منو يذكر شنو سوى نفس هاليوم قبل 18 سنه؟ (قبل الغزو بيوم)

[سايق الخير74]

اختبار للذاكره منو فيكم يذكر شنو الأشياء اللي سواها قبل الغزو العراقي الغاشم بيوم؟ انا الصبح كان عندي امتحان رياضيات كورس صيفي بالثانويه وبالليل كنت مزهب الجنطه بروح منتزه الخيران عقب ما أقدم آخر امتحان يوم الخميس الصبح بس مانبي نتطرق للموضوع سياسيا احتراما لقوانين المنتدى بس ودنا نختبر ذاكرة الاعضاء.

 

[للعقل كلمة]

موضوع جميل ولكنى لا أظن أن أحد نسى هالليلة

عن نفسى نفس حالتك بس بدال الرياضيات إنجليزى

 

[قلم حر]

كنت استعد للسفر الى البصره ومترددين بسبب التهديدات
وبعدين اهل البصره زارونا بالكويت

 

[yoyo1983]

كنت صغيره وما اتذكر الا اني كنت خايفه

 

[al7bebe]

كنت راد من الدوام بالليل الساعه 10 ومرهق ونمت على الفراش وماصحيت الا على صوت المدافع والقنابل .
كان يوم اسود ولاكنت مصدق وشفت الجنود الهكره الشرذمه النجسه في وقت الفجر يتمشون في الشارع وعند المنازل جالسين مثل الكلاب المسعورة.

 

[zoya_y]

والله ماذكر شي إلا انه المفروض حفلة تخرجي من الروضه وماصارت الحفله وبس

 

[قلم حر]

والله ماذكر شي إلا انه المفروض حفلة تخرجي من الروضه وماصارت الحفله وبس

نفس الكذبه كنت بكتبها بس قلت يصيدوني مافي دوامات شهر 8

 

[بوعبدالله]

مانسى ذاك اليوم
كنا رادين من عرس وبعدها نمت وأتفاجأ بولد خالتي مقعدني يقولي صار غزو ..

جنه حلم

 

[دحيم 06]

كنت مع صديق لي عزيز سهرانين بدوانيته وضحكنا كان عالي حيل ...
الساعة 12 نص الليل قامت امه الله يرحمها وقالتله ليش تضحكون هالضحك هذا !!! الله يستر من ضحككم!!!
ثاني يوم رفيجي ماسكينه اسير كان بجمارك العبدلي....
وبالنسبة لي اذكر اليوم هذاك لحظة بلحظة ...لاني تشهدت فيه اكثر من مرة....

 

[zoya_y]

ليش طفت الكهربا ؟؟ !!
لا عاد مصخووها تـرشيد

 

[zoya_y]

نفس الكذبه كنت بكتبها بس قلت يصيدوني مافي دوامات شهر 8

ابوي انا ماقلت حفلة تخرجي بالروضه من وزارة التربيه .. وشنو جذبه !!! بصراحه مالي خلق اخرب عالريال صفحته وارد ​

 

[نوط بو 1000]

هالحزه كنت أقز بالسالميه مع ولد عمتي حالنا حال الشباب بذاك الوقت و رجعت معاه بيتهم و نمت عنده..

و صحيت يوم الغزو على صراخ عيال عمتي إللي عمري ما سمعت لهم حس لكن لما عرفت السبب بطل العجب..

الله لا يعودها من أيام و يحفظ كويتنا إللي بدونها ما نسوا شي والله.

 

[قلم حر]

ابوي انا ماقلت حفلة تخرجي بالروضه من وزارة التربيه .. وشنو جذبه !!! بصراحه مالي خلق اخرب عالريال صفحته وارد ​

انا كنت بكذب مو انتي اللي تكذبين وعلى فكره اول مره احس انج معصبه

 

[(فزاع)]

راح اكتب اللي صارلي بليلة الغزو .. وكيف تم اسري بسبة تاير ..!
واشلون كنت ابيع الاغراض في خيطان .. والجليب .. بفلوس كويتيه وعراقيه ..
ولحظة دخولي في مخفر صليبيخات ..
وصفوان .. وسجن ابو غريب ..
ولحظة التحرير .. بالجزيره الخضره .. مع الطيارات اللي تطلع الوان بالسما ..!

تسجيل دخول .. ولي عوده ..

مع الشكر الجزيل ،،

 

[MOHAMMED11]

احنا كنّا سهرانين قدّام بيت واحد من الشباب
والساعه 4 تقريبا صرنا نسمع شي يشبه الانفجارات
على بالنا عمّال التنظيف يشيلون عزكم الله الزباله

نمت والساعه 9 قعدت من النوم على اتصال
اخوي يقولي انا بالمستشفى مصاب
خل فلان يجي يطلعني من المستشفى قبل
لايجون العراقين وياخذوني اسير ،،
وانا بسابع نومه مو عارف شالسالفه
قلت له اي عراقين شالسالفه
قال انتو نايمين ماتدرون عن شي ، العراقيين ادخلو علينا
وتصادمنا معاهم وانا الحين مصاب وكل جسمي شظايا
لاكن خل فلان يجي الحين وياخذني بسرعه
وقعد ساعه يوصيني ،، عقبها طارت النومه
وصحّيت اهلي من النوم وقلت لهم السالفه
وقعدت اخوي وقلت له روح المستشفى اخوي فلان مصاب
وموجود هناك ويبيك اطّلعه باسرع وقت
قعد اخوي وراح للمستشفى ،،
وامّي وزوجة اخوي اقلبوها مناحه بالبيت

عاد اخوي وصل المستشفى وهناك لقى مع اخوي
زميله مصاب بعد واخذهم اثنينهم بعد ماغيروا ملابسهم
ووصل رفيجه لبيتهم . وبالليل كان موجود عندنا


وسلامتكم



//////////////

 

[جورج المطيري]

انا والد بعد الغزو

اذكر كنا مخططين نروح احواض السباحه بس مامدانا دخل علينا ولد سجوده

 

[acton]

صادوج يازويا افأ ماني خابر بشهر 8 دراسه
كنا رادين من السفر بتاريخ 1/8 مع العلم ان ردتنا بشهر 9 بس الوالد الله يرحمه كان يتابع الاخبار وحجز على اقرب طياره

 

[MOHAMMED11]

راح اكتب اللي صارلي بليلة الغزو .. وكيف تم اسري بسبة تاير ..!
واشلون كنت ابيع الاغراض في خيطان .. والجليب .. بفلوس كويتيه وعراقيه ..
ولحظة دخولي في مخفر صليبيخات ..
وصفوان .. وسجن ابو غريب ..
ولحظة التحرير .. بالجزيره الخضره .. مع الطيارات اللي تطلع الوان بالسما ..!

تسجيل دخول .. ولي عوده ..

مع الشكر الجزيل ،،

على طاري البيع اخوي فزّاع

اذكر انا وواحد من الربع كل واحد اخذ اغراض من بيتهم
على شان بيعهم بالسوق وكان مكانه بالجليب
على مااذكر
المهم انا اخذت غساله وتلفزيون
بعت التلفزون على واحد
والغساله شراها منّي عسكري من الحرس الجمهوري
المهم عدّيت الفلوس ولاّ ناقصين 10 دنانير عراقي
قلت له تعال الفلوس ناقصين عشره
قال ده مشّيها ماراح تغنيك العشره
قلت على الحرام ماامشيها هات العشره
قالي لااااااااااااااك تبي تسويها عركه عشان عشره
قلت له انا اتفقت وياك ماعندك فلوس خلها
المهم حاول فيني انزل له العشره وانا من خبالي
امسكت معاي ياانا يالعشره . المهم الرجال طلع فيه خير
وعطاني العشره
يوم راح ويلتفت علي رفيجي . قالي انت مجنون ؟؟
قلت له ليه . قال ماسك مع الرجال عشان عشره
لو ماخذها منّك من غير فلوس ولا ساحبك ويّاه منو يفكك منّه،
عاد انتبهت حق نفسي انا هنيه . قلت له تصدق انّي
مو صاحي . ونسيت نفسي ^_^
الحمد الله انّه طلع فيه خير ولا على قولك ياخذ الغساله بلاش
شقدر اسوي له يعني

 

[مديرو]

آنه كنت نايم (مبجّر) عقب صلاة العشا لأني كنت راد من النادي هلكان .. وزهّبت جنطتي و حطّيت المايوه والحركات مالت الشاليه .. و دخلت بسبات عميق (طبعاً كانت آخر نومه كامله قبل الغزو) ..

ويوم قعدت من النوم (لابس شورتي وحالتي حاله .. نزلت من الدري .. ولاااا الوالده منصفق ويهها .. !! والوالد أول مرّه أشوفه بهالحاله .. ماسك التلفون ويطل من الدريشه بطريقه غريبه ومخيفه .. !!!

ايييي قولولي شالسالفه عااااااااااد .. ::verymad:: ؟؟!!!!

طبعاً ضاق خلقي بالبدايه (لأني كنت ناطر روحة الشاليه ) .. وما كنت مستوعب سالفة الغزو مووولييييه ..


... هذي كانت البدايه ..


وآخرتها .. توزيع خبز وفلوس .. و لا على ظهر وانيت الفير .. انلم بهالزباله (كرمتوا) ..!!!

وان كشخنا حطينا بسلّة القاري (كاكاو عراقي اللي لونه بنفسجي و شوية حب) وقمنا نبيع عاليهال بغااااالي .. !!

لاااا .. ولاااا سالفة حرق بيوتنا لأنا عاندنا العراقيين وقمنا نكتب بصبغ الرش على طوفة نادي خيطاااان .. (الكويت حرررررره) .. !!! ​

 

[ياسر الروقي]

كنا سهرانيين عند واحد من الربع شباب اعمارنا من 15 الى 16 سنه وجايبين واحد يدق عوود ههههههه الله يذيك الايام منخشين عن الشياب
العود خاشينه ملحفينه بطانيه على شان محد يشوفه والاخ قاعد يغني اغاني عراقيه حزينه بعد ..... المهم نما والصبح ولا كل واحد عند بيتهم راجمة صواريخ