وين افضل مكان لفحص سيارة مستعملة؟

[المهندسـة]

السلام عليكم
بشتري سيارة مستعملة bmw وابي اعرف شنو افضل مكان لفحصها وين اوديها للفحص؟

 

[ناصر فيصل]

فحص

شارع الكنندراي بعد محطة غسيل القطامي او لفه على اليمين محل على الزاوية يمين مكتوب علبه متخصص فحص ماكينه و بدي 15 دك والله الموفق .

 

[السوق توافيق]

افضل مكان في الكويت الرمال الذهبيه في الري مقابل الرئاسة العامة للحرس الوطني

 

[Grofaz80]

ياخوي لاتفحص عند غير الرمال الذهبية ! بالتوفيق

 

[حيدروف]

الرمال الذهبية له سمعة طيبة بالكويت.

 

[Rap Soul]

بسم الله الرحمن الرحيم

السلام عليكم ورحمة الله وبركاته

جزانا الله واياكم الخير والعافية وجميع امة المسلمين اللهم آمين

واسأل اللهم التوفيق لي ولكم ولجميع امة المسلمين اللهم آمين

في أمان الله

 

[القراشي]

مع احترامي لجميع ارائكم
انا فحصت عندهم سيارتي وقالولي مافيها صبغ وبعد 7 شهور لقيت الباب فتح لونه ولما رحت عند صباغ قالي الباب مصبوغ رغم ان الرمال الذهبيه قالولي مافيها صبغ حتى تجميلي
وغير الكلام اللي سمعته عنهم .

 

[بـوشوق]

الرمال الذهبيه فحص ميه ميه اضم صوتي مع الاخوان

 

[aldosri]

الرمال الذهبية

 

[tazz]

الرمال الذهبيه

 

[بوجويس88]

الرمال الذهبية انا شخصيا ما امشي بكلامه

روح اشتر سيارة من الوكالة و اول ما تستلمها ودها لهم يطلعون فيها علة


عشان يبرون نفسهم من الكفالة

و جم مرة صارت فيني

 

[مصعب التميمي]

اختي احسن فحص الوكاله

وانا اخالف الاخوان أن احسن فحص الرمال الذهبيه

 

[ahmadm]

الرمال الذهبيه رقم 1 بالكويت

 

[اسكاليد]

الرمال احسن فحص خصوصا الصبغ والنجم الثلاثي فحصه دايخ

 

[mmf]

السلام عليكم ورحمة الله وبركاته

مداخله بسيطه

فيه فرق بين اللي بيستعمل واللي يبي يتشيرط؟؟

اللي بيستعمل يروح لنجم الثلاثي اللي بحولي الي على الزاويه لأنه صج لا يزيد ولاينقص عند الفلبينين يقلبون لك عفش السياره حتى البلاستك اللي من تحت مال الصدر يبطلونه ويحكون الشاص حك ..

اما الرمال الذهبي هذي معروفه حق الشريطيه تكسر فيك وتكرهك بسيارتك على قولت اللي سبقني لو من الوكاله لا زم يطلعون شي علشان الكفاله
واول دليل افحص سياره بدون لوحات راح تشتريها ومن ثاني يوم دخلها
بلوحات وشوف الفرق

حتى شوف فحصهم ترى ماينزلون صدرية السياره يعني لهم بظاهر بس
واي طقه بدعاميه قالولك فيه اثر ضربه بشاصي ؟؟؟ طيب ليش

انا مره انضربت سيارتي بدعاميه من مظلة البيت حتى ماتعورة بس صبغت الدعاميه بالفحص كاتبين ضربه بشاصي من الخلف قلت لهم متعور قالو لا بس فيه اثر ضربه ولما فحصتها بكراج ريما قالو سليم طبعآ بعد مافضخو قلبي قالو لي شاصي رحت الريما وثلاث ساعات بس فحص الشاصي لو فحص كامل كان اخذت فراشي ​

 

[امبلتع]

وجهة نظري وبرأيي الشخصي
الرمال الذهبيه فقط لاغير
والله الموفق

 

[q8ty_azgarty]

وانا اضم صوتي لصوت الشباب الرمال الذهبيه عميل للشريطيه الى بالري

 

[فهد الشاعر]

السلام عليكم ورحمة الله وبركاتة

الرمال اكبر فحص يلعب على الناس تدرون ليش علشان الكفاله

فحص سياره عندهم قالولي السياره اوكي توكلت على الله شريت السياره ثاني يوم الجير طلع مايبدل وديتها لهم فحص السياره قالو الجير خربان قلت اوكي بتصلحون الجير على الكفاله
لا
قلت ليش
قالو في تهريب شبنه جير هذا مانعطي كفاله على التهريب قلت السياره بعد الفحص ماشي 70 كيلو وانت اتقولي التهريب طلعت من هم وانا اسب فيهم وعلى نصبهم
بعد قلت اهم اشي الواحد يفحص الشاصي ويسوق السياره ويجربها على الخط اذا جامده وسواقتها حلو يتوكل على الله وياخذها

ام الحادث الثانيه بعت سياره على شخص ودينها صوب الرمال فحصو السياره طلت اوكي
بعد كم يوم داق على الرجال قالى السياره طقت مكينتها
قلت افا شلون واهم معطينا نسبه السياره 71 % جيده

هذا الرمال اللي انتم تمدحونه

 

[BOSHHAB]

دق سلف وطق فره وامحطها بالخط السريع وشغل كل اجهزة السياره والمكيف اذا كل شي اوكي
توكل على الله بلا رمال ذهبيه بلا خاكيه بلع فلوس وتظييع وقت على الفاضي

انت لك نظره السياره وممشاها والباقي بذمة البايع

بالنهايه شاري سياره مستعمله مو يديده ف لازم يكون فيها شي ولو بسيط

 

[ابو سالم1]

انا شخصيا صارت لى سالفة مع الرمال الذهبية اقسم بالله على ما اقولة شهيد
شريت نيسان عربانة بيك اب
موديل 2002
فحصت السيارة عندهم قالو فى اصباغ على المدقر و باب السايق و غطاء السيارة الكبوت
قلت ماكو مشكلة صبغ انا راضى لان سعر السيارة الى شريتها كان مغرى
وحطيت ورقة الفحص بدرج السيارة وستعمال شهرين وبعدها شاف السيارة واحد من الربع كنت انا معاه بالبر وقالى هذى سيارة قالبة والقمارة مقصوصة ومبدلة
قلت مستحيل لانى فاحصها بالرمال وقالو بس فيها صبغ متفرقة
المهم رحت فحص جولد صن وقت لهم ابي فحص قمارة السيارة فقط ابي تشوفون السيارة قالبة او لا وبعد الفحص عطونى برنت وقالو السيارة مقصوصة القمارة كلها ومبدلة
على طول رحت للرمال الذهبية وكان الوقت الساعة 10 الصبح وكان الشرار يتطاير من عيونى معصب حدي حصلت صاحب الرمال الذهبية ابو احمد العتيبي بيض الله وجهة وقلت له السالفة وقال دخل السيارة فحص الحين وشيكو عليها وقالو السيارة قالبة والقمارة متبدلة !! يا اخوان ترى من الفحص الاول الى شريت السيارة فية تغريبا شهرين وبعدها اكتشفنا ان السيارة قالبة .
طبعا لو فحص غير الرمال الذهبية اقل شى بيقول صارلك شهرين ومانتحمل يمكن تكون السيارة مدعومة عندك وجاى تتبلى علينا وصدقونى معاهم حق لو يقولون هذا الكلام لان المدة شهرين مو شوى
المهم قالى صاحب الرمال الذهبية امر شنو الى تبي حنا حاضرين وبنى ادم ماهو معصوم من الخطأ قلت هذى غلطتكم وتحملو السيارة قال نعطيك مبلغ 20 بالمية من سعر السيارة وتاخذ سيارتك وتتوكل على الله قلت لاء السيارة انا مابيها طاب الخاطر من عرفت انها قالبة المهم الرجل اقسم بالله ماقصر قالى كم سعر السيارة قلت له بالمبلغ الفلانى قال هذى بطاقتى روح حول السيارة بأسمى وتعال اخذ فلوسك فعلا حولت السيارة وعطانى مبلغ السيارة بالكامل !!!
ومن بعد هسالفة اقسم بالله ما افحص اى سيارة الا بالرمال الذهبية

والله على ما اقولة شهيد
وبيض الله وجهكم يا الرمال الذهبية