محلل ... خبير ... محفظة ... صندوق.... كلهم خسرانين !! أشكيلي لابكيلك !!

[rahaly]

حقيقة شر البلية ما يضحك !!!!

يعني ربعنا ... تلقاه محلل وفنان صج ... وكل يوم حاطله شارت ...

والا خبير ... شغل عدل .... يتداول في البورصة من قبل افتتاحها ...

والا تلاقيه مدير صندوق .... او مدير محفظة ....


النتيجة ؟؟؟

خسراااااان بالاسهم !!!!

تقول حق الواحد السهم الفلاني نازل علي 20% ... يقولك احسن مني .. انا نازل علي 30% !!!

انا مو من اللي ذكرتهم بس مثل متذوق الشعر ....
انا متذوق تحليل ... وصديق الخبراء ... وهاوي صناديق .. وشريك محافظ ..

والنتيجة ؟؟؟

خسراااااان ...

:d



السؤال .............

يا جماعة الغلط وين ؟؟؟

من التحليل ؟
والا من حسابات خبرة غلط ؟؟
والا السوق ماشي عالبركة ؟؟

وين الخلل؟؟

وشنو الحل؟؟



يعني الصراحة التحليلات والخبرة ولله الحمد والمنة .. ماشية معانا حلاوة في السوق الامريكي ...

لااااااا ... حتى امس شريت فقع ب 6 دنانير وبعدين لقيته ب 5 .... اضطريت اشتري مرة ثانية نفس الكمية عشان (( ابرد عليه ))

يعني التحليل ماشي معانا حتى بسوق الفقع ...
اما بالبورصة سلامتكم


:d

أما السوق الكويتي .... مو ماشي معاه شي منهم ....

فاين الخلل؟؟؟



تحياتي



رحالي

 

[boalons]

الخلل بادمان السوووووق

لما الواحد يشتري سهم ويقول ابي استثمر وكل يوم يجابل اوامر البيع والشرى .... ليش ؟؟ مو انت مستثمر تابع الاقفالات بس احسلك

ادمان السوق يخليك مضارب غصب طيب السوق صاعد والحبيب يطامر من سهم للثاني

اغلب المضاربين لما يشترون سهم ويبيعونه بعد مايرتفع شوي ايدهم تحكهم الا يشتري سهم ثاني بنفس اليوم , بدون لا يشوف هل توقيته صحيح ام لا

وفي نقطة اخيره ان اغلب المتداولين مايفعلون الستوب لووز

كل هالاسباب تخلينا ما نربح حتى لو صعد السوق الى 40 الف نقطه !

 

[بيل غيتس]

ربعنه يا رحالى حمنيه

للاسف طلعوا عندهم سحاحير مو صناديق

اليوم شوف عينك تصريف على سينفونيه بيتهوفن

يمسكلك المؤشر بالكيسبان والزجاج

انا من راى افضل البيع والانتظار

اذا شفت تداول بقيمه 150 مليون والمؤشر فوق 11 الف ادخل السوق

 

[mustafa2005]

الخلل
1- ان السوق فيه ناس وايد ماتدري شنو تشتري وليش ومتى
ونفس الشي عند البيع مايدرون متى يبيعون وعلى اي سعر يبيعون وليش يبيعون (يعني لايمشون على اي مبدا وبنفس الوقت يتداولون بطريقة عشوائية دون اي تفكير )

2- سياسة القطيع

3- الاشاعات والأشخاص المجندين لخدمة الأشاعات بالبورصة (مأجورين نفس المطبلين ) وياكثر الناس الى تسمعلهم وتمشي على هواهم

4- عدم الاسقرار من كل الجوانب ( يعطي للمستثمر احساس بالتخبط واللامبالاه والعشوائية باتخاذ القرار )

وجهة نظر خاصة

 

[ipi]

والله صدقت يا رحالى

مشاركتك تعكس الحالة السائدة فى السوق حاليا مو بس سوق الاسهم لا وسوق الفقع بعد
اقول شئ
لى صديق مقرب من المجموعة الدوليه حيل ما اقدر اوصف لك شنو علاقته بسامي البدر والمجموعة والله شوف عينى انه باع بالدينار و نطر يومين ودش على 1,060 وقال السهم ما عد راح ينزل للدينار ثانى ويمكن هالشئ الى مخلينى اقول ان المجموعة ما كانت تقصد تسوى شئ بالمساهمين وان الامور حدثت دون تخطيط لظروف السوق لان لو فى احد لازم يعرف ان شئ هيصير بالمجموعة ويطلع من السهم كان هذا لازم يعرف لكن الواحد ما يقدر يقول الا قدر الله وما شاء فعل وارادة الله فوق كل شئ لو رايد لك خسارة والله لو انت الركيبى راح تخسر ولو رايد لك المكسب راح تلاقى نصيبك بالطريق .

 

[خالد الفارس]

,والله انا عمرى ماربحت بسهم ومخطط لهشي انا اراقب اشوف الاسهم الي زايده عليها الكلام والاشاعات لما تتبتدى تصعد بدايتها ادش عليها علي طول وما تطول وياى حتا لو معلق السهم ما انطر ثاني يوم اقطه وانساه فتره واتجه لسهم ثاني وهكذا وبعض المرات ادش علي السهم علي البركه مدرى يكون ضايق خلقي اشوف اى سهم عليه تداول قوى ادش عليه واغلب المرات الله يرزقني من وراه عموما السوق الكويتي علي البركه لا تحليل ولا بطيخ دش بأول الموجه ولا تطمع بنص الموجه بيع هذه سياستي بالتداول وكلو ماشي وانصحكم بسندويش بيض بطمام كل ما اكله اول السو ق اربح

 

[jreea]

لااااااا ... حتى امس شريت فقع ب 6 دنانير وبعدين لقيته ب 5 .... اضطريت اشتري مرة ثانية نفس الكمية عشان (( ابرد عليه ))

يعني التحليل ماشي معانا حتى بسوق الفقع ...
اما بالبورصة سلامتكم

رحالي

ذبحتني من الضحك الله يغربل أبليسك

 

[SpeciaL 1]

لااااااا ... حتى امس شريت فقع ب 6 دنانير وبعدين لقيته ب 5 .... اضطريت اشتري مرة ثانية نفس الكمية عشان (( ابرد عليه ))

والله هسترت من الضحك
حتى عندي الربع
يبون يعرفون اشفيني
ولما قلت لهم
عليك إنك تتخيل اشصار
الله يفرحك كثر ما ضحكت الناس
وأهنيك على هالروح الطيبه
​

 

[white soul]

هلا برفيق الدرب بالعله العقاريه اكيد عرفتها

انا اقولك الغلط وين

الغلط بعقولنا احنا المتداولين

قسم منهم يتبع التحليل الفني ويثور ويغضب اذا قلنا في بعض الحالات التحليل يعتبر فيها لاغي يعني كل شغله شارتات ويوت وبلوت وما ينظر للعوامل المحيطه بالسوق سواء ايجابيه او سلبيه وما يعترف بشي اسمه توصيه..

والقسم الاخر يتبع التوصيات توصيه من زيد ومن عبيد وما يعترف لا بشورتات ولا بفنايل واذا قلتله السهم اعطى اشارة خروج رد عليك بطنازه وعنده عداوه مع المحللين ونظرياتهم

.....................................

الحين الذكي والي يبي يربح المفروض شيسوي

يمزج الاثنين التوصيه والتحليل الفني يعني اذا سمع توصيه عن سهم يدش على عند الدعم ويبيع عند المقاومه ويطلع عند اشارة الخروج بس منو فينا يتبع هالطريقه..؟

وفي اكثر من سبب اخر لخسائرنا

منها ادمان التداول يعني اذا بعت لازم اشتري حتى لو مو عارف شنو شتري ما تعرف تصفي المحفظه

وعدم تقبل فكرة البيع بخساره

..........................................................

وعلى طاري الفقع شوف هالتقرير من جلوبل

جلوبل:الفقع وفرصه لمستثمري الفترات المتوسطه لبناء المواقع من جديد

كنا قد ذكرنا في شهر يناير الماضي ان الفقع يتداول عند اعلى مستوياته 15 دينار للكيلو الزبيدي واوصينا متتبعي توصياتنا بالاحتفاظ بالفقع والتسييل في حال تداوله باقل من 12 دينار للكيلو والملاحظ ان سعر الفقع قد تراجع منذ ذلك التاريخ حتى وصل الى 5 دنانير على ذمة رحالي وننصح متتبعينا بناء المواقع من جديد عند هذا السعر مع ضرورة ايقاف الخسائر في حال تداوله باقل من هذا السعر.​

 

[rahaly]

هلا بالروح ... والله من زمان مو شايفلك مشاركة معاي



ياخوي من اشوف واحد من ربعي في سهم خسران استااااااانس ..
اتذكر ان في ناس خسرانه ...
يعني :
take it easy




الله يوفقك ياخوي

بس الفقع مشكلة ... يبيله متابعة ... وشارت

بس المشكلة انك لازم تتابع مؤشرات اكثر من سوق
( كويتي .. ليراني .. سعودي .. جزائري .............)
الشغلة اتعب شوى






رحالي

 

[بوحسن]

رحالي والله انا خسران ..يالله افرح اكثر

على الاقل اشوف شي ايجابي من خسارتي انها فرحتك

رحالي تقارير الفقع انت مع وايت سوول طيبه ليتكم اتابعونا اول باول



انصحك اتابع فرسان الميدان على سما دبي الساعه 8 اليوم النصويت النهائي

وتعلم هز الراس معاهم

 

[rahaly]

رحالي والله انا خسران ..يالله افرح اكثر

على الاقل اشوف شي ايجابي من خسارتي انها فرحتك

رحالي تقارير الفقع انت مع وايت سوول طيبه ليتكم اتابعونا اول باول



انصحك اتابع فرسان الميدان على سما دبي الساعه 8 اليوم النصويت النهائي

وتعلم هز الراس معاهم

هلا بو حسن ....
اما هز الراس ... ياخوي واحنا شقاعدين نسوي كل يوم ؟؟؟

مو قاعد تتابع المؤشر؟؟
وعيونك تتلاقط يمين يسار ؟؟

قاعدين نهز الروس بدون لا ندري


:d