وين افضل مكان لفحص سيارة مستعملة؟

[MDH119]

السلام عليكم
اختي كلام الشباب صح بسمعت الرمال الذهبيه
ولكن فحصهم حده دايخ من جميع النواحي
والاهم دامج تبين تشترين سياره للاستعمال وبي ام بعد
اولا اخذي رقم لوحة السياره ودقي علي 22246000 وكالة بي ام دبليو واسالي عن السياره لاتكون تاجير او فيها عله لانه راح يعطونج الهيستوري كامل
والاهم من هذا كله لاتفحصين غير بالوكاله
لانه الرمال والنجم الثلاثي فحصهم اي كلام ولكن هذا الموجود والسريع للفحص والاغلبيه يرشحونها ولكن انا قلت لج الوكاله وبس

وتحياتي للجميع

 

[احمد العبدلي]

احسن فحص النجم الثلاثي بالشويخ عند ابو مبارك

 

[ريح المسك]

السلام عليكم

بصراحه انا والله بغيت اشتري سياره وفحصتها عند الرمال وطلعوا لى الف شغله وشغله ,وصار الريال صاحب السياره يحلفلى ويقسم انها مافيها شي وصار يقولى انا والله منصدم وارجوك تسمحلى ,طبعا انا ماشريت السياره ,وبعد فتره جيتهم بفحص سياره ثانيه وقالولى مثل ماقالو بالسياره الاولى بالظبط ,,وجيتهم ثالث مره ونفس الشي ,وانا الحين بصراحه اشك فيهم ,وفيه واحد من الربع يحلف يقول ودلهم سياره موديل السنه راح يطلعون لك الف شغله وشغله ,

 

[المهندسـة]

هلا اخواني
مشكورين جميعا وما قصرتوا

انا السيارة باخذه من وكالة ال bmw المستعمل وبفحصها هناك وقلت اشوف افحصها برة
بس بعد الكلام اللي قريته شكلي بفحص بالوكالة بس

 

[ضاع الأمل]

حبيبتي الرمال الذهبية وبس

 

[wooow]

بسنة 1998 شريت جيب لكزس 98 وكانت السياره جديده وحلفلي صاحبها ان البدي وكاله وصدقته وبعد شهر بعتها على واحد وفحصها بالرمال الذهبيه وطلع الفحص صبغ السياره بالكامل تجميلي ,,,, صعقت وقلت مستحيل ,, حتى المشتري ما اقتنع لانه يقول عنده خبره بالسيارات وقال ابي افحص بالوكاله و قلت توكل على الله وراح الوكاله وفحصوها وطلع التقرير سليمه ولا يوجد اصباغ ,, استغرب وشرحلهم فحص الرمال وقامو وارفقو مع التقرير كتالوج السياره ودبسو ورقه على صفحة مميزات طلاء اللكزس 3 طبقات بعكس باقي سيارات تويوتا
وبعدها فتحو الرمال الذهبيه بمواصفات سماكة صبغ سيارات لكزس ,, لانهم بالاول يقيسونها على نفس سماكة اصباغ الاندكروزر وغيره

 

[you1]

دق سلف وطق فره وامحطها بالخط السريع وشغل كل اجهزة السياره والمكيف اذا كل شي اوكي
توكل على الله بلا رمال ذهبيه بلا خاكيه بلع فلوس وتظييع وقت على الفاضي

انت لك نظره السياره وممشاها والباقي بذمة البايع

بالنهايه شاري سياره مستعمله مو يديده ف لازم يكون فيها شي ولو بسيط

اتفق معاك تماما الاخي الكريم.....افحصها بنفسك وتوكل على الله...

 

[abu shehab]

احسن فحص كونكورد لا رمال ولا نجم ثلاثي ولا رباعي طبعا من بعد الوكاله وشكرا

 

[560SEL]

طيب كونكورد وين مكانه اخوي لو سمحت وصف دقيق

 

[560SEL]

انا فحصت عندهم بي ام x5 2001 وقالو لي السياره فيه نتله بالقير وما ادري وبكس وطلعو بلاوي
انا شريت السياره لنظافتها
وبعد ماشيكتها طلع دهن القير مو اصلي الظاهر اللي الغرشه بنص دينار وحطيت دهن اصلي الغرشه ب 7.5 دينار وفلتر ب 20 دينار اصلي ولقيت البكس ناشف ما فيه دهن وحطينا دهن وشبنات تهرب وغيرتها وفلنجات وغيرتها وبعدها الموتر صار 100% لا نتله قير ولا بكس تعبان

 

[Bo-SaNaD]

السلام عليكم ورحمه الله وبركاته...


انا وجهه نظري السياره مثل الحرمه انت وحظك والله لو تفحصها بالمريخ لي عنفصت عليك رحت فيها وبالتوفيق ان شاء الله

 

[abu shehab]

اخوي كونكورد مكانه وانت داش شارع كندا دراي من شارع المطار اول دش يمين دشه وامش لآخر الشارع رايح يجيك تقاطع راح يكون على يمينك محل قطع غيار هوندا ويمه النجم الثلاثي وعيسارك هم بعد محل قطع غيار هوندا ويمه كونكورد والشباب اللي فيه على ما اعتقد انهم ارمــن مو سوريين وانا فحصت عندهم كذا سياره والحمد لله كلهم اووكي

 

[maax1]

انا افضل الرمال الذهبية اهم شى القير والماكينة والشاصى
اما تقريرهم عن الشغلات الاستهلاكية يضييق خلقك بس عادى مقدور عليها
اهم شى الشغلات الكبيرة المكلفة

تونى فاحص عندهم مورسيدس e240 2004
عطانى قير + ماكينة + شاصى اوكى فوق الممتاز بس حطلى شغلات استهلاكية عادية ماتضر
والبدى يقول مصبوغ كبوت ومدقر وباب صوب السايق بس مو حادث طقات عادية
وشريتها عادى

بعدين ياجماعة البدى حسب النظرة تجميلى او طقات خارجية مو مشكلة بس مو حادث قوى
وعندنا بديرة اغلب السيارات تلقا البدى حايشتة ضربة ( اذا ماتدعم تندعم) الله يحفظكم

 

[viva.q8]

احسن فحص مكينه وقير لل bmw



بالنسبه لي انا انصح بكراج المستشار متخصص بسيارات ال bmw والعماله اللي موجوده فيه كانت بالسابق من عمالة شركة على الغانم وكيل سيارات بي ام

والسياره من الخارج انصح بالنجم الثلاثي جدام شركة ابيات بالشويخ وعلى فكره سيارتي بي ام وشغلي كله عند كراج المستشار وعلى فكره بعد الوحيد يملك جهاز فحص وبرمجه بالشويخ وكل الكراجات بالشويخ يردون علية اذا توهقوااا

عمالة هندية امينه وثقة
والاحسن من هذا كلة صاحب المحل رجل متدين وصاحب ذمه وضمير
وهذا رقم المحل
24918968

 

[النمله السعيده]

الرمال فصحت عندهم قالي توكل على الله اخر شي القير طلعت فيه طقه كلفني تصليحه 700 دينار!!

 

[bioeng_2003]

الشراء قسمه ونصيب

هلا اختي
اهم شي انه السيارة تدش المزاج ولا الفحص مثل ماقالو الاخوان قبلي الخيارات متعدده.
واكيد احترتي من كثر الاراء والخيارات الشباب ماقصروا
انا شريت يوكن قبل فترة وفحصته في كراج الشريعان ملاصق للرمال الذهبيه وفيه شايب ارمني اسمه ابوعلاء صراحه الرجااااال فاهم ويعطيك من الاخر
وقال لي شنو الاعطال وشنو الاصلاحات
والله يوفقج بالموتر ويوفق الجميع انشالله

 

[ابوراشد73]

الكراجات واجد بس الرمال اخذ سمعه كبيرة لان موقعه ساعده جدام الحراج القديم بالرقعى بس الحين يمشى على الدعاية القديمة انصح النجم الثلاثى او انوار كاظمة خلف لاندمارك الرى او كراج البشر