الله يبشرك بالجنه يا خالد العليان
والله اني البارحه في الديوانيه ساهي وافكر متى اشتري لي ارض والا بيت
وانا ادري عن قانون 8 و 9 2008 بس كنت خايف انه ما راح يتطبق
وعلى فكره انعرضت علي ارض بأبوفطيره ب 105 ورفضت اشتريها لان الدلال دق علي وكان يحاول يقنعني بطريقة كشيت منها
عموما راح نصمد لين يجيب الله مطر
هلا بالحبيب....endless
ياخوك انا وبعض الاخوان اللي قاعد نسويه..نجيب المعلومات والحقائق ونعرضها على رواد المنتدى الكرام...والقرار النهائي بيدكم انتم فقط لاغير...
ونطرح وجهة نظرنا الخاصة..و من وجهة نظري الخاصة...
هناك خياران امامي:
الخيار الاول: انتظر طلبي الاسكاني وهنا استفيد من امرين اساسيين الاول الدولة تعطيني ارض قيمتها لاتقل عن 100 الف بالاسعار المتداولة حاليا وتعطيني قرض بقيمة 70 الف بدون فوائد وباقساط مريحة...بمعنى ان الدولة تعطيني 170 الف...منهم 100الف وهي قيمة الارض بدون مقابل يعني هدية وبالمجان..هذا اذا ماطلعلي بالقرعة بيت زاوية وارتداد...تكون هدية الدولة دسمة...
الخيار الثاني:اقوم بشراء ارض بقيمة 100الف من حسابي الخاص..واقول للدولة مشكورة ارضج مابيها و100 الف اللي تبين تهديني اياها مابيها...واصفي بس على ال70 الف قيمة القرض..
بجد الله سبحانه وتعالى عرفناه بالعقل..والعقل بالموضوع هذا واضح وصريح..الدولة قاعدة تعطيني ارض ببلاش...ارفس النعمة واروح ادفع اللي قدامي ودوني واقساط مالها اول ولا اخر عشان ارض الدولة موفرتها لي بدون ولا فلس...
اذا الاراضي سعرها معقول..ماتتجاوز50 الف مثلا...ممكن الواحد يقول مبلغ ويتعوض...بس بجد صعبة تعوض ال100الف...هذا المبلغ قاعد نوفره من تعب وسهر وشغل ليل نهار...
وخلنا نحسبها لواحد راتبه الف دينار...المصاريف اليومية والماجلة الشهرية وايجار الشقة..اذا كنت بطل وتعرف تدير الحسابات صح..تقدر توفر 300دينار بالشهر..اضربهم بالسنة...هذا يعني انك تقدر توفر بالسنة 3600دينار..وبالعشر سنوات تقدر تجمع 36الف دينار..وبعشرين سنة تجمع 72 الف..وبثلاثين سنة تجمع تقريبا 100الف...
يعني الحين...تجميع 30 سنة...بتعب وسهر وكراف...اروح احرقهم بيوم وليلة واعطيهم للتجار او بيت التمويل...ليش...عقلي وين...وبالمقابل...الدولة تقولك ياحبيبي ياكويتي يامواطن ياعزيز...لاتعب حالك..وتضيع حلالك..انا اعطيك الارض..واعطيك مبلغ عشان تبني فيه وقسطك 100دينار بالشهر بدون فوائد...
ياجماعة...مسمى (الكاش عزيز) نظرية من ابتداع التجار...اذا التجار عندهم الكاش عزيز..يعني انا يالمواطن الفقير عندي الكاش مو عزيز..الا عزيز وعزيز وعزيز..