مساعدة قانونية لمؤسسة جديدة

[q8rottweilers]

السلام عليكم
اخواني انا بفتح مؤسسة ايجار سيارات وواحد من الربع قالي حطلك محامي (مافهمت قصده للامانة) والثاني قالي لا مجرد انك تدفع مبلغ شهري للمحامي واذا في اي قضية تبلغهم واهمه يسوون كل شي بالمحكمة
ثاني شغلة بخصوص صياغة العقود هل احتاج فيها محامي؟ لان في ناس قالولي تحصلها عند الطباعين
واذا في اي شي ثاني تقدرون تضيفونه اكون شاكرلكم
تحياتي

 

[al3mlaaq]

اخوي في شركات تحصيل اموال تعامل مع وحدة منهم ودير بالك من هالشغلة ترة فيها ضلم للناس

 

[q8rottweilers]

اخوي شنو الي يقدرون يسوونه شركات التحصيل ومايقدر المحامي يسويه؟ وهل اتعابهم ارخص من المحامين؟ ومشكور

 

[rahaly]

اخي الكريم ..
انت مقبل على مشروع جديد وبالطبع فيه رأس مال ..
يعني لو نفترض بتحط 20 الف دينار (مثلا) ..
اذا رحت محامي نظم امورك كلها - استشارات وصياغة عقد الايجار وكافة المعلومات
واخذ منك مثلا 500 او 700 او حتى الف دينار ... حطهم من المصاريف ما تطلع شئ

اما اذا بدأت غلط ولا سمح الله تعرضت لخطأ قانوني قد يخسرك مبالغ طائلة ... راح تروح محامي وتدفع له اضعاف هذا المبلغ عشان يرجع لك خسارتك او ينقذك من الخسارة

نصيحتي اقعد مع محامي يفصل لك عقد حسب متطلباتك وابعد عن العقود الجاهزة

والله اعلم

 

[q8rottweilers]

اخوي رحالي اول شي مشكور عالاجابة
ثاني شي بخصوص ما بعد العقود شلون يكون تعاملي مع المحامي؟ كل ما يتاخر شخص عندي بالسداد او يصير شي بالسيارة لازم بهذلة بالمحاكم؟ ما يصير اخلي مندوب يكون مختص بهالامور ويكون اتفاق بيني وبين المحامي؟
وفي شغلة ثانية بخصوص الاستئجار لو نفرض شخص اجر السيارة مني واتلفها واحتاجت تصليح والتامين ما يغطي تكلفة هالتصليح هذا هل يحقلي ادفع(بشد الفاء) المستأجر بموجب كمبيالة ولا راح تعتبر خيانة امانة فقط وما يلزم بكامل المبلغ؟ ولو حولتها عالمحكمة والزموه بالدفع وماعنده شنو يكون الحل؟

 

[rahaly]

بالنسبة للمحامي ..
ممكن تتفق معاه على كل قضية على حده .. وانا افضل لك هذه الطريقة في البداية بدل العقد السنوي .. حتى تعرف حجم عملك وحاجاتك

بالنسبة للالتزام مستأجر السيارة .. طبيعي ان المستأجر يتحمل اي تلف وضرر ..
مالم يكن هناك تأمين يتفق عليه

وانا لا افضل خيانة الامانة .. لانها تاخذ وقت طويل والمحكمة الجنائية لا تعطيك فلوس .. يعني تروح محكمة مدنية على طول افضل

وعموما اقعدلك قعده وحده مع محامي .. ما راح يكلفك شئ نهائيا - لان المحامين في الكويت ما ياخذون اتعاب على الاسئلة اللي تهدف منها معرفة الاتفاق وترتيب عملك
راح تفهم شنو ممكن يسويلك وشنو ممكن يرتبلك اياه ... وانا متأكد ان الموضوع لن يكلفك الا شئ بسيط
واتفق معاه على اتعاب كل قضية في حال رفعها .. راح يسويلك شرائح
خيانة امانة
مطالبة بايجار متأخر
مطالبة باضرار
..... الخ

والله اعلم

 

[Lawyer25]

السلام عليكم ورحمة الله وبركاته ..

ما ازيد على الاستاذ ( رحالي ) بشي الا بنقطه جدا بسيطة واعتقد كفى ووفى

اخوي انت عندك اجارات سيارات وعسى الله يبعدك عنها قدر الامكان مشاكل معا الزباين وبلاوي .. المقصد او الي تختاره انت يكون افضل حسب معرفتي ..
اما انك تسوي عقد معا محامي توكلة بكل شؤون الشركة او المؤسسة القانونية .. او على كل موضوع تتفق وياه على مبلغ معين ..
بالنسبة حق الصيغة اخوي انت لازم توضح طبيعه عملك وشنو فيه العقد وشنو عليه انت بتروح تاخذ صيغة من طباع انزين وبعدين ... صارت مشكلة هم بتروح حق محامي ؟؟

وراك مطالبات و اجراءات بالمحاكم و و و ... الخ

فا نصيحتي لك اخوي انت ما بطلت مؤسستك ,, فا ما تعرف كم القضايا الي عندك او الشغل ..

اشور عليك انت تتفق ويا محامي يصيغ لك العقد وكافه اجراءاتك القانونية وتتفق معاه على القضايا الي اتييك على مبلغ معين لمدة شهرين ..
شوف وضعك فيها .. عقب تقدر تتفق وياه على عقد سنوي او لمدة معينة ياخذ يقوم عنك بكل اجراءاتك القانونية ..

واقرأ موضوع الاخ ( رحالي ) فوائد الاستعانه بمحام ان شاء الله وايد راح يفيدك وعسا الله يوفقنا ويوفقك بتجارتك ..

ان اصبت فمن توفيق الله تبارك وتعالى والسلام عليكم ورحمة الله وبركاته