دورة المؤشرنت للتحليل الفني
50 دينار كويتي
اهو شاط عمره بحكم انه عضو مجلس امه والناس تطلب منه هالشي ...
بس انت ليش مشتط
انا اقول خذ لك زقاره وبرّد اعصابك وفوقها شاي منعنع وانسى الموضوع وخلهم يتطاحنون ... اذا بيطيحونهم بيطيحونهم شئت ام ابيت واذا ماهم مطيحينهم ماراح يطيحونهم شاء او ابى بو رميه ...
اعصابك يابو عتيج الله يهداك يه ! ...
شوف انا عندي لك حل يرضيك اعتقد والحل كالآتي :
1. يتم جمع المديونيات على المواطنين ذوي الدخل المحدود فقط يعني اللي مالهم دخل غير الراتب بس ( مو اهل الكروش اللي ياخذون قروض بالملايين عشان يمولون مشاريعهم ) .
2. تشتري الدوله هالمديونيات من البنوك . ( يعني تدفع المديونيات للبنوك ويصيرون اصحاب القروض غير مطلوبين للبنك ).
3. تعيد الدوله جدولة القروض (كل واحد ومديونيته).
4. الأشخاص المقترضين الحين يكونون مطلوبين للدوله .
5. يتم تسديد القرض للدوله بأقساط مريحه ولا يتخللها زيادة فوائد وخلافه .
مثال :
شخص شاري بيت قيمته 150.000 دك (70.000 بنك التسليف و 80.000 قرض من بنك ... وشخص ثاني شاري سياره قيمتها 10.000 دك ( قرض من بنك) ...
الطريقه :
يتم وضع شرط ان اللي مديونيته تتجاوز ال100.000 دك يكون قسطه مو اقل من 200 دك ولا اكثر من 300 شهريا واللي اقل من 100.000 مو اقل من 100 ولا اكثر من 200 ...
طريقه ثانيه :
كل شخص صار مديون للحكومه الحكومه تاخذ 15% او 20% من راتبه ليما يتسكّر القرض وممنوع انه ياخذ أي قرض خلال هذي الفتره ( اللي اهي فترة التسديد ) .
ان شاء الله تكون الفكره وصلت ... بس عشان تقدر تنام وتطمئن انه ما تطيح القروض
الاخ bu3teeg72 يقول انه حاط راسه براس ابو رميــه !!
والاخ الناقد يقول انه مرتشي والراشي ابورميه !!
يابو عتيج هذا مو اسلوب بالرد , انك تقول انا حاط راسي براس ابورميه اذا المساله فيها تصفيات شخصيه هذا موضوع ثاني وشخصيتك من خلال ردك تدل على انك ترى الامور من زاويه ضيقه جدا احنا نتكلم عن اسر وعن عائلات ونسب كبيره داخل المجتمع الكويتي تتعدى علاقتك السيئه بالنائب الفلاني او العلاني !!
والكلام موصول للاخ الناقد ..
احنا شكو وابورميه شكو بالموضوع !! ابورميه صاحب مبادره ومتبني الموضوع وله الشكر فيما هو ظاهر لنا احنا مهتمين في الموضع نفسه
احنا نتكلم عن اسقاط قروض مالنا شغل ببورميه وغيره !!
الرزق بالسماء والحسد بالارض ...
بالتوفيق للجميــع
اتقي الله يا النااااااااقد اتقي الله
الرجال فلوس ما عنده عشان يشتري اصوات
شراء الاصوات يبيله ملايين
وهالريال لو عنده نص مليون دينار جان صار وضعه غير عن جذي
فلو سمحت انك تتقي الله وتستغفر ربك بما تقول من كذب وافتراء على هذا الرجل
وبالنسبه لاسقاط القروض انا مع اسقاط القروض لكن الحين بهون وبخلي اسقاط القروض عن العراق في اولوياتنا لان العراقيين دشو الكويت وذبحو واسرو و و و و و الخ
ويا ريت من الاخوان المعارضين لاسقاط القروض ان يطالبون الكويت باسقاط القروض عن العراق ويتذكرون عيالنا اللي ارجعو عزيزوو وجمجمه رحمة الله عليهم
يتذكرون دمعت ابو مبارك الله يرحمه بالغزو
يتذكرون الدوري لمن قال يا قرووووووووووود
يا الله تذكرو العراق وقولو ما نبي تسقط القروض عن الكويتيين
تطمن عزيزي أنا أعصابي منقعة بثلاجة ولما قلت حاط راسي براس بورمية قصدتها بطريقة تهكمية.. و أنا مشتط لآني كويتي... ثانيا لله الحمد أنا ما أدخن... وثالثا اقتراحك فعلا عملي و خطوة بالطريق الصحيح (حق اللي خذوا قروض لحاجة حقيقية مو للكشخة) بهذي جنه ما ودك ربعك وقرايبك وجماعتك واخوانك الكويتيين كلهم يرتاحون من اخطاء صارت لهم بسبب قلة الوعي الإستهلاكي وسبب آخر وهو الأهم ان زيادة الفوائد والتسهيلات من البنوك كأن البنك المركزي ما يدري شالطبخه ؟؟؟ ولا كأنه كانو ممكن يسوون ربط بموضوع الأقساط بين الشركات ( مثال : في السابق مثلا رحت للتمويل وعطوك مشتريات ب 50% من راتبك تطلع منهم وتروح للتسهيلات هم يعطونك 50% من راتبك ؟؟؟ ... طبعا ما يسوي هالحركه اللا سفيه لكن كانت صايره وانا اعرف ناس تزايدت عليهم المديونيات ليما وصلت مستويات لا تحمد عقباها .. منو السبب برايك ؟ برايي الشخصي اول شي المستهلك الغير واعي وثاني شي عدم تطبيق القوانين وهي موجوده لكن تلاعب وضحك على الذقون لذوي الإحتياجات الضروريه ومنها بيت او سياره تشيله اهو وعياله ...
اخي الحبيب : احب لأخيك ما تحب لنفسك .. والله ثم والله انك بنعمه اذا ماعليك اقساط واحمد ربّك واشكره عليها. وأصابعك مو سوا في اخطاء طاح فيها الآباء والأجداد وربي انه احنا الأجيال الحين ماكلينها وعلينا ديون منها ولا حدنا للأقساط اللا هالأخطاء الي مالنا ذنب فيها ...
يعني ما اعتقد انك تكره الإقتراح اللي كتبته فوق يشمل الكل والجميع سواء للكشخه على قولتك او للحاجه الضروريه ... على الأقل اذا فيه تخفيف عن المسلمين ما افتكر يزعل من هالشي اللا الحاسد وان شاء الله انك مو من الحسّاد ...
اخي الكريم : لا ضرر ولا ضرار ... بهالأقتراح ما انضرّيت انت ولا طاحت عنّا الديون بالعكس ينعش الإقتصاد هالشي ويزيد من الشراء لأن الأغلبيه العظمى ارتاحت من اقساط اكثر من 50% من راتبها ...
بشرط ما يطلعلك بورمية ثاني و تعالوا اسقطوا القروض عقب ما تتجدول!
الموضوع الأهم.. إعادة صياغة ثقافة وسياسة الإقتراض عند الناس من قبل الحكومة.
ما ذنب الذي ليس عليه دينا وليش الكويتيين وصلوا مواصيل حب المال والجاه
أنا ضد حتى لو أسقطو ديون العراق
وتقبّل فائق احترامي وتقديري
جزاك الله خير..وقف ديون العراق مطلب الكل بلا استثناء ومع الأسف ما شفنا بورمية يشط عمره و يطبع بوسترات تطالب بمنع اسقاط الديون على العراق و بوقف المساعدات الخارجية مثل ما سوا حق القروض! ماني عارف ليش بصراحة! إذا إنت تعرف قولي.
يا الحبيب من قالك اسقاط ديون العراق مطلب الكل ؟؟
يمكن مطلب دولي والدول مالها دعوه إذا اسقطنا ديون العراق ان لم نسقطها فهذا يرجع لنا ولا احد يقدر يجبرنا عليها
وبالنسبه للمساعدات الخارجيه فهذا شي طبيعي وطيب من الكويت اذا قدمت مساعدات للدول الفقيره اثناء احتياجهم للمساعدات مثل الكوارث الطبيعيه والحروب وغيرها وتكون معقوله وما يوصلونها مليارات !!!
ثانيا رجاء لا تجي من آخر النقاش وتقول محد من المعارضين لاسقاط القروض تكلم عن ديون العراق! ارجع حق كل المشاركات في هالموضوع و غيره قبل ما تحكم.
اخوي العزيز انا قلت وجهة نظري وانت بمنتدى قاعد تناقش بامكانك الرد وعدم الرد ولكن ما بإستطاعتك اجباري على قراءة جميع المواضيع ولا انك تأمرني اني ما اجي آخر النقاش واطرح نقطه منتهين منها او غير منتهين
على لسان احد المسؤولين التابعين للحزب الحكومي
يقول:
من الاستحاله اسقاط القروض, ولكن هناك مقترح حكومي
بان يشتري بنك التسليف المديونيات الاصليه من البنوك
وبالتالي تسقط الفوائد , ويسدد المواطن باقي المديونيه
لبنك التسليف, بالتقسيط الميسر...
السلام عليكم ورحمة الله وبركاته,,,,
والله يا اخوان اني تابعت هالموضوع من اول ما انكتب وما حبيت اعلق عليه لاني شايف الموضوع من جهه اني اتمنى اصقاطها والي يميل للموضوع مايكون منصف فيه, لكن اود ان اعطيكم نظره للموضوع من جهة اقتصادية ونظرة مستقبلية.
اولاً: اسقاط القروض سوف يعيد تدوير المال في البلد وهذه نظرية اقتصادية تلجأ اليها الدول من اجل التنمية او اذا كان هناك كساد وهو من توصيات صندوق النقد الدولي, فسوف تنتعش الاسواق والمستفيد الدولة اكيد لان المال ماراح يتسرب للخارج(دهننا في مكبتنا).(مثال الكويت واغلب دول العالم فترة الستينات من تثمين اراضي وغيرها)
ثانياً: الدولة ارتفعت بها مصاريف التشغيل والايجار والنقل والمواد الاوليه والكمالية والمشتقات البترولية...الخ خلال عامين 60% او اكثر, فالمواطن الي كان يقدر يعيش على نصف الراتب الحين مايقدر يعيش على الراتب كله وهو ماعنده اقساط .(مثال دبي)
ثالثاً: الدولة عندها وفره مالية اذا وجهت بالكامل الى البنيه التحتيه واقامت مشاريع فسوف تقع بمشكلة من الشخص المستفيد؟ اكيد الغني يزيد غنى من الاستثمار المرتفع جداً والفقير يزيد فقر بسبب زيادة اعباء المعيشة وارتفاع المواد اكثر واكثر في ظل ثبات الدخل على ماهو عليه.(مثال مصر بعد اتفاقية كام ديفيد).
رابعاً: من اهم اهداف التنمية هي الحفاظ على حقوق المواطن من تغلبات المستقبل وتامين المستقبل له وهو ما تغافلت عنه الحكومه ممثله بالبنك المركزي فعندما سمحت للبنوك بفتح سقف الاقتراض بضمان الراتب الى حدود غير معقوله تتجاوز 20 سنة وهي كما هو معروف اذا زاد القرض عن 5 سنوات يعتبر القرض تجاري يجب ان يكون مصحوب بضمان اصول او عقار او سندات ..الخ.(توصيات من صندوق التنمية الدولي).
خامساً: النظره العامة لموضوع الاصلاح الاقتصادي وكما هو معروف يعتمد على اشراك الموطن في التنميه والادخار فيجب على الدوله ان تصلح من السلوك الاستهلاكي وان تضع خطة مستقبليه لكي يتجنب المواطن الغرق في الاتمان من غير وعي ويوفر بعض المال للمستتقبل.(صنايق الادخار).
وفي الختام قال الله تعالى: {انما المؤمنون اخوة} ((الحجرات: 10))، وقال تعالى: {اذلة على المؤمنين اعزة على الكافرين} ((المائدة: 54))، وقال تعالى: {محمد رسول الله والذين معه اشداء على الكفار رحماء بينهم} ((الفتح: 29)).
وعن انس رضي الله عنه ان النبي صلى الله عليه وسلم قال: "لا تباغضوا، ولا تحاسدوا ولا تدابروا، ولا تقاطعوا، وكونوا عباد الله اخوانًا، ولا يحل لمسلم ان يهجر اخاه فوق ثلاث" ((متفق عليه)).
والسلام عليكم واعذروني على الاطاله.
دورة المؤشرنت للتحليل الفني
50 دينار كويتي