أستثمار ١٠٠٠٠٠ دينار في سهم

[بو مازن]

انصحك بسهم ميكروسوفت أو اشتري سبائك ذهب

 

[ابو البراء]

السوق السعودي اطيب من السوق الكويت

 

[شرياص العديلية]

قريب منكم ..

بمشي معاك بالتدريج
وبصعد معاك بالمخاطرة
فقانون البيتا يقول :

كل مازادت المخاطرة بالإستثمار
زاد كل من ( الربح والخسارة )

فيا تلقح معاك بالربح .. أو العكس

خذ نفس عميق وتمقل :

١٠٠ ألف دينار = ١.٢٨٠.٠٠٠ درهم
خذ لك شقة بالبرشا من شركة إعمار

يعطونك مقدم ١٠٪ إيجار سنة
بعد ٦ سنين تدبل معاك كقيمة تراكميه

وبعد معرض إكسبو راح تعزمني
بسان جورج .

شركة إعمار للتطوير العقاري
على راسي .

هذا في حال اذا تبي تشتري راسك

سيناريو ٢

تاخذ ربع بالوفره وتحفر لك بير
وتزرع جت أو رودس أو بطاط

وتوقع عقد مع الموردين
تكد خير من الله .

سيناريو ٣ ( صراع الجبابره )

مليون سهم مركز سلطان ب٩٠ ألف دك
ال١٠ دك سافر فيها روح كالفورنيا
٣ شهور ، ، ،

يا ترمّض عندنا بالكويت وفلوسك
نفس ماهي ٩٠ ألف دينار .

يا مطلّق المره وزالق الشنب ومركب
عدسات شذريه وحسابك مليونين $

والعشر الأواخر بKINK سان فرانسيسكو


دمتم بود .

 

[قريب منكم]

الله يجزاكم خير على النصايحه والتفاعل والكل يدلو بدلوه

 

[بوشكاش]

مشاريع

 

[رابح رابح]

اذا بتاخذ مصيحة اخونا المحترم شرياص العديلية وتفتك من بورصة الكويت ابرك لك لانها صالة قمار مو بورصة ومافيها مصداقية.

واذا معزم بتستثمر في بورصة الكويت اخذ اسهم تشغيلية مثل :
1- القرين بتروكيماويات 200
2- المركز المالي 110
3- كامكو 100-110
4- السفن 122
5- الراي 100-110
6- المواشي 110-120
7- المتحد 620

الحذر اشتر عقار من الشركات الكبيرة الموثوقة وادرس عقودها عدل حاليا هناك عقود عقارية وهمية وبعضها حق انتفاع وليس وثائق تملك مثل ماصار بالبوسنا

صل استخارة وتذكر هالكلمتين عدل ..
شركات بورصة الكويت بورصة هشة ماشية على الابتزاز تاكل من صحتك

"حلال عند الناس تخليه ودعه"​

 

[شرياص العديلية]

الظاهر صاحبنا بيطلق المره وبيزلق الشنب

علق مركز سلطان +5

 

[قريب منكم]

طيب شرايكم اشتر ارض في مصر وابيع شقق على العظم

صحيح الربح 100/100 ولا تطلع سالفة حسينوه يوم يقوله المصري حنشتري الاهرامات وانجيبها للكويت


صج صج ياجماعه يقول الربح في العقار ١٠٠/١٠٠

اما الحلم الي ودي اسويه وماقدرت اهو محل سفريات لاني متابع للسوق وفيه خير لكن المطلوب ٢٠٠٠٠٠ عشان تدخل السوق بقوه

لان فيها تأمين ٧٠٠٠٠ للشركة أياتا و٢٠٠٠٠ للطيران المدني
هاذا مشروع الحلم بالنسبه لي لاني راعي سفر

 

[بوررصجي]

الظاهر صاحبنا بيطلق المره وبيزلق الشنب

علق مركز سلطان +5

المشكله يااخوي شرياص سهم مركز سلطان كميات التداول والمعروض قليله جدا صارلي فتره ابي اخذ فيه 500الف ماعطاني وشريت من المعروض 100الف بسعر90 و91و92و93 فقط

 

[بوررصجي]

الظاهر صاحبنا بيطلق المره وبيزلق الشنب

علق مركز سلطان +5

مجلس ادارة (م سلطان) يجتمع في 31-03-2015 لمناقشة بيانات 31-12-2014
يعلن سوق الكويت للاوراق المالية بان شركة مركز سلطان للمواد الغذائية (م سلطان) افادت بان مجلس ادارة الشركة سوف يجتمع يوم الثلاثاء الموافق 31-03-2015 في تمام الساعة 03:00 عصرا، لمناقشة البيانات المالية السنوية للشركة للسنة المنتهية فى 31-12-2014 .

 

[InDepth]

ايا كان السهم الذي تريد شراؤه، انتظر موجة صاعدة حقيقة، ولا تطارد قيعان....
اختر 3 سهم نظيفة ماليا...وليس واحدا....من 3 قطاعات مختلفة....و3 مجاميع مختلفة...

هناك فارق كبير بين الرغبة بالاستثمار، وبين الادمان بالمضاربة
المستثمر، يفضل دخوله باختراق مقاومات وتأكيد ترند صاعد حتى لو دخل متأخرا قليلا ...

بالتوفيق ان شاء الله