البدو والحضر والزبيدي !

[مفتاح]

منو ما ياكل الزبيدي ؟ الزبيدي أحلى سمجه بـ الدنيا !! قطاوة الكويت شبعت من عظامه .. من كثر ما ياكلونه هذا الشعب السمكي الأصيل منو ما يحب الزبيدي ؟

آآآه يا الزبيدي .. بـ الصيف و بـ عز الحر ..يدقون عليك البيت و يقولولك تعال يا فلان اليوم مسويلك زبيدي .. تروح هلكان و عرقان و منتهي .. و تشوف السفره عليها بصل أمريكي .. و ليمونتين يلمعون و جرجير .. و لبن المراعي على كتر بارد و والاجار المعتق ..وعقبه جاي المخدر بالنعناع و تنطر شوي ولا حاطينلك الصحن .. العيش المدهّن و الحشو الوحشي و السمنه الخياليه .. و أخيراً شمعة الجلاس سيدتي الزبيديه طبعا مو كل بيت يعرف يطبخ هالطبخه العريقه للاسف

كل هذي اللحظات السعيده تدمّرت في عيون المواطن الكويتي .. الزبيدي صار كيلوّه بـ 14 دينار يعني إذا حاب تصير إنسان لطيف و تتغدى زبيدي ويا أهلك .. لازم تدفع 100 دينار و اللي كان ياكل زبيدي يوم و ترك قام ياكله مره كل أسبوعين !! 14 دينار شنو .. ليش مو مليووون ؟! الله يخلي الميد والصبور خلطة من الثوم والبهارات وطعم لايعلى وبلاش !

وبالمناسبه رحت ذاك اليوم سوق السمج مع صاحبي بالامارات لم سئلته عن الزبيدي عندهم قال ماييبونه ولم رحنه قالو هذا ييبونه من ايران بس يودونه الكويت لان عليه طلبيه وايد مايجي امارات !

وعموما السمج بنهايه كل مفيد وافضل من اللحم لان اللحم يعتبر داء رئيسي لامراض القلب والشرايين والكوليسترول والنقرس الروماتيزي
عشان جذيه نشوف اخوانه العيم يصك عمرهم 60 ومافي ولا مرض اما البدوي اكال اللحوم والبعارين بس يوصل 40 صارت فيه الجلطه من هاللحوم بس في بدو الي بصحرا تشوفه بصحه وقوته عن 3 رجال وعمره 70 ولم تساله ليش يقولك ماكل الا تمر وحليب نياق


- بس السوال اهو متى راح ينزل سعر الزبيدي .. و جم تتوقعون راح ينزل في شهر 6 ؟!

- بـ الوقت الحالي الأكثريه لجئوا للزبيدي الإيراني أو الباكستاني .. أيهما تفضّل ؟

- حالياً تاكلون زبيدي كويتي ؟ إذا الإجابه " نعم " .. كل متى تاكلونه و شـ رايكم بـ سعره ؟!

احنا البدو نختلف عنكم بشي ... اللبن ماتحصله لاصار الغدا سمك

كذا مره انعزم عند ربعي حضر وأحصل لبن مع السمك .. مادري شسالفة اللبن مع السمك

 

[khalid592]

انا ما راح ارد عليك اكثر لانك تطبق المثل اللي يقول ضربني وبكا وسبقني واشتكي.. واذا انت تقول هذا مكان محترم عدل كلامك مدامك تدري محترم ليش الغلط على العالم حبيبي؟ ليش تسوي نفسك الحين انك انسان تحشم وتقدر العالم وانت تغلط وتقول اكال البعارين ووصف كأنه البدوي انسان همجي ؟؟ ليش عدل كلامي ولا لا يالحضري؟

 

[Shima]

احنا البدو نختلف عنكم بشي ... اللبن ماتحصله لاصار الغدا سمك

كذا مره انعزم عند ربعي حضر وأحصل لبن مع السمك .. مادري شسالفة اللبن مع السمك

صح كلامك احنا مانجمع البن مع السمك من زمان هالمعلومه نعرفها
هم فيه حديث عن الرسول صلوات الله عليه عدم جمع اللبن وسمك لانه مضر بالصحه يأدي للموت او يسبب البهاق والبرص او نقرس
من خلقني الله وحنا نعرفها مانجمع ابد

 

[Analyst]

صح كلامك احنا مانجمع البن مع السمك من زمان هالمعلومه نعرفها
هم فيه حديث عن الرسول صلوات الله عليه عدم جمع اللبن وسمك لانه مضر بالصحه يأدي للموت او يسبب البهاق والبرص او نقرس
من خلقني الله وحنا نعرفها مانجمع ابد

صبحكم الله بالخير جميعا ...

بالنسبة للأخت الشيماء ......ممكن تذكرين الحديث لو تكرمتي ....

ودمتم بخير .

 

[Shima]

صبحكم الله بالخير جميعا ...

بالنسبة للأخت الشيماء ......ممكن تذكرين الحديث لو تكرمتي ....

ودمتم بخير .

انا قريته بكتاب ل بن اعثيمين
ان الرسول ماجمع بين سمك ولبن
خليني ادور الكتاب وارد عليك ان شاء الله

 

[يقولون]

يا جماعه صلوا على النبي الرجال ما قصد شي والا تبون جنازه وتلطمون فيها تعوذوا من بليس لحد يدش بينا شفيكم موناقص الا تطلبون رفع الحصانه عن الاخ كاتب الموضوع

 

[ياسر الروقي]

عطيتو الموضوع اكبر من حجمه مبين على عاشق انها ما يقصد شى
بعدين عاشق من الاعضاءالمحترمين نحسبه كذلك والله حسيبه

 

[بوسعود66666]

تدرون ان غداى اليوم سمج ازبيدى
حياكم معاى ياشباب

 

[Shima]

صبحكم الله بالخير جميعا ...

بالنسبة للأخت الشيماء ......ممكن تذكرين الحديث لو تكرمتي ....

ودمتم بخير .

هذا اللي حصلته يمكن اختلط عليه حطيته حديث وهو مو حديث لكن سمعته من اكثر من شيخ ان الرسول مايجمع بين لبن وسمك واولهم شيخنا بن عثيمين

وهذا من تدبير اغذية الرسول صلوات الله عليه وجد لم يجمع قط بين لبن وسمك لانهم مختلفين وضارين للصحه
والكلام هذا قريته في
كتاب الطب النبوي ممكن تشتريه وتقراه

 

[Bokandar79]

اخ عاشق CINDY وصفك البدوي ب " اكال " غلط
اما انها تعني تكبر و عنصريه او خطأ تعبيري
ولا تنسى ان الحضر عندهم عادات شاذة ماله داعي نذكرها
خلني ساكت احسن

" انا خلقناكم شعوبا و قبائلا لتتعارفوا ان اكرمكم عند الله اتقاكم "

سلمت يداك

البدوي اكال البعارين هههههههههههه ليش شايفنه اسود الله يهداك .. انا بدوي ما اكل لحم يعني اعتبر غير عنهم؟؟ بعدين اكثر ناس ياكلون السمج بدو واكثر ناس يتفننون بطبخ السمج هم بدو .. عبالك انه البدو مو اهل بحر يعني؟؟ طلعت متخلف يا راعي الموضوع .. نتمنى من المراقبين يسكرون الموضوع التافه لانه فيه عنصريه من كاتبه الاحمق !!!!

احتراما للمنتدى المحترم ولا عرفت شلون ارد على اشكالك عالعموم ترا المنتدى هذا حق المحترمين مو مكان هيلق وسب وانا اذا كتبت كلمه محد قصد فيها غلط ووضحت السالفه لكن الاحمق الي مايفهم بالقوانين المنتدى مثلك ومايفهم الي نكتب بالموضوع والموضوع عن الزبيدي اذا كنت تعرف تقرا لكن شتفهم عالعموم القافله تسير ........!​

للاسف..
هذا حال العرب والامه الاسلاميه...
كما هي الجملة المحبطة دائما والتي تقول إتفق العرب على أن لا يتفقوا.... وكذلك أقول إتفق متأخري العرب والامه الاسلاميه على أن لا يفكروا
انظر لتطور العالم الغربي... ونحن نقف وقفه صارمه ونختلف لاسباب..... احضري بدوي سني شيعي انا من قبيلة....!! وانت من قبيلة........!! نصنف ونتدحرج والغرب يضحك.... الله المستعان....
وهذا حال اغلب المنتديات العربيه...
بل حتى مستوى الفكر العربي فهو للأسف في أقل مستوياته...
تصفح بيوم بين المواضيع... وأنظر شبابنا الصاعد وفتياتنا الواعدات
في أي المواضيع يقفون...

ونسأل المولى أن يصلح الأحوال....

 

[Pivotrend]

هذة الخصله السيئة بأمة محمد لن تنتهي حتى يوم الساعة لو بعد الاف السنين
حديث صحيح قال رسول الله صلى الله عليه و سلم : " ثلاث من أمور الجاهلية في أمتي لا يدعوهن , الفخر في الأحساب و الطعن في الأنساب ...... "
لاحظ أول خصلة ذكرت من أمور الجاهلية التي لن تدعها أمة محمد هي الفخر في الأحساب و الطعن في الأنساب , إذاً مالحل

الحل هو بكيفية التعامل معها..............!
الحل هو بكيفية التعامل مع البشر الذي به هذة الخصلة السيئة
وهي خصلة موجوده بكل طوائف المجتمع , غني فقير , متعلم جاهل , حتى المطاوعه