أخصها لبوفهد وأعمها للجميع

الموضوع في 'إستراحة المنتدى' بواسطة عفار, بتاريخ ‏28 أغسطس 2002.

  1. عفار

    عفار عضو جديد

    التسجيل:
    ‏16 يناير 2002
    المشاركات:
    1,389
    عدد الإعجابات:
    0
    مكان الإقامة:
    الرياض
    ابوفهد تحب سوالف الغانمين

    وهذه وحده من سوالفهم صارت على الشاعر الكبير فى شخصيته وكرمه

    الشاعر عبدالله بن عون العتيبى

    عبدالله موّلع بحب الابل لدرجه لايتخيّلها العقل وأكثر أوقاته عندها

    ومن عادته أذا قرّب موعد الامطار كل شخص يسيّر عليه يسأله عن

    المطر والحيا طبعا ليقوم بأخذ الابل الى ذلك المكان ولكى تستطيب

    بتلك المراعى

    وفى أحد المرات جاء اليه شخص يدعى حشر وكان الوقت وقت نزول

    الامطار

    فسأله عبدالله ياحشر ما عيّنت علوم المطر ماجاكم شى

    فرد حشر

    اذا بغيت أعلوم المطر يابن عون عطنى ألف ريال خمسميه فوقها خمسميه

    وعطيك أعلومن سامعها من رجال ثقه يحرى بالصدق

    فقال بن عون
    علومك يالبناخى ماهى طيبه ألف على شان خبر عن الامطار أقعد

    مانبيلك علوم نقدر نجيبها بالتلفون من فلان وفلان وبدون ألف ريال

    ضحك الجميع من هذا الحوار الذى دار بين حشر وابن عون

    ألا أن حشر أراد أن يجسد هذا الحوار بلغة الشعراء

    فقال

    راعى الوضح ايتنشد يدوّر علم سيل
    00000000000000000000000وعند ناله علم الامطار من رجلن ثقه
    مير قالوا اهل العرف مايخدم بخيل
    00000000000000000000000ماش علم ألا تحط ورقه فوق ورقه

    فرد ابن عون

    يالبناخى ما تجى منك الاخبار تشفى الغليل
    000000000000000000000000ماتعرف اتسولف ألا بكبده ومرقه
    والحيا والسيل مالك على قدره سبيل
    000000000000000000000000ونت مالك ماشيه عندى غير وكرى وسلقه

    وسلامتك وسلامت السامعين
     
  2. خالد فهد السلوم

    خالد فهد السلوم عضو جديد

    التسجيل:
    ‏3 سبتمبر 2001
    المشاركات:
    369
    عدد الإعجابات:
    0
    مكان الإقامة:
    الدرعيه
    عكه السمن

    صح لسانك يا عفار ... وينك من مبطي .. هذي هي السوالف اللي

    على قول ام عليوي تكبر الكروش ... ما دام اننا في البل (الابل) والقنم

    (الغنم) ..فخلني اقول سالفه والله يجمد عليها الشوارب ... ما اطول

    عليك السالفه وهي قصيره ...

    كنت انا ورع ... اظن عمري 12 سنه وكان للوالد الله يطول عمره وعمر

    السامعين نسيب شمري ... وكان هالنسيب من الله خلقه في البر

    ولا يحب الا البر ... اهله وجماعته هالحين كلهم حضر لكن هو لازال

    عنده حوش في البر .. وبيت شعر ... والبيت اللى عنده مافيه دش

    ومكيفات مثل ماهو حاصل الان في الباديه ... ولكن مخليه اذا هبت

    هبوب الشمال ... او اذا هاجت عليه السباع والا لحقه ذيب (مثل ذيب

    مشعل الله يمسيه بالخير ) يزبن به ويفتك من شرهم ... المراد ان

    هالنسيب جانا في ضحويه ما فيه صريخ ابن يومين ... واتذكر انه يوم

    جمعه ... دخل المجلس وكنت انا نايم .. او هي نصف نومه جنب وجار

    المعاميل ... وبدون مقدمات نصاني وشدني بيدي حتى انها بغت

    تنفك من صواميلها وقال لي ... هالحين يا هالرخمه نايم الى هالحين

    وفي مجلس الرياجيل (الرجاجيل) .. طبعا انا ارتعبت وناظت الى والله

    هذا خالي .... قلت هلا والله بالخال عسى ما شر ... قال لي وراك

    نايم في المجلس ... قلت اجل وين انوم فيه ؟ قال نم على راس الوتد

    يالله اذلف وجب لي عكه السمن من السياره .... طبعا وللمعلوميه

    الخال صالح يحب يغط الاقط على كاسه سمن بري ... وعلى الريق

    المهم رحت جبت عكه السمن بري من الونيت اللي مليان غنيمات

    وداخل الغماره اربع حزم (قت) المهم بعد ما عطيته المطلوب قعدت

    اراقب الرجال وش يسوي ... ما اطول عليكم وهي قصيره .. بعد ما

    خلص من غط الاقط في السمن بري ... بقى ربع الكاس ... وبسم الله

    جغمه وحده .. وبعدها تكريعه من اللي يحبها قلبك ... انا بصراحه

    اعجبني هالمنظر واعتبرته شي خارق اتمنى انني اصير مثل خالي

    شديد .... قلت له يا خال ابي اصير مثلك قوي واقدر اشرب السمن

    ... طالعنا بنظره ماكره وقال .. ابشر يا ولد اختي .. تعال معي للبر

    وانا اخليك رجال يمشي على زندك التيس ... وافقت ووافق ابوي مع

    بعض التحفضات من الوالده اني ما اقعد في البر اكثر من اسبوع

    المهم اول ما وصلنا ... طبعا كنت راكب معه في الونيت وفي حضني

    صخله ما قصرت بعد ما تهضم البرسيم تعطيني المقسوم .. قلت معليش

    كل هالامور بتخليني مثل ما قال خالي رجال يمشي على زندي التيس

    دخلنا الحوش فيه غرفه ... جعلكم ما تشوفونها ولا بالاحلام .. الحشرات

    بتتكلم عربي ... وكل الاصناف اللي يقشعر منها البدن موجوده بدا من

    الصارور ونهايه بالعقرب والحنشان ... قلت هالحين يا خال انا بنوم في

    هالغرفه ... قال ايه ... قلت يا خال بس العقارب والحيايا هناك وشلون

    بنوم في نفس الغرفه ؟ اكيد بيدبون في الليل ويقرصوني واموت ....

    ضحك على وقال شفني انا حي والا ميت ؟ قلت لا حي .. قال شف

    العقارب والحيات يعرفون اذا كنت خايف والا لا .. فخلك شجاع وما يجونك

    قلت بس يا خال انا خايف من هالهوام واكيد بيتعشون علي واروح

    طعام جحوش .... المهم خالي نام وشخيره ينسمع ممشى يومين

    وكانه نايم في سويت في برج العرب وانا عيني على هالهوام اراقب

    كل حركه .. وتخيلت مرقدي وبيتنا وتحسرت وقلت الله يرجعني يا رب

    لميمتي ..خلاص يا ربي تبت ما عاد ابي اصير قوي وجعل زندي ما

    تمشي عليه العصفوره ...

    طلع الفجر ... وقومت خالي عشان يصلي .. كنت في المدينه يقومني

    ابوي بالمشعاب ... صلينا وبعد ما صلينا قلت لخالي نبي نفطر .. قال

    تفطر ؟ تفطر وشو ؟ قلت ما عنده جبنه والا خبز ... ضحك على وقال

    ما عندنا لك الا حليب نياق .. الجبن والخبز هذا عند ابوك ... اها يالله

    خلنا نروح نرعى البهم ونحلب لك حليب (بكسر حرف الحاء) المهم

    الشمس اشتدت وصار حمو الله لا يوريكم وانا شوي واهلك من الجوع

    والعطش والشمس وبصراحه حليب النوق ماهوب وجبه ... وتذكرت

    اني وعدت خالي اني اطاوعه واكون عند حسن الظن ولا اكون في

    نظره رخمه .. وبعدين فكره ان زندي يمشي عليه التيس بصراحه

    تدغدغ مشاعري ... مشينا في هالصحراء اللي تذكرني بصحاري

    بورموث في الريف الانجليزي ...الين حسيت بشي يتحرك ببطني

    وطبعا اللي يعرف حليب النياق يعرف وش اقصد خصوصا اللي يشربه

    اول مره ... قلت يا خال الحقني ... قال وش فيك .. قلت ابي الحمام

    قال وش حمامه ؟ عندك البر .. بس لا تستقبل القبله ... قلت وشلون

    يا خال اسويها في البر يمكن احد يشوفني ... طبعا خالي ميت من

    الضحك ... وانا فهمت المغزى ورضيت في الواقع ... طبعا ما فيه شي

    اسمه ابي مويه .. فعنك الحصى والعظامه كلها تقوم بالمطلوب .

    طبعا ابعدت شوي وبعد ما جيت ما لقيت خالي .. اخذ الونيت وما ادري

    وين راح ... جاء العصر ما جاء ... ليلت على الدنيا ... والله يجيركم

    اشتغلت اصوات الذيابه اللي تمشع القلب .. طبعا خالي بالعنيا يبي

    يخليني رجال سنافي شجاع مثل عنتر عشان كذا راح وخلاني في

    الظلما وبعد العشى تقريبا شفت انوار سيارته ... وكنت مثل المجنون

    او الغريق اللي بعد ياس شاف سفينه تنقذه ... تجودت بحلق خالي

    وقلت داخل على ثم عليك ... يا شقيق امي ... رجعني ... انا ماعاد

    ابي اصير قوي مثلك و ابي زندي يمشي عليه التيس .. ارجوك هالحين

    ردنى ... ضحك خالي وقال بس المشكله عندي خروفين في الغماره

    وما تكفي السياره لك ولهم ... قلت معليش احطهم في حضني بس

    دخيلك ودني ل ماما ... و بابا ... في رحله العوده مع اني يميني

    خروف وشمالي عنز وعلى رجلي صخله ... لكن كاني فى طياره

    نفاثه ... وتوبه يا خالي ان رحت معك البر ....
     
  3. عفار

    عفار عضو جديد

    التسجيل:
    ‏16 يناير 2002
    المشاركات:
    1,389
    عدد الإعجابات:
    0
    مكان الإقامة:
    الرياض
    ما شاء الله عليك يابوفهد

    عندك موهبه ثانيه غير المنطق الرياضى اللى تستخدمه فى الاستثمار

    فى الاسهم

    تذكرنى بعبدالكريم الجهيمان وفهد المارك

    بس قلبى قرصنى لما قلت حليب بكسر الحاء طرا على أخوك شىء

    ما كتبتها ألا فيها شىء هههههههههه

    ترانى خبير فى اللهجات
     
  4. خالد فهد السلوم

    خالد فهد السلوم عضو جديد

    التسجيل:
    ‏3 سبتمبر 2001
    المشاركات:
    369
    عدد الإعجابات:
    0
    مكان الإقامة:
    الدرعيه
    انا اشهد

    انا اشهد والله انك ذيب يا عفار .... عرفت من وين الرجال من حرف

    واحد .. تبي الصراحه والله زاد اعجابي فيك اضعاف ..ولا يهون السامعين
     
  5. عفار

    عفار عضو جديد

    التسجيل:
    ‏16 يناير 2002
    المشاركات:
    1,389
    عدد الإعجابات:
    0
    مكان الإقامة:
    الرياض
    الله يسلّمك يابوفهد

    هذا من طيبك

    الظاهر أنى بجيب الدله والفناجيل والقدوع وبجلس عندك هنا

    اليوم شورت سيلنغ

    جايب أخبار ماهى زينه عن الاقتصاد العالمى والامريكى

    والدخول فى هالسوق هاليومين أعتبره مخاطره وأى ذيب بيدخل

    ماأظن بترجع عظامه سليمه هههههههه

    يالله يابوفهد

    هذى الدله وهذا القدوع والسالفه هالحين عندك
     
  6. خالد فهد السلوم

    خالد فهد السلوم عضو جديد

    التسجيل:
    ‏3 سبتمبر 2001
    المشاركات:
    369
    عدد الإعجابات:
    0
    مكان الإقامة:
    الدرعيه
    الله مير يسلمك

    عساها دايمه يابو عبدالله ... وتراني عند الدله والقدوع انتشي

    واسفهل وتجي السوالف والعلوم الزينه وخصوصا اذا كانت الدله سلمك

    الله يابو عبدالله مبهرت (بكسر التاء ) من ثلاث ساعات ... على حطب

    في بيت شعر ... والهبوب شمال ... والربابه يجرها مشعان بن مجول

    وفي المجلس شرواك وشروى السامعين ...وطالما السوق احمر مثل

    ما تفضلت ... والسالفه من عندي فهاك اولها ......

    يوم تخرجت من الثانوي قدمت بعثه الى امريكا وبعد ما قدمنا الاختبارات

    الاوليه في اللغه قالوا اللي نجحوا يروحون مباشره ... المهم قبل السفر

    تجهزت بكل ما احتاج من الملابس والبوالطوا ...وكل ما يخطر على البال

    واللي ما يخطر على البال ان الوالده شرت لي عازه ولفتها في كرتون

    صغير .. وقالت يا ولدي هاذي هديه لك ..بس على شرط ما تفتحها الا

    بعد مرور شهر عليك في ديره الحمص (تقصد الامريكان) قلت طيب

    يا ميمتي وشنهي ؟ قالت مالك شغل انت بس نفذ كلامي ...

    المهم .. مالكم بها طويله ... مر على في امريكا شهرين وبصراحه

    انذبحنا من الهمبورقر والنسكافه والبيتزا واحيانا نطيح في لحوم خنيزيرات

    وانت ماشي الين صارت الصماط اللي ينفل في مجالسنا حلم ما

    نشوفه الا في المنام ... المراد في نهايه الاسبوع وهو عندهم سبت

    واحد ... السكن حق الطلاب في غمضه عين يصير وحيش بالحيل لان

    الطلاب زي المساجين بس يجي نهايه الاسبوع يهربون في ثواني

    ويصير السكن مثل ثانويه عامه في منتصف العطله الصيفيه .... اقول

    ربعي في السكن قالوا لي يالله يا خالد تولم نبي نسافر الى (سيدارابد)

    وهذي مدينه تبعد حوالي ساعتين ... قلت لهم لا انتم توكلوا على الله

    انا اليوم متوعك وما لي رغبه اروح معكم (من اللي يتذكر درب الزلق ...

    يوم قحطه قعد في البيت وما راح مع ابو صالح وسعد )

    المهم بعد كم ساعه تشاويت وقمت امشي في حوش السكن كني

    سكني وما فيه الا المشرف وبعض الموظفين هنا وهناك ... بصراحه

    ضاقت بي الدنيا وقلت يا حلالات يا ديرت هلي ... فجأه تذكرت العازه

    اللي الوالده لفتها لي في كريتين صغير واللي وصتني ما افتحها الا بعد

    شهر .. وهالحين مضى شهرين .... اسرعت ركض الى غرفتي قي

    السكن وفتحت الشنطه ...ثمن فتحت الكرتون .......!


    تدرون وش لقيت ؟ ... لقيت شي خلا دموعي تسيل .. وخلا العبره

    تهزني الين بديت اشاهق .....

    لقيت في الكرتون دله ومعها كيس هيل وقهوه ...... طبعا الوالده

    تعرف اني اعز القهوه حيل ... وعارفه بعد اني بعد شهر ابي امل من

    اكلهم وشربهم .... وكانت تعرف بغريزه الام ان ولدها هواوي ... يحب

    الشعر .. والقصيد ... واذا قالت الربابه يا ونه ونيتها تالي الليل ....

    رد ابو فهد .. صح لسانك يا مشعان ....
     
  7. عفار

    عفار عضو جديد

    التسجيل:
    ‏16 يناير 2002
    المشاركات:
    1,389
    عدد الإعجابات:
    0
    مكان الإقامة:
    الرياض
    يابوفهد

    والله مالومك يوم العبره أحشرتك

    الله يجزاها خير ام خالد عرفتلك

    بسألك أبوفهد

    مادامك من اللى راحوا الى أمريكا

    ماجيت صياهد نيفادا

    بعض الاخوان من اللى ينطقون حرف الحاء بالكسره يمدحون الضبان

    هناك

    ماقولها ضحكه والله العظيم يمدحونها ويقولون أنها أطعم من اللى

    فى خشم العرمه هههههههههه
     
  8. خالد فهد السلوم

    خالد فهد السلوم عضو جديد

    التسجيل:
    ‏3 سبتمبر 2001
    المشاركات:
    369
    عدد الإعجابات:
    0
    مكان الإقامة:
    الدرعيه
    نعم

    نعم هذا صحيح ( بكسر الصاد والحاء) ... يابو عبدالله ... والسبب ان

    الاجواء المناخيه هناك حتى لو انها صحراء لكن ياخوك صحراء عن صحراء

    يعنى وحنا هناك في امريكا لنا اخو نزبن عليه من وقت لوقت اذا اشتقنا

    سلمك الله للكبسه .... واللي عاش في امريكا يعرف معنى هالكلام

    ويعرف قيمه الكبسه لو هي على ممشى يوم وليله ... فا .. هزنا

    الشوق للكبسه انا وبعض الاصدقاء وقلنا نتصل على حبيبنا بن ماضي

    عشان يعشينا الليله ...اتصلنا عليه امسيان وقلنا ترانا الليله عندك

    يابو متعب ... وكان الرد اسعدها من ساعه ... وبالمناسبه ابو متعب

    مقيم في مدينه اسمها ( فينكس) وهي في الصيف حر شديد

    واجواءها صحراويه .. وماهيب بعيده والله عن صياهد نيفادا ولكنها

    بعيده بالحيل عن خشم العرمه .... مافيه شي يشبه خشم العرمه

    يابو عبداالله ابد .... على اي حال كنا نتسامر في بيت بن ماضي وهو

    بالمناسبه رجال يعشق البر لدرجه انه وهو في بيته اذا هزه الشوق

    للديره ... لبس المشلح والعقال وفرش الزوليه قدام البيت .... طبعا

    اللي يمرون في الحي ياقفون يتفرجون عليه وكانهم يتفرجون على

    احافير لديناصور منقرض وهو ما همه بهم معطيهم اشكل ... ارجع

    للماضوع ... فرش بن الماضي الصماط وكب الرز على هاك البلم اللي

    بغى يتثلم من عيوننا المشفوحه ... وحنا نيصح تفكى يابو متعب ترانا

    ما نقوى على الصبر ... التفت علينا وهو يضحك وقال :-

    اجل لو تشوفون اللي مخليه لكم مفاجأه ؟ قلنا وشنهي ؟ فيه شي

    ازين من هاللحيمات والكبسه ؟ قال ايه .... المهم قام بن ماضي

    للمطبخ بعد ما قلطنا على السفره واذا المفاجأه اللي ما حرينا لها ولا

    خطرت عللىبالنا ولا في الحلم .... المفاجأه هي ..... ضب ... نعم

    ضب يا مسلمين ..ووين في امريكا ... طبعا كلنا زهدنا باللحم وهجمنا

    على الضب وهات يا عض وتقبيص ... وجعلك يا عفار منتب ضب

    ذيك الساعه بين ايدينا .....



    ززز
     
  9. عفار

    عفار عضو جديد

    التسجيل:
    ‏16 يناير 2002
    المشاركات:
    1,389
    عدد الإعجابات:
    0
    مكان الإقامة:
    الرياض
    أبلشتنى يابوفهد

    مره ترفع ومره تكسر الظاهر أنك باخصنى بالحيل

    بس ماعليك أخوك شمالى خاطره وسيع

    أبوفهد أبيك ترخصلى

    ودى أوصل الخوال فى الكويت شوقتنى لهم بسواليفك عن خوالك

    خل نارنا حيه ودلالنا على ماهى عليه

    لين أجيك

    توصينى بشىء مناك ترا عشاى أو غداى عند المؤشر

    يوم الاربعاء أو الثلوث القادم