينه ..و نوزع الخبز بالتساوي .. (تحس يوعان..)





المهم .. السوق عنده تريند لاين طيب ابتدأ معانا من منتصف شهر يوليو .. يعني عمره الزمني جيد .. و كذلك عدد مرات الإلتماس .. (الخط البني )



الجميل بالخط هذا ان السوق كان يسير بمحاذاته طوال فترة الصعود اللي استمرت من منتصف يوليو ..لغاية منتصف اكتوبر .. و بعد الطفرة الشرائية اللي كسرت مقاومة ال 10300 نقطة ..السوق استغنى عن هذا التريند لاين الصديق .. و شاف روحه عليه ..و تكبر .. و الكبر لله سبحانه ..



الآن هذا التريند لاين ..قاعد عند ال 11400 تقريبا .. (السهم الأخضر السفلي)..و يحرس شباك المرمى..



مؤشر القوة النسبية ..فقد الكثير من قيمته ..و هذا شي جيد نسبيا ..كون السوق يلتقط الأنفاس ..و هو حاليا عند قيمة 62 نقطة ..و من المتوقع ارتداده عند خط البيع و الشراء (50 نقطة-السهم الأخضر العلوي)



الماكد واضح من تقاطعه بأنه أعطى إشارة خروج ..و لكنه طول عمره آخر الركب .. و إشارته متأخره بعض الشيء ..



كمية التداول تعطي انطباع و كأن الناس غير مقتنعه بالبيع ..و جني الربح ..و التمسك بالأسهم لجودتها .. و هذا الأمر باين من خلال النظر للكثير من الأسهم اللي عانت من نزول قيمة و لكن بكميات لا تذكر ..على سبيل المثال لا الحصر ..(الصخور ..البناء..أغذيه..كويتيه للتمويل..اسمنت الكويت..و الكابلات..) و الأمثله عديده على شركات كان لها تأثير قوي جدا على نزول المؤشر ..و لم تجني أي ربح يذكر ..



فهذا النزول كأنه تطييب للخواطر التي تنادي بالتصحيح و النزول المرجو .. (تبون نزول ؟ و لا يهمكم..هاكم نزول يالله و لا تزعلون .. بناخذكم على قد عقلكم ..)



و لا ليش جني الأرباح على سهم الوطني بتداول 300 الف سهم ..و بنك الخليج 160 الف سهم ..و ايفا 140 الف ؟و هذي كلها أسهم شهدت ارتفاعات بالأسعار مؤخرا ؟ و ين جني الأرباح ..وين البيع ؟؟



بصراحة ..انا مرتاح من النزول هذا كونه مفتعل .. و لا يبين أي نوع من هروب الأموال من السوق ..على الأقل على الأسهم التي حصل عليها دخول قوي ...و التي عادة ما تكون صانعة لشرارة النزول الدامي..



أي بمعنى آخر.. اننا لا نتكلم عن سيولة ساخنة تحوم في الأفق ..



عموما .. بكرة يوم بإذن الله يكون الجو فيه جميل .. و يكون نهاية نزول ..و بوادر اكتفاء ..كون المؤشر غدا بالإمكان ان يحقق نزول يعادل 500 نقطة من القمة ..و يرتد من ال 11400 نقطة.. أو بالقرب منها ..



و أظن 500 نقطة كافية انها تسد حلوج اللي يصايحون يبون تصحيح ..و يبون راحه ..


و الله كريم ..و هو سبحانه أعلم ..



و بالتوفيق ..



بو فارس ..

قراءة دقيقة جدا للمؤشر و نسبة الخطأ كانت 0% يعني معدومة ... وأيضا كل الشكر للمحلل الكبير ابو ريم الذي اصاب في تحليله

نتمنى ان نرى محللين بكفاءة وقدرة ابو فارس وابوريم في المنتديات يقرؤون الحدث قبل وقوعه وهذا بفضل من الله وتوفيقه

ابومحمد