سوق مكعيل

[محمد السريع]

سوق مكعيل
شخصيات القصة
مكعيل : درويش في القرية يعني ابن حلال بدو يعني خبيل شوي
معيض : واحد في القرية توه بادي يجرب حظه في التجارة ( يعني قاعد يتعبث في الاسهم )
مشقاص : ولد خالة معيض
المكان : قرية صغيرة

مكعيل : ( جالس عند المسجد بعد صلة العصر وعنده قواطي صلصة قديمة يلعب فيهن ويملاهن بالتراب ويرصهن ) فاضي ماعنده شغل
معيض : وش تسوي يامكعيل
مكعيل : ( وش يقول مايدري ......... خطرت له فكره قال : عندي هالقواطي ودي ابيعهن
معيض : على كم
مكعيل : على عشرة
معيض : ( لقاه مقفاه وراح وهو يقول الحمد لله يالله عطه عقل من عندك )

بكرة بعد العصر نفس القعدة مكعيل عند المسجد بس استحلى الشغلة
مكعيل : على عشرة على عشرة ابو السمايح بايع ورايح على عشرة
معيض : انت مهبول ياولد رح لهلك ابرك لك
مكعيل : كل يوم وانت تتهزابي الحق الزين لايروح
معيض : وش اسوي فيهن
مكعيل : تترزق الله فيهن تبيعهن بمكسب وان مالقيت احد يشتريهن ان ابي اشتريهن منك بكرة
معيض : قلبها بمخه شوي ........ طيب هات قواطيك يامكعيل 5 قواطي من 10 ريال يعني 50 ريال توكلنا على الله

بكره بعد صلاة الظهر معيض قاعد في بيته والا الباب يطق
معيض : من يطق الباب
مكعيل : انا مكعيل ياعم معيض
معيض : ياهلا والله هلا بوجه السعد ( اختلفت اللهجة بلا فيها دراهم )
مكعيل : القواطي عندك بترابهن والا لا
معيض : نعم موجودات
مكعيل : ابي اشتريهن منك بمكسب 10%
معيض : نعم هاه كيف معليش ياعم مكعيل تراني انصقهت من تالي
مكعيل : اقول ابي اكسبك عشرة بالمية يعني نسبة لك خاطر والا اروح
معيض : جيبي جيبي القواطي يابنت وانتبهي التراب لاينكب

من بكره
ام معيض قالت لاختها ام مشقاص تبي تفيد اختها
وبعد العصر عند المسجد

مكعيل : بخمسين بخمسين ابو السمايح بايع ورايح بخمسين
معيض : وش بلاك يامكعيل وش تقول
مشقاص : معيض امي قايلتلي قواطيه على عشرة وش جد جديد
مكعيل : اقول ان جازلك السعر والا خله ...... الغالي دواه الترك .... على خمسين على خمسين
معيض : وراك يامكعيل المفروض اليوم ارخص عند 20 قوطي
مكعيل : وانت تعدهن علي تبي تشاركني ....... هذا سعر اليوم السوق يختلف وان مالقيت احد يشتريهن منك يمكن امر بكرة واشتريهن منك
معيض : اقول اجل عطني 15 قوطي
مشقاص : وراك ياولد خالتي وش خليت لي ...... عطني يامكعيل الباقي 5 قواطي

بكرة بعد صلاة الظهر في بيت مشقاص
مشقاص : ( يفرك ايدينه ويدور في الصالة ) وينك يامكعيل وينك
مكعيل : ( يطق الباب على مشقاص ويرفسه برجله من البطرة ) مشقاصوه ... مشقاصوه ... صقه وينك
مشقاص : هلا والله بالشيخ مكعيل
مكعيل : القواطي عندك عطنياهن وخذ في الواحد 55 ريال يعني مكسب 10%
مشقاص : ياهلا بوجه السعد ... سم ياخلف ابوي

عند بيت معيض ...... مكعيل يطق الباب
مكعيل : يامعيض
معيض : ياهلا
مكعيل : القواطي عندك تراني جيتك شراي وابي اكسبك 10%
معيض : ماتخارج
مكعيل : نعم اقول ابي اكسبك نسبة تقول ماتخارج
معيض : ابي تدبيلة تعرف وش معنى تدبيلة ........ بيشة والغذائية وغيرها مو ابرك من قواطيي
مكعيل : ماودك تشاور نفسك
معيض : تبيهن والا خل قواطيي عندي
مكعيل : امري لله

بعد اسبوع شاع خبر مكعيل في القرية صار اللي ماكان يصلي بالمسجد يجي العصر يصلي يحتري البيعة
مكعيل : ( جمع قواطي الحارة كلهن حتى المعفطات زينهن وسمكرهن واللي بويته قديمه دهنها من جديد ) على ميتين على ميتين ابو السمايح بايع ورايح على ميتين

( انكبو الناس على مكعيل كل واحد يبي يشتري )
( بعد 5 دقايق مابقى مع مكعيل ولا قوطي :

بكرة بعد الظهر
معيض ( ينتظر )
مشقاص ( جته الدوخة وهو يلف في الصالة ينتظر مكعيل
( كل واحد في القرية ينتظر مكعيل )
العصر اذن ماجاهم مكعيل

( بعد صلاة العصر مكعيل قاعد عند المسجد معه مساويك )
مكعيل : على ريالين على ريالين ابو السمايح بايع ورايح على ريالين
معيض : وراك ماجيت تشتري القواطي يامكعيل
مكعيل : والله بطلت الشغلة ياطويل العمر
معيض : والقواطي وفلوسي
مشقاص : يخوي ما ابي مكسب اشترهن براس المال
معيض : مكعيل انا ابي اخصملك 10% والا اقول 20% واذا كنت مزنوق اصبر عليك تقصيد مو مشكلة والله توني بايع مزرعتي تكفى ياشيخ مكعيل
مشقاص : يبن الحلال ابخصملك 50% بس خذ قواطي هالتراب بقرتنا مابعتها الا قبل امس عشان اشتري قواطيك
مكعيل : يا اخوان وراكم زعلانين الشغلة وما فيها اني بطلت هذي الشغلة ولو تبي تبيعهن بريالين ماشريتهن

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

 

[محمد السريع]

هذه المشاركة في شهر 5 / 2006

والله وجاء زمانك مرة ثانية يامكعيل

 

[حـر اليدين]

رغم طرافة القصة ابو مجاهد لكن لها حكمة
.
.
من له حيله فليحتال
.
.
سوقنا ربح وخسار ة
.
.
دمت بود
يعطيك الف عافية على القصة​

 

[lopa]

قصه معبره جدا
دمت بخير