إزعاج الجيران بالأشغال في الليل

haddaq8

عضو نشط
التسجيل
17 أكتوبر 2009
المشاركات
158
السلام عليكم،،،

يالأخوان في أحد من الأعضاء الكرام عنده معلومه عن قانون البناء إذا يسمح بالبناء في منتصف الليل بين الفريج و يسبب بازعاج شديد للناس؟

أنا عند منطقتي بالعقيلة في مشروع قاعدين يبنون حوالي خمس فلل أمام البيت و الجيران ، بنص الليل حفر و كرف و ازعاج شديد يعني حتى الساعة 3 الصبح! بحجة إنه رمضان و ما يقدرون يشتغلون بالنهار ، هل هذا الشي قانوني؟؟؟؟ الفريج كله مو نايم و تدري بالليل يسري الصوت و كأنه درل محطوط على راسك ، كلمت صاحب المشروع و معاند! يعني بس أهم صايمين؟

يا شباب شنو أقدر أسوي بهالحالة؟ لاعت كبدي ، أمس رجعت من صلاة القيام و لا قدرت أنام بهالساعات القليلة قبل لا أقعد حق الفجر ، أروح المخفر؟ و هل راح يساعدوني؟
 

Kaubar

عضو نشط
التسجيل
24 أكتوبر 2009
المشاركات
258
شوف اخوي الديرة ديرة قانون ومؤسسات روح المخفر وقدم شكوى وأثبت حالة وأرفع قضية

للضرر وحط النفسية ومشاكل الدنيا وأطلب تعويض

اذا بالك طويل بالمحاكم

او تحمل الباقي من الشهر وحط قطن بأذونك
 

مستريح

عضو نشط
التسجيل
13 يناير 2010
المشاركات
207
اخوي الفاضل حق الجار على الجار حق عظيم اذا هو مزعجك كلم صاحب البناية واذا تقدر تتحمل تحملهم بارك الله فيك
 

الأبطح

عضو نشط
التسجيل
17 ديسمبر 2007
المشاركات
409
اخوي الله يعينك وان شاء الله انك مأجور على تحملك للازعاج
وصدقني ومن باب تجربة
اليوم انت متحملهم باجر اهم يتحملونك ما تدري شنو تصيرلك من ظروف

اول ما استلمت بيتي ازعجت جيراني بحكم عمل ترميمات
حتى بايام العطل وما شفت منهم الا كل خير
وبعد ما سكنت تعرضت لازعاج الله لا يوريك على قولتك تحس ان الدرل براسك تحملتهم لين الله سهل لهم وخلصوا ترميمات
كما تدين تدان
 

بيتك

عضو نشط
التسجيل
2 مايو 2009
المشاركات
811
السلام عليكم

اخوي المتعارف عليه في رمضان الكريم العمال يشتغلون بالليل تحمل هل الايام والله يعينك

بس اذا بعد رمضان ماخلص شغل الليل لك حق تروح تشتكي يفضل معاك 2 من جيرانك

ونفس اليوم يوقفونهم لك بس الافضل كلم اصحاب البنيان الاول

بالتوفيق
 

مهم للغاية

عضو نشط
التسجيل
12 يوليو 2008
المشاركات
594
الإقامة
الكويت
دام انك توك جاي من صلاة القيام ...يعني تدور الأجر الكبير عند الله ........ تبي زيادة في الأجر ؟؟ احتسب الصبر على أذى الجار عند الله ............الصبر على أذى الجار .......... له أجر عظيم ........
 

TRADING

عضو نشط
التسجيل
17 أكتوبر 2007
المشاركات
216
الإقامة
kuwait
الاخ الابطح بارك الله فيك علي النصح الطيب

يا اخي تحملهم وان كانوا اذوك - هذا بنيان يعني فيه صدعه لصاحب البناء نفسه والله يعينه وبنفس الوقت مثل ما تفضل اخونا الابطح بيجيك يوم وبتكسر الدنيا ولازم يتحملونك جيرانك
عندي واحد من الجماعه جاره هدم بيته من عرجه وحفر سرداب
اتعرف شصار بالطوف الملاصقة للجار - كلها تشلخت شروخ عميقة وكان قبل اقل من شهر مرمم الديوان ماله والاستقبال وحتي الشرخ سحب لي الديكور
شنو تهقي سوا ؟ سلامتك من يشوف جاره ساله اذا يحتاج شي او يبي خدمة ويقدمله القدوع فوقه
احمل اخاك وتحمل وهذي الجيرة الطيبة تبين في هالاوقات وانا اخوك وعساها بميزان حسناتك ويردونها لك
والله المستعان
 

haddaq8

عضو نشط
التسجيل
17 أكتوبر 2009
المشاركات
158
يالله نتحمل مو مشكلة علشان نصايحكم الطيبة

و على فكرة أهو مو جاري أهو تاجر يسوي بلوك كامل من القسايم و يبيعهم

يالله مو مشكلة نتحمله على كل حال ، يمكن تسرعت بسبب حلاة النومة :mad::p
 

ناصر فيصل

عضو نشط
التسجيل
15 نوفمبر 2005
المشاركات
434
الإقامة
الكويت
الازعاج

في لندن العمل محدد بساعات و العطل الرسميه يمنع العمل فيها لعدم ازعاج الجيران بالعطل ولكن اذا ضغطت عليهم و ضغطوا علىالعمال و اضطروا للعمل بالنهار و اضطروا للفطر من شدة الحر 0000هل تعتقد ان هذا من باب التعاون على البر و التقوى ام الصبر و الاجر و الله المستعان
 

ابو زبن

عضو نشط
التسجيل
23 فبراير 2010
المشاركات
19
الله لا يحرمكــــم اجر نصحكم وارشادكم . فعلاً الجار للجار لو الزمن بار
لـــكن يا هل تري راح تكون المشاعر والاحاسيس متبادله مستقبلاً اتمني ذلك . لو ان الزمن بالوقت هذا ما له صاحب,

تري كاضمين الغيظ لهم اجر عند رب العباد..
 

Q8ti

عضو نشط
التسجيل
13 يونيو 2004
المشاركات
459
إذا ممكن عنوان القسايم؟؟

آسفين على الإزعاج مقدما

والله يصبرك على إزعاج العمال والبنيان

بصراحة آنا قاعد أدور أرض أو بيت فإذا ممكن عنوان القسايم أو إذا كنت تعرف هل هي للبيع أو التاجر بايعهم وقاعد يشطب البنيان وراح يسلمهم للملاك
 

شمس العصر

موقوف
التسجيل
27 يوليو 2008
المشاركات
772
الإقامة
الكويت الحبيبة
يالله انك تجيبلى جار نفسك

جزاك الله خير
اخوي الله يعينك وان شاء الله انك مأجور على تحملك للازعاج
وصدقني ومن باب تجربة
اليوم انت متحملهم باجر اهم يتحملونك ما تدري شنو تصيرلك من ظروف

اول ما استلمت بيتي ازعجت جيراني بحكم عمل ترميمات
حتى بايام العطل وما شفت منهم الا كل خير
وبعد ما سكنت تعرضت لازعاج الله لا يوريك على قولتك تحس ان الدرل براسك تحملتهم لين الله سهل لهم وخلصوا ترميمات
كما تدين تدان
 
أعلى