تكفووووووووون ياشباب المساعده

[MAC/D]

السلام عليكم ياشباب
ابي اشترك بخدمة ال DSL وابي نصيحتكم من حيث:

افضل شركه من حيث الخدمه و السعر

ارجو ان لايبخل علي احد بالمعلومات

واكون شاكر جدا

ارجو الرد السريع لاني مضطر اشترك بسرعه

 

[saad2008]

فاست تليكو
886666

 

[بـ مـبـارك ـو]

قلوبل دايركت 807007 السرعه 256 ب 12ونص شهري

 

[boabdulmohsen]

كولتى نت

 

[المعوشرجي79]

قلوبل دايركت 807007 السرعه 256 ب 12ونص شهري

ما انصح بهالشركة اسال مجرب خدمتهم سيئة

انصح بكواليتي نت

 

[بـ مـبـارك ـو]

صج او ايامي طفشت منهم بس الحين ممتاز والحمدلله

 

[anacardia]

انقل لك تجربتي مع فاست تيلكو لاكثر من 3 سنوات حتي في ايام مشاكل النت كانت خدمتهم جيدة نوعا ما قياسا للشركات الاخري حسب ما كنت اسمع من مشتركين بشركات اخري ، صج ان سعرهم نوعا ما غالي لكن عندهم عروض حلوة وتقدر تتصل عليهم وتسألهم.

 

[jeme_E]

عن نفسي

احترم شركه كولتي نت

اقوى سيرفرات وعندها شبكات بحري وجوي

لو صار اي مشكله بالبحري تحول على الدشات

خدمتها راقيه والدعم الفني مالها محترم ولو صارت اي مشكله بسرعه يحلونها

وعندهم فني دايم يروح السنترال لو عندك اي مشكله

انا جربتهم يوم فصلنا الكيبل وغيرت رقم الخدمه اكثر من مرتين

ما خذو ولا شي وبسرعه ضبطوها لي

انا الحين قريب اخلص ثاني سنه اشتراك دي اس ال وباذن الله بجدد بعد

اشتراكي على الفيزا يقصون كل شهر اذا ماني غلطان 24 دينار


اسمحلي نسيت جم بالضبط مكنش الفيزا لو يبوقون مني مادري

سرعتي 512 ومركب عليها شبكه وايرلس للبيت اشغل عليه مرات 4 كمبيوترات

وبشوف لو يسون عروض بجدد بسرعه اكبر افكر 1024

جد جد انصح فيها هل شركه راقيه وانا من ايام الاشتراك العادي وبعدها الكروت وانا معاهم


الشركات الباجيه يقولون لك سرعه عاليه بس ماتكون حقيقه

وخدامتهم سمعت مو ذاك الزود

اذا عندك كمبيوتر واحد لاب توب اتوقع الايقو افيد لك بس انحش من الوطنيه روح لزين

الكل يمدحها

انت سألتنا وانا جاوبتك عن اللى اشوفه ويعلم الله

قلت اللى اشوفه بدون زود ولا نقصان

ونسأل الله لكم ولنا التوفيق

 

[ابوعبدالله لابتوب]

انا انصحك بكيمز 822822 توكل على الله واه احيانا يسون عروض 96 دينار 256 لمدة سنه ومعاملتهم طيبه ويساعدونك على كل شي تبي تستفسر

 

[MAC/D]

للرفعععععععععع

 

[Buffett]

والله ياخوي انا كنت مشترك بكوالتي نت أكثر من سنتين ..

وخدمتهم جدا راقية وممتازة ..

غيرت اشتراكي إلى United Networks عن طريق الشوتايم ..

لان الاشتراك أرخص تقريبا بنص السعر ..

بس والله اني تحسفت .. خدمتهم وسرعتهم أي شي ..

والحين بروح الشركة واكنسله واذا ما رضوا برفع عليهم قضيه ..

لانهم يلزموني اكمل السنه .. غصب يعني تتحمل خدمتنا سواءاً زينه ولا شينه واذا بكنسلها لازم ادفع جم دينار ..

وصدقني غير كوالتي نت لا تختار .. وجني سمعت انهم مسوين عروض الحين ..

تاخذ سرعه ويعطونك دبلها ..

موفق يالغالي ..​

 

[سكارفيس]

فاستلكو واقطع ... والحين عندهم عروض حلوه لا تطوفك ...

 

[MAC/D]

شكرا لجميع الاخوان اللي ردو علي استفساري


واتمني الردود من الاخوان الاخرين وان لايبخلون

علينا بالمعلومات

 

[MAC/D]

فاستلكو واقطع ... والحين عندهم عروض حلوه لا تطوفك ...

ياريت تزودني برقمهم واكون شاكر

 

[سعمران]

شوف أخوى وبلا مقدمات وبلا أفلام

صارلى سنتين وأنا مشترك بالفاست تيلكو وجددت أشارتى للمره الثالثه قبل أسبوع رغم أنه لن ينتهى ألا بشهر 11 القادم والأسباب هى التالى ..

كان عندهم عرض صاروخى وتاريخى وقياسى وما بغيت أطوف هالفرصه

عطونى سرعه مضاعفه بدال 512 عطونى 1 ميغا بسعر 206 دنانير لمدة سنه مع أيبود 4 غيغا قيمته بالسوق 55 دينار .. يعنى أشتراكى طلع على بحدود 150 دينار ..

خدمة العملاء عندهم ممتازه وفوق الممتازه ..

هذا الحجى اللى عندى وهذى تجربتى معاهم أذا تبى تسمع كلامى خير على خير وأنت المستفيد بالنهايه وأذا تبى تطنش فيه وتسوى السالفه قصة ليلى وعنتر وتطولها وهى قصيره .. فحسافه على الوقت اللى ضيعته وأنا أطبع الرد والتفاصيل لأنه الواضح أنه ما عندك سالفه .

 

[سعمران]

فاست تليكو
886666

ياريت تزودني برقمهم واكون شاكر

والرقم اللى بالرد رقم 2 شنو رقم سبيس تون ؟؟

 

[ahmedh]

ههههههههههههههه سعمران

اسف بس ماقدرت امسك نفسي من الضحك

 

[MAC/D]

للرفعععععع

 

[شرياص العديلية]

أحسن حمص ( مطعم السعادة )

أقوى شورمه ( أفراح الخليج ) الفروانيه اللي يحطون الصيخ بالطول .

أفضل واحد ما عنده شغل ... آنا

تروح البحرين معاي .. واترك عنك هالخرابيط ​

 

[Master-Leo]

كوالتي أو فاست تيليكو ليس لأنهم الأفضل بالخدمه على الاطلاق لكن لأنهم أفضل السيـئين بالوقت الحالي

انا جربت كوالتي لابأس فيها بس دائما العيب بشكل عام بال upload سرعته مو مثل الداون لود

كوالتي كلمهم على رقم 804444 اخذ منهم تفاصيل الاشتراك اذا تحب وقارنه مع فاست تيليكو