نتمنى حل مجلس الأمة
وازدهار الاقتصاد
مساك الله بالخير
انا على علم بأن نسبه كبيره من اعضاء المجلس مو قد المجلس وان الاغلبيه تبحث عن مصالحها الشخصيه والبلد آخر همهم بس نبي نعرف منو وصلهم للي اهم فيه
ببساطه اولا احنا الناخبين !
صار عندنا حب للمرشحين اللي يصرخون في المجلس ويهددون الحكومه وكنا نتوقع منهم الحرص على مصلحة البلد بس للاسف ! قمنا نشوف اغلب الاعضاء قاموا يصرخون بغض النظر عن الموضوع اللي يصرخون فيه بس تعلموا من السعدون والبراك الصراخ !
اليوم اغلب المرشحين يحاولون يضغطون على الحكومه اما لمصالح شخصيه او لاكتساب ناخبينهم !
نبي مجلس مايفكر في مصالحه ولا يفكر في انه ينجح في الانتخابات القادمه ,,,, نبي مجلس يفكر شلون يعدل وضع البلد ,,, نبي مجلس يبي يطور البلد وما يفكر ليش المشروع هذا بياخذه فلان ولا فلنتان ,,, نبي مجلس يشوف شئ واحد وهو الكويت .
السبب الثاني هو الحكومه
الحكومه الضعيفه ورئيس الحكومه الضعيف صار الوضع خطير جدا وزراء ما ادري من وين يجيبهم وزراء مو عارفين شلون يحكمون وزاراتهم وزراء يتنفعون بسبب نفوذهم .
اربع تشكيلات وزاريه في سنه ونصف
قلنا رئيس وزراء جديد ممكن يخطأ في التشكيله الاولى او الثانيه بس اربع تشكيلات خطأ
رئيس الوزراء مستانس في منصبه ! والله اللي شاف جلسة الافتتاح لدور الانعقاد للمجلس وحط نفسه مكان رئيس الوزراء والله انه ما راح يقدر ينام ,,,, ولكن هل حس فيها الرئيس ؟ للاسف لا !
ابسط شي من رئيس الوزراء انه يستقيل قبل لا يوصل مرحلة طرح الثقه فيه او اقالته من قبل صاحب السمو الامير
احنا في وضع نقول المهم فقط الكويت
ورساله الى صاحب السمو الامير قد تكن قاسيه ولكن يجب ان تذكر
يا والدنا
لك طولة العمر بس بعد عمر طويل نبي نذكر صباح الاحمد الصباح بانجاز يكون تحت اسمه
المرحوم باذن الله عبدالله السالم كان ابو الدستور
المرحوم باذن الله صباح السالم كان مكمل لتثبيت الدستور
المرحوم باذن الله جابر الاحمد كان ابو التطور والكويت الحديثه
نبي نذكر صباح الاحمد ولكن لانجد اي انجاز الى اليوم
اليوم البترول في افضل اسعاره وين تعديل البنيه التحتيه !
وين المركز المالي!
وين الحلول لمشاكلنا !
كلنا كان يطمح بوضع اقتصادي ممتاز فى عهد صباح الاحمد .. كلنا يحلم بأن يرى الكويت دانة الخليج كما كانت
الله يستر علينا ويحفظنا
يارب تعدل اوضاع الكويت وتحفظنا من جميع المدسوسين ويحفظ اميرنا ويرزقه البطانه الصالحه
اسمحولى على الاطاله بس كلام يقرقع في قلبي وحبيت اقوله