اخواني شرايكم في وظيفة كاشير البنزين ؟

[دواس علف]

السلام عليكم

اخواني عن قريب ان شاء الله استلم وظيفتي كاشير بنزين

شرايكم بالوظيفه اخواني ؟ متعبه ,, مريحه ... حلوه

للعلم الوظيفه 8 ساعات فشنو تنصحوني يااخواني اسويه عشان تنتهي هال8 ساعات بسرعه لان دوامي الفجر وما اعتقد فيه زباين كثير

فشنو رايكم يااخواني ونصايحكم تكفون

والله يجزاكم خير

 

[جامعي]

الله يوفقك اخوي
بس بقيت استفسر منك شلون اتوظف فيها وكم معشاتهم
ومالك الا الابتوب عشان تكزرها ومشكور

 

[كويتي محب]

لاب تـوب .. واحد من ربعك يكون معاك ..
والله يوفقك

 

[الشكوىى لله]

وين التقديم أخوي ؟
وفي دورة أو لا
وكم مدتهاَ وهل احصل على شهادة
او
اي شيء يثبت أني انجزت الدورة ؟؟؟
وين التسجيلُ غير شركة الخرافي
لإن يطلبون لمن يهمه الأمر من التأمينات
والإغلبية موظفين صارواَ مثل ديوان الخدمة
يبون الناس تقدم أستغالتها واخرتها
مايقبلونه معاهم كاشير ..

 

[الشكوىى لله]

بنسبة شلون تضيع هل 8 ساعات ..
عزبة قهوه وجاي ..لآبتوب ...وشوفلك واحد ونيسس

 

[بدون مجامله]

واحد من الشباب كان فيها دوامه صبح من الساعه 6 الى الساعه 2 الظهر طبعا مايطلع الا الساعه 3 العصر على مايجيه الشفت الثاني ويسلمه المحطه والفلوس المساله استلام وتسليم على مايوصل البيت الا تعبان بالمره طبعا مافيه اجازه الا يوم بالاسبوع صراحه صاحبنا تعب وطلع يقول ماقدرت اتاقلم ..خاصه لدخل عليك الشتاء دوامك الساعه 6 لازم تطلع من البيت بالليل نور الصبح ماشق هذا الي عندي وعسى الله يوفقك

 

[هادي33]

الله يعيينك اخووي ...

هالمهنه متعبه ولا ودي احبطك ولكن لالالالالالالالالالالالازم تتحمل الاشكال ألي بتشوفها

منها :
* ألي نلسي بوكه
* معبي 5 يعطيك 4ونص !!!! ويقولك ماعندي نص !!
* الاجانب الاجانب وخصوصا لو كنت بمحطه مناطق فيها اجانب (لاتقولي ناس متعلمين ويحترمون
القانون !! هالشي بديرتهم بس )) وخصوصا استعباطهم ...
* وعلى حسب واسطتك ومكان المحطه (( لو كنت بالمناطق الداخليه تحمل القشران والنفسيات)
وان كانت المحطه بالمناطق البعيده الله يعينك على ( ***** )
* مشكله دائمه وابديه ألي ماعندهم فلوس ((اخذ بطاقاتهم وهوياتهم او حتى سبير سيارته))
ودفع من جييبك على ما يردون ((عندي بطاقات وايد ))

قضاء 8ساعات : اذا كانت المحطه زحمه ماراح تحس بالوقت بس تبي راديو

اما اذا كانت المحطه عاديه :
جايات وقهوه ومكسرات (( ولابتوب سريع فيه نت سريع وسحب الافلام او طالع قنوات ))

وفي شي مهم جدا (( قرائة المعوذات والصدقه اول اليوم للحفظ من كل سوء))
وموفق والله يعيينك .....

 

[abu yousef]

الصراحه وظيفه زينه بس بخصوص اشلون تقزرها لا تنسى كتاب الله

 

[دواس علف]

السلام عليكم
الف شكر لكم يااخواني على ردكم ما قصرتو
اخواني بخصوص اللي سالو عن التوظيف فعند اولى الخرافي خلف جبرة الخضره بالشويخ في كيربي كبير للتوظيف
ويقبلون شهادة متوسط وما يحتاج لا دوره ولا شي
والراتب مع دعم العماله 510

الف شكر مره ثانيه لجميع الاخوه اللي ردو وزودوني بالمعلومات ما قصرتو كفيو ووفيتو

 

[دواس علف]

اللي عنده معلومه اكثر يفيدنا

 

[الاولى]

السلام عليكم
الف شكر لكم يااخواني على ردكم ما قصرتو
اخواني بخصوص اللي سالو عن التوظيف فعند اولى الخرافي خلف جبرة الخضره بالشويخ في كيربي كبير للتوظيف
ويقبلون شهادة متوسط وما يحتاج لا دوره ولا شي
والراتب مع دعم العماله 510

الف شكر مره ثانيه لجميع الاخوه اللي ردو وزودوني بالمعلومات ما قصرتو كفيو ووفيتو

مبروك

بصراحه وظيفه زينه

والحكوميه بالبصمه صارت مثل مثل

الله يوفقك وينور طريقك

 

[جامعي]

اخوي انا معاي الشهاده الجامعيه ودي اكزر فيها لين اتوظف كم الراتب من غير دعم العماله
والتوظيف يحتاج واسطه ويطول على الوظيفه

 

[بو جابر]

أنا أسميها وظيفة تغزيره يعني لاحد ما تلاقي وظيفه أحسن بصراحه وظيفه مالها مستقبل بس تنفعل لما تلاقي وظيفه أحسن وأحسن من القعده

 

[ابو سالم1]

انا اشتغلت سنتين فيها
الوظيفة يبيها شخص عندة قووة بالصبر
بالمحطة دوامك انت ومسؤول المحطة لازم يتم بينكم تنسيق عشان لا سمح الله اذا صار عندك ظرف يمسك مكانك لان مسؤولين المحطة دايم يكشتون فيك ويطلعون لو انت تبلغ عليهم يروحون فيها يعنى من الاول خلوكم حبايب ثانيا اذا بديلك ماداوم انت راح طبق شفت ثانى يعنى اذا مداوم 6 الصبح وصاحبك غياب راح تطلع الساعة 11 بليل اظن متعبة واجد

والاجازة صعبة جدااا
سنوية لك 15 يوم فقط
اذا تبي تغيب لا تغيب نسق مع الكاشريه البحرينيين و السعوديين يداوم عنك اليوم بـ 10 بس اذا انت بتغيب خصم 30 والى تبي يداوم عنك من الاخوة الخليجيين لازم يكون محل ثقة ومايقط الكاش الا جدام مسؤول المحطة عشان يتاكد لان لو يبي يسرق الفلوس يقدر يبوقها وانت الى تتحاسب .
بالنسبة للمشاكل اى نقص راح تدفع من جيبك اى زيادة اخذها لك .

نصيحتى لك لاتكون هذى وظيفتك الى مسجل فيها بالتامينات لانها وظيفة مؤقتة تجيب الظغط و السكرى .

الله يوفقك

 

[بو ناصر@]

هلا اخوي ،،
الوظيف هذي انا مجربها قبل ثلاث سنين ، حلو وتعلمك شلون تتعامل مع الناس لان جميع اشكال الكويت تمر عليك
وتعلمك التركيز بالشغل لان لازم تدقق بالفلوس امكن تعطي 10 زياده او تنقصها
اذا جاك نقص بالفلوس طبعا من جيبك واذا زاد خله معاك لانه راحيجك يوم امكن احديسال انه ناقصه فلوسه
وديربالك من الفلوس المزوره احيان من كثرت الشلغ ما تنتبه
وتاكد انك حاط فلوسك كامله لان اذا ناقص راح الشركة تخصم من معاش علطول
حط بالك ان هذي الوظيفه مؤقته يني اذا انت تدرس او تنطر وظيف افضل منها
وترى الشغال مو عيب .
والله يوفقكـ ،،
اي نسيت لا اقول لك ، اذا احد جاك وقال انه ناسي فلوسه على طول قول له عطني تلفونك
لان اذا جاد راح يعطي ويرجع لك اما اذا مو جاد رح يعتذر واذا ما عطاك التلفون وما جاى روح بيعه .
ودور المحطات الي ما عليها مشاكل

 

[ابو سالم1]

النصابين يقولك حتى تلفون ما معاى يكون خاشة التلفون بس اذا مامعاه اى شى نزل سبير السيارة وعطة مهلة يومين اذا ماجا بيع الى عطاك البطاقة لاتاخذها لان عادى يطنشوف مايجيك الا بنزلت المعاشات بس اذا خذيت منه شى ثمين لازم يجك ابعد عن محطة ام الهيمان بصراحة اكثر الى مرو لى مامعاهم فلووس بس مرات تحوشك مفاوضات يقولك اعطيك تلفون بو ليت وخلنى اعبي بـ 5 محطة ام الهيمان الله يعين الى يشتغل فيها

 

[fawazzz]

بس مرات تحوشك مفاوضات يقولك اعطيك تلفون بو ليت وخلنى اعبي بـ 5 محطة ام الهيمان الله يعين الى يشتغل فيها

ههههههههههههههههههه بصراحة هذا بو ليت شي موطبيعي
اقص ايدي اذا رجع لك مرة ثانية عشان تلفون ابو ليت

 

[Viridistori]

هل يوظفون طبيعي ولا لازم واسطة؟

 

[الشكوىى لله]

اي عـادي ...
وين محطة بانزين شويخ
الي خلف الـجبره ومقابل .. التطبيقي
هناك وهذا رقم المشروع...
24912715

الأوراق المطلوبه ..(صورة)
البطاقة المدنيه
الجنـسية
شهادة الميلاد
الجـواز
شهادة لمن يهمه الأمر من التأمينات الاجتماعية انك مو موظف
صورة أخر مؤهل
4 أصور شخصية

تقدم وتسجل رقمك عندهم ..
ويسجلون انت أي منطقهـ ...
وانطر منهم أتصال دورة ..
14 يوم نعم أسبوعين ...
الراتب 580 مع دعم العمالة
وعالفكرة يبون متوسطة وثانويه
واداوم 8 ساعات .. ......

بالتوفيق ياشباب

 

[ابو سالم1]

انا كنت موظف فيها
انص اخوانى ترا الوظيفة مملة حييل تذكر اذا بدليك الشفت الثانى ماجاك انت اطبق 8 ساعات اضافية اجبارى

نصيحتى يا شباب ترا الجمعيات التعاونية عندهم وظايف حق الغير موظفين يعنى شرط تكون كويتى وغير موظف تقدر تتوظف بالجمعية وتغريبا نفس الراتب بس اريح من كاشير تعب حيل هذى اسمها وظيفة مؤقتة