مشروع مواد البناء

[تشطيبات الكويت]

وياجماعه ارجوكم هذه تجاره فيها ربح وخساره يعني مو واحد يكلمني وثاني يوم يروح يسوي شي ويجي يقول خسرت بسببك لا اسالني ودور السوق واسال اللي اكبر مني وخبرته اكثر مني اذا شفت الموضوع دش مخك توكل على الله !!!!!!!!!!!؟
تعليقي / المفروض توقعهم علي تعهد !! تري جايينك جايينك !!
الموسوي يعطيك العافية وموفق خير انشاء الله ،وكفو .
وحقيقة أنا شخصيا مع انو عندي شوية خبرة ومتواجد بسوق المقاولات من كام سنة !! حقيقة استفدت من معلوماتك وخبرتك الواقعية مع هالشغل .
اخوي الموسوي
أنا صارلي فترة وقاعد افكر بمعرض مواد بناء وبرمضان حصلت محل خلو 2000 وايجار 600 ومساحته زينة !
وانا بيني وبينك شغال بالمقاولات واطقطق ، وعندي معرفة جيدة بالمواد والمصدرين برا الكويت وقاعد احاول أأمن الحصول علي وكالة منتجات معينة وتوني مبلش اسوي اتصالاتي !!

سؤالي لك اذا تكرمت المحل وسط محلات مواد البناء هل الاعتماد بعد الله علي زبون السوق او تحريك المندوبين ؟؟
وكم برايك نسبة هذول وهذول ؟؟
هل إغراءات مندوبين الشركات مهمة ؟ وما أنواعها برأيك ؟
إذا تعاملت مع تجار الجملة بالكويت هل أحتاج مخزن ؟

كثرت عليك هاه ؟ اطمع بكرمك
وعطني تلفون المعرض علشان ناخذ منك لشغلنا. ومشكور وبالتوفيق يالموسوي

 

[ح.الموسوي]

هلا وغلا اخوي العزيز تشطيبات الكويت
تصدق كل يوم استانس اكثر لان ماشاء الله في ناس قامت تسال وتستفسر وهذا الشي اعتقد انه يخلي الناس تتوعى من الغش شوي

بخصوص المحل عزيزي حسب المكان يعني اذا بشويخ بين محلات مواد البناء ماله داعي تاخذ مخزن لان اكثر تجار الجمله صوبك وحوالينك اما اذا كان في اماكن مثل الفحيحيل او بنيدالقار او حولي او السالميه تحتاج مخزن على الاقل للاسمنت والطابوق لان مومعقوله واحد يطلب 50 كيس اسمنت تروح تجيب له من الشويخ عرفت

المحل سواء كان بين محلات ولا بروحه الزبون يشتري منك لان لابد انه يعجبه شي من اسعارك او يرتاح لك وبعدين اكثر المحلات اللي جنب بعض تلقى سوقهم ماشي وزباين وايد يمرون عليهم باليوم

اما بخصوص
هل إغراءات مندوبين الشركات مهمة ؟ وما أنواعها برأيك ؟
إذا تعاملت مع تجار الجملة بالكويت هل أحتاج مخزن ؟

هل الاسئله ما فهمت قصدك ياريت توضح لي اكثر

اما بخصوص رقم الشركه
23721675
66623401
هذول ارقام المحل والنقال الخاص بالمحل

نسيت اسالك المحل اللي محصله وين اي منطقه اذا كان بالشويخ ياريت تفيدنا بالموقع على الخاص اذا ما تبيه احتمال انا اخذه

ياريت ترد علي على الخاص

 

[تشطيبات الكويت]

تري دزيتلك العنوان عالخاص !! بالتوفيق


عموما شرايك بالحجر الاردني والسوري والرخام ؟؟ فقط

أو من الافضل بيع كل مواد البناء ومن ضمنهم الحجر ؟؟ بصراحة انا شغال بالحجر

 

[ح.الموسوي]

هلا اخوي تشطيبات الكويت رحم الله والدينك على الخاص ماقصرت

بالنسبه للحجر والرخام شغلهم ممتاز وحلو جدا وانصحك خلك عليهم اذا ما تبي تتشتت لان مواد البناء مثل ما شرحت وايد اصناف تدوخ يعني لازم تحفظ الاسعار وكذا يبيلها واحد له خلق اما الحجر والرخام اصناف بسيطه وتعرف اسعارها وربحها حلو واذا تبي من الاردن مياشره اقدر اضبطك من هناك يعني لا تاخذ من السوق ولا شي من الاردن لين المخزن مالك وباقل الاسعار وهذه الشغله انا حابها يعني ادش معاك شريك اذا تبي طبعا الاداره عندك لان والله شغلي بمواد البناء من الساعه خمس الفجر لين الساعه 8 بالليل يعني مااقدر احك راسي ويوم اللي اداوم بالحكومه اخوي يستلم مكاني وهو شريكي انا دوامي شفتات فاكثر شي انا اجابل المحل بس الحجر شغله جدا حلو وفايدته بعد حلوه انا ماشتغلت فيه بس ادري

اذا لك نيه عزم وانا معاك نستورد من الاردن مباشره واقدر اخليهم يعطونا تسهيلات بالدفع بعد

بالتوفيق

 

[almousawima]

يا سلام عليك يالموسوي

انا احب العمل الحر
حقيقة استفدنا منك كثيرا

الله يوفقك