عندي جم استفسار عن السوق الامريكي وارجو المساعدة

[احمدوووووووووو]

السلام عليكم
اخواني الي يتداولون بالسوق الامريكي
انا بصراحة تعبت من السوق الكويتي وخسرت فيه 90 من راس مالي
ابي ادش السوق الامريكي وعسى ربي يعوضني خير
اول سوال شلون اتداول بالكويت وين اروح وافتح حساب
وشلون احول الفلوس
وشنو افضل شركة تداول بالكويت
وعندي بعد جم استفسار وهذولا اهم ثلاث اسئلة حاليا
وشكرا

 

[faresss]

عليكم السلام ورحمة الله وبركاته
أولا : عسى الله يعوضك راس مالك وأكثر
ويرزقك الله وين ماكنت مع اخواني الاعضاء في المنتدى
ثانيا : التداول في السوق الامريكي من الكويت عدة شركات
أما انا مشترك في شركة (TradeStaition) ولها فرع في دبي
والتسجيل عن طريق السيد/ أحمد المقيم في دبي وهو رئيس الفرع على ما اعتقد.
والشركة ولله الحمد ممتازة بتعاملهم ويكفي انها مباشر.
اما الرسوم الشهرية نوعا ما جيده مقارنة مع الشركات الثانية.
واذا حاب تتواصل او تشترك فيها ابشر
ادزلك رقم احمد وهو يعلمك طريقة التسجيل لأني بصراحة طولت
معاهم لما سجلوني (معقدة جدا) وأحس الأمن فيها زيادة حييييل عن اللزوم (دقيقين).

 

[bo_hamdan]

هلا أحمد و الله يوفقك ان شاء الله و يوفق الجميع بالاستثمار الناجح و الرابح

بالكويت او حتي بالخليج من أنصح بالتدول مع الوسطاء(للتداول بالسوق الامريكي) لعدة أسباب و أهمها:

1- العمولة مرتفعة جدا
2- احيانا ممكن تواجهك مشكلة بالتداول و ما تقدر تبيع أو تشتري

العضو faresss ذكر اسم TradeStation و أنا ما عندي أي تعامل معاهم من قبل فما راح أقدر اعلق على خدماتهم.

انا تجربتي مع شركة tdameritrade.com و هذى من أكبر الشركات بأمريكا.

فتح الحساب سهل جدا, كل ما عليك تختار (فتح حساب جديد) Open New Account و تعبأ كل بياناتك و تطبع النموذج و توقعه. بعدين ترسل النموذج لهم بالايميل
و تحتاج المعلومات الاساسية مثل: الاسم, العنوان, تاريخ الميلاد, الوظيفة و مكان العمل و الدخل.

راح تحتاح صورة الجواز scanner
و صورة كشف حساب بنكي انجليزي (اطلبه من الفرع ان يعطونك باللغة الانجليزية)
و ترسلها لهم بالايميل

و في نموذج الضرائب W8BEN لازم الاصلي ينكتب و يتوقع و بعدين ترسله لهم بريد مستعجل مثل DHL , FedEx, UPS, Aramex

تمويل المحفظة : يتم عن طريق تحويل بنكي من حسابك و الاسهل بالنت
سحب من محفظتك: تطلبه عن طريق الموقع و يتم الايداع بحسابك البنكي

و اذا عندك أي استفسار او سؤال , ان شاء الله نرد عليك ...

 

[@ROYAL@]

عزيزي الأخ بو حمدان،

بالنسبه للتحويل المالي إلى حسابك الجديد عندهم (أميري تريد).. تقول عن طريق النت. و إنه أسهل من التحويل البنكي.

شلون تحول مبلغ لهم بالنت ؟

من الكويت، لازم تحول بنكي إلى بنكهم.

أما إذا إنته ساكن داخل أمريكا، تقدر تسوي إللي تبي، عن طريق النت، بنك، شيك بالبريد، إلخ.

الخلاصه، عندي سؤالين:

- كيف بالنت، من الكويت ؟

- إنت أكيد بتحول فلوسك من دينار إلى دولار. أول شئ، تجد سعر تحويل مناسب. و هذا ما لا تجده! في البنوك. يعني لازم تعمل شيك مصدق إلى شركة صرافه ، و منهم تاخذ دولار، و نفس الوقت تقولهم أبي تحويل إلى بنك كذا في اميركا ...لحساب الشركه / البروكر / الوسيط إلخ. الفلاني ....

هذا للي أعرفه في مجال التحويلات الكبيرة (١٠٠ ألف، إلى ملايين الدولارات!). أما إللي يبي يحول لحساب وسيط أمريكي ٢٠ أو ٣٠ ألف دولار.. يروح بنكه في الكويت، و يعمل حواله تلكس / سويفت swift عاديه. و ما راح تفرق معاه ١ - ٢ فلس زياده في سعر صرف البنك.

و الله أعلم

 

[look333]

تبي النصيحه انحش الكل خسران

 

[bo_hamdan]

عزيزي الأخ بو حمدان،

بالنسبه للتحويل المالي إلى حسابك الجديد عندهم (أميري تريد).. تقول عن طريق النت. و إنه أسهل من التحويل البنكي.

شلون تحول مبلغ لهم بالنت ؟

من الكويت، لازم تحول بنكي إلى بنكهم.

أما إذا إنته ساكن داخل أمريكا، تقدر تسوي إللي تبي، عن طريق النت، بنك، شيك بالبريد، إلخ.

الخلاصه، عندي سؤالين:

- كيف بالنت، من الكويت ؟

- إنت أكيد بتحول فلوسك من دينار إلى دولار. أول شئ، تجد سعر تحويل مناسب. و هذا ما لا تجده! في البنوك. يعني لازم تعمل شيك مصدق إلى شركة صرافه ، و منهم تاخذ دولار، و نفس الوقت تقولهم أبي تحويل إلى بنك كذا في اميركا ...لحساب الشركه / البروكر / الوسيط إلخ. الفلاني ....

هذا للي أعرفه في مجال التحويلات الكبيرة (١٠٠ ألف، إلى ملايين الدولارات!). أما إللي يبي يحول لحساب وسيط أمريكي ٢٠ أو ٣٠ ألف دولار.. يروح بنكه في الكويت، و يعمل حواله تلكس / سويفت swift عاديه. و ما راح تفرق معاه ١ - ٢ فلس زياده في سعر صرف البنك.

و الله أعلم

هلا بك @casino@

كلامك صحيح اذا كنت في أمريكا او عندك حساب في أمريكا فالسحب و الايداع يكون سهل جدا و يكون كله بالانترنت. و لكن انا تجربتي من حسابي بالكويت.

أيداع بالمحفظة: لما تكلمت بالانترنت كنت أقصد عن طريقة خدمة البنك بالانترنت الي تتعامل معاه. لازم أول شي تكون مفعل خدمة الانترنت مع البنك الي انت تتعامل معاه و تحتاج بطاقة الكي نت و رقمك السري و بعدها تفعل كل الخدمات مع البنك الكويتي (و نفس الطريقة في البنوك الخليجية). بعدها ممكن تدخل على حسابك و تضيف بيانات المستفيد للتحويل الدولي. المستفيد راح يكون شركة امريتريد و لازم تضيف البنك الوسيط و بعدين تضيف أسمك و رقم محفظتك في قسم بيانات التحويل. البيانات عادة تحتاج تظيفها مرة واحدة و كل مرة تودع تستخدم نفس بيانات المستفيد. كل بنك عندنا يختلف في طريقة أدخال المعلومات بموقعهم الالكتروني , دائما تأكد من خدمة العملاء بالبنك و أنك دخلت المعلومات بشكل صحيح.

https://www.tdameritrade.com/retail-en_us/resources/pdf/TDA111.pdf

النموذج هذا يعطيك المعلومات الى لازم تحطها في قسم المستفيد و اذا بتحول عن طريق الفرع إطبع النموذج و اكتب بياناتك و سلمه لهم.

العملة: في بعض البنوك تعطيك الصلاحية بتحويل بالدينار و بعدين يتم تحويله بالدولار لما يوصل هناك , بس الافضل انك تحول بالدولار مباشرة و كل البنوك راح تعطيك قيمة التحويل من حسابك في نفس الوقت على حسب تحويل سعر العملة لهذا اليوم. فرق العملة يختلف من بنك الى آخر بالكويت أنا جربت 2 بنوك اسلامية للتحويل و 3 بنوك تقليدية و كل واحد يحسب سعر العملة بإختلاف النسبة. ممكن الفرقية تكون 0.5-5% حسب البنك. اذا تبي تعرف رأي الشخصي عن البنوك الي جربتها ارد عليك بالخاص لان حاليا اتعامل مع بنك واحد و خدمته الافضل و الاسرع بالكويت.

حدود التحويل limit: اذا بتحول عن طريق الفرع فعادي اتوقع اي مبلغ متوفر حسابك, اما اذا كان بالانترنت فلازم تشوف الحد في البنك و تحتاج تزيده في بنوك تعطيك حد ممكن 1000 او 2000 دينار و بعضعا يعطيك 10000 الآف دينار. الفكرة هو حماية المستخدمين حتي لو تم الدخول الي حسابك بالانترنت من غير علمك ما يقدرون ياخذون فلوسك. الحد ممكن يتغير مع البنك و تطلب تزيده او تنقصة حسب احتياجك.

للسحب من المحفظة: اذا كان عند حساب بنكي بأمريكا فعادي تحول المبلغ من محفظتك للبنك و يدخل في ساعات او نفس اليوم اتوقع. اذا بتسحب لاي حساب ثاني خارج امريكا فلازم تعبأ الطلب و النموذج و توقعه و تحط فيه اسمك و رقم حسابك و بيانات البنك و شي مهم جدا لازم تعطيهم سبب سحب المبلغ. أذا نسيت تحط السبب فما راح يتم التحويل و صارت معاي. ما يهم شنو السبب المهم تذكر سبب التحويل, مثلا لشراء سيارة, تصليح البيت, ترميم البيت , شراء تذكرة للسفر. أنا عارف ان الواحد يسحب لاسباب عديدة بس لازم تذكر سبب واحد و مقبول. انا مرة كتبت بسحب فلوسي من حسابي كسبب و ما تم التحويل و لازم اقول بعدين السبب و بعدها تم التحويل.

https://www.tdameritrade.com/retail-en_us/resources/pdf/TDA922.pdf

النموذج تكتب بياناتك و تطبعة بعدين توقعه و تبعثه لهم. ممكن تبعثه فاكس بس الافضل تسوي scan او تصوره بتلفونك و تبعثه بالايميل . طبعا لازم تدخل حسابك في امريتريد و تبعث ايميل عن طرق الحساب لان أفضل , آمان و مضمون.

 

[bo_hamdan]

تبي النصيحه انحش الكل خسران

كلامك غير دقيق و غير صحيح , الحال متشابه في كل الاسواق ممكن تربح و ممكن تخسر و عندنا الوضع بالكويت بشكل عام اغلب الناس خسرانين.

الاسواق الامريكية فيها سيولة عالية و متداولين من كل انحاء العالم.

الربح و الخسارة يعتمد على أختيارك للشركة السعر وقت البيع و الشراء. بشكل عام الربح يكون لما تختار شركة عندها اخبار ممتازة او عقود مستقبلية رابحة و تكون حساباتها المالية ما عليها اشكاليات و التحاليل المالية تكون ايجابية.

أذا شريت السهم لما يكون سعره رخيص و تبيعه عند الارتفاع تكون ربحان.

اعطيك مثال غير الاسهم. الي اشتري ارض لما كانت رخيصة (مثل جنوب السرة) كانت بحدود 40-60 ألف دينار و كن السبب لرخصها ان المنطقة جديدة و مافيها خدمات و لا جمعيات و محلات .... الخ

الحين نفس الارض سعرها 200-300 الف دينار لان المنطقة فيها كل الخدمات ...

نفس الشي الاسهم تشتري الشركة التي تكون لها أخبار و اسباب ايجابية للارتفاع ...

 

[@ROYAL@]

كلامك غير دقيق و غير صحيح , الحال متشابه في كل الاسواق ممكن تربح و ممكن تخسر و عندنا الوضع بالكويت بشكل عام اغلب الناس خسرانين.

الاسواق الامريكية فيها سيولة عالية و متداولين من كل انحاء العالم.

الربح و الخسارة يعتمد على أختيارك للشركة السعر وقت البيع و الشراء. بشكل عام الربح يكون لما تختار شركة عندها اخبار ممتازة او عقود مستقبلية رابحة و تكون حساباتها المالية ما عليها اشكاليات و التحاليل المالية تكون ايجابية.

أذا شريت السهم لما يكون سعره رخيص و تبيعه عند الارتفاع تكون ربحان.

اعطيك مثال غير الاسهم. الي اشتري ارض لما كانت رخيصة (مثل جنوب السرة) كانت بحدود 40-60 ألف دينار و كن السبب لرخصها ان المنطقة جديدة و مافيها خدمات و لا جمعيات و محلات .... الخ

الحين نفس الارض سعرها 200-300 الف دينار لان المنطقة فيها كل الخدمات ...

نفس الشي الاسهم تشتري الشركة التي تكون لها أخبار و اسباب ايجابية للارتفاع ...

مشكور أخوي بو حمدان على المعلومات القيمه .

أما بالنسبه لما ذكره الأخ...انحش من السوق الأمريكي! أتفق معك إنه أهم عامل في أية سوق ماليه...هي السيوله. و سوق أمريكا السيوله و التداولات فيه لاتتوقف.

مو سوقنا....بلد بكبره تداول ١٠ - ٢٠ مليون دينار!

مفروض على مقومات الاقتصاد الكويتي، و ثراء البلاد و العباد...مو أقل من مليار دينار يوميا (١٠٠٠ مليون) !

لكن شتقول... بورصة عبادان

 

[look333]

خلنا نحسب كم واحد بالمنتدى ربحان او على الاقل طلع براس ماله

 

[bo_hamdan]

مو سوقنا....بلد بكبره تداول ١٠ - ٢٠ مليون دينار!

مفروض على مقومات الاقتصاد الكويتي، و ثراء البلاد و العباد...مو أقل من مليار دينار يوميا (١٠٠٠ مليون) !

لكن شتقول... بورصة عبادان

ههههههههههه

احنا سوقنا المفروض يسمونه سوق الحراج للاسهم ههههههه كل شئ فيه رخيص , اسهم اكتتابها 100 فلس و سعرها الحين 7 فلوس

الله يهديهم المسؤولين عن البورصة و يشوفون حل , بس حسب رأي الشخصي الموضوع ماله حل الا ان يزيد الاقبال على التداول من خارج الكويت و زيادة السيولة. لما كان السوق التدوال فيه بالشرائح 5000 او 10000 آلاف كان الى يتداولون شركات كبيرة و محافظ مالية و لازم عندهم رأس المال , و كان سوق الكسور للمتداول المتواضع الي. الحين السهم يصعد حد أعلى 10% او ينزل 10% حد أدني بتداول سهم واحد

 

[bo_hamdan]

خلنا نحسب كم واحد بالمنتدى ربحان او على الاقل طلع براس ماله

هلا بك look333

أحنا نناقش الموضوع بشكل عام و كيف ممكن نربح بالاسهم .... كلنا داخلين بالاسهم حتي نستثمر و نربح . بدون شك مافي احد دائما يربح و شيئ عادي ان اي واحد يخسر فلوس بالاسهم , بس الخسارة هي تجربة و الواحد يستفيد منها.

شوف سهم EQLB مرتفع فوق 50-40% من الاسبوع الماضي و لو واحد اشتري السهم الخميس و باع اليوم و حاط 10000آلاف لصارت 14000 الف يعني الربح في 4 ايام تداول 4000آلاف.

و الله يوفقنا و يوفق الجميع ان شاء الله

 

[سيف 79]

بالنسبه لربح والخساره يعتمد بعد الله على وضع السوق لانك أحد مكوناته

يعني السوق الكويتي خسران 15 % من بداية العام
السوق الامريكي ناسداك ربحان 8 % من بداية العام

من طبيعي وضع المتداول في الامريكي افضل لكن ولو حصل العكس مثل عام 2007
ايضا راح تخسر هناك المتجاره من وجهة نظري تعتمد على السوق وعلى استراتيجية المتدوال
لكن السوق الامريكي يبقى افضل معدل السيوله عالي بعكس السوق الكويتي كنا 56 شركه فى 96 وكنا نتداول ب 20 مليون
والحين اعتقد 200 شركه ومبلغ التداول هو هو كما اسمع

عندي سوال للشباب سمعت ان السوق الامريكي االغى الستوب لوز ؟ هل هذا صحيح ؟

 

[بدون مجامله]

السوق الامريكي بإختصار شديد
ممكن تدخل بالف وتطلع بمئة دينار
وممكن تدخل بمئة دينار وتطلع بألف
وبلحظه واحده او بلمحه تخسر قيمة الف او تكسبها ، سوق غريب عجيب ، سهم يصعد بلحظه 20 دولار وينزل مثلها ، الي يبي يتداول يدخل بمبلغ بسيط ويحط في باله انه قد ماترجع

 

[صاعد نازل]

هلا أحمد و الله يوفقك ان شاء الله و يوفق الجميع بالاستثمار الناجح و الرابح

بالكويت او حتي بالخليج من أنصح بالتدول مع الوسطاء(للتداول بالسوق الامريكي) لعدة أسباب و أهمها:

1- العمولة مرتفعة جدا
2- احيانا ممكن تواجهك مشكلة بالتداول و ما تقدر تبيع أو تشتري

العضو faresss ذكر اسم TradeStation و أنا ما عندي أي تعامل معاهم من قبل فما راح أقدر اعلق على خدماتهم.

انا تجربتي مع شركة tdameritrade.com و هذى من أكبر الشركات بأمريكا.

فتح الحساب سهل جدا, كل ما عليك تختار (فتح حساب جديد) Open New Account و تعبأ كل بياناتك و تطبع النموذج و توقعه. بعدين ترسل النموذج لهم بالايميل
و تحتاج المعلومات الاساسية مثل: الاسم, العنوان, تاريخ الميلاد, الوظيفة و مكان العمل و الدخل.

راح تحتاح صورة الجواز scanner
و صورة كشف حساب بنكي انجليزي (اطلبه من الفرع ان يعطونك باللغة الانجليزية)
و ترسلها لهم بالايميل

و في نموذج الضرائب W8BEN لازم الاصلي ينكتب و يتوقع و بعدين ترسله لهم بريد مستعجل مثل DHL , FedEx, UPS, Aramex

تمويل المحفظة : يتم عن طريق تحويل بنكي من حسابك و الاسهل بالنت
سحب من محفظتك: تطلبه عن طريق الموقع و يتم الايداع بحسابك البنكي

و اذا عندك أي استفسار او سؤال , ان شاء الله نرد عليك ...

بخصوص كشف الحساب باللغه الانجليزيه ما تحتاج تروح للبنك

قبل لا تدخل الى حسابك فى البنك عن طريق النت حول لغة سايت البنك الى اللغه الانجليزيه ومن ثم ادخل لحسابك وكل شيء راح يطلع باللغه الانجليزيه واطبع الكشف ومن ثم اعمل سكنر وارسله لهم .

 

[bo_hamdan]

بالنسبه لربح والخساره يعتمد بعد الله على وضع السوق لانك أحد مكوناته

يعني السوق الكويتي خسران 15 % من بداية العام
السوق الامريكي ناسداك ربحان 8 % من بداية العام

من طبيعي وضع المتداول في الامريكي افضل لكن ولو حصل العكس مثل عام 2007
ايضا راح تخسر هناك المتجاره من وجهة نظري تعتمد على السوق وعلى استراتيجية المتدوال
لكن السوق الامريكي يبقى افضل معدل السيوله عالي بعكس السوق الكويتي كنا 56 شركه فى 96 وكنا نتداول ب 20 مليون
والحين اعتقد 200 شركه ومبلغ التداول هو هو كما اسمع

عندي سوال للشباب سمعت ان السوق الامريكي االغى الستوب لوز ؟ هل هذا صحيح ؟

هلا بك سيف 79

السوق الامريكي لو امور كثيرة تميزة عن أسواقنا و اهمها شي السيولية المالية العالية و الدعم الحكومي الفعال الي تشوف له نتائج ايجابية. كلامك صحيح عن سنة 2007 بعد الازمة الاقتصادية في العالم شركات افلست و الاسواق تدهورت في كل العالم و لكن في السوق الامريكي الاسهم نزلت و لكن الوضع بسرعة استقر و رجع الي نفس مستوايته القديمة و أفضل. انما الوضع عندنا بالعكس بعد الازمة المالية 2007 السوق بدأ بالتدهور و استمر بالهبوط و صار السوق ماله اي قيمة .... عشرات من الشركة وقفت عن التداول و شركات شطبت من السوق و شركات افلست و اسهم نزلت و صلت لغاية 7 فلوس .... هذا الفرق بينا و بينهم.

طريقة التداول الناجحة حتي تعرف وقت الدخول و الخروح تعتبر من اهم شي للتداول الرابح . أنصحك بالاشتراك مع موقع التوتير https://twitter.com/345Research
و راح تستفيد منهم و الاسهم عندهم مرتفعة بأرقام عالية جدا.

أما بالنسبة بالسوق الامريكي وقف الستوب لوز فهذا غير صحيح. الستوب لوز stop loss تعتبر طريقة تستخدم عن طريق الوسيط لوضع امر بيع بسعر معين حتي تقلل من المخاطر و هذي السياسة في التداول تناسب المحافظ المالية التي تكون محافظفها المالية بالملايين و ليس الافراد. كان في ناس يتكلمون عن الفيدرال ريسيرف و رفق نسبة الفوائد في أمريكا و كان هذا التخوف بس و كان راح يرفعون النسبة و في البعض اعتبر رفع النسب وقف الستوب لوز.

اعطيك معلومات عن الفوائد في امريكا و حاليا في اقل معدل من أكثر من 20 سنة

لو تلاحظ نسبة الفوائد كانت اكثر من 5% لغاية سنة 2007 و نزلت الى 0.5% و هذا كان احد العوامل الرئيسية في انعاش الاقتصاد و حل مشكلة الازمة المالية. فالجواب بإختصار بانه الستوب لوز ماتغيير و كان في تخوف من رفع النسبة فقط من الفيدرال ريسيرف.

 

[bo_hamdan]

السوق الامريكي بإختصار شديد
ممكن تدخل بالف وتطلع بمئة دينار
وممكن تدخل بمئة دينار وتطلع بألف
وبلحظه واحده او بلمحه تخسر قيمة الف او تكسبها ، سوق غريب عجيب ، سهم يصعد بلحظه 20 دولار وينزل مثلها ، الي يبي يتداول يدخل بمبلغ بسيط ويحط في باله انه قد ماترجع

السلم عليكم الاخ "بدون مجاملة"

لو تابعت موقع التوتير https://twitter.com/345Research كان شفت شلون ممكن تربح أكثر من 100% في يوم واحد و في شركات إرتفعت 1000%. إذا بتدخل السوق بشكل عشوائي فمن غير المستغرب ان الواحد ممكن يغلط في التداول و يخسر و انا مريت في هذه التجربة بنفسي و اظن الكل عنده نفس التجارب هذي.

الواحد يعمل بالاسباب و يبحث و يستشير و يستخير بالله عزوجل و ان شاء الله الارزاق من عند الله عزوجل.

تابعهم 345Research@ و راح تشوف الفرق.

 

[bo_hamdan]

بخصوص كشف الحساب باللغه الانجليزيه ما تحتاج تروح للبنك

قبل لا تدخل الى حسابك فى البنك عن طريق النت حول لغة سايت البنك الى اللغه الانجليزيه ومن ثم ادخل لحسابك وكل شيء راح يطلع باللغه الانجليزيه واطبع الكشف ومن ثم اعمل سكنر وارسله لهم .

هلا بك "صاعد نازل"

مشكور على المعلومات هذي, صحيح اغلب البنوك عندها الخدمة هذي و تسمح لك بتنزيل كشف الحساب بالانجليزي بطريقة PDF/MS Word/Excel

بس أهم شي يكون الاسم مكتوب بالانجليزي و العنوان و اسم البنك و عنوان البنك و تاريخ كشف الحساب موجود. في بعض البنوك يمكن تكون بعض البيانات ناقصة مثلا لو تتعامل مع بيت التمويل فعندهم خدمة طبع كشف الحساب بطريقة اكسل و مافيها عنوان العميل و لا عنوان البنك

و حتي مثلا البنك الوطني يعطيك كشف حساب من غير العنوان للعميل او البنك عن طريق خدمة الاون لاين.

انا ما كنت راح اذكر اسماء البنوك و لا احب اقيم خدماتهم و كل الخدمات ممكن تتغير في اي وقت بس حبيت ارد على السؤال حتي تتوضح الصورة للجميع و البنوك التي ذكرتها من افضل البنوك لكن ما توفر خدمة طبع كشف الحساب مع كافة البيانات.

فالجواب إذا كان البنك لاتي تتعامل معاه يعطيك كشف حساب مع كل المتطلبات فممكن تطبعه و تسوي سكان و لكن اذا ما اعطاك البيانات فلازم تطلبه من البنك و يختلف كل بنك في بعضهم بالاون تطلب كشف حساب يوصلك بريد او استلام بالفرع في بعضهم عن الطريق الخدمة الهاتفية و بعض البنوك لازم تروح الفرع و ممكن يطبعه في نفس الوقت.

 

[AMR]

بختصار شديد

الكثير من الاخوان في هذا المنتدى يتداولون في اخطر اسهم في البورصه الامريكيه و هي اشبه بالحظ و ليس استثمار ابدا


انا اتداول في هذا السوق من عام 2002

استهدف من 15% الى 20%

واحد يقول تخسر فلوسك شلون !!!!!! وين تتداول ؟ و ين حاط افلوسك !!!

انا ما كتب في منتدى الامريكي ودي اشوف سهم زين له القيمه ليس له علاقه بالارتفاع و النزول

شكرا

 

[bo_hamdan]

بختصار شديد
الكثير من الاخوان في هذا المنتدى يتداولون في اخطر اسهم في البورصه الامريكيه و هي اشبه بالحظ و ليس استثمار ابدا
انا اتداول في هذا السوق من عام 2002
استهدف من 15% الى 20%
واحد يقول تخسر فلوسك شلون !!!!!! وين تتداول ؟ و ين حاط افلوسك !!!
انا ما كتب في منتدى الامريكي ودي اشوف سهم زين له القيمه ليس له علاقه بالارتفاع و النزول
شكرا

السلام عليكم احمد

السوق الامريكي في سيولة مادية عالية و متداولين من كل دول العالم فهذا يميز التداول فيه و يعطيك فرصة كبيرة للربح. و عندهم مافي حدود للارتفاع الحد الاعلى او الادني مثل سوق الكويت او اسواق الخليج 10%.

أختيار الاسهم من الامور الصعبة جدا و تحتاج خبرة عالية و مقدرة على التحاليل بكل انواعها لان احيانا ينزل و يرتفع السهم و إذا ما عندك خبرة في التحاليل و الرسوم البيانية ممكن تبيع بخسارة و بعدها يرجع يرتفع السهم و يكون ربحان . أنا شخصيا مريت في هذي التجربة و في اسهم خسرت فيها و جربت هذا الموضوع.

في مواقع او منتديات ممكن تعطيك معلومات عن الاسهم بس أفضل موقع شفته حاليا يكتبون في التوتير

https://twitter.com/345Research

أنا احيانا انقل الابحاث الي يتم نشرها في المنتدي عندنا و لو تدخل عندهم و انصحك تشترك معاهم و اتابع الاخبار فراح تشوف إن الاسهم الى يتم تغطيتها تكون أسهم ربحانة و في مجال للشراء قبل ما يرتفع السعر.

لما تختار الشركة أهم شيئ إنك تختار شركة يكون لها مستقبل و لها منتجات او خدمات جيدة.

في شركة كتبت عنها أمس و اليوم BIEI و كان مكتوب عنها في التوتير 345Research@ بتاريخ 27/11/2015 و لو مثلا اشتريت اسهم بقيمة 10,000$ دولار في نفس اليوم بتاريخ 27/11/2015 فاليوم 9/12/2015 محفظتك راح يكون فيها 35,000$ دولار و هذا تقريبا إرتفاع 250%. يعني أرباح 25,000$ صافية في اسبوعين و طبعا لو مستثمر أكثر فأرباحك راح تكون أكبر.

هذي الشركة طبية و عندها خدمات و علاجات طبية لامراض مثل السرطان و علاج السرطان من أغلي الادوية في العالم. و عندهم أخبار ممتازة و عندهم برائات اختراع باسم الشركة.

اذا تتداول مع شركات الوساطة بالكويت مثل كيميفك , الوطني أو مباشر فممكن تواجه صعوبة بالشراء و البيع ببعض الاسهم و عمولتهم بالتدوال مبالغ فيها ممكن تدفع 100-200$ دولار عمولة لعملية بيع أو شراء هذا غير طبعا الخسارة في تحويل العملة للدولار.

ان شاء الله يكون الجواب وافي و إذا عندك أي سؤال ثاني فحياك الله اخوي اي وقت.

 

[AMR]

اخوي ابو حمدان

ابيك تعرف انك تتداول في شركه مفلسه لن تدوم اكثر من سنه واحد و تختفي و هذه ليست شركه و ليس استثمار

و هذه لها سوق مختلف ليس في البورصه الامريكيه

اللي بيك اتعرفه شي واحد فقط

انك تلعب روليت تماما بل و الله اخطر بكثير من الروليت

لا تقول لاحد انك تتداول بالبورصه الامريكيه ( فانت تكذب اذا قلت هذا الكلام لان هذا ليس بالبورصه الامريكيه )

و مع الاسف الكثير من الاخوان يعتقدون بانهم يتداولون في البورصه الامريكيه و ينقلوا من غير علم


اذا كان عندك 50,000 دولار بعد سنه يصبحون 5000 دولار و تقول خسرت بالبورصه الامريكيه

و انت لم تشتري سهم واحد بالبورصه الامريكيه

و اخطر مكان يضع الشخص فلوسه في هذا المكان تحديدا

انا اشتري اسهم بي 100,000 دولار و انساهم و مرتاح

بس ما اقدر اشتري باكثر من 100 دولار في اسهمك لا واخاف تروح ال 100 دولار

يا ليت توصل المعلومه

و موقعك فاشل بكل المقاييس

شكرا