أخوي/ khqreen
مساك الله بالخير
عجبني انتقادك للأوضاع بالطرح الساخر اللي تعودنا عليه كـ كويتيين..
والا شنو يهون علينا مشاكلنا غير "هالطنازه"..
بس في شي ما فهمته..
هل فعلاً قصدك نسكت لين نوصل لحال أهل أفريقيا ؟؟
ياخي سكتنا عن الأوضاع الصحيه واحنا اللي نبني المستشفيات للخليج والدول الثانيه وشوفة عينك وين وصلنا..
سكتنا عن الكهربا والماي وشوفة عينك وين وصلنا..
سكتنا عن الرياضه وإنت ادرى بالحال..
ياخي سكتنا لين وصلنا آخر اللسته بكل شي..
الناس تصعد واحنا نتسابق بالنزول..
في بريطانيا وتحديداً في لندن لما زادوا سعر البيض عليهم في فتره من الفترات الناس وقفت وقفه وحده..
قالوا ما نبي بيض لين خاس على الرفوف واجبروا التجار يردونه لأسعاره الأوليه..
احنا اهني ما عندنا مثل هالوقفه..
صج إني مدمن قهوه لكن مو آنا اللي أشتريها ولو ما نبهني عليها شريكي والا ما كنت أدري عنها ولا أشتريها..
وتعال شوف ربعنا ووقفتهم..
قررت أقاطع الـ KDD وقمت أشتري المراعي وغيره من الشركات..
الربع ما يقصرون بالضغاط
والمشكله إنه بعد يومين يدق يقول عندك سلف !!
شقول وشخلي يابن الحلال..
أخوك/ ويلاه
فعلا اخوى انا لما قلت خلك ساكت ,, ترى قلتها عن تجربه
خلنى اقولك ,, تذكر لما مجلس الوزراء ( الله يطول عمارهم ) المنه قصدى زيادة الـ120 دينار الاخيره ,, كل الكويتيين تكلموا فيها ,, وطبعا علشان اثبت انى كويتى لازم اتكلم ,, فكانت لى مشاركه فى احد المنتديات او بالاحرى اقتراح ,, ملخص الاقتراح ,, بعد ما ذكرت الشباب ان الحكومه عاهدت المواطنين على تصليح امور كثيره ومنها ضبط الاسعار ,, والحكومه نزلت الـ120 دينار بتوقيت فى غير صالح المواطن ,, يعنى على الاقل تضبط الاسعار او حتى تتفق مع التاجر على مبلغ معين للسلعه وبناء عليه تتم زيادة المواطن ,, اما ما يسمى زياده عشوائيه فهى مرفوضه لان الزياده ماهى للمواطن ولا راح يتمتع فيها ,, هى للتاجر من الحكومه عن طريق المواطن ,, وطبعا المشاركه كان فيها كلام كثير ,,,, المهم بلشت الردود
سجل عندك ,,, ( شر البلية ما يضحك )
1- طلعت عميل لدوله مجاوره لغتها الام فارسيه ( ويعلم الله حتى عرج من بعيد ما عندى من هالدوله )
2- طلعت احد الذين يرفسون النعمه ( خلنا نشوف النعمه اول وبعدين نرفسها )
3- متواطئ مع الناس اللى أبنوا مغنيه ( شكو ما ادرى )
4- اذا مستغنى عنها ودها بيت الزكاة ( الاخ عنده خبر ان فى كويتيين ماسكين طابور يدورون صدقات )
5- الكويتيين اكثر شعب يتحلطم ( بسكم تحلطم ) الرد بهالصيغه
6- قول الحمدلله احنا وااايد احسن من افريقيا ( طالع المقارنه التافهه )
7- ردود وايد بس اكثرها على هالموال
اخوى ويلاه - الحكومه تعرف الشعب عدل - ما عندهم الا بربره على الفاضى -
انت تدرى واحد من التجار لما قاطعوه الجمعيات شسوى - اخذ عندك
دز له مصرى مع كاميرا ديجيتال - وعلى مدى عشرة ايام قاعد يصور الكويتيين اللى يشترون من محازن الشركه - طبعا الصوره فيها التاريخ والوقت
الحبيب اخذ الصور - ولا رده الا مسئول حكومى عووووووود -
التاجر وصل فكره عن اتحاد الجمعيات للمسئول انهم شوية صبيان بيردوون الديره نفس ايام الغزو - والدليل شوف طال عمرك هاااذى صور الكويتيين ما سكين دور على المخازن عندى -
باختصار - الجمعيات قاطعوا هالتجار علشان سالفة زيادة الاسعار - وهم ماكوا فايده رحنااا لهم نطقطق عليهم بيبان مخازنهم ,,, تكفون بيعوا لنا بالسعر اللى انتوا تبون ,, وهم تبى موقف ( من صجك انت يا اخوى )
==========================================
انت قلت سالفة البيض فى لندن - لا انا باقولك سالفة جريدة الانباء -
جريدة الانباء كانت هى الجريده اللى لا يعلى عليها بالكويت - اكثر اهل الكويت مشتركين فيها - قررت ادارة الجريده ترفع سعرها من 100 فلس الى 150 فلس لغير المشتركين - واظن 35 دينار بدال 30 دينار على المشتركين ,,, لما صار موقف وقاطعوها لا فى تجديد اشتراكات ولا احد يشتريها - طاحت بجبودهم ,, وفنشوا نص موظفينهم - والى يومك هذا والجريده ماحد يطالع صوبهاااا - اعتقد ان اشتراكهم الحين بـ10 دنانير ومو محصلين احد يشترك - هاااذى المواقف
اما شركة كى دى دى يعلم الله ان ديوانيه كامله تعاهدنا انه هالمنتج ما يدش بيوتنا الا فى الضروره القصوى ,, ولله الحمد ليما الحين ما مرينااا بضروره قصوى وشغالين على المراعى واكتيفيا والله يعز المنتجات السعوديه اللى اجود وارخص واحسن من ربعناااا ,,, ( وانصحكم بانواع العصائر خاصه البرتقال ,, تذوقه مررره تطلبه كل مره )
==========================================
ترى احنا شغل عدل بالضغاط ,, ما عليك خلك على شغلك وكمل مقاطعتك لهم ,, خلك من الكلام الفاضى اللى يقولك جعص علشان 20 فلس ,, واللى يقولك ما تسوى ,, واللى يقول لك اذا ما شريت اخاف بيسكرون مخازنهم ,,, ما عليك منهم ترى اللى مقاطعين ناس وايد واهم حاسين ,, واحصائياتهم اثبتت ان مبيعاتهم نقصت ,, والـ 20 فلس تعتق رقبتك من جهنم ,, يستاهلها من هو بحاجتها واللى من وراه الاجر عند الله ,,
وسلامتك