عسا ماشر يابوفهد

الموضوع في 'إستراحة المنتدى' بواسطة عفار, بتاريخ ‏19 سبتمبر 2002.

  1. عفار

    عفار عضو جديد

    التسجيل:
    ‏16 يناير 2002
    المشاركات:
    1,389
    عدد الإعجابات:
    0
    مكان الإقامة:
    الرياض
    والله فقدناك يابوفهد هنا وهناك

    أهم شىء عندى تكون بصحه وعافيه

    بعد غيبتك تذكرت بندر بن سرور يوم يقول

    الله من عين ليا عسعس الليل
    00000000000000000000عافت لذيذ النوم ماتهتنيبه

    ياوين أبلقا من يحب التعاليل
    0000000000000000000يبدى بزين القول ولاّ ابتديبه
     
  2. خالد فهد السلوم

    خالد فهد السلوم عضو جديد

    التسجيل:
    ‏3 سبتمبر 2001
    المشاركات:
    369
    عدد الإعجابات:
    0
    مكان الإقامة:
    الدرعيه
    بخير

    بخير عساك بخير يا العفار ... انشغلت شوي في امور الدنيا .. لكن

    اشتقت لكم يابوعبدالله .. وعسى دلالنا على حطتها ؟... وانا لي فتره

    ما شربت ام الهيل ياالعفار ... وعلى طاري العفار ... اي والله يابو عبد

    الله كلامك على متمه ... بس تخيل لو اننا انا وانت مثلا عشنا ذيك الايام

    يا ترى هل نكون زي ما نحن عليه الان ؟ ... بصراحه ما اقدر اقول ايه والا

    لا ... لكن كلامك عن معنى العفار ذكرني بسالفه سمعتها من الشيبان

    ان من قديم في الجزيره العربيه عادات زواج غريبه وبعضها طريف جدا

    فا ... وحده من هالعادات هي ان الرجال اذا تزوج يقام له حفل العرس

    بعد ما ينتهى مراسم العرس ما فيه زي هالحين كل شى ينتظر على

    البارد مبرد لكن كانت العروس تنحاش في البر ... ويا الله طردي وراها

    وطبعا مثل المصارعه تمخيش وضرب وجر والغبار يطير في الجو والعفره

    تغطي العريس والعروس .... ولازم يكون الرجال نشيط عشان يقدر يرجع

    هالمهره المتوحشه الى عش الزوجيه والا مهوب رجال ولا هوب كفو

    اللي ما يقدر يغلب مره !!!! (امرأه)


    الشاهد فيه شاعر مرهف الاحساس راح يتقدم لخطبه ذيك الكامله

    زين .. وبنت اجاويد ... وفوق ذلك تجيد المبارزه بالسيف (خل بالك من

    تجيد السيف ) وصحه وعافيه والسمن والحليب يقطر من خشمها

    يعني لو جبنا اربعه رجاجيل في زمنا هذا عفرتهم وورتهم نجوم الظهر

    لا ... وازيدك من الشعر بيت .. هي القعده لهلها يعني هي السابعه

    بعد سته فرسان كل واحد يقول الزود عندي ( بالبلدي ياكلون الزلط)

    المراد جاب الرجال اهله وطلب وقالوا له يا هلا ومرحبا ... وغدوهم

    وعشوهم واكرموهم كعاده العرب وبعدين قرب ابو البنت لابو الولد وقال

    يابو خلف ابيك بكلمه راس .. قال ابو خلف سم طال عمرك آمر .. قال

    ما يامر عليك عدو .. لكن لنا شريط بسيط بخصوص زواج بنتنا وانت عارف

    هي الغاليه ووحيدتي وهي اميمتي الغاليه ... رد ابو خلف هات يابو نواف

    قال بنتنا فارسه وتجيد المبارزه وانت عارف اخوانها السته فرسان وهي

    تطبعت بطبعهم ومعجبه بأخوانها كثير وهي لها شرط ان ما تقول قبلت

    ي رجال الا اذا طرحها في المبارزه .. رد ابو خلف هذا الامر هين يابو نواف

    باكر ان شاء الله عند الفجر موعدنا .... الولد طبعا شاعر مرهف

    الاحساس ما هوب يم سيف ومبارزه وطعن وطعين .. اضف الى ذلك

    قليل صح .. يعني نحيف .. ذبحه قل الاكل والسهر وعد النجوم السواري

    فا ... عند الفجر استعدت البنت للنزال ... وخلف يالله قومه ابوه

    بالمشعاب .... تقابلت مزنه على فرسها امام خلف على حصانه ...

    ومن اول جوله تعفر خلف من الفرس على الارض وصاح ابوه قم .. قم

    الله يسود وجهك ... رجعت مزنه هي واخوانها السته وابوها معهم الى

    الخيام .. وبصراحه مستحين وش يسوون مع هالشاعر وابوه ...

    المهم قعد الابو مع بنته واخوانها حولها يحاولون فيها عشان تنسى

    هالشرط المعجز ... رفضت البنت في البدايه وبعد الحاح من ابوها

    واخوانها وافقت بس بشرط جديد .. وهذا الشرط هو ان يوافق على

    صيدها صيد بعد ما تنحاش في البراري ... والا يفتح الله ما فيه عرس ..

    وافق خلف وعقدوا على البنت وقامت الحفلات .. وحطوا الشق حق

    خلف ومزنه في اطراف المضارب ... دخل خلف الخيمه وكانت تنتظره

    مزنه الين دخل ثمن هربت في اتجاه البر .... طبعا انتم عارفين خلف

    وعارفين قدراته الجسديه ... فصخ البشت والشطفه .. وقال بسم الله

    هذي نومه .... نعم خلف كبر الوساده وقال خلها تنحاش الين تتعب

    المهم مزنه ابعدت منحاشه في البر تنتظر الشاعر يلحقها ويربطها

    ويردها للخيمه لكن انتظارها طال ... وبعد ما ايست عودت للمضارب

    واتجهت للشق ...واذا والله الرجال في سابع نومه ....!!!

    نامت في الخيمه الثانيه وعند الفجر قومت خلف للصلاه وللفطور وما

    سالته وينك والا وراك ما طردتني ... الليله الثانيه انحاشت مزنه للبر

    ونفس الشي خلف افندي كبر الوساده ونام ... واليوم الثالث نفس

    الشي ... هذي المره دخلت العروس على الشق ووقظته وقال هالحين

    وراك ما تلحقني وتصيدني وتغصبني ارجع للشق ... انت عارف ان هذا

    شرطي ... رد عليها الشاعر المرهف الاحساس ... والله يا بنت الحلال

    ما احد غصبتس تنحاشين ... واذا تبين الليله تنحاشين بكيفك تعبت على

    عراكيبتس ... وعلى فكره يا بنت الاجاويد مصير الجمل للمقصبه ....

    مرت الايام والليالي وبعد تسعه اشهر بالضبط من هذا الحوار احتفل خلف

    بالمولود الاول...!!!!!

    يا تر ى يا بو عبد الله لو انك خلف تختار العفرى ..والا تختار الحيله ؟
     
  3. عفار

    عفار عضو جديد

    التسجيل:
    ‏16 يناير 2002
    المشاركات:
    1,389
    عدد الإعجابات:
    0
    مكان الإقامة:
    الرياض
    الحمد لله على سلامتك يابوفهد

    ونا طالبك أنك ماتبطى علينا بمثل هالسواليف السنعه

    ونارنا على ماتحب

    بس هالسالفه يابوفهد غفلتنى من الضحك الله يغربل مزنه أغصبنى

    وأتغيصب

    بيّن عليها عاشقتن خلف بس ماودها تقول

    والله النعم بخلف يعجنى عرفلها (مردها للمقصبه)

    والله يابوفهد

    مادامك سألتنى العفرى ولاّ خلف

    لا والله ألا خلف مادام الحيله غلبت الشجاعه فأنا دايم مع الطيّب
     
  4. خالد فهد السلوم

    خالد فهد السلوم عضو جديد

    التسجيل:
    ‏3 سبتمبر 2001
    المشاركات:
    369
    عدد الإعجابات:
    0
    مكان الإقامة:
    الدرعيه
    الحسوفه

    يا العفار قللي هل انا اخطيت ....

    او من غير ما ادري على حبيبي زليت ...

    انا هاليومين منيب حي ولا ميت ...

    كل ما تذكرت ذاك الوجه ونيت ...

    ولذيك السوالف حنيت ...

    كتبت الشعر واوفيت ...

    ونظمت القوافي الف بيت ...

    اكره التتن .. واحب قهوه الكيف ...

    وصدقاني مشعان ومجول وحنيف ...

    ذلولي يم بيتهم شديت ...

    انا يا العفار على الهجران ما قويت ...

    وسلامتكم .
     
  5. عفار

    عفار عضو جديد

    التسجيل:
    ‏16 يناير 2002
    المشاركات:
    1,389
    عدد الإعجابات:
    0
    مكان الإقامة:
    الرياض
    والله يابوفهد ماجبت سالفة مزنه ألا ونا دارى أنه فيك البلا

    أما هواوى

    ولاّ ناوى على الثانيه من وكالة مزنه

    الظاهر دخلت فى راسك شغلت الطردى والعفرى

    بس وين بتلقا زى مزنه هالحين قفلت وكالتها راحت مع ذيك الايام

    وحتا لو لقيتلك وحده بمواصفات مزنه

    فى ليلة الدخله وين بتطردها فيه فى شوارع العليا

    وبعدين تعال ليه ماقلتلى أنك شاعر على شان نلعب الطواريق منى ومنك

    وأبي منك شغله يابوفهد وابيك ترد العلم عنى

    مايجى من مثلك وشرواك الزلل ولا الخطا فنعم الرجل أنت ولو ماشفناك

    لكن دائما اللى فالقلوب مايجيبه غير اللسان ولسانك مايقطر ألا عسل

    وهذا دليل على معدنك الطيب

    حث المطايا وشرقها وغربها
    000000000000000000واقطع بها كل فج دارس خالى

    واطعن انحور الفيافى مع ترايبها
    000000000000000000وابعد عن الهم تمسى خالى البالى
     
  6. خالد فهد السلوم

    خالد فهد السلوم عضو جديد

    التسجيل:
    ‏3 سبتمبر 2001
    المشاركات:
    369
    عدد الإعجابات:
    0
    مكان الإقامة:
    الدرعيه
    صح لسانك

    صح لسانك يابوعبد الله ... والحقيقه ان هذا الشعر انقال في مناسبه

    مالها يم الهواويه طريق ... يعني خواطر تجيش في البال ... وانا احب

    الشعر وما نيب شاعر ... ومعظم شعري كتبته باللغه الانجليزيه بحكم

    تخصصي في الشعر والمسرح للادب الانجليزي .

    وبالنسبه للتمرغ في العفر ..فهو والله كل يوم حنا في عفرا في امور

    الحياه وهمومها ...

    وسلامتكم


    ملاحظه :-

    آسف على التأخير يابوعبدالله الجهاز عندي ذا الايام خربان ضاربه

    فيروس مرتب ... لذا يمكن اغيب كم يوم الين تضبط الامور .
     
  7. عفار

    عفار عضو جديد

    التسجيل:
    ‏16 يناير 2002
    المشاركات:
    1,389
    عدد الإعجابات:
    0
    مكان الإقامة:
    الرياض
    ما عليه يابوفهد

    هاذى الدنيا يوم تبكينا ويوم تضحكنا والله لو تشوف اللى على راسى

    يمكن يهون اللى على راسك ههههههههه

    ندعيلك يابوفهد

    بس أبى منك طلب عند أول مشاركه لك عقب ماتصلح كمبيوترك

    أبى منك قصيده بالغه الانقليزيه

    ويكون اللى رادها واحد من شجعانهم أو فارس من فرسانهم يعنى

    قديمه

    بشوف فيه تشابه بينا وبينهم

    وعلى شرط تترجمها لان أخوك بالانقليزى صفر على يمين وصفر على الشمال