عاجل :مشكلة غلاء المطاعم و15% خدمة !!!

الموضوع في 'إستراحة المنتدى' بواسطة كويتي2006, بتاريخ ‏4 مارس 2008.

  1. كويتي2006

    كويتي2006 عضو جديد

    التسجيل:
    ‏11 سبتمبر 2006
    المشاركات:
    1,166
    عدد الإعجابات:
    0
    :mad:
    يا اخوان هناك جانب لا بد أن يطرح ويتدخل المسؤولين فيه ، وهو زيادة الأسعار الغير مبررة في المطاعم والمجالات الترفيهية ، يعني مو معقولة بحجة الإقتصاد الحر لازم الكل يرفع السعر على مزاجه ويقولك تنافس والي مو عاجبه لا يروح لأنها كماليات ! .

    يعني شلون نقعد ببيوتنا مع أهلنا وما نطلع .

    انا شخصيا رصدت عدة مطاعم رفعوا أسعارهم بحجة أن المواد غالية ، والسؤال هل تعلمون كم تربح هذه المطاعم قبل موجة الغلاء ، يعني الي كان يربح 100 ألف صار بعد غلاء المواد يربح 80 ألف ، فما الداعي كي يزيد سعره ، اهو من قبل كان يربح ربح فاحش ومحد يكلمه .

    المهم هناك ظواهر يجب أن يتدخل المسؤولين ويوقفون هل المطاعم عند حدها وقصبن عليهم بعد ( لا اقتصاد حر ولا بطيخ ، هل العقليات ما يمشون الي بالعقال والعين الحمرة لأنهم ما يفهمون ان التجارة هي جانب اجتماعي للتنمية وليس لشفط الجيوب ) .

    الظاهرة الأولى : الكثير من المطاعم اسعارهم غاليه وهم ياخذ منك فوق الفاتورة 10% وبعضهم 15% خدمة ، يعني تدفع فاتورتك 20 دينار وياخذ منك دينارين او 3 دنانير خدمة فوق الفاتورة !!!! يعني بالله هذي وين صارت بعد ، يعني شلون بالله اروح انا المطبخ مال المطعم واييب طلبي ، ولا صاحب المطعم يبي يطلع رواتب موظفينا على ظهورنا ويدش بجيبه الربح الصافي ! .

    المعروف بأمريكا او حتى اوربا انك انت تحط حسب ما تحب وحسب معاملة الجرسون لك ، اتحطله المبلغ الي تحب كخدمة او اذا مو عاجبك لا تحط شي ، لكن عندنا غصبا عليك تدفع خدمة .

    لا بد لوزارة التجارة ان تشن حملة وتمنع اي مطعم من وضع اي زيادة فوق الفاتورة سواء خدمة او ضريبة او عماة عين ، ممنوووووووووووووع ، ولازم تنتبه الوزارة ، مش يلغي زيادة الخدمة ومن باب ثاني يروح يزيد السعر علشان يطلع الفرقية . انتبهوا .

    الظاهرة الثانية : ارتفاع جنوني بسعر الأكل في المطاعم ، وحتى الشيشة ، دون مبرر ، يعني مثلا مطعم ومقهى ليالي الحلمية ، امأجر المكان من المشروعات السياحية ، كان يبيع الشيشه بنص دينار ، فعدل الديكورات وخلا الشيشة بدينار زائد 10% خدمة ، الحين دون تغيير ديكورات او شي ، زاد سعر الشيشة وخلاها 1750 فلس زائد 1% خدمة يعني تقريبا دينارين !! . طبعا المطعم يغير ديكوراته علشان زباين اكثر ايون له مو علشان يزيد سعره بحجة سويت ديكورات يديده !! . شنو هل الفوضى ، وانا ضربت لكم مثال الشيشة ، وكذلك زاد سعر كل شي سواء اكل او مشروبات ، طبعا هذا مكانه على البحر ومافي منافسين له ، وانا شخصيا اتصلت واشتكيت عند الجهة المسؤولة بوزارة التجارة ، قالي الموظف بكل وقاحة : انا لو منه خل يرفع سعر الشيشة 5 دنانير علشان لحد يشيش !!!!!!!! . يعني لو مسؤول امسوي رجيم بيقول خل يسوون سعر الكباب 10 دنانير خل الناس تضعف ، فوضى فوضى ، كلواحد يدخل قناعاته بالدولة ، باجر واحد عنده السينما مخالفة للأخلاق بنظرة ، بيقول خل يسوون سعر التذكرة 100 دينار خل الناس لا تروح !! .

    بس انا هذا الموظف حاولت احكره بسؤال ثان ، وقلتله طيب والأكل زايد سعره ؟ . اهني تلعثم البطل ، وقالي هذا مطعم ما نقدر نتدخل بسعره ، بس الحين بنطلع قانون ما يخلي احد يزيد ، يعني الحين خل يزيدون والقانون لما يطلع يثبت سعر الزيادة وبعدها محد يزيد !!! . يعني عينك عينك يا مطاعم سوو الماعون من دينار لي 3 دنانير وبعدين يطلع قانون يثبت ال 3 دنانير وخلاص لحد يزيد .

    الخلاصة : يجب إلغاء اي زيادة على الفاتورة بحجة الخدمة ، سواء 10% او 15% او حتى 0% .
    والثاني : يجب تدخل وزارة التجارة وتحديد سعر كل الأصناف وفرضها على المطعم ، ويحطون سعر معقول جدا جدا وبسيط يناسب العائلة والدخل المحدود حتى على مستوى المطاعم الراقيه ، يعني تبون رب الأسرة يودي أولاده مطعم نوارة ، لازم الأسعار معقولة بالمطاع العائلية علشان الكل يقدر يروح والمطعم ينترس ويبيع وايد ويربح وايد ، بدل لا يطلع كل ربحه من نفرين ، يطلعه من 20 نفر وهم المطعم منترس بدل الموظفين واقفين بطاليه ، يعني بدل ان يربح 100 ألأف خل يربح 20 ألف ، ليش بأمريكا قنوعين وتشوف اسعارهم رخيصة واحنه الكل يبي ينهب .

    ثالثا : ممنوع لأي مطعم ان يخلي بداية للفاتورة ، مثلا مطعم فيلا فيروز تبدي فاتورة الشخص ب 7 دنانير حتى لو طلبت ماي ، يعني الواحد يروح اهو واولاده ، يحسب كل واحد 7 دنانير ، وانت ولدك صغير ما ياكل حتى بنص دينار ، فتطلع وانت دافع 50 دينار على ولا شي ، بحجة المطعم هذا نظامه . فوضى فوضى فوضى ، لازم وزارة التجارة تمنع هل الممارسة الي اهي دخيله على الكويت ، كل واحد حاطله مدير اجنبي على المطعم ويايب افكار وممارسات دخليه على المجتمع الكويتي . ممارسات شفط الجيوب بحجة المكان راقي !!!! ( كل واحد منهم في ديرته مو لاقي ياكل ، الحين ياي ديرتنه وبيتفلسف ان امسوي مكان راقي ولازم تدفعون هيك وهيك وهيك ) بس الشرها على الكويتيين اصحاب المطاعم يسمعون لإستشارات الأجانب ويطبقونها على اهل ديرتهم ويتسببون بالغلاء .


    وسلامتكم ، وانا اقترح خل يبدون بليالي الحلمية ويخلون الشيشة نص دينار ، وباجي المواعين لازم رخيصة جدا لأن المكان هذا مؤجر من المشروعات السياحية ، حسب ما سمعت ما تقدر تتملك هل الأماكن على البحر .

    ولا تنسون قصر يلدز ببرج حمود ، هم زايد أسعاره وهم ياخذ خدمة 15% ، يعني كان يبيع بطل الماي الي يكلفه 150 فلس ، كان يبيعه دينار والحين خلاه دينار وربع !!! ، وغير الزيادات الثانية ، وقبل كان ياخذ خدمة 10%
    والحين 15% وهكذا .

    يا اخوان صدقوني اذا ما نتحرك مع الوطنيين والجهات المسؤوله ونردع هؤلاء ، وخاصة كثير منهم يحاولون يستوردون أفكار أجنبية ودخيلة على البلد في طرق رفع السعر بحجة الخدمة والديكور والمكان الكشخه وهل الخرابيط ، وهي امور مفتعله لا تستوجب رفع السعر .

    معلومة : تره القانون يتيح لوزير التجارة التدخل بالأسعار وهو يقدر يحددها عليهم وغصبا عليهم بعد .

    يعني يقدر يخلي صحن التكة بدال دينارين ، فقط دينار ، والأحسن خل يخليه 750 فلس ، وانا لو منه اخليه 500فلس ، وراس الشيشة تره ايكلف 100 فلس ، خل يخلون سعره بكل المطاعم 500 فلس بس للراس ، ورجاءا لا يدخل المسئولين قناعاتهم بهل السوالف ، يعني مو مسؤول ما يشيش يقول خل يزيدون الشيشه احسن ، وباجر مسؤول امسوي رجيم يقول خل يزيدون سعر الكباب احسن خل الناس تضعف لا تمتن .

    اخيرا : لازم الوزارة تتدخل وتقلل سعر تذاكر السنما لأنها محتكره ، ولازم التذكره بس دينار ، وإذا واحد يايب افراد عائلته يسوولهم عرض خاص .

    واخر شي بعد هذا : خل يتدخلون باسعار الأجارات ويقللونها غصبا على الي ما يرضى ، يعني عمارة صاحبها طلع سعره وخلص والحين يرفع سعر الأجار ليش ، لازم الأجارة يحدد على المساحه ، يعني 3 غرف وصالة وحمامين ومطبخ ما يزيد الأجار عن 200 دينار واذا اقل احسن ، صاحب العمارة ربحان ربحان ، شنو بتنهبون انتوا .

    يا سلام لو يخلوني وزير التجارة بس اسبوع ، اخليلكم الكويت مميزة بالعالم برخص السعر والجودة ايضا ، والكل يربح بحدود القناعة وليس الجشع .

    وبس تعبت ايدي ، عاد ياريت يطلع واحد نشيط ويروج هل الأمور ويخلي المسؤولين يطبقونها ، ملينا من الكلام والتذمر ، نبي عمل عمل عمل نتيجة .

    :rolleyes:
     
  2. خبير النفط

    خبير النفط عضو نشط

    التسجيل:
    ‏15 يناير 2007
    المشاركات:
    4,638
    عدد الإعجابات:
    54
    طالما المطاعم تعطى معامله واسعار خاصه لبعض المسئولين عن تطبيق القانون الخاص بالزياده او حمايه المستهلك ما راح تتعدل الامور بل العكس راح تتردى ,
     
  3. Bent_alq8

    Bent_alq8 عضو جديد

    التسجيل:
    ‏28 سبتمبر 2007
    المشاركات:
    3,735
    عدد الإعجابات:
    0
    مكان الإقامة:
    حبيبتي الكويت
    أول شئ أخوي الله يعطيك ألف عافية على هالموضوع الحساس واللي مو لاقين من ينقذنا منه وهو الغلاء الغير مبرر..يا جماعة وين الحكومة وين المسؤلين وين التجارة وين حماية المستهلك...وين ووين ووين؟؟؟؟؟
    بإختصار>>>>>>>لالالالالالالالالالا حياة لمن تنادي...:(
     
  4. عاشق سدني

    عاشق سدني عضو جديد

    التسجيل:
    ‏10 أكتوبر 2007
    المشاركات:
    322
    عدد الإعجابات:
    0
    مكان الإقامة:
    في الاعماق
    اي والله موضوع مهم من الناس طول عمرها نص الراتب يطير على المطاعم وفوق كل هالفلوس الي لطوها صار البعبع مايشبع الحين صارت اسعار
    المطاعم العاديه مثل العالميه الي الوجبه كانت 1000 زادت دبل واولهم البطريق
     
  5. (فزاع)

    (فزاع) عضو جديد

    التسجيل:
    ‏18 ديسمبر 2007
    المشاركات:
    4,473
    عدد الإعجابات:
    0
    مكان الإقامة:
    .. الكون ..
    مشكور اخوي كويتي ..
    ابصراحه حطيت ايدك على الجرح ..
    لكن اذن من طيين واذن من عيين ..

    انا من ناحيتي .. كل ما القى مكان صار غالي .. قمت ورحت عند اي شي البديل ..
    على الاقل خلي بضاعته تطيح بجبده .. ( ان كان مطاعم او جمعيات ) ..

    واتوقع ان ما راح تكون ردة فعل من الكبار .. ( مجرد توقع ) ..
    لأن تجارنا من النوع اللي يتلذذ بمذاق الربح من ورا اظهور الفقارى ..

    على العموم نصيحه من اخ لي اخوه ..
    اذا شفت اي مكان غلى سعره .. اتركه .. وخله يولي ..
    علشان يتوهق .. وبالنهايه .. ما يلقى احد اييله ..


    ومشكور ويعطيك العافيه قلب ..
     
  6. Dr-Q80

    Dr-Q80 عضو نشط

    التسجيل:
    ‏30 سبتمبر 2007
    المشاركات:
    1,131
    عدد الإعجابات:
    3
    مكان الإقامة:
    الكويت
    يعطيكم العافية على هذا الموضوع
    انا راي الشخصي يا جماعة انه مو شرط نروح هالمطاعم و نبدا بالمقاطعة مثل ما اقترحوا كثير من الاخوان بالمنتدى و نسويها حمله وطنية
    على الاقل يوم بالاسبوع الكل يقاطع المطاعم و ياكل بالبيت
    اكل البيت انظف و ارخص و صحي اكثر
    يا جماعة احنا نصيح من الغلاء و لما تمر على ستاربكس ما تلقى كرسي فاضي شلون ما تبونهم يزيدون الاسعار العيب هم فينا
    مو شرط كل مرة نطلع مع عيالنا نروح هالمطاعم
    الجو هالايام حلو اخذوا سندويشات و روحوا مع عيالكم و قعدو عالبحر ترى مو عيب
    لازم احنا نتحرك اما اذا بتنطرون الحكومه ف..... لا تعليق
     
  7. بوغمازات

    بوغمازات عضو نشط

    التسجيل:
    ‏15 مايو 2007
    المشاركات:
    2,416
    عدد الإعجابات:
    2
    الزياده طبيعيه بالاسعار ... انا اروح علي طول قهوه لانوتر من 4 سنين ولازالت الاسعار مثل قبل لا زيادة ولاشي .... عاد في احد يروح ستاربكس !!! وعموما يقولون راح يكون في اضراب يوم الخميس تاريخ 6\3 عن السوق والمطاعم جميعا يعني باليوم هذا الكل راح يقعد بالبيت لاسوق ولا مطاعم ولا كافيهات :cool: حسب كلام الايميل اللي وصلني امس :cool:
     
  8. Bent_alq8

    Bent_alq8 عضو جديد

    التسجيل:
    ‏28 سبتمبر 2007
    المشاركات:
    3,735
    عدد الإعجابات:
    0
    مكان الإقامة:
    حبيبتي الكويت
    إيه يصير خير إن شاء الله عسى الله يحينا ليعقب باجر وروح خذ لك فرة بمولات الكويت وشوف الذبحة...قال مقاطعة ققااااال...تبي ناس تمووووووت...يبه الناس إذا طلعت وما تاكل يصير فيهم شئ.:confused:
     
  9. الأرستقراطي

    الأرستقراطي عضو نشط

    التسجيل:
    ‏17 أكتوبر 2007
    المشاركات:
    7,178
    عدد الإعجابات:
    12
    مكان الإقامة:
    OKBK
    اذا مطعم بدر البدور زود سعر سندويشة الكباب من 250 الى 300 ،،،
     
  10. bin_thawi

    bin_thawi عضو جديد

    التسجيل:
    ‏27 أكتوبر 2006
    المشاركات:
    18
    عدد الإعجابات:
    0
    اخوي كويتي 2006 .كلامك حلو بس القاعدة تقول **لكل فعل رد فعل الا في الكويت**.ما اقصده ان الشعب الكويتي اصبح شعب حكي_في الديوانيات,الدوائر الحكومية,المقاهي,...الخ,والفعل ماكو.خير مثال على اللي اقوله المحلات الغذائية في السعودية قاطعت المنتجات الدنمركية,عندنا في الكويت بس الجمعيات التعاونية(م.سلطان ولا همه,سيتي سنتر ولا اسألت وما ادري اذا في غيرهم ولا لا).
    المهم حتى نجبر الاخرين على اللي نبيه لابد ان نحترم نفسنا ونبدي نتحرك مو نبدي نسولف.
     
  11. قدوع

    قدوع عضو جديد

    التسجيل:
    ‏25 ديسمبر 2007
    المشاركات:
    254
    عدد الإعجابات:
    0
    لو علم صاحب المطعم او المقهى او اى سلعه اخرى ان الناس ستقاطعهم فى حال زيادة اسعارهم فعلا لا قولا ومهايطا فلما تجرأ أحدا منهم على رفع سعره .

    لكن الغالب من الناس مثل أم ناصر لسان طويل وحيل قاصر .. بس بطرق التلعلع بالدواووين والتشكى بالمنتديات .
     
  12. rakan_yes

    rakan_yes عضو نشط

    التسجيل:
    ‏24 مايو 2007
    المشاركات:
    2,073
    عدد الإعجابات:
    0
    تعالي يام العياال
    شنو طابخين لنا اليوم

    ها يمه شنو الطبخ اليوم

    شفيكم

    موعاجبينكم الاهل
    ماعاجبتكم الام ولا ام العيال

    ليش نروح للمطاعم شالي حادنا عليهم

    اهو صحيح التغير بس اهو السبب الي يخلينا نروح للمطاعم يعني مافي غيره بالنسبه لي


    يااخوااااااااااان شحلات البيت وطباخه وشحلات طبخ الام ولا ام العياال

    والله لو تستحمل اخوي او اختي
    الاعضااء

    اكل البيت راح تحس بعافيه كبيره

    اكل البيت صحي 100%

    المطاعم كل يوم ماسكين مخالفه البلديه عليهم
    عندكم خبر ان المطاعم يسون بعض الاكل في الحمامات واعتقد الكل شاف الجريده وشاف الصور واهم حاطين اللحم في المبانيوا

    ياناااااااس اصحوا شوي
    لاتدفع لمرضك اموالا

    بل ادفع لعافيتك اكثر

    مع المعلم ان بالبيت الاكل مايكلفك شيء وبالمطاعم تدفع الشيء الفلاني

    اشكر صاحب النقل
    على هالجهد الجباار

    تسلم يمينك اخوي

    تقبل تحياتي
    ابورااشد
     
  13. المرشد1

    المرشد1 موقوف

    التسجيل:
    ‏24 أكتوبر 2005
    المشاركات:
    460
    عدد الإعجابات:
    0
    يا جماعه غيروا من السندوش السريع لفطاير المشلتت احلي
    وارخص واطعم
    لان المسؤلين ما راح يدرون عنكم انبحت الاصوات ولا حياة لمن تنادي
     
  14. كويتي2006

    كويتي2006 عضو جديد

    التسجيل:
    ‏11 سبتمبر 2006
    المشاركات:
    1,166
    عدد الإعجابات:
    0
    يا اخوان في عندكم لبس في مسألة علاج المشكلة .

    المقاطعة ليست حلا في الكويت .

    في احدى فرجان لندن ، زاد راعي البقالة سعر البصل ، فقرر سكان الحي مقاطعته ، فرضخ وارجع السعر كالسابق .

    في الكويت هذا الكلام ما يمشي ، ليش ؟

    السبب ان ليس هناك منافسة ولا بديل ولا بطيخ

    السينما محتكره لشركة واحدة
    الهاتف النقال فقط شركتين ، تقاطع منو ولا منو .
    المطاعم ليست كثيرة جدا ، وهي اغلبها زادت اسعارها .
    وهكذا كل شي ، يملكه مجموعة من التجار يتفقون فيما بينهم ، واما مسألة ان نشتري المراعي والمنتجات الأجنبية ، فهذا خطر جدا ، فمن غير المعقول ان ندمر منتجاتنا الوطنية كي نربح منتجات اجنبية ، وبعد اغلاق مصانعنا سوف تتفرد بنا الشركات الأجنبية وتصعد اسعارها ، وانظروا الشركات السعودية ماذا فعلت بالسوق السعودي من غلاء .

    الحل اجبار الشركات الوطنية على ان تجعل سعرها رخيص .

    بعدين احنه بدوله فيها قانون يحمينا مو شغلي انا وغيري انقاطع هذا وذاك بسبب مجموعة مسؤولين متواطئين مع قوى الفساد .

    الصحيح هو محاسبة الجهات المسؤولة وتحويلها النيابة واستبدالهم بعناصر وطنية كفوؤه قلبها على البلد والمواطنين .

    لو فقط هذه الجهات تتفعل وتتدخل لرأيتوا كيف كل شي ليس فقط يرخص ، بل يكون اسعاره اقل من السابق بكثير ، وذلك من خلال تحديد سقف الربح كحد اعلى بعد حساب التكلفة ، والمنافسة بالأسعار تكون ضمن هذه الحدود الأعلى والأدنى ، وليس الأمر ان ادع السقف مفتوح بحجة المنافسة والسوق يعادل نفسه وهل الخرابيط الي تنجح بامريكا وتفشل مع بلاعة البيزة عندنا .

    يا اخوان ، انت ممكن تقاطع وتنثبر بالبيت ، بس اعيالك يبون يطلعون يستانسون وترفه عنهم ، ما يصير اخليهم ينثبرون بالبيت بحجة المقاطعه وننسى تفعيل القانون ومحاسبة المقصرين والمخربين وخاصة الأجانب الي يايين يشفطون ديرتنا وجيوبنا ، تره احنه بدولة مو بمخيم .

    يعني باجر لو واحد يفتح بار او مركز دعارة ، هل افعل القانون واسكره واحاسبه او اقول للناس خل نقاطعه ومحد يروح فيخسر ويسكر ، طبعا هذا ما راح يصير لأن راح تشوف طق امطاقق عليه ، لأن بعض النفوس الضعيفه راح تروح مثل ما يروحون بعض المقاهي المشبوها والتي تكثر فيها مظاهر الدعارة المقنعة ، ولا احد يردعهم ولا بطيخ ، وفقط بعض العوائل تتذمر من هذه المظاهر دون ان يتدخل احد بألف حجة وحجة ، ولو يبون يضبطون الأمور يقدرون ، بس البعض يحب هل الأجواء ومخلي القرعه ترعى .

    بعدين حجة ان المطعم الكشخه لازم انخليه غالي ، هذي حجة غلط ، المطعم يرتب ديكوراته وخدماته علشان يكسب زباين اكثر واكثر ، ولذلك لازم تتدخل الدولة وتحدد السعر بكل شي وتجعله بسيط جدا ، يعني ربح لا يتجاوز 10% من التكلفة ، والي يبي يربح اكثر خل يبيع اكثر ، يعني المطعم لما ياكل فيه زبون ربحه اقل عن الي ياكل فيه 1000 زبون ، وكل مطعم خل يشد حيله ويكسب زباين اكثر ويسوي عروض ، ولكم العبرة بمطاعم عالمية مثل ماكدونالد ، وكل مطعم خل يضبط ديكوراته علشان يكسب زباين اكثر ، مو يحطلي جم مزهرية ويزيد السعر دبلات بحجة الديكورات وان المطعم راقي ، شنو يعني ، قصبن عليك اتخلي الديكور راقي والخدمات ، عيل تبي اتوكل عوايل الكويت بعشه واكل بايت ، بس الشره مو على الأجانب ، الشره على الي خلاهم يلعبون فينا طوبه ، ومثل ما قال احد المشاركين ، مادام يضبطون بعض المسؤولين فلا تشتكي ، ولكن هل مسؤولين هم اول من لازم انوديهم النيابة ونرصهم بغرامات خيالية وفصل وسجن خل يكونون عبرة ، وباجي المطاعم ننزل عليهم عقوبات رادعة انخليه يلعن الساعة الي تجرأة ورفع سعره ، بل لازم الحين تتدخل الحكومة وتحدد الأسعار بادنى مستوى كي متماشى مع اقل دخل في البلد ، وما عليكم تره مهما السعر رخيص ، فالتاجر رابح رابح ، بس بدل لا يربح مليون يربح 100 الف ، خل يحمد ربه ويشكره .


    لا تركزون على المقاطعه وايد لأنها ما تهش ولا تنش ، لأن الخيارات مو كثيرة ، انتوا مو في امريكا إلي الخيارات وايد .

    الحل : فقط وفقط ساحة الأرادة ، والمطلب يكون واضح ودقيق ويحل المشكلة من الجذوذ بشكل سلمي وقانوني وديمقراطي .

    6 مراحل للحل :

    1) مرحلة الاعتراف بالمشكلة .
    2) مرحلة البحث والتحري عن حلول لهذه المشكلة .
    3) مرحلة إعداد وكتابة خطة زمانية ومكانية لتطبيق هذه الحلول .
    4) مرحلة التطبيق ورأيت النتائج .
    5) مرحلة الوقاية والمحافظة على النتيجة الإيجابية .
    6) مرحلة ثبات التغيير والتأكد من القضاء على المشكلة وعدم عودتها .


    اتوكلوا على الله ، تره ديرتنا اصغيرة وفيه خير وناس شجعان وقلبهم على البلد ، وتره الحل فيها اسهل من شرب شربت الزعفران .

    بس انتوا لا تتحلطمون وايد بالديواوين بينكم بين بعض ، لأن التحلطم ما يهش ولا ينش ، جنك تقط راسك بالطوفة ليما تموت ، الحل هو ساحة الإرادة بشكل سلمي ومن خلال القانون ومعانا النواب الوطنيين وراح تشوفين اشلون واقعكم يتغير للأفضل ، والحياة تصير رخيصة وسهلة وجودة ووناسه وخير ، وراتبك الحين اذا 1000 دينار ، بعد علاج المشكلة وكل شي يصير ارخيص ، راح تشوف راتبك بو 1000 صار يسوا 3000 ، لأن قيمته صارت قوية .

    يلى شدوا حيلكم وكلنا معاكم .
    :p

    نبيها أرخص .




    الحل الوحيد هو ان تقوم الحكومة بالضرب بيد من حديد ضد القطاع الخاص الجشع وكل من يريد تخريب البلد وجعله الشعب امفلس ، فتنهار القوة الشرائيه وتنهار معاها امور ثانيه كالطبقة الوسطى التي تشكل العامود الفقري للديمقراطية الحرة النزيهة .
     
  15. rakan_yes

    rakan_yes عضو نشط

    التسجيل:
    ‏24 مايو 2007
    المشاركات:
    2,073
    عدد الإعجابات:
    0
    كثر الله من امثاالك

    الاخ كويتي 2006


    ممكن نغير اسمك ونخليه كويتي المستقبل

    انت فعلا اجبت فاصبت


    بصراحه اعجبني ماكتبت واثلج صدري ان هناك اناس يكتبون مايروه مناسبا للوقت والحدث
    كالحاظر الذي نعيش فيه ليريح لنا مستقبلنا باذن الله

    ماعندي غير
    جزاك الله الف الف خير
    وكثر الله من امثاالك في هالمنتدى وفي هالديره


    تقبل تحياتي
    اخوووك
    ابورااشد​