على فكره قبلكم ناس صارلهم سنين وخسايرهم من اسوا لسوا تدرون ليش انا راح اوضح وياليت الاخ القارى يفهم معنى كلامى عدل
1- مع احترامي للكل وانا ما اقصد بكلامى اى احد من اللى يحطون تحليل او توصيه
2- ياصغار المستثمرين لازم تعرفون ان المنتدى او الاعلام او الدواوين او التصريحات انها خصم وتجار السوق الخصم المقابل له يعني اذا انت عرفت خطه الخصم اللى قدامك من السهل انك تسوى خطه تتغلب عليه فيها لان خطته مكشوف
3- تجار السوق يستخدمون كل الطرق لجذب صغار المستثمرين تدرون ليش لان التاجر ماياكل تاجر مثل الهوامير بالقرقور ينطرون لما ادش عليهم سمكه صغيره والكل منهم يحاول اكلها باى طريقه
4- استخدام اى وسيله للدعايه سوا منتدى او اعلان او تصريح او لقاء تلفزيونى تاكدو انه من تاجر او محفظه تدرون ليش لان هالاعلام من المستحيل يقولك دش على السهم الفلانى وانا اتحمل خسايرك لاخسرت ولو ذكر سهم معين تاكد انه هالسم تم التجميع عليه وهالتاجر او المحفظه بدت تسوي للى اجمعته دعاية
5- مافيه تاجر يشترى السوق مرتفع ومافيه تاجر يبيع والسوق نازل بحكم عملى ومقابلهم بالسوق 8 سنوات ما اشوفهم يبتسمون بينهم وبين بعضهم الا اذا نزل السوق واشوفهم يركزون اذا ارتفع السوق وطبعا تركيزهم لسباب عده اولها اشلون يصرف الاسهم اللى تم دبل سعرها او اشلون يصرف سهم ويضغط سهم
فيا اخوانى نصيحه اغلب تجار العالم بالبورصه لهم حكمه وكلهم مجتمعين عليها اشتر بالازمات وبيع بالافراح وانا اعتقد ان فيهم الجامعي والمهندس والفنى يعني منتو اصغار تطوف عليكم هالامور
ركزو لما كان السوق ينزل شنو كانت تقول الصحف والمنتديات وشوف لما ارتفع شنو قالت المنتديات والصحف لدرجه انهم قالو شركات راح تعلن افلاسها وحرب على الابواب وشركات راح تنزل اقل من سعر 100 فلس وابيكم تلاحظون مدام حنا اعيال اليوم روحو وشوفو الاسهم بثاني اسبوع من شهرنا هذا وشوفو سعرها اليوم ولو بضرب مثل بقولكم الدوليه م ا اوصلت الى 104 فلس وخلال اسبوع اوصلت 128 فلس وداماك اوصلت 255 فلس وخلال اسبوع اوصلت 285 فلس
دانه اوصلت 168 فلس وخلال اسبوع اوصلت 190 فلس لو بذكر الاسهم يبيلي صفحتين من ذكر الاسهم اللى اوصلت لسعار خياليه ورتدت مابين 30 الى 40 فلس يعني لو اللى دش بالازمه طلع امفايده واللى باع اول الازمه ودش باخرها رد راس ماله تقريبا فيا اخوانى انتم تحت مناظر التجار وخططكم مكشوفه السهم اللى راح يعلن من اى وسيله اعلاميه سوا منتدى او صحافه او دوانيه او تلفاز تاكدو ان التاجر راح يحط خطه يخليك تخسر باى طريقه لانك مكشوف وهو غامض
وانا بقول للى يقول انا عندى توصيه احب اقولك نقطه ومع احترامي لك التوصيه انت تعتقد انها بالطريقه السهله اللى توصلك
تاكد ان التوصيه ماتوصلك الا اذا فيك هالميزتين
1- امين على السر
2- لاتذكر تلك السهم اللى وصوك عليه لان دائما راعى التوصيه اللى يعطي يقول هالكلمتين يافلان ترا هذا سر وامانه ويافلان لاتذكر هالسهم لو قعدت بمكان يسولفون عن الاسهم
هذا وارجو انى قد وضحت ما اريد توضيحه ومع احترامي وتقدير لاى شخص يحلل او يقول عندى توصيه وتقبلو تحياتى
ملاحظه : اخاونى انا جتنى اربع توصيات وجربت هالشغله اول توصيه ربحت يمكن 95 بالميه من راس المال والثانيه 80 بالميه والثالثه يمكن 85 بالميه والرابعه 70 بالميه
تدرون شنو الغريب اللى اكتشفته ان لما جتنى التوصيه الاسهم اللى وصانى عليها هالشخص مااسمع لها طارى لابالمنتديات ولا بالجرايد ولا بالتلفزيون ولا بالدواوين يقولى مثلا اخذها اول الشهر الفلانى وبيعها باخر الشهر الفلانى وتلقاها مدفونه بالاشهر اللى هو قال اخذها وبيعها فيه واول مابيعها اتفاجئه انها تارسه المنتديات والجرايد والدوانوين والتلفزيونات
نقطتين بموضوعي ارجو الانتباه عليهم
1- اشتر بالازمات وبيع بالافراح
2- السهم الى يتم تداوله بالكلام باى موقع لاتقرب صوبه لان 90 بالميه يكون تصريف
ملاحظه مهمه جدا : اللى يحاول يلقاء برنامج كاشف الايبي راح يتفاجئه بالمنتديات ان اغلب الموجودين لهم نكين او ثلاثه وانا بالصدفه كشفت واحد له ثلاث نكات اثنين باسم رجل والثالث باسم انثي طبعا من المستحيل اذكر اهو باى منتدى وشنو نكه لان الستر زين نبهتكم فحذرو وشكرا
جرئة الطرح هذه الى نبيه...
صدمت الناس فى مقالتك وخليتهم يصحون وشلت الغشاوه الى على اعيونه....
يعتقدون ان فى المدينه الفاضله .....
لى تعليق من قبل اسبوع وهذه جزء منها ....
اما الان بعض الاسهم طاحت النص من قيمتهاا تقريباا ومحد راضى يشترى والكل خايف....
والى كان يوصى فى الشراء الحين يوصى لاتشترى امر البشر غريب....
غير المواضيع الرنانه...
هل نحن بأزمة منااخ جديده؟!!
هل سنشهد افلاس كويتي ؟
وردود ان هناك اربع شركات سوف تعلن افلاسة...
وغيرهاا الكثير...
يعطيك العافيه على التنبيه...
