وجهة نظري في مدينة صباح الاحمد

[Hanged Man]

انا بصراحه لو يعطوني قصر جاهز بمدينة صباح الاحمد ما اسكن فيها لجميع الاسباب اللي ذكروها الاخوان البعد ,مافيه خدمات ,تلوث ,غير الجو اللي ما راح يصفى الا كم يوم بالسنه

كفاية الامراض اللي احنا فيها!!!!!!!!! ابي اروح طبيب خاص لان العلاج بالحكومه خرطي وين اروح؟؟؟؟

اعتقد كل ما بغيت مراجعة طبيب لي ولا لعيالي ولا شيبانا راح يكون سفر

بعض الامور ضرورية قبل البيت والمساحه اللي تركض فيها الخيل

شنو بتنفعنا اذا كل يوم بنروح الدوامات سافرنا ولا نبي سوق ولا مراجعه ولا تقولون ما يحتاج مراجعات لاني بالاسبوع مره على الاقل بروح مراجعات للوزاره

واللي دوامه بعيد بالجهراء ولا بالديره شنو يسوي؟؟؟؟

والله احنا بالجهرا وكل ما بغينا نداوم ولا نراجع تضايقنا من المشاوير والزحمه مع ان الجهرا الحين متوفر فيها اشياء كثيره بس ما تغنينا عن وظايفنا واشغالنا بالديره ومراجعات الاطباء ولا تمشيات على البحر والمطاعم >>>>>> مطاعم الجهرا صففففففففففففففففر ما تسوى تحط فلوسك

على فكره الجهرا سنين وسنين يالله وصلت هالمستوى فما بالك بعريفجان؟؟؟؟
ومنو قالك ان اي شي برى الديره تهتم فيه الحكومه >>>>>> ويييييييييييييه بدون ومزدوجين

هذي نظرة اهل الديره اعذروني سمعتها كثير وشوفوا الجهرا اكبر دليل ما تقول تابعه للكويت خراب بخراب لو تدش المناطق الداخلية تحس انك بديرة العز والكشخه حتى الشوارع والارصفه شي غير

بعدين فيه مناطق كثيره ومساحات كبيره مثل خيطان والجليب وحولي والسالميه ساكنينها الوافدين >>>>>>>> يعني هم اللي ما شاء الله كشخه بوسط الديره قريب من الخدمات؟؟؟؟

المفروض يحطون لهم مناطق برى يسكنون فيها وهالعماير تتحول بيوت وتتوزع على الكويتيين ومو لازم 400 متر تصير 300 عادي المهم بالديره عند البحر والاسواق والمناطق الترفيهيه بصراحه ديرتنا صارت للاجانب هم المستانسين واحنا بالصحرا والجواخير
وفيه عندكم الشويخ والري ليش ما يشيلون الصناعيه والمحلات ويقطونهم ورى السابع ويوزعونها بيوت على الكويتيين

وغيره وغيره وغيره تعبنا من الكلام ولا فيه احد يسمع

ابن ادم لو تعطيه الجنه قال ابي جنة الفردوس الأعلى

الحمد لله على العافيه

 

[كويتي2]

ابن ادم لو تعطيه الجنه قال ابي جنة الفردوس الأعلى

الحمد لله على العافيه

كلامك 100 %

هذا هو الكلام الصح واللي عجبني من كل المشاركات

 

[شذى العطور]

اكيد نبي اكثر من الفردوس الاعلى

ابن ادم لو تعطيه الجنه قال ابي جنة الفردوس الأعلى

الحمد لله على العافيه

اخوي الانسان لازم يكون طموح واقصد بالحلال مو الحرام

انا مسلم والحمد لله يعني راح ادخل الجنة 000لكن هل هذا يوقف طموحي وطمعي بشي اكبر؟؟؟؟

انا ابي اعلى واعلى 00ولو كانت بس الجنة طموحي ما صليت وصمت وتصدقت ودعيت ربي بالفردوس الاعلى ولو فيه اعلى هم ابيه
الحمد لله تركنا متع الدنيا والمنكرات والحرام عشان رضا ربي والجنه ما تبيني اذا ربي دخلني الجنة ان يكون لي طموح بالفردوس الاعلى؟؟ ولا ما شفت ناس صج تركت اشياء كثيره لرضا ربها وهم مسلمين مصلين لكن عندهم طموح بالفردوس الاعلى ومنزلة مع منزلة الرسول عليه الصلاة والسلام

احنا كويتيين والحمد لله عايشين بخير ونعمه ما ننكر هالشي وغيرنا مو لاقي بيت يضفه مع عياله لكن هذا ما يمنع اني اتكلم واطالب من ديرتي شي غيري محصله ويلعب فيه0000 وما طلبت حرام طلبت شي حلال اذا حصل الحمد لله واذا ما حصل هم الحمد لله

اهم شي ما نصير صم بكم ما نتكلم ولانطالب لان لنا حقوق ما حصلناها وواجب نطالب فيها مثلنا مثل اللي بالديره مناطق نظيفه والخدمات على كيف كيفك

حتى الطبيب عندهم احسن الدكاتره وحنا يجيبون لنا اجانب شهادات جيد يعني بديرته ما وظفوه

احنا صرنا مثل الولد اللي يالله محصل لقمته وابوه مليونير يلعب بالفلوس لعب وساكن بقصر وقاط عياله في بيت حكومي

انت لو ابوك جذي ترضى ؟؟؟؟؟ اكيد بتموت قهر بس هم ما راح تذبح ابوك ولا تسرقه بس بتتكلم
خلنا نتكلم عشان نفش خلقنا