أستشارات مجانية ... بناء ترميم ديكورات داخلية وخارجية

[almellyarder]

حياك الله

السلام عليكم

غرفتين 4×4 لكل غرفة
حمامين 2×1.5 لكل حمام
صالة 5×4
مطبخ 3×3
غرفة + حمام للعاملة 5×3

بحدود ستة الاف دينار تقريبا

 

[bofaisal38]

الجرانيت والسيراميك .

السلام عليكم ورحمة الله وبركاته

اخي العزيز ابي نصيحتك بخصوص ارضيات غرف النوم ايهما الأفضل الجرانيت او السيراميك وشنو القياسات المناسبة للغرف اللي تتراوح مساحاتها بين 5*5 و5*7 .

وشكرا .

 

[almellyarder]

حياك الله

السلام عليكم

حاليا الجرانيت الناخب الاول الصيني هو الدارج بين الناس بس السراميك ممكن تشكل فيه بالتركيب وفي عدة اشكال والانواع والقياسات تكون ما بين 40×40 الى 50×50 بس لا تحاول تصغر أو تكبر .

(رَبَّنَا آمَنَّا فَاغْفِرْ لَنَا وَارْحَمْنَا وَأَنتَ خَيْرُ الرَّاحِمِينَ) [المؤمنون/109]

 

[taleb500]

مرحبا
عندي سؤال اخوي الملياردير .... بس ودي أعرف جم تكلفة بناء مساحة 425 دورين يعني تقريبا 850 وديوانيه مساحتها 13*5 اذا بغيت التسليم عالمفتاج جم تقريبا يكلف ؟
وسؤال ثاني أي منهم أفضل الشركة ولا المقاول وهل فعلا الشركات اغلى بالسعر من المقاول ؟
وشكره

 

[خالد خالد]

السلام عليكم خالد خالد
كل عام وانت بخير عساك من العايدين والفايزين ويغفرلك الله ذنوبك ويزيد حسناتك أمين .

اخذت القياسات وبأذن الله راح ارد عليك بعد العيد .


(رَبَّنَا آتِنَا فِي الدُّنْيَا حَسَنَةً وَفِي الآخِرَةِ حَسَنَةً وَقِنَا عَذَابَ النَّارِ) [البقرة/201]

السلام عليكم شخبارك طال عمرك شنو صار على الحسبة ياليت نعرف جم تقريبا وادرى انى تعبتك ولك جزيل الشكر

 

[almellyarder]

حياك الله

سلام عليكم

حياك الله خالد خالد
الحسبة اطلعت عندي مابين 14000 الف د.ك الى 15750 الف د.ك ويمكن اقل .
توكل على الله يا خالد خالد .


(رَبَّنَا ظَلَمْنَا أَنفُسَنَا وَإِن لَّمْ تَغْفِرْ لَنَا وَتَرْحَمْنَا لَنَكُونَنَّ مِنَ الْخَاسِرِينَ) [الأعراف/23]

 

[bofaisal38]

السلام عليكم .

عندي الديوانية لاصقة بالمطبخ وانا حطيت الطوفة بينهم دبل صف طابوق اسود اسمنتي وصف طابوق هيبل علشان مايكون فيه صوت بس المشكلة اللي ما انتبهت لها الا تالي ان دكت تكييف الديوانية اول شي يدش المطبخ وبعدين يطلع للديوانية علما بان المطبخ له مكينة تكييف بروحه منفصلة عن البيت .
والحين باجي جزء من الفتحة بعد تمديد الدكت اللي داش بالمطبخ وطالع للديوانية .
وسؤالي أخي العزيز هل يوجد مواد خاصة ممكن اضافتها للمونة لتسكير الفتحة علشان اضمن عدم وصول اي روائح والا بس تسكير الفتحة بالطريقة العادية بالطابوق والاسمنت .
وشكرا .

 

[almellyarder]

حياك الله

السلام عليكم


ماله داعي مواد خصوصية بس سكر بالاسمنت محيط الدكت وسكر بعض الفتحات بين الجسر والطابوق نظام ( تلبيش ) لان الريحة الطبخ بخار حار تصعد فوق لانها اخف فتدش بين فتحات اللمبات أو دفيوزر أو راجع بالمطبخ علشان جذي تشم ريحة الطبخ وإذ تبي تحط سليكون مكثف أو فوم حوالين الفتحة الدكت علشان اهتزاز المكينة لا تفتح معاك وبعدين تمسح .

الله يوفقك .

 

[taleb500]

مرحبا
عندي سؤال اخوي الملياردير .... بس ودي أعرف جم تكلفة بناء مساحة 425 دورين يعني تقريبا 850 وديوانيه مساحتها 13*5 اذا بغيت التسليم عالمفتاج جم تقريبا يكلف ؟
وسؤال ثاني أي منهم أفضل الشركة ولا المقاول وهل فعلا الشركات اغلى بالسعر من المقاول ؟
وشكرا

 

[almellyarder]

حياك الله

السلام عليكم

بناء دورين 850 + 65 = 75000 الف د.ك تقريبا إذ مو اقل .

جميع المقاولين عندهم شركة تابعة لهم .

بس نصيحة لابد ان تكون شركة وتوقع مع الكويتي صاحب الشركة مع احترامي للوافدين علشان تضمن حقوقك إذ لا قدرالله وصلت المشكلة للمحاكم الكويتي وين بروح أم الوافد فممكن يروح ديرته .
وممكن توقع مع الكويتي وتشتغل مع المقاول بس شوف سابقة اعماله ولا تورط مع واحد أعليمي .

الله يحفظكم من ضعفاء النفوس

 

[ابو نصور]

وفقك الله لما تقوم به من خير وجعله الله فى ميزان حسناتك

استاذى العزيز / كثر الكلام عن الصين وبضائعها
مارأيك بالارضيات والابواب والدرابزين والثريات وغيرها الكثير وهناك من يقول يوجد انواع كثيره من الاحجار للتكسيه الخارجيه باشكال روعه
لا نستغنى عن رأيك الطيب

 

[almellyarder]

حياك الله

السلام عليكم

والله يا بنصور كلامك صحيح 100% كل اغراضنا من الصين بصراحة إذ تقدر تييب اغراضك من الصين انت الرابح بس بعد ما تخلص الهيكل الاسود وتستدعي الكيال يحسب لك البيت بالكامل ويعطيك القياسات الصحيحة للارضيات والحوائط والتكسية الخارجية حتى الابواب بمبلغ 35 د.ك .

الله يوفقك يا ابو نصور

 

[طارق55]

الاخ almellyarder

جزاك الله خير علي مشاركاتك القيمه بصراحه ..
تقول انت في شرحك ( الالمنيوم دبل ابشن 2 ملي فعلي) سؤالي هو هل يوجد 2 ملي ؟؟ لانه يقولون ماكو في الكويت الا 1.80 بس .. ويسمونه 2 ملي ؟؟ واذا اكو شنو اسم الشركه الي تركبه ورقم تلفونها .. وبكم المتر ؟؟

وشاكر لك جهودك

 

[almellyarder]

حياك الله

السلام عليكم

إي نعم في 2 ملي خصوصي وفي شركة الواوان بالشويخ عندهم 3 ملي
بس يتسخدمون الارقام الكبيرة لعمل ( ارجات ) للشبابيك مثلا علشان يعطيك قوة الاقواس 2 ملي فلابد ان يستخدم 2.5 ملي على العموم انا شخصيا اتعامل مع باكستاني شغله نظيف ويشتغل بالمجمعات التجارية والفلل صارلي معاه فترة ابعث لك رقمه على خاص وتطلب منه كفالة ضد الهوا وخرير الماء وشوف منه عينات قبل توقيع العقد .

الله يوفقك

 

[DODA]

السلام عليكم

غرفتين 4×4 لكل غرفة
حمامين 2×1.5 لكل حمام
صالة 5×4
مطبخ 3×3
غرفة + حمام للعاملة 5×3

بحدود ستة الاف دينار تقريبا

هلا اخووي ..

هالسعر يشمل التشطيب ولا بس عالاسود ..

وعندكم نظام اقساط ؟ ​

 

[almellyarder]

حياك الله

السلام عليكم

هذا السعر تشطيب على المفتاح .

لا والله مافي مجال للاقصاد .

 

[كول]

السلام عليكم

لو سمحت

اذا ابي ابني 600 متر في صباح الاحمد بنيان كامل ثلاث ادوار

نظام هوردي للادوار كلها

الثالث يكون فيه ثلاث شقق كبار

كم سعر بنيان الاسود ؟

وكم سعر بنيان على المفتاح تشطيب ديلوكس كل شي اصلي ؟

 

[almellyarder]

حياك الله

السلام عليكم

اولا نظام الهوردي مكلف وماله داعي وانت منت محتاجه لانك راح تبني غرف وممكن تحط كم عامود مخفي داخل الطوف وينتهي الامر ينحط الهوردي
مثلا ( بالصالات الكبيرة المفتوحة - صالات الافراح - المساجد - قاعة تشريفات )..... الخ .

على العموم التكلفة دبل بالهيكل الاسود مابين 45000 الف د.ك الى 50000 الف د.ك طبعا هذا حسب مكتب الاشراف واشلون تسليحة خفيف أو ثقيل .

على المفتاح:
تشطيب الاصلي يعني شنو ؟
هل تقصد كل شئ غالي وماركة ؟

على العموم تبدأ التشطيب الفيلا وانت مأخذ مسطحاتك بالكامل يعني من 125000 الف د.ك وانت صاعد ( تشطيب اصلي ) .

على العموم الله يبارك لك بالبيت .
بس نصيحة حاول ان تلاشى فكرة الهوردي تكلفة على الفاضي وحتى لو انت مقتدر , وإذ مقصدك ما تحب ان تبني الاسقف على الحوائط تقدر تستخدم ( الشدة المصرية ) معلق أفضل مع كم عامود مخفي .

(رَبِّ اشْرَحْ لِي صَدْرِي وَيَسِّرْ لِي أَمْرِي وَاحْلُلْ عُقْدَةً مِّن لِّسَانِي يَفْقَهُوا قَوْلِي) [طه/25-28]

 

[bofaisal38]

الطرطشة والعزل

السلام عليكم ورحمة الله وبركاته ...
عندي استفسار متى يتم طرطشة دورات المياه والمطابخ هل تتم قبل او بعد العزل لان مقاول الصحي يقول الأفضل بعد العزل... وشركة العزل تقول الأفضل قبل العزل... ويهمني اسمع رايك بهالموضوع .
وشكرا ...

 

[almellyarder]

حياك الله

السلام عليكم

كل واحد خايف على شغله بس المفروض بعد العزل علشان تكون الطوفة ناعمة للعزل , علشان لا تكون في مسمات مفتوحة بالطوفة , لان العزل بعد الطرطشة يترك فتحات لان البحص تقريبا يترك 1 ال 1.5 ملي بعد عن الطوفة
وقول حق المساح على شنو مستعجل لا بد ان تكون 3 ايام ترش ماء على المساح والطرطشة في جميع الاحوال واعطاء مجال كافي لان الجو بارد .
وقبل هذا وذاك افحص الحمام بعد العازل بالماء لاتأكد من عدم الخرير لمدة يومين

(رَبِّ إِنِّي أَعُوذُ بِكَ أَنْ أَسْأَلَكَ مَا لَيْسَ لِي بِهِ عِلْمٌ وَإِلاَّ تَغْفِرْ لِي وَتَرْحَمْنِي أَكُن مِّنَ الْخَاسِرِينَ) [هود-47]