امانه للتخزين وبنك بوبيان

[ولد البورصه]

السلام عليكم ورحمه الله وبركاته

اخوانى وخواتى ...
ارجوا منكم التفاعل معى بموضوع الاكتتاب الملغى حيث اننى تقدمت بطلب الاكتتاب والكل يعرف ان الاكتتاب الغى من مجلس الوزراء وصدر قرار اللغاء
واللحين له اسبوعين من الغاءا الاكتتاب والفلوس مارجعت
وكل ما اكلم البنك يقولى لازم يصدر قرار او مرسوم اميرى بالغاء الشركه
شنو ذنب المكتتبين اللى عليهم التزامات ماليه ويبون استرجاع المبالغ


هل اشتكى لوزارة التجارة عشان فلوسى
لان البنك مو راضى يرجع الفلوس

ارجوا التفاعل مع القضيه

 

[ولد البورصه]

معقوله
يعنى بس انا اللى ماردوا فلوسى

اشوفكم بس دشتى اطالعون الموضوع بدون محد يقول راييه

الظاهر بس انا اللى مكتتب

 

[الشاطر]

اخوى على هالحال الله يعينك

انا انصحك انك تشوفلك جريده تثير الموضوع ويكتب بالصفحه الاولى عشان يردون افلوسكم من ثانى يوم

يبون الكويت مركز مالى

 

[خبره بالسوق]

انا اليوم كلمت مسؤول بالبنك

وقالي لم يجيهم المرسوم يوم الاحد القادم ( يمكن يوم الاحد , يعني مو أكيد بعد )
وبالتالي يرجعون الفلوس

خل يشتغلون بالفلوس عدل هاليومين وبعدين يرجعونهم , عقب ما يطلعون منهم جم بيزه على ظهورنا

 

[ولد البورصه]

الحل شنو ؟؟؟؟؟؟



يا بنك يامسلم فرج كربتى
ترى الديون مزعجتنى وابى افتك من الديانه
بروح حق الراى العام اشتكى واتقدم بالشكوى
يمكن فى حل

 

[حمود الطواش]

على هالحال البنك يفقد مصداقيته وهو بحاجه لاثبات العكس كونه بنك جديد ويعتبر تصرف وحجز اموال يجب على البنك المركزي تصحيح الوضع

 

[سفير النواياااا]

اتوقع اخوى واللة اعلم علشان المرسوم يكون بالجريدة الرسمية ولاتخاف حفك بيرجع يعنى بيرجع هذا بنك مو بقالة ومثلك ناس كثيرين لاتحاااااتى
تحيااااتى

 

[1st choice]

اخوى...شوف مسلم البراك لان هو السبب الاساسى بالايقاف
واعرض عليه الموضوع...والله يعينك

 

[c200]

الحل شنو ؟؟؟؟؟؟



يا بنك يامسلم فرج كربتى
ترى الديون مزعجتنى وابى افتك من الديانه
بروح حق الراى العام اشتكى واتقدم بالشكوى
يمكن فى حل

عليناا هلحكي العب غاارها هلحكي ساامعينه يالله عااد عن الكلك يعني معقوله مااتدري ان فلوسك مااراح اتشوفهم قبل سنتين او ثلااث

 

[قطاع الارماس]

على الاقل يرسلون رسالة بالهاتف النقال عليك ويقولون موناسينكم والا شاطرين بس بورقة الاكتتاب اذكر رقم الهاتف !!!! . يعنى شنو ا بتكلفة زهيدة على الانتر نت $$$ .

 

[kwaity]

يا جماعة ترى البنك دوره وكيل بيع ماله شغل بمسكة الفلوس والاستثمار فيها.
البنك ينطر قرار من اصحاب الحساب بعمل الاجراء الخاص بالشركة برد المبالغ.
البنك ما يقدر يسحب الفلوس من حساب الشركة ويردها لاصحابها.
مثال جنك تقول حق البنك : ترى انا عطيت فلان فلوس ، الحين هونت ابيها ردوها لي. البنك يقوله انت عطيته قوله يردهم لك واذا ما رضى اشتك عليه.